KIC News

လါမ့ၤ ၁၆ သီႇ ၂၀၂၂ နံၣ်ႇ ခ့ၣ်အဲးစံၣ် ခီဖျိဟီၣ်လာ်မ့ၣ်ပိၢ်ဒီးကျိဖးဒိၣ်ချံႇကဘီယူၤမ့ၣ်ပိၢ်ချံလၢအတပိၢ်ဖးထီၣ်ဒံးဘၣ်သ့ၣ်တဖၣ်အံၤအဃိ မၠၣ်၀တံၣ်ကီၢ်ဆၣ် လ့က့ၣ်ကိာ်ဟီၣ်က၀ီၤလီၢ်က၀ီၤၦၤမၤအီၣ်ခုးမၤအီၣ်သံၣ်ဖိတဖၣ် က့ၤဖံးအီၣ်မၤအီၣ်တၢ်တဘူၣ်၀ဲဒံးဘၣ်အဂ့ၢ်န့ၣ် လီၢ်က၀ီၤဖိတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ ၦၤမၤ၀ဲၤဖိတဂၤစံး၀ဲ“မူခိၣ်စူၤလံႇကဘၣ်သူၣ်လီၤဘုခ့ႇဘၣ်သူၣ်ထံပီၤအဆၢကတီၢ်ဘၣ်လံႉတၢ်ဒုးကဲထီၣ်ဒံးအဃိက့ၤမၤအီၣ်တၢ်တဘူၣ်ဘၣ်ႉပယီၤသုးကျိၤတဖၣ်ဟးဃာ်တၢ်လီၢ်ဒီဒူၣ်ညါလီၤႉအ၀ဲသ့ၣ်ဒိးလီၤဃာ်မ့ၣ်ပိၢ်နါက့အိၣ်ႉတမၤရှဲဘၣ်မ့ၣ်ပိၢ်ဖးဒိၣ်ချံဒံးဘၣ်အဃိလဲၤတဘူၣ်ဘၣ်”အဂ့ၢ်န့ၣ် စံး၀ဲန့ၣ်လီၤႉ လ့က့ၣ်ကိာ်ဟီၣ်က၀ီၤအပူၤတၢ်ဖံးအီၣ်မၤအီၣ်လီၢ်ကျဲလၢအအိၣ်၀ဲဒၣ်အ့ကၢၣ်(၁)တကလးဃၣ်ဃၣ်အံၤ လီၢ်က၀ီၤဖိတဖၣ်သူၣ်အီၣ်ဖျးအီၣ်၀ဲတၢ်အမဲာ်ညါခီကီၢ်ဟံၣ်ဖိဃီဖိၦၤမၤတၢ်ဖိလၢအဟဲတူၢ်ငါလၢတၢ်လီၢ်လၢအယံၤသ့ၣ်တဖၣ်စ့ၢ်ကီးတုၤလၢခဲအံၤအ၀ဲသ့ၣ်ဘၣ်ဟးဒိးသန့ၤအိၣ်ကဒု၀ဲလၢၦၤလီၢ်အိၣ်ကမှံတၢ်လီၢ်အဖၢမုၢ်ဒံးန့ၣ်လီၤႉ မၠၣ်၀တံၣ်ကလံၤထံးမဲၢ်ထီးသလ့သ၀ီႇမ့လဲၣ်ပၤႇကၠၤအ့စ့ၣ်ကၠံႇအ့ၤကၠ့မၠဲၤႇထံမဲး၀ါခံႇပဟံၣ်ကျီးႇဖလူဖးဒိၣ်ႇဖလူဖိႇယသ့ၣ်ကူၤသ၀ီဃုာ်ဒီးလ့က့ၣ်ကိာ်လီၢ်က၀ီၤတၢ်ဖံးအီၣ်မၤအီၣ်လီၢ်ကျဲအလီၢ်အံၤတဖၣ် တုၤလၢခဲအံၤ(၅)လါဘျဲၣ်အတီၢ်ပူၤတၢ်ဒုးကဲထီၣ်၀ဲလၢပယီၤသုးဒီး(KNLA)သုးပာ်ဖှိၣ်အဘၢၣ်စၢၤကိးမုၢ်နံၤဒဲးန့ၣ်လီၤႉ တၢ်စူၤလီၤသီအကတီၢ်ဘၣ်ဆၢဘၣ်ကတီၢ်လၢတၢ်သူၣ်လီၤ၀ဲဘုခ့ဒီးတၢ်သူၣ်တၢ်ဖျးလီၢ်ကျီးပူၤသ့ၣ်တဖၣ် ခီဖျိဟီၣ်လာ်မ့ၣ်ပိၢ်ဒီးမ့ၣ်ပိၢ်ချ့လၢအတပိၢ်ဖးထီၣ်ဒံးဘၣ်အိၣ်အဃိကျီးကစၢ်ဒီးခီကီၢ်ၦၤမၤတၢ်ဖိဟံၣ်ဖိဃီဖိလၢအဟဲတူၢ်ငါတဖၣ်အါဒၣ်တက့ၢ်န့ၣ်က့ၤဖံးအီၣ်မၤအီၣ်တၢ်တဘူၣ်ဒံးဘၣ်အဃိအိၣ်ကဒုဒံး၀ဲဖဲၦၤလီၢ်အိၣ်ကဒုအလီၢ်အဂ့ၢ်န့ၣ် ၦၤလၢလုၢ်အီၣ်သးသမူလၢတၢ်သူၣ်တၢ်ဖျးဖဲလီၢ်က၀ီၤပူၤအံၤတဖၣ် စံးဘၣ်ခ့ၣ်အဲးစံၣ်န့ၣ်လီၤႉ ခီဖျိတၢ်ဒုးကဲထီၣ်လၢလ့က့ၣ်ကိာ်ဟီၣ်က၀ီၤပူၤအဃိ လီၢ်က၀ီၤၦၤထူလံၤသ၀ီဖိတဖၣ်ဘၣ်ဃ့ၢ်ထီၣ်၀ဲဒီး လၢန့ၣ်အမဲာ်ညါၦၤဃ့ၢ်ထီၣ်တဖၣ်အကျါပၣ်ဃုာ်စ့ၢ်ကီးခီကီၢ်ၦၤမၤတၢ်ဖိဟံၣ်ဖိဃီဖိလၢဟဲတူၢ်ငါဖံးအီၣ်မၤအီၣ်တၢ်လၢအိၣ်ဟဲလၢပကိကီၢ်ခီႇအ့ၣ်ယၣ်၀တံၣ်ႇမကွ့ကီၢ်ခီႇမါတလ့ကီၢ်ခီတကပၤၦၤနီၣ်ဂံၢ်အိၣ်၀ဲအဂၤ(၂ႇ၀၀၀)ဘျဲၣ်အဂ့ၢ်န့ၣ် ဒူသ၀ီတၢ်မၤနီၣ်စရီအသိးသ့ၣ်ညါဘၣ်န့ၣ်လီၤႉ တနီၤန့ၣ်ဂုာ်ကျဲးစၢး၀ဲလၢကက့ၤဆူအ၀ဲသ့ၣ်အနီၢ်ကစၢ်လီၢ်ကျဲဘၣ်ဆၣ် ခီဖျိလၢအ၀ဲသ့ၣ်ဒူသ၀ီအပူၤစ့ၢ်ကီးတၢ်ဒုးကဲထီၣ်၀ဲလၢပယီၤသုးဒီးတၢ်ဒီသဒၢကမျၢၢ်သုးတဖၣ်အဘၢၣ်စၢၤဒီး တၢ်ဒွဲၣ်အူအီၣ်ကွံာ်အ၀ဲသ့ၣ်သ၀ီဒီတဖျၢၣ်ညါအဃိက့ၤ၀ဲတသ့ဘၣ်န့ၣ်လီၤႉကတီၢ်ခဲအံၤအ၀ဲသ့ၣ်ဘၣ်ဆဲးအိၣ်ကဒုဒံး၀ဲဖဲၦၤလီၢ်အိၣ်ကဒုအလီၢ်အဂ့ၢ်န့ၣ် ကရူၢ်လၢမၤစၢၤၦၤလီၢ်အိၣ်ကဒုဖိ ၦၤဘၣ်မူဘၣ်ဒါတဖၣ်စံး၀ဲအသိး သ့ၣ်ညါဘၣ်န့ၣ်လီၤႉ

