လါအီးကထိဘၢၣ် ၉ သီ, ၂၀၂၅ နံၣ်, ခ့ၣ်အဲးစံၣ်
စကဲကီၢ်ခီဒိၣ် ခၠီအူကီၢ်ဆၣ်(ချောင်းဦး)အပူၤ အပူၤကွံၥ်ဖဲကီၢ်ပယီၤ(သီတင်းကျွတ်)လါပှဲၤအနံၤန့ၣ် သုးမီၤစိရိၤအ(လ့ၤထံ)ကဘီယူၤ လဲၤတ့ၢ်လီၤဝဲမ့ၣ်ပိၢ်လၢ ဘိၤတိၤ(ဘုံတို)သဝီပူၤ တီၤဖုၣ်ကၠိကရၢၢ်ပူၤအဃိ ကမျၢၢ်သံ(၁၉)ဂၤ, ဘၣ်ဒိ(၄၀)ဂၤ အဂ့ၢ်န့ၣ် NUG ပဒိၣ်စုတီၤ ဖီလၥ် Ministry of Human Rights ထုးထီၣ်ပၥ်ဖျါဝဲဖဲမဟါလါအီးကထိဘၢၣ် ၈ သီ အနံၤန့ၣ်လီၤ.
ဖဲလါအီးကထိဘၢၣ် ၆ သီ ဟါခီ ၇း၃၀ ဃၣ်ဃၣ်အဆၢကတီၢ်န့ၣ် သုးမီၤစိရိၤကဘီယူၤ(Paramotor)လ့ၤထံတဘ့ၣ် လၢအိၣ် ဟဲဝဲလၢမုၢ်နုၥ်ကလံၤစိးကီၢ်ခီ သုးဝဲၤလီၢ်ခိၣ်သ့ၣ်တၢ်လီၢ်အံၤ ဟဲကွံၥ်လီၤဝဲ(၁၂၀ မမ) မ့ၣ်ပိၢ် ၂ ဖျၢၣ် ဒီး အတၢ်လဲၤတ့ၢ်လီၤ မ့ၣ်ပိၢ် အံၤဘၣ်လၢ(သီတင်းကျွတ်)လါပှဲၤ ကမျၢၢ်ဒီးဖိဒံဖိသၣ်သ့ၣ်တဖၣ်မၤဝဲတၢ်ဒွဲၣ်သကိးဝဲမ့ၣ်အူအဃိ တၢ်သံဘၣ်ဒိဘၣ်ထံးဘၣ်ကဲထီၣ် သးအါဝဲဒ်အံၤလီၤအဂ့ၢ်န့ၣ် စံးဝဲန့ၣ်လီၤ.
လၢန့ၣ်အမဲၥ်ညါတၢ်လဲၤတ့ၢ်လီၤမ့ၣ်ပိၢ်ဖဲန့ၣ်ဝံၤပှၤလၢအဘၣ်ဒိဘၣ်ထံးသ့ၣ်တဖၣ်ဖဲတၢ်ကူစါယါဘျါအဝဲသ့ၣ်အခါ တကတီၢ်ဃီ ကဘၣ်ဖဲ ၁၁း၀၀ နၣ်ရံၣ် အဆၢကတီၢ်န့ၣ် (Paramotor)ကဘီယူၤလ့ၤထံ ၂ ဘ့ၣ် ဟဲတ့ၢ်လီၤကဒီးဝဲ(၁၂၀ မမ)မ့ၣ်ပိၢ် ၂ ဖျၢၣ် လီၤတဲၥ်ဝဲလိၤလိၤ လၢကၠိတၢ်သူၣ်ထီၣ်ဖီခိၣ်အဃိ ကၠိတၢ်သူၣ်ထီၣ်(၂)ဖျၢၣ်, သိလ့ၣ်(၁)ခိၣ်, သိလ့ၣ်ယီၢ်(စဲးကၢး) ၄ ခိၣ် ဟးဂီၤဝဲ အဂ့ၢ်န့ၣ် သ့ၣ်ညါဘၣ်န့ၣ်လီၤ.
