လါယနူၤအါရံၤ ၂၀ သီ, ၂၀၂၆ နံၣ်, ခ့ၣ်အဲးစံၣ်
လၢတနီသရံၣ်ကီၢ်ခီဒိၣ် ဘျံးဒဝဲၢ်ကီၢ်ရ့ၣ်(သုးက့ ၄) ကၠိဆူၣ်ဟီၣ်ကဝီၤအပူၤ ပယီၤသုးဒီး(ဗျူစောထီး)သ့ၣ်တဖၣ်အံၤပၥ်ဖှိၣ်ထီၣ်သး နုၥ်လီၤဝဲဒၣ်လၢ ဘၤဒနဲ(ဘဒ္ဒနဲ)ကရူၢ်ဒူသဝီပူၤအခါ ဒွဲၣ်အူအီၣ်ဝဲသဝီ ၄ ဖျၢၣ်အဂ့ၢ်န့ၣ် (PDF) ထုးထီၣ်ပၥ်ဖျါဝဲ ဖဲလါယနူၤအါရံၤ ၁၈ သီ အနံၤန့ၣ်လီၤ.
စးထီၣ်ဖဲအပူၤကွံၥ်(၂၀၂၅)နံၣ်လၢၥ် လါဒံၣ်စ့ဘၢၣ် ၃၁ သီအခါန့ၣ် ပယီၤသုးဒီး(ဗျူစောထီး)သုးပၥ်ဖှိၣ်သ့ၣ်တဖၣ်အံၤ လၢသုးချံကဘီ (၃)ဘ့ၣ် ဃုၥ်ဒီးသုးဂံၢ်ဘါအါအါဂီၢ်ဂီၢ် ဟဲထီၣ်ပိၥ်ဝဲလၢ(မန်းကြီးမြစ်)မါကၠံကျိလိၤလိၤဝံၤ တၢ်ဒုးစးထီၣ်ကဲထီၣ်ဝဲဒီးဟီၣ်ကဝီၤ (PDF ) အဘၢၣ်စၢၤ န့ၣ်လီၤ.
လၢတၢ်ဒုးကဲထီၣ်ဘျီဝဲန့ၣ်အပူၤ ပယီၤသုးအံၤသူဝဲကျိဖးဒိၣ်,(Bofor Gun)ကျိအမဲၥ်ညါသူဃုၥ်စ့ၢ်ကီးဝဲဒြိဒိၣ်ဒိၣ်မုၢ်ဒိၣ်ဒီး တကးဒံးဘၣ် ဖဲတလါအံၤလါယနူၤအါရံၤ ၃ သီအနံၤန့ၣ်စ့ၢ်ကီး မၤအါထီၣ်ဝဲသုးဂံၢ်ဘါလၢကဘီ(၅)ဘ့ၣ်ဟဲထီၣ်ဝဲအဂ့ၢ်န့ၣ် လံၥ်တၢ်ပၥ်ဖျါအပူၤ ပၥ်ဖျါဝဲ န့ၣ်လီၤ.
“ဖဲလါယနူၤအါရံၤ ၁၁ သီအနံၤန့ၣ် ဒုၣ်ဒါဟဲခးပသုးကလၢၤတၢ်လီၢ်ဒီးဒြိကအိၣ်လၢ ၃ ဘျီညါ. ပသုးကလၢၤတၢ်လီၢ်မ့ၣ်အူအီၣ်ဝဲ အသိး ပပှၤဘၣ်လုၢ်ထီၣ်ကွံၥ်အသးသမူလၢထံကီၢ်ဒီးပှၤကလုၥ်အဂီၢ် ၂ ဂၤစ့ၢ်ကီး”အဂ့ၢ်န့ၣ် စံးဝဲလၢလံၥ်တၢ်ပၥ်ဖျါအပူၤန့ၣ်လီၤ.
လၢန့ၣ်အမဲၥ်ညါတနံၤဃီဖဲလါယနူၤအါရံၤ ၁၁ သီအံၤ ပယီၤသုးဒီး(ဗျူစောထီး)တဖၣ်အံၤ နုၥ်လီၤဝဲလၢ(ဘဒ္ဒနဲ)ကရူၢ် ကၠီၣ်တါငဲၤသဝီ (ကျောက်တန်းငယ်), အီၣ်ကၠၣ်တါ(အောက်ကြတ်တန်း), မါကၠံ(မန်းကြီး)သဝီ ဒီး ဝိၤသဲၣ်(ဝန်သိုက်) သဝီသ့ၣ်တဖၣ်အံၤအပူၤဝံၤ ဒွဲၣ်အူ အီၣ်ကွံၥ်ဝဲသဝီတဖၣ်အံၤအပူၤဟံၣ်တၢ်သူၣ်ထီၣ်ခဲလၢၥ်တကးဒံးဘၣ် က့ၤစိၥ်ဃုၥ်စ့ၢ်ကီးဝဲပှၤတၢ်ဖိတၢ်လံၤအဂ့ၢ်န့ၣ် သ့ၣ်ညါဘၣ် လၢလံၥ်တၢ်ပၥ်ဖျါပူၤအသိးန့ၣ်လီၤ.
ဖဲလၢတၢ် ၁၂ သီ တၢ်ဒုးကဲထီၣ်အတီၢ်ပူၤအံၤ ပယီၤသုးဒီး(ဗျူစောထီး)တကပၤသံဘၣ်ဒိထံးတစှၤန့ၢ်အဂၤ(၁၀)ဒီး မ့မ့ၢ်လၢ(PDF)တကပၤ ခီန့ၣ် ဘၣ်လုၢ်ထီၣ်ကွံၥ်အသးသမူလၢထံကီၢ်ဒီးပှၤကလုၥ်အဂီၢ်(၂)ဂၤအဂ့ၢ်န့ၣ် စံးဝဲန့ၣ်လီၤ.