လါမ့ၤ ၁၃ သီႇ ၂၀၂၂ နံၣ်ႇ ခ့ၣ်အဲးစံၣ် လၢဖၣ်အၣ်ကီၢ်ရ့ၣ်(သုးက့ ၇)ဟီၣ်က၀ီၤအပူၤန့ၣ် (၂၀၂၂–၂၀၂၃)တၢ်သိၣ်လိနံၣ်အဂီၢ် တီၤထီကၠိဒီးတီၤခၢၣ်သးကၠိလၢအအိၣ်ကညီကူၣ်သ့ဆဲးလၤ၀ဲၤကျိၤ(KECD)တၢ်ပၢဆှၢဖီလာ်တဖၣ်အံၤၦၤကၠဖိအနီၣ်ဂံၢ်ဟဲအါထီၣ်အါန့ၢ်ဒံးအပူၤကွံာ်နံၣ်အဂ့ၢ်န့ၣ်သ့ၣ်ညါဘၣ်လၢကီၢ်ရ့ၣ်ကူၣ်သ့ဘၣ်ထွဲၦၤဘၣ်မူဘၣ်ဒါတဖၣ်အအိၣ်န့ၣ်လီၤႉ ခီဖျိသုးတၢ်သဘံၣ်သဘုၣ်ဟဲအိၣ်ထီၣ်လၢခ့ၣ်အဲၣ်ယူၣ်တၢ်ပၢဟီၣ်က၀ီၤသုးက့၊ကီၢ်ရ့ၣ်တၢ်လီၢ်တနီၤအပူၤဒီး ၦၤကၠိဖိလၢတလဲၤထီၣ်လၢၤကီၢ်ပယီၤပဒိၣ်ကၠိတဖၣ်န့ၣ်ဟဲထီၣ်က့ၤ၀ဲဆူကီၢ်သူလ့ၤကၠိတဖၣ်အဃိ တုၤလၢတၢ်တဆဲးလီၤဘၣ်ဒံးမံၤန့ၣ်ကၠိဖိလၢတၢ်ချၢသ့ၣ်တဖၣ်ဟဲတုၤ၀ဲအါအါဂီၢ်ဂီၢ်လံအဂ့ၢ်န့ၣ် ဖၣ်အၣ်ကီၢ်ရ့ၣ်(KECD)ကူၣ်သ့မူဒါခိၣ် စီၤဖျဲၣ်ထူ စံး၀ဲဒ်အံၤန့ၣ်လီၤႉ “စးထီၣ်လၢခဲအံၤကၠိန့ၣ်မးတသွီလီၤဘၣ်ကၠိဖိအမံၤဒံးဘၣ်န့ၣ်ခဲအံၤၦၤလၢတၢ်ချၢသ့ၣ်တဖၣ်န့ၣ်ဟဲထီၣ်အိၣ်ခိးပာ်စၢၤတၢ်လၢတၢ်ချၢဒူပူၤသ၀ီပူၤန့ၣ်အိၣ်ပာ်စၢၤဖးအါညါႉနါက့ဂ့ၤလၢကၠိအတကွီၢ်ပူၤန့ၣ်ကၠိခိၣ်ကၠိသရၣ်၊သရၣ်မုၣ်သ့ၣ်တဖၣ်န့ၣ်အတၢ်ဘၣ်ကိၢ်ဘၣ်ဂီၤခီန့ၣ်အိၣ်၀ဲန့ၣ်ႉအိၣ်၀ဲလၢကၠိတၢ်သူၣ်ထီၣ်တတြီၢ်ဘၣ်ႇဟံၣ်ဒွဲသ့ၣ်တဖၣ်န့ၣ်တတြီၢ်ဘၣ်ႉလီၤဆီဒၣ်တၢ်စ့ၢ်ကီးလၢတၢ်သိၣ်လိမၤဒိးန့ၣ်တီၤဒၢးတလၢလၢၤဘၣ်မီၤနီၤႉပမ့တူၢ်လိာ်ဘၣ်ဖုးၦၤကိးဂၤဒဲးကဟဲဆဲးလီၤမံၤဒုလီၤတံၢ်လံတတြီၢ်လၢၤဘၣ်န့ၣ်”အဂ့ၢ်န့ၣ် အ၀ဲစံးဘၣ်ခ့ၣ်အဲးစံၣ်န့ၣ်လီၤႉ ကတီၢ်ခဲအံၤခီဖျိထံရူၢ်ကီၢ်သဲးတၢ်အိၣ်သးတဖၣ်အဃိကီၢ်ပယီၤပဒိၣ်ကၠိတနီၤဘၣ်တၢ်ကးတံၢ်ဃာ်၀ဲဒီး ကၠိဖိလၢအကဘၣ်ဆဲးမၤလိမၤဒိးတၢ်သ့ၣ်တဖၣ်အံၤဟဲထီၣ်က့ၤကၠိလၢကီၢ်သူလ့ၤကၠိတဖၣ်အသိး ခီဖျိတၢ်ဒုးတၢ်ယၤကဲထီၣ်လၢဟီၣ်က၀ီၤပူၤအဃိတနံၣ်အံၤၦၤကၠိဖိနီၣ်ဂံၢ်ဟဲအါထီၣ်အါန့ၢ်ဒံးအပူၤကွံာ်နံၣ်အဂ့ၢ်န့ၣ် ကူၣ်သ့မူဒါခိၣ် စီၤဖျဲၣ်ထူ စံးအါထီၣ်၀ဲန့ၣ်လီၤႉ ၦၤကၠိဖိလၢဟဲထီၣ်အိၣ်ကၠိလၢဖၣ််အၣ်ကီၢ်ရ့ၣ်ပူၤတဖၣ်အါဒၣ်တက့ၢ်အိၣ်ဟဲ၀ဲဒၣ်လၢခ့ၣ်အဲၣ်ယူၣ်(သုးက့ ၁)ဟီၣ်က၀ီၤတၢ်ဒုးကဲထီၣ်အလီၢ်ဒီးတၢ်လီၢ်လၢအဂၤသ့ၣ်တဖၣ်စ့ၢ်ကီးအိၣ်၀ဲန့ၣ်လီၤႉဒ်န့ၣ်အသိးဖၣ်အၣ်ကီၢ်ရ့ၣ်နီၣ်ဂံၢ်(၁)တီၤထီကၠိဃုာ်ဒီးကီၢ်သူလ့ၤကၠိလၢအိၣ်သူမှဲကျိဒီတကျိၤအံၤစ့ၢ်ကီးၦၤကၠိဖိအနီၣ်ဂံၢ်ဟဲအါထီၣ်အါန့ၢ်ဒံးအပူၤကွံာ်နံၣ်အဂ့ၢ်န့ၣ် ကူၣ်သ့ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ ကတီၢ်ခဲအံၤၦၤကၠိဖိအနီၣ်ဂံၢ်လၢအဟဲအါထီၣ်လၢဖၣ်အၣ်ကီၢ်ရ့ၣ်ပူၤတဖၣ်မ့ၢ်၀ဲဒၣ်တီၤထီကၠိဖိႇတီၤခၢၣ်သးကၠိဖိတဖၣ်ဒီး လၢကဟဲလါမ့ၤ...