တၢ်လဲၤတ့ၢ်လီၤမ့ၣ်ပိၢ်ဘျီဝဲအံၤကမျၢၢ်သံ(၁၉)ဂၤအကျါပၣ်ဃုၥ်ဝဲဖိသၣ်(၁၈)နံၣ်ဆူဖီလၥ်(၃)ဂၤဒီး ဘၣ်ဒိ(၄၀)ဂၤအကျါပၣ်ဃုၥ်ဝဲ ဖိသၣ်(၁၈)နံၣ်ဆူဖီလၥ် ၂၀ ဂၤအသိး ကမျၢၢ်လၢအသံအဘၣ်ဒိသ့ၣ်တဖၣ်အံၤအိၣ်ဝဲဒၣ်လၢ ခၠီအူကီၢ်ဆၣ်(ချောင်းဦး) ဒီး မိၤယွၤကီၢ်ဆၣ်(မုံရွာ) ဒူသဝီသ့ၣ်တဖၣ်အပူၤအဂ့ၢ်န့ၣ် လံၥ်တၢ်ပၥ်ဖျါအပူၤပၥ်ဖျါဝဲန့ၣ်လီၤ.
တကးဒံးဘၣ်တၢ်လဲၤတ့ၢ်လီၤမ့ၣ်ပိၢ်ဘျီအံၤခီဖျိပှၤဘၣ်ဒိဘၣ်ထံးနးနးကျံၤကျံၤအိၣ်အါမးအဃိ တုၤဖဲမဟါလါအီးကထိဘၢၣ် ၈ သီ ဟါခီ ဒ်(Ministry of Human Rights)ထုးထီၣ်ပၥ်ဖျါဝဲလီၢ်ခံကတၢၢ်စရီအသိးန့ၣ် တၢ်ကဲထီၣ်သးသီသီအခါ ကမျၢၢ်သံအိၣ် (၁၉)ဂၤဘၣ်ဆၣ်ခဲအံၤကမျၢၢ်သံအနီၣ်ဂံၢ်အိၣ်ထီၣ်တုၤလၢ(၂၂)ဂၤလံအသိး အပူၤကွံၥ်ကမျၢၢ်ဘၣ်ဒိ(၄၀)ဂၤဘၣ်ဆၣ်ခဲအံၤ ဘၣ်ဒိ ဘၣ်ထံးအနီၣ်ဂံၢ်အိၣ်ထီၣ်တုၤလၢ(၅၅)ဂၤလံအဂ့ၢ်န့ၣ် စံးဝဲန့ၣ်လီၤ.
ဒ်န့ၣ်အသိးတကီၢ်ခါခဲအံၤခီဖျိတၢ်လဲၤတ့ၢ်လီၤမ့ၣ်ပိၢ် တၢ်သံတၢ်ဘၣ်ဒိဘၣ်ထံးအါအါဂီၢ်ဂီၢ်ကဲထီၣ်ဒ်အံၤအဖီခိၣ် လီၢ်ကဝီၤကမျၢၢ်လၢ အိၣ်ဖဲတၢ်ခိၣ်တၢ်ဃၢၤဝဲန့ၣ်သ့ၣ်တဖၣ်စ့ၢ်ကီးဃ့ၢ်ထီၣ်ဟးပလဲၥ်သးအိၣ်ဝဲဒၣ်န့ၣ်လီၤ.
သုးမီၤစိရိၤအံၤတချုး(သီတင်းကျွတ်)လါပှဲၤဒီးလါပှဲၤအနံၤ,လါပှဲၤဝံၤလီၢ်ခံအံၤ သူဝဲကဘီယူၤဟးတ့ၢ်လီၤဝဲမ့ၣ်ပိၢ်လၢ စကဲကီၢ်ခီဒိၣ် ဟီၣ်ကဝီၤ, ခၠီကီၢ်စဲၣ်, ခ့ၣ်အဲၣ်ယူၣ်တၢ်ပၢဟီၣ်ကဝီၤ,မ့ကွ့ကီၢ်ခီ ဟီၣ်ကဝီၤ ဃုၥ်ဒီးဟီၣ်ကဝီၤတၢ်လီၢ်လၢအဂၤ တဖၣ်အဃိ တၢ်သံတၢ်ဘၣ်ဒိဘၣ်ထံး,တၢ်ဟးဂူၥ်ဟးဂီၤကဲထီၣ်အိၣ်ဝဲအါမးအဂ့ၢ်န့ၣ် သ့ၣ်ညါဘၣ်န့ၣ်လီၤ.
