လါဖ့ၤဘြူၤအါရံၤ (၆)သီ, ၂၀၂၅နံၣ်, ခ့ၣ်အဲးစံၣ်,
ကီၢ်ကၠီၣ်တဲၣ်ကီၢ်ပယီၤကီၢ်ဆၢ,ရၤမတံဝ့ၢ်ကၠီၣ်တဲၣ်အတၢ်ဟ့ၣ်လီၤဝဲလီမ့ၣ်အူဒီးသိသ့ၣ်တဖၣ်အံၤ,ကၠီၣ်တဲၣ်ပှၤဘၣ်မူဘၣ်ဒါတဖၣ်ပတုၥ်ကွံၥ်ဝဲအဃိ,မဟါလါဖ့ၤဘြူၤအါရံၤ(၅)သီအနံၤအပူၤဂီၤခီဆၢကတီၢ်,လီၢ်ကဝီၤဖိတဖၣ်ဘၣ်ယိၥ်ဝဲလၢသိတအိၣ်လၢၤဘၣ်အဃိ,ရၤမတံဝ့ၢ်ရ့ၣ်နီၣ်သိကျးတၢ်လီၢ်တဖၣ်အပူၤ,ကမျၢၢ်တဖၣ်လူၤပှ့ၤပၥ်ဝဲသိအါအါဂီၢ်ဂီၢ်အဂ့ၢ်,သ့ၣ်ညါဘၣ်န့ၣ်လီၤ.
ရၤမတံလီၢ်ကဝီၤဖိတဂၤစံးဝဲလၢ“စးထီၣ်လၢဂီၤခီတၢ်စးထီၣ်လဲၤပှ့ၤဝဲသိန့ၣ်လီၤ.သိလ့ၣ်ကစၢ်,ဆဲးကဲးကစၢ်တဖၣ်လဲၤပှ့ၤဝဲအါအဃိ,သိကျးတဖၣ်န့ၣ်ပှဲၤဝဲလီၤ.ကၠီၣ်တဲၣ်တကပၤပတုၥ်ကွံၥ်ဝဲမ့ၣ်အူန့ၣ်တဘၣ်ဒိဘၣ်ထံးကမျၢၢ်ဘၣ်ဆၣ်,ပတုၥ်ကွံၥ်ဝဲသိဒုဘၣ်ဒိဝဲကမျၢၢ်သ့လီၤ”အဂ့ၢ်စံးဝဲဒၣ်န့ၣ်လီၤ.
ခီဖျိလၢတၢ်ပှ့ၤပၥ်ဝဲစဲးဖီကဟၣ်သိဒ်အံၤအဃိ,တကီၢ်ခါခဲအံၤ,တသဂၢၢ်ဘၣ်ဒံးဝဲသိတၢ်ဂ့ၢ်ကီဒံးဘၣ်ဘၣ်ဆၣ်,ကၠီၣ်တဲၣ်တကပၤမ့ပတုၥ်ကွံၥ်တၢ်ဟ့ၣ်ရ့ၣ်နီၣ်သိသပှၢ်ကတၢၢ်န့ၣ်,ရၤမတံဝ့ၢ်တဖျၢၣ်တကးဘၣ်ကီၢ်ပူၤရ့ၣ်နီၣ်သိအတၢ်ရၤလီၤသးကီခဲထီၣ်ဝဲသ့အဂ့ၢ်ပှၤလၢအဘူးဒီးစဲးဖီကဟၣ်တၢ်မၤလီၢ်တဂၤစံးဝဲဒၣ်န့ၣ်လီၤ.
အဝဲစံးဝဲလၢ“တၢ်လဲၤပှ့ၤပၥ်ဝဲသိလၢသိကျး,တၢ်ကဘၣ်ဆှၢသိလၢလၥ်မ့လၢၥ်လၢၥ်တခီန့ၣ်,သိလ့ၣ်လၢကဘၣ်လဲၤလၢဖၣ်အၣ်,မီၣ်လမၠဲၣ်,ဝ့ၢ်တကူၣ်,ကပတုၥ်ကွံၥ်အသးလီၤ.တၢ်တီသိအသိလ့ၣ်န့ၣ်လၢတိၤနီၢ်ဂံၢ်ခံတကပၤပံးလံ,တၢ်မ့ပံးကွံၥ်လၢတၢ်ဖီလၥ်()တၢ်ခိးတြဲၤဒုကီၢ်ပူၤသိတၢ်ဂ့ၢ်ကီအိၣ်ထီၣ်ဝဲသ့အဂ့ၢ်”စံးဝဲဒၣ်န့ၣ်လီၤ.
တကီၢ်ခါခဲအံၤ,ရၤမတံ,ရွံၣ်ကိၣ်ကိၤ,ဝီၢ်လ့ၤဒီးမဲထီသလ့လီၢ်ကဝီၤဖိတဖၣ်လူၤပှ့ၤပၥ်ဝဲရ့ၣ်နီၣ်သိလၢသိကျးတဖၣ်အပူၤအိၣ်ဝဲဒီးရၤလီၤဝဲအသးလၢစိၤရှၢၣ်မံးဒံးယၢၣ်ပူၤအိၣ်ဝဲဒၣ်န့ၣ်လီၤ.
ဒ်န့ၣ်အသိး,တနံၤအံၤလါယနူၤအါရံၤ(၆)သီဂီၤခီအနံၤအပူၤ,ရၤမတံဝ့ၢ်ပူၤသိလ့ၣ်လၢအိၣ်ဒီး(လဲၤစ့ၣ်)သ့ၣ်တဖၣ်စ့ၢ်ကီးရဲၣ်လီၤသးလဲၤနုၥ်လီၤပှ့ၤဝဲသိလၢကၠီၣ်တဲၣ်မဲၢ်ဆီးတၢ်ဆါသိကျးလီၢ်တဖၣ်အိၣ်ဝဲအဂ့ၢ်,ကၠီၣ်တဲၣ်စိၤရှၢၣ်မံးဒံးယၢၣ်တၢ်ကစီၣ်တနီၤပၥ်ဖျါစ့ၢ်ကီးဝဲဒၣ်န့ၣ်လီၤ.