လါမ့ၤ ၁၃ သီႇ ၂၀၂၂ နံၣ်ႇ ခ့ၣ်အဲးစံၣ် ပယီၤသုးဒီးသုးခိးကီၢ်ဆၢ- BGF(၁၀၁၄)သုးရ့ၣ်သုးကလၢၤလၢအိၣ်ဖဲဘံလ့ကီၢ်ဆၣ် လ့က့ၣ်သ၀ီပူၤအံၤတဖၣ် ဖီၣ်တ့ၢ်၀ဲကမျၢၢ်(၉၂)ဂၤလၢသုးကလၢၤဒီးဖဲန့ၣ်အကျါပၣ်ဃုာ်ဖိသၣ်(၄)ဂၤလၢအသးနံၣ်တၦဲၤဒံး၀ဲဘၣ်အဂ့ၢ်န့ၣ် ခ့ၣ်အဲၣ်ယူၣ်–ဒူသထူၣ်ကီၢ်ရ့ၣ်တၢ်ကစီၣ်ဒီးတၢ်ဘိးဘၣ်ရၤလီၤ၀ဲၤကျိၤထုးထီၣ်ပာ်ဖျါ၀ဲန့ၣ်လီၤႉ ကမျၢၢ်လၢတၢ်ဖီၣ်တ့ၢ်၀ဲတဖၣ်အံၤအဂၤ(၇၀)န့ၣ်အိၣ်၀ဲလၢဖၣ်အၣ်ကီၢ်ဆၣ်ဒီး(၂၂)ဂၤန့ၣ်အိၣ်၀ဲလၢဘံလ့ကီၢ်ဆၣ်ပူၤဒီးအကျါဖဲန့ၣ်ပၣ်ဃုာ်၀ဲဖိသၣ်(၄)ဂၤလၢအသးနံၣ်တၦဲၤဒံး၀ဲဘၣ်အဂ့ၢ်န့ၣ် ခ့ၣ်အဲၣ်ယူၣ်ဘံလ့ကီၢ်ဆၣ်တၢ်ကစီၣ်ဒီးတၢ်ဘိးဘၣ်ရၤလီၤ၀ဲၤကျိၤမူဒါခိၣ်စံး၀ဲန့ၣ်လီၤႉ အ၀ဲစံး၀ဲလၢ“သုးခိၣ်တ့ၤ၀့တီခိၣ်ရိၣ်မဲ(BGF–၁၀၁၄)ဒီးပယီၤသုးပာ်ဖှိၣ်တဖၣ်အံၤ ကဟဲထီၣ်မၤၦဲၤအနီၣ်ဂံၢ်လၢလ့က့ၣ်သုးကလၢၤအဂီၢ်အ၀ဲသ့ၣ်ဟဲလၢကျဲဒီတဘိန့ၣ်ကယဲၢ်မ့ၢ်ၦၤလၢအထံၣ်၀ဲန့ၣ်ဖီၣ်၀ဲပီၣ်တၣ်လီၤႉဖီၣ်၀ဲန့ၣ်ပၣ်ဃုာ်ဒီးလၢၢ်ချၢၣ်သ၀ီဖိလၢအသးနံၣ်တၦဲၤဒံးဘၣ်(၄)ဂၤႉခဲလၢာ်န့ၣ်(၉၂)ဂၤႇတုၤလၢခဲအံၤတပျၢ်လီၤ၀ဲဒံးဘၣ်ႉဖီၣ်တ့ၢ်ဃာ်၀ဲလၢလ့က့ၣ်(BGF)သုးကလၢၤန့ၣ်လီၤ”အဂ့ၢ်န့ၣ်အ၀ဲစံးဘၣ်ခ့ၣ်အဲၣ်ယူၣ်ဒူသထူၣ်ကီၢ်ရ့ၣ်တၢ်ကစီၣ်ဒီးတၢ်ဘိးဘၣ်ရၤလီၤ၀ဲဲၤကျိၤန့ၣ်လီၤႉ လၢန့ၣ်အမဲာ်ညါပယီၤသုးဒီး(BGF)သုးပာ်ဖှိၣ်တဖၣ်အံၤကိးသူ၀ဲလီၢ်က၀ီၤကမျၢၢ်တဖၣ်ဒ်တၢ်ဒီသဒၢစုက၀ဲၤတခါလၢအ၀ဲသ့ၣ်တၢ်ဘံၣ်တၢ်ဘၢအဂီၢ်အဂ့ၢ်န့ၣ် ဘံလ့ကီၢ်ဆၣ်တၢ်ကစီၣ်ဒီးတၢ်ဘိးဘၣ်ရၤလီၤမူဒါခိၣ် စံးအါထီၣ်၀ဲန့ၣ်လီၤႉ ဒ်(ခ့ၣ်အဲၣ်ယူၣ်)ဒူသထူၣ်ကီၢ်ရ့ၣ်တၢ်ကစီၣ်ဒီးတၢ်ဘိးဘၣ်ရၤလီၤ၀ဲၤကျိၤပာ်ဖျါ၀ဲအသိးန့ၣ် ပယီၤသုးႇ(BGF)သုးပာ်ဖှိၣ်လၢအိၣ်လ့က့ၣ်သုးလၢၤတဖၣ်အံၤဟုၣ်အီၣ်၀ဲလ့က့ၣ်သ၀ီပူၤတၢ်အီၣ်တၢ်အီဒီးတၢ်ဖိတၢ်လံၤလၢအိၣ်ဟံၣ်ပူၤႇကျးပူၤတဖၣ်အသိး ဖဲလါမ့ၤ ၁၀ သီအနံၤစ့ၢ်ကီး ပယီၤသုးႇ(BGF)သုးလၢအိၣ်တၤပီသုးကလၢၤတဖၣ်ဟဲနုာ်လီၤလၢတၤပီသ၀ီပူၤဒီးဟုၣ်၀ဲလီၢ်က၀ီၤဖိအဟုသးအထၢၣ်(၂၀)ဃၣ်ဃၣ်အဂ့ၢ်န့ၣ် ပာ်ဖျါ၀ဲန့ၣ်လီၤႉ ကတီၢ်ခဲအံၤလၢဘံလ့ကီၢ်ဆၣ်အပူၤခီဖျိသုးတၢ်သဘံၣ်သဘုၣ်ဟဲဆူၣ်ထီၣ်၀ဲလၢ ပယီၤသုးႇ(BGF)သုးပာ်ဖှိၣ်ဒီးခ့ၣ်အဲၣ်ယူၣ်သုးတဖၣ်အဘၢၣ်စၢၤအဃိလီၢ်က၀ီၤကမျၢၢ်(၁၀ႇ၀၀၀)ဘျဲၣ်ဘၣ်ဃ့ၢ်ထီၣ်၀ဲဒီးလၢတၢ်အံၤအဖီခိၣ်ပယီၤသုးဒီး(BGF)သုးပာ်ဖှိၣ်တဖၣ်ဟံးန့ၢ်၀ဲတၢ်ခွဲးတၢ်ယာ်နုာ်လီၤဟုၣ်၀ဲကမျၢၢ်အတၢ်ဖိတၢ်လံၤႇမၤဟးဂီၤ၀ဲအဂ့ၢ်န့ၣ်ခ့ၣ်အဲၣ်ယူၣ်ဒူသထူၣ်ကီၢ်ရ့ၣ်တၢ်ကစီၣ်ဒီးတၢ်ဘိးဘၣ်ရၤလီၤ၀ဲၤကျိၤလံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ

လါမ့ၤ ၁၂ သီႇ ၂၀၂၂ နံၣ်ႇ ခ့ၣ်အဲးစံၣ် စးထီၣ်ဖဲအပူၤကွံာ်လါအ့ဖြ့ၣ် ၂၃ သီအနံၤန့ၣ် လၢကညီကီၢ်စဲၣ် ကၠၤအ့စ့ၣ်ကၠံကီၢ်ဆၣ် ချၢၣ်–တကူၣ်တၢၣ်လီၢ်က၀ီၤအပူၤ တၢ်ဒုးကဲထီၣ်လၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ဒီး ပယီၤသုးတဖၣ်အဘၢၣ်စၢၤအဃိလီၢ်က၀ီၤကမျၢၢ်အဂၤ(၁၀ႇ၀၀၀)ဃၣ်ဃၣ်ဘၣ်ပာ်တ့ၢ်အဟံၣ်အဃီဘၣ်ဟးဃ့ၢ်အိၣ်ကမှံ၀ဲအဂ့ၢ်န့ၣ် သ့ၣ်ညါဘၣ်လၢကရူၢ်ကရၢလၢမၤစၢၤၦၤလီၢ်အိၣ်ကမှံဖိတဖၣ်အအိၣ်န့ၣ်လီၤႉ ၀ီၢ်ရီဟီၣ်က၀ီၤပူၤဒူသ၀ီအဖျၢၣ်(၁၀)ဘျဲၣ်ကမျၢၢ်တဖၣ်ဘၣ်လဲၤဃ့ၢ်အိၣ်၀ဲဒၣ်လၢ၀့ၢ်ႇသ၀ီလၢအဂၤဒီးကစၢၢ်ခိၣ်ကလိကျါန့ၣ်လီၤႉ ကတီၢ်ခဲအံၤခီဖျိတၢ်ဆၢကတီၢ်တုၤဃီၤလၢတၢ်စူၤခါလံအဃိ ၦၤလီၢ်အိၣ်ကမှံတဖၣ်အါဒၣ်တက့ၢ်န့ၣ်တၢ်ကီတၢ်ခဲဟဲအိၣ်ထီၣ်၀ဲလၢတၢ်လုၢ်အီၣ်နီၢ်ခိသးသမူအဂ့ၢ်န့ၣ် ကရူၢ်ကရၢလၢအမၤစၢၤတၢ်တဖၣ်စံး၀ဲန့ၣ်လီၤႉ “ပပာ်တ့ၢ်ပဟံၣ်ပဟးစံၣ်န့ၢ်အသီ(၂၀)ဘျဲၣ်လံႉမ့ၢ်ကဘၣ်စံၣ်တုၤဖဲလဲၣ်တသ့ၣ်ညါဘၣ်ႉလီၤဘၣ်တၢ်ကီတၢ်ခဲခဲလၢာ်လီၤႉကဘၣ်မၤစံာ််အဆၢကတီၢ်မၤတဘူၣ်ဘၣ်ႇက့ၤလၢဟံၣ်နါက့တဘူၣ်ဘၣ်ႉတၢ်ဒုးကဲထီၣ်ကိးနံၤဒဲးလီၤႉဘၣ်အိၣ်ဘၣ်အီၣ်ဘၣ်ဒိးသန့ၤထီၣ်သးလၢၦၤဟဲမၤဘူၣ်လီၤတၢ်ဖိအအိၣ်လီၤႉအဲၣ်ဒိးက့ၤမၤအီၣ်တၢ်လၢသ၀ီလံ”အဂ့ၢ်န့ၣ် ၀ီၢ်ရီလီၢ်က၀ီၤၦၤဃ့ၢ်အိၣ်ကမှံနီၢ်ဆၢဂ့ၤ စံးဘၣ်ခ့ၣ်အဲးစံၣ်န့ၣ်လီၤႉ စးထီၣ်ဖဲအပူၤကွံာ်လါအ့ဖြ့ၣ် ၂၃ သီအနံၤခီဖျိတၢ်ဒုးကဲထီၣ်အဃိ ချၢၣ်ႇမၠိၣ်ဟီႇချၢၣ်သ၀ီဖိႇဃိၣ်ယဲၢ်ဖျၢၣ်ႇတကူၣ်တၢၣ်ႇနါသဲထိၤႇတကူၣ်တၢၣ်သ၀ီဖိႇပူၤလ့ၤႇဒဲၤလိၣ်ႇကမီၣ်၀ါဒီးသ၀ီလၢအဂၤလီၢ်က၀ီၤကမျၢၢ်(၁၀ႇ၀၀၀)ဃၣ်ဃၣ်ဘၣ်လဲၤဃ့ၢ်အိၣ်၀ဲဆူတလၢၤကီၢ်စဲၣ်ဒီး၀့ၢ်ပူၤႇသ၀ီလၢအဂၤဒီး ခီဖျိိတၢ်ဒုးကဲထီၣ်ဒံးကိးမုၢ်နံၤဒဲးအဃိလီၢ်က၀ီၤကမျၢၢ်တဖၣ်က့ၤလၢဟံၣ်တဘူၣ်ဒံးဘၣ််ဘၣ်ဟးစံၣ်အိၣ်ကဒုသးအဖၢမုၢ်အဂ့ၢ်န့ၣ် ကရူၢ်ကရၢလၢမၤစၢၤၦၤလီၢ်အိၣ်ကမှံတဖၣ်စံး၀ဲန့ၣ်လီၤႉ ပယီၤသုးလၢအိၣ်ဆီလီၤသးဖဲတကူၣ်တၢၣ်ပၢၤကီၢ်၀ဲၤလီၢ်အံၤဒီး(KNLA)တဖၣ်အဘၢၣ်စၢၤတၢ်ဒုးကဲထီၣ်ယံၤ၀ဲအသီခံဆံကိးမုၢ်နံၤဒဲးဒီး...

လါမ့ၤ ၁၂ သီႇ ၂၀၂၂ နံၣ်ႇ ခ့ၣ်အဲးစံၣ် စးထီၣ်ဖဲအပူၤကွံာ်လါအ့ဖြ့ၣ်အခါန့ၣ် လၢကညီကီၢ်စဲၣ် ဖၣ်အၣ်ကီၢ်ဆၣ် သုးခိးကီၢ်ဆၢ(BGF)တၢ်ပၢဟီၣ်က၀ီၤတဖၣ်အပူၤန့ၣ်တၢ်ထၢသုးဟ့ၣ်တၢ်ဆီၣ်သနံးလၢကကဲ(BGF)သုးဒီးထၢစ့လၢလီၢ်က၀ီၤဖိအအိၣ်ကဲထီၣ်သးတပယူာ်ဃီအဂ့ၢ်န့ၣ် လီၢ်က၀ီၤဖိတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ ဖဲအပူၤကွံာ်လါမ့ၤ ၂ သီအနံၤန့ၣ် လၢဖၣ်အၣ်ကီၢ်ဆၣ်တတါအူႇညီၤကိႇ၀ဲပၠၣ်သ၀ီတကပၤန့ၣ် သုးခိၣ်တ့ၤ၀့တီခိၣ်ရိၣ်မဲ(BGF)သုးဖီၣ်က့ၤကိး၀ဲလီၢ်က၀ီၤဖိတဖၣ်ဒီးဆှၢထီၣ်၀ဲဆူတၤပီႇလ့က့ၣ်သ၀ီတကပၤလၢက၀ံန့ၢ်ပယီၤသုးတၢ်ဖိတၢ်လံၤအဂီၢ်န့ၣ်လီၤႉဒ်န့ၣ်အသိးအ၀ဲသ့ၣ်ထၢဖှိၣ်သုးႇဟ့ၣ်စ့၀ံၤမးပျၢ်လီၤက့ၤ၀ဲလီၢ်က၀ီၤဖိတဖၣ်အဂ့ၢ်န့ၣ် လီၢ်က၀ီၤဂံၢ်ခီၣ်ထံးတၢ်ကစီၣ်တဖၣ်စံး၀ဲန့ၣ်လီၤႉ ဖဲန့ၣ်၀ံၤအလီၢ်ခံစှၤသီအတီၢ်ပူၤ လၢဃိၣ်လိာ်ကျိ(ကီၣ်လိၤ)ကီးဒီးလူၢ်ပျဲၢ်ကီၢ်ဆၣ် စွ့ၤကိႇအ့နိၣ်သ့ၣ်သ၀ီအခိၣ်အဃၢၤတကပၤန့ၣ်စ့ၢ်ကီး(BGF)ထၢသုးထၢစ့ဒီး ခီဖျိနုာ်လီၤဖီၣ်သမံးသမိးတၢ်လၢကျဲမုၢ်ခိၣ်သ၀ီပူၤအဃိ လီၢ်က၀ီၤဖိတဖၣ်ဘၣ်ဟးစံၣ်ပလဲာ်သးအဂ့ၢ်န့ၣ်် လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤစံး၀ဲန့ၣ်လီၤႉ “ခဲအံၤတမ့ၢ်ထဲလၢသ၀ီဖဲန့ၣ်တကပၤလၢၤဘၣ်ႉဟဲတုၤလၢစွ့ၣ်ကိႇမၠဲၤကၠံငူၤႇအ့နိၣ်သ့ၣ်ပၤႇလူၢ်ပျဲၢ်တၢ်လီၢ်သ၀ီတကပၤလံႉ(BGF)တြဲၤအိၣ်ခိးသမံသမိးတၢ်လၢကျဲပူၤဟဲအါထီၣ်ႉမၠဲၤကၠံငူၤဒီတကျိၤန့ၣ်မ့ၢ်(BGF)ဟီၣ်က၀ီၤအဃိမၤ၀ဲလၢတၢ်ဘၣ်အသးလီၤႉအဲၣ်ဒိးထုးထီၣ်တၢ်ကလုၢ်န့ၣ်ထုးထီၣ်၀ဲႇကိးဖှိၣ်သ၀ီဖိမၢအကဲ(BGF)လီၤႉလၢသ၀ီပူၤန့ၣ်ကိးနံၣ်ဒဲးတနံၣ်န့ၣ်ဃ့၀ဲဒၣ်ဟံၣ်တဖျၢၣ်န့ၣ်တကလီၢ်ႇတကလီၢ်ဘျဲၣ်ညါႉဟ့ၣ်စ့မ့တန့ၢ်ဘၣ်န့ၣ်ကဘၣ်ဃုန့ၢ်ၦၤလၢအလီၢ်တဂၤ”အဂ့ၢ်န့ၣ် စံး၀ဲန့ၣ်လီၤ. ပယီၤသုးနုာ်လီၤမၤဒုးယၤတၢ်ဟူးတၢ်ဂဲၤလၢကညီကီၢ်စဲၣ်ပူၤအံၤဒ်သိး(BGF)မၤစၢၤပယီၤသုးကန့ၢ်အဂီၢ်န့ၣ် ထၢသုးႇကိးမၢလီၢ်က၀ီၤဖိလၢက၀ံန့ၢ်ပယီၤသုးတၢ်ဖိတၢ်လံၤႇထၢကျိၣ်ထၢစ့အဃိ ၦၤအိၣ်လၢဒူသ၀ီပူၤတအိၣ်လၢၤဘၣ်ဒီးၦၤနီၢ်ဒိၣ်ႇၦၤသးစၢ်ဒီးဖိသၣ်လၢအိၣ်ကၠိသ့ၣ်တဖၣ်...

လါမ့ၤ ၁၁ သီႇ ၂၀၂၂ နံၣ်ႇ ခ့ၣ််အဲးစံၣ် ဖဲမဟါလါမ့ၤ ၁၀ သီအနံၤန့ၣ် သုးခိးကီၢ်ဆၢ(BGF)သုးသိလ့ၣ်အခိၣ်(၆၀)ဘျဲၣ်ဟးထီၣ်ကွံာ်လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၅)ဟီၣ်က၀ီၤအပူၤဒီး တၢ်ရဲၣ်တၢ်ကျဲၤအိၣ်လၢတၢ်ကမၤလၤကပီၤအ၀ဲသ့ၣ်လၢမၠၣ်၀တံၣ်ကီၢ်ရ့ၣ် စွ့ၤကိၣ်ကိၤသ၀ီပူၤအဂ့ၢ်န့ၣ် တၢ်စံး၀ဲန့ၣ်လီၤႉ တကီၢ်ခါခဲအံၤသုးခိၣ်ဒိၣ်စိစီၤခၠ့ၣ်သူၤတီခိၣ်ရိၣ်မဲ(BGF)သုးဟီၣ်က၀ီၤ(၃)စုတီၤအဖီလာ်သုးဖိတဖၣ် ဟဲက့ၤတုၤ၀ဲလၢစွ့ၤကိၣ်ကိၤလံဒီး လၢကဟဲလါမ့ၤ ၁၅ သီအနံၤန့ၣ် နၢ်ဟူလၢတၢ်ကမၤလၤကပီၤ(BGF)သုးဖိတဖၣ်ဖဲစွ့ၤကိၣ်ကိၤအဂ့ၢ်န့ၣ် KNLA(သုးက့ ၁)သုးခိၣ်တဂၤစံး၀ဲန့ၣ်လီၤႉ “(BGF)သုးလၢအလဲၤမၤစၢၤတၢ်လၢ(သုးက့ ၅)တဖၣ်န့ၣ်ပနၢ်ဟူလၢအက့ၤလၢာ်လံႉ ပနၢ်ဟူလၢအိၣ်တ့ၢ်က့ၤထဲပယီၤသုးလီၤႉ(BGF)သုးလၢအိၣ်(သုးက့ ၁)အပူၤတဖၣ်အိၣ်တ့ၢ်ဒံးႉ အ၀ဲသ့ၣ်ဟဲက့ၤန့ၣ်တနုာ်လီၤလၢ(သုးက့...

လါမ့ၤ ၁၀ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ် ဘံလ့ကီၢ်ဆၣ်အပူၤ ဖဲလါမ့ၤထီၣ် ၈ သီအနံၤန့ၣ် ပယီၤသုးလၢအကလဲၤဖဲလ့က့ၣ်သုးကလၢၤအံၤတဖၣ်ဖီၣ်က့ၤကိး၀ဲကၠီၣ်ဖၠၤသ၀ီပူၤၦၤဃ့ၢ်တၢ်ဒုးပိာ်မုၣ်ပိာ်မၢၤႇပိာ်ခွါႇသးစၢ်တဖၣ်ဃုာ်ဒီးၦၤလၢအသးနံၣ်တၦဲၤဒံးဘၣ်တဖၣ်ဒီးသူကမျၢၢ်တဖၣ်ဒ်တၢ်ဒီသဒၢစုက၀ဲၤတခါအသိးအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ ပယီၤသုးတဖၣ်အံၤအိၣ်လၢတၤပီသုးကလၢၤကလဲၤထီၣ်လၢလ့က့ၣ်သုးကလၢၤအံၤအဂီၢ် ဖဲအ၀ဲသ့ၣ်လဲၤတုၤဖဲကၠီၣ်ဖၠၤသ၀ီအဆၢကတီၢ်တၢ်ခးလိာ်သးကဲထီၣ်၀ဲဒီးဟီၣ်က၀ီၤ(KNLA)သုးပာ်ဖှိၣ်တဆံးတက့ၢ်၀ံၤအလီၢ်ခံနုာ်လီၤဖီၣ်၀ဲၦၤဃ့ၢ်တၢ်ဒုးဖိလၢအလဲၤစံၣ်အိၣ်ခူသူၣ်ဖဲကၠီၣ်ဖၠၤသ၀ီသီခါဖၠၣ်ကရၢၢ်ပူၤအံၤတဖၣ်ဒီးသူ၀ဲလီၢ်က၀ီၤဖိတဖၣ်ဒ်တၢ်ဒီသဒၢစုက၀ဲၤတခါအသိးဒီးက့ၤကိး၀ဲဆူလ့က့ၣ်သ၀ီအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ ၦၤလၢအမၤစၢၤၦၤဃ့ၢ်တၢ်ဒုးဖိဖဲလီၢ်က၀ီၤပူၤတဂၤစံး၀ဲလၢ“သ၀ီဖဲန့ၣ်အါဒၣ်တက့ၢ်ၦၤစံၣ်လၢာ်လံႉဘၣ်ဆၣ်အိၣ်တ့ၢ်က့ၤတနီၤလၢအလဲၤစံၣ်အိၣ်လၢသီခါဖၠၣ်လီၤႉတၢ်ခးလိာ်သးကဲထီၣ်၀ံၤပယီၤသုးတဖၣ်နုာ်လီၤလၢသီခါဖၠၣ်ကရၢၢ်ပူၤဒီးၦၤအိၣ်ဖဲန့ၣ်သ့ၣ်တဖၣ်န့ၣ်က့ၤကိး၀ဲခဲလၢာ်လီၤႉသိလ့ၣ်(၃)ခိၣ်ႇသိလ့ၣ်ယီၢ်တခိၣ်လၢအိၣ်ဖဲသီခါဖၠၣ်ကရၢၢ်ပူၤန့ၣ်တီၢ်ဟးဂီၤ၀ဲလီၤႉၦၤလၢအဖီၣ်၀ဲတဖၣ်မ့ၢ်တၢ်ပျၢ်လီၤ၀ဲလံဧါႇတပျၢ်လီၤ၀ဲဒံးဘၣ်ဧါန့ၣ်တဲလီၤတံၢ်တဘၣ်ဒံးဘၣ်ႉက့ၤကွၢ်တၢ်လၢသ၀ီပူၤဒီးက့ၤတဘူဘၣ်”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ ဖဲအပူၤကွံာ်လါမ့ၤ ၅ သီအနံၤစ့ၢ်ကီး ပယီၤသုးတဖၣ်ပာ်ဖှိၣ်ထီၣ်သးဒီး(BGF)ဖဲအဟဲတုၤလၢဖၣ််အၣ်ကီၢ်ဆၣ် ထံကၠုၢ်သ၀ီဒီးမဲဲၢ်သနၣ်သ၀ီအဘၢၣ်စၢၤအခါန့ၣ် ခးသံစ့ၢ်ကီးကမျၢၢ်(၄၂)နံၣ်တဂၤလၢအဟဲဒိး၀ဲဒီးဆဲးကဲးအံၤဒံးအဂ့ၢ်န့ၣ် ခ့ၣ်အဲၣ်ယူၣ်ဒူသထူၣ်ကီၢ်ရ့ၣ် ဖၣ်အၣ်ကီၢ်ဆၣ် တၢ်ကစီၣ်ဒီးတၢ်ဘိးဘၣ်ရၤလီၤ၀ဲၤဒ့ ထုးထီၣ်ပာ်ဖျါ၀ဲန့ၣ်လီၤႉ စးထီၣ်လၢဟီၣ်က၀ီၤကညီဒီကလုာ်ဂၢၤသးကရၢ(KNDO)ထုးထီၣ်လံာ်ဟ့ၣ်ပလီၢ်၀ဲလၢ...

လါမ့ၤ ၁၀ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲတနံၤအံၤလါမ့ၤ ၁၀ သီ မုၢ်ထူၣ် ၁၂ နၣ်ရံၣ်ဘျဲၣ်အဆၢကတီၢ် ပယီၤသုးသိလ့ၣ်လၢအိၣ်ဟဲလၢပကိကီၢ်ခီဒိၣ်ႇ၀ီ၀့ၢ်တကပၤအံၤ ဖဲအဟဲတုၤလၢတလၢၤကီၢ်စဲၣ် ကၠဲၣ်ထိၤ၀့ၢ်ကပၤ အ့ၤကၣ်ဘိၤသ၀ီအခါန့ၣ်ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်အိၣ်ခိးခးအ၀ဲသ့ၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ပယီၤသုးတဖၣ်အံၤအိၣ်ဟဲ၀ဲဒၣ်လၢ၀ီ၀့ၢ်ဒီးသိလ့ၣ်(၅)ခိၣ်ဟဲထီၣ်၀ဲဆူကၠဲၣ်ထိၤတကပၤဒီး ခီဖျိဟီၣ်က၀ီၤ(KNLA)သုးပာ်ဖှိၣ်အိၣ်ခိးခးအီၤလၢတၢ်ဘၢၣ်စၢၤအဃိ ပယီၤသုးတကပၤသံဘၣ်ဒိဘၣ်ထံးအိၣ်၀ဲအဂ့ၢ်န့ၣ် ခ့ၣ်အဲၣ်ယူၣ်စံး၀ဲန့ၣ်လီၤႉ ခ့ၣ်အဲၣ်ယူၣ်ခိၣ်နၢ်ၦၤဘၣ်မူဘၣ်ဒါတဂၤစံး၀ဲ“ပၦၤတဖၣ်နုာ်လီၤခး၀ဲအဃိအ၀ဲသ့ၣ်တကပၤန့ၣ်ဘၣ်ဒိဘၣ်ထံးအိၣ်လီၤႉတၢ်သံတၢ်ဘၣ်ဒိဘၣ်ထံးအိၣ်ဆံးအါလဲၣ်ခီန့ၣ်တသ့ၣ်ညါဘၣ်ဒံးဘၣ်ႉမ့မ့ၢ်လၢပ၀ဲတကပၤဒုတၢ်ဘၣ်ဒိဘၣ်ထံးတအိၣ်ဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ၀ီ–ကၠဲၣ်ထိၤကျဲအံၤအိၣ်၀ဲဒၣ်လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢဒူသထူၣ်ကီၢ်ရ့ၣ်(သုးက့ ၁)ဟီၣ်က၀ီၤအပူၤဒီးလၢကျဲမုၢ်ဖီခိၣ်အံၤတၢ်ခးလိာ်သးကဲထီၣ်၀ဲလၢဟီၣ်က၀ီၤ(KNLA)သုးပာ်ဖှိၣ်ဒီးပယီၤသုးတဖၣ်အဘၢၣ်စၢၤတလီၢ်လီၢ်န့ၣ်လီၤႉအပူၤကွံာ်လါမ့ၤ ၃ သီအခါစ့ၢ်ကီး...

လါမ့ၤ ၁၀ သီႇ ၂၀၂၂ နံၣ်ႇ ခ့ၣ်အဲးစံၣ် လၢကညီကီၢ်စဲၣ် မၠၣ်၀တံၣ်ကီၢ်ဆၣ် စွ့ၤကိၣ်ကိၤဒူသ၀ီကရူၢ်တဖၣ်အပူၤန့ၣ် တၢ်ဟးထၢ၀ဲဟံၣ်တဖျၢၣ်ကဘၣ်ဟ့စ့(၅၀၀)ဘးလၢ(BGF)သုးလၢအအိၣ်တၢ်မဲာ်ညါသ့ၣ်တဖၣ်အဂီၢ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ ဖဲအပူၤကွံာ်လါမ့ၤ ၇ သီအခါန့ၣ် ဟီၣ်က၀ီၤ(BGF)ကိးအိၣ်ဖှိၣ်၀ဲစွ့ၤကိၣ်ကိၤသ၀ီကရူၢ် သ၀ီၦၤဘၣ်မူဘၣ်ဒါတဖၣ်ဒီး ဃ့၀ဲစ့ဒ်အံၤလီၤအဂ့ၢ်န့ၣ် လီၢ်က၀ီၤဖိစံး၀ဲအသိးသ့ၣ်ညါဘၣ်န့ၣ်လီၤႉ လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤစံး၀ဲ“အ၀ဲသ့ၣ်တဲ၀ဲလၢကဘၣ်ထၢနုာ်စ့ဟံၣ်တဖျၢၣ်န့ၣ်(၅၀၀)ဘးမီၤနီၤႉဘၣ်မနုၤအဃိလဲၣ်န့ၣ်မ့ၢ်ဒ်သိးကဆီၣ်ထွဲမၤစၢၤ၀ဲၦၤလၢအကဲသုးတဖၣ်အဂီၢ်မီၤနီၤႉခဲအံၤၦၤစးထီၣ်ထၢစ့လံအဃိဘၣ်စးထီၣ်ထၢနုာ်စ့လံမီၤနီၤႉဖဲသ၀ီပူၤဒုၦၤဟးထၢသုးအသီဒုတအိၣ်ဒံးဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ဒူသ၀ီလၢအဘၣ်ထၢနုာ်စ့သ့ၣ်တဖၣ်လၢအမ့ၢ်သဲပိၤသ၀ီႇ၀ါခးဟီႇခၠီစိၤႇ မဲးပံးႇထံလီၤသံးသ၀ီတဖၣ်အံၤမ့ၢ်ဟီၣ်က၀ီၤလၢ(BGF)လုၢ်ဘၢ၀ဲဒီး ဟံၣ်တဖျၢၣ်န့ၣ်ဘၣ်ဟ့ၣ်၀ဲလၢစ့ယိၤ(၅၀၀)ဘး လီၤလၢ၀ဲစ့ပယီၤခံကလီၢ်ဘျဲၣ်ညါအဃိၦၤလၢအကျိၣ်အစ့အိၣ်သ့ၣ်တဖၣ်တၢ်ကီတၢ်ခဲတအိၣ်လၢအ၀ဲသ့ၣ်အဂီၢ်ဘၣ်ဆၣ် မ့မ့ၢ်လၢၦၤမုၢ်ဆ့ၣ်မုၢ်ဂီၤဖိတဖၣ်အဂီၢ်န့ၣ်တၢ်ကီတၢ်ခဲအိၣ်၀ဲအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ ဘၣ်ဃးဒီးတၢ်ဂ့ၢ်ကဲထီၣ်သးအံၤ ခ့ၣ်အဲးစံၣ်–ကညီတၢ်ကစီၣ်၀ဲၤလီၢ်ခိၣ်သ့ၣ် ဆဲးကျိး(BGF)ၦၤဘၣ်မူဘၣ်ဒါတဖၣ်ဘၣ်ဆၣ်...

လါမ့ၤ ၉ သီႇ ၂၀၂၂ နံၣ်ႇ ခ့ၣ်အဲးစံၣ် သုးကီၣ်ကးအတၢ်ကွဲမုာ်တၢ်မုာ်တၢ်ခုၣ်အံၤမ့ၢ်တၢ်ကွဲမုာ်လၢအပာ်ပနီၣ်၀ဲတၢ်အဒူၣ်အဆၢထဲၦၤတနီၤအဂီၢ်လီၤဒီးၦၤလၢဘၣ်ထွဲဘၣ်ဃးတဖၣ်တပၣ်ဃုာ်ပၣ်ဂီၢ်၀ဲခဲလၢာ်ဘၣ်အဃိလဲၤထံၣ်လိာ်၀ဲတသ့ဘၣ်အဂ့ၢ်န့ၣ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ထုးထီၣ်ပာ်ဖျါ၀ဲဖဲတနံၤအံၤလါမ့ၤ ၉ သီအနံၤန့ၣ်လီၤႉ ခ့ၣ်အဲၣ်ယူၣ်လံာ်တၢ်ဘိးဘၣ်ရၤလီၤအပူၤစံး၀ဲပထံၣ်လၢဒ်ပအိၣ်ဒီးတၢ်မုၢ်လၢ်အသိးန့ၣ်ပဒိးန့ၢ်ဘၣ်တၢ်မုာ်တၢ်ခုၣ်အမ့ၢ်အတီတမ့ၢ်လၢကန့ၢ်ကသ့၀ဲဘၣ်ဒီးစုက၀ဲၤတၢ်ဘၣ်ဂံာ်ဂူာ်စ့ၢ်ကီးတမ့ၢ်လၢပဃဲၣ်လီၤဘှါလီၤအီၤကန့ၢ်ကသ့၀ဲဘၣ်အဂ့ၢ်န့ၣ် ပာ်ဖျါ၀ဲန့ၣ်လီၤႉ ကတီၢ်အံၤတၢ်ဒုးတၢ်ယၤဒီးတၢ်ခးလိာ်သးတဖၣ်ကဲထီၣ်သးလၢထံကီၢ်ဒီတဘ့ၣ်အပူၤအဃိ ထံဖိကီၢ်ဖိကမျၢၢ်တဖၣ်ဘၣ်ကွၢ်ဆၢၣ်မဲာ်၀ဲဒီးၦၤဂ့ၢ်၀ီတၢ်တိစၢၤမၤစၢၤအတၢ်ဃံးတၢ်စ့ၤတဖၣ်ဒီးလၢတၢ်န့ၣ်အဃိကတီၢ်အံၤတၢ်ထံၣ်လိာ်စံးကတိၤထိၣ်ဃူလိာ်သးဒီးသုးကီၣ်ကးန့ၣ်ကဘၣ်မ့ၢ်ဒၣ်တၢ်ထံၣ်လိာ်လၢၦၤဂ့ၢ်၀ီတၢ်တိစၢၤမၤစၢၤထံဖိကီၢ်ဖိကမျၢၢ်ဒီးဂ့ၢ်ဂီၢ်အူတၢ်ဆီၣ်ထွဲမၤစၢၤတဖၣ်နုာ်လီၤဟူးဂဲၤဖံးမၤတၢ်ကန့ၢ်ကသ့၀ဲအဂီၢ်ဧိိၤလီၤအဂ့ၢ်န့ၣ် ခ့ၣ်အဲၣ်ယူၣ်စံး၀ဲန့ၣ်လီၤႉ ဒ်န့ၣ်အသိးတၢ်မုာ်တၢ်ခုၣ်ဒီးတၢ်ထံၣ်လိာ်စံးကတိၤသကိးထံရူၢ်ကီၢ်သဲးတၢ်ရဲၣ်တၢ်ကျဲၤအသီတ၀ီအံၤ တၢ်ကဘၣ်သူၣ်ထီၣ်အီၤလၢ“ထံရူၢ်ကီၢ်သဲးတၢ်သးအိၣ်”အဖီခိၣ်ဒီးကျဲၤဘၣ်လိာ်တၢ်ဘၣ်ဂံာ်ဂူာ်တဖၣ်လၢတၢ်မုာ်တၢ်ခုၣ်အပူၤႇဃုထံၣ်န့ၢ်တၢ်အစၢလၢထံရူၢ်ကီၢ်သဲးတၢ်ဂ့ၢ်ကီလၢအဂံၢ်စဲၤလီၤတ့ၢ်၀ဲဒိၣ်ဒိၣ်ယိာ်ယိာ်ႇတၢ်မၤကတၢၢ်ကွံာ်မီၤစိရိိိိၤသနူဒီးပတုာ်ကွံာ်သုးအတၢ်ပၣ်ဃုာ်ပၣ်ဂီၢ်လၢထံရူၢ်ကီၢ်သဲးအပူၤအမဲာ်ညါလၢတၢ်ထံၣ်လိာ်စံးကတိၤသကိးကိးပတီၢ်ဒဲးန့ၣ်ထံဂုၤကီၢ်ဂၤအတၢ်ပၣ်ဃုာ်ပၣ်ဂီၢ်ဒ်အမ့ၢ်ၦၤထီၣ်ဒိကနၣ်တၢ်ႇၦၤအုၣ်သးဒီးၦၤလၢဆီၣ်ထွဲမၤစၢၤတၢ်ဒ်အမ့ၢ်တၢ်သ့တၢ်ဘၣ်ဒီးတၢ်ဆီၣ်ထွဲမၤစၢၤတဖၣ်ကဘၣ်အိၣ်၀ဲအဂ့ၢ်န့ၣ် လံာ်တၢ်ဘိးဘၣ်ရၤလီၤအပူၤ ပာ်ဖျါ၀ဲန့ၣ်လီၤႉ ခ့ၣ်အဲၣ်ယူၣ်ၦၤကတိၤတၢ်ပၢပဒိၣ်စီၤတီနံစံး၀ဲ“ဖဲတၢ်ဟံးဆူၣ်န့ၢ်ကွံာ်တၢ်စိတၢ်ကမီၤ၀ံၤအလီၢ်ခံန့ၣ်တၢ်အိၣ်သးသ့ၣ်တဖၣ်ဆီတလဲအသးအါမးအကျါန့ၣ်ပကတဲလၢ(New State Holder)သ့ၣ်တဖၣ်န့ၣ် အိၣ်ထီၣ်၀ဲဒၣ်တဘျုးခါညါႉတမ့ၢ်၀ဲဒၣ်လၢကလုာ်ဒူၣ်ဟီၣ်က၀ီၤအပူၤဘၣ်ႉမ့မ့တခီမ့ၢ်၀ဲဒၣ်ၦၤနီၣ်ဂံၢ်အါကတၢၢ်လၢပယီၤဖိအကျါဒၣ်လဲာ်န့ၣ်မ့ၢ်ၦၤသ့ၣ်တဖၣ်လၢအထီဒါ၀ဲဒၣ်သုးဟံန့ၢ်ဆူၣ်တၢ်စိတၢ်ကမီၤတဖုအံၤဆူၣ်ဆူၣ်ကလဲာ်န့ၣ်ၦၤထံၣ်ၦၤသ့ၣ်ညါခဲလၢာ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ တၢ်မုာ်တၢ်ခုၣ်တၢ်ရဲၣ်တၢ်ကျဲၤအပူၤသုးမီၤစိရိၤအခိၣ်မ့အီၤလဲၤကွဲမုာ်၀ဲကလုာ်ဒူၣ်ဖီၣ်စုက၀ဲၤကရူၢ်ကရၢတဖၣ်လၢအမ့ၢ် တၢ်မုာ်တၢ်ခုၣ်ကီၣ်ကး(KNU/KNLA-PC)ႇတၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)ႇ ပအိၣ်(တီသူ)ဒီကလုာ်တၢ်ထူၣ်ဖျဲးကရၢ(PNLO)ႇတလၢၤကီၢ်သီပၣ်တံၣ်(NMSP)ဒီးရၢၣ်ခၢၣ်ကီၢ်တၢ်ထူၣ်ဖျဲးပၣ်တံၣ်(ALP)လၢအဆဲးလီၤတ့ၢ်ဃာ်၀ဲ(NCA)သ့ၣ်တဖၣ်အံၤန့ၣ်လီၤႉ (KNU/KNLA-PC)တၢ်မုာ်တၢ်ခုၣ်ကီၣ်ကးသုးခိၣ်ဒိၣ်စိစီၤကၠီၤညိၣ်စံး၀ဲလၢ “လၢ(PPST)တၢ်အိၣ်ဖှိၣ်အပူၤန့ၣ် ၦၤလၢဟ့ၣ်ထီၣ်တၢ်ပာ်သးန့ၣ်အိၣ်(၅)ဒူၣ်မီၤနီၤႉ...