ခ့ၣ်အဲးစံၣ် – KIC News

လါမးရှး ၂၄ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ကၠၤအ့စ့ၣ်ကၠံ၀့ၢ်ပူၤ တလါအံၤအတီၢ်ပူၤပယီၤသုးဟးထီၣ်က့ၤလီၤႇသမံသမိးလီၢ်က၀ီၤကမျၢၢ် လၢအဟးထီၣ်က့ၤလီၤလၢ၀့ၢ်ပူၤတဖၣ်ဟဲအါထီၣ်၀ဲအဂ့ၢ်န့ၣ် ကၠၤအ့စ့ၣ်ကၠံ၀့ၢ်ပူၤကမျၢၢ်တဖၣ်စံး၀ဲန့ၣ်လီၤႉ စးထီၣ်လၢသုးမီၤစိရိၤမၤအတီၤတဆံတၢ်ဒိးစဲးတုၤလၢခဲအံၤန့ၣ်လီၢ်က၀ီၤသ၀ီဖိလၢအဟးထီၣ်က့ၤလၢ၀့ၢ်ပူၤတဖၣ် ပယီၤသုးအိၣ်ခိးသမံသမိးအ၀ဲသ့ၣ်တကးဒံးဘၣ်အမဲာ်ညါနုာ်လီၤဟူးဂဲၤလၢကၠၤအ့စ့ၣ်ကၠံ၀့ၢ်ခိၣ်၀့ၢ်ဃၢၤဒူသ၀ီတဖၣ်အပူၤဟဲအါထီၣ်၀ဲအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ ကၠၤအ့စ့ၣ်ကၠံ လီၢ်က၀ီၤကမျၢၢ်လၢတအဲၣ်ဒိးပာ်ဖျါအမံၤတဂၤစံး၀ဲလၢ“လၢညါခါန့ၣ်အ၀ဲသ့ၣ်တသမံသမိးတၢ်အါအါ ဘၣ်ႉဖဲလီၢ်ခံအံၤအ၀ဲသ့ၣ်သမံသမိးတၢ်ဟဲအါထီၣ်ႉစးထီၣ်ဖဲၦၤဒိးစဲးအတီၤတဆံဘျီန့ၣ်အ၀ဲသ့ၣ်သမံသမိးပၢၢ်တုၤလၢဆဲးကဲးကိပူၤညါႉသမံသမိးတၢ်တုၤလၢခဲအံၤလီၤႉဖဲမဟါန့ၣ်နါက့ပယီၤသုးနုာ်လီၤဟးဆှၣ်တၢ်လၢသ၀ီပူၤဒီးဖီၣ်ဒံးပီၣ်တၣ်ဒံးႉပယီၤသုးမ့နုာ်လီၤလၢသ၀ီပူၤန့ၣ်ၦၤသ၀ီဖိဘၣ်ယိၣ်၀ဲလၢပယီၤသုးကဖီၣ်ပီၣ်တၣ်” အဂ့ၢ်န့ၣ် စံးဘၣ် ခ့ၣ်အဲးစံၣ်–ကညီတၢ်ကစီၣ်ဖဲလါမးရှး ၂၃ သီအနံၤန့ၣ်လီၤႉ လၢန့ၣ်အမဲာ်ညါပယီၤသုးခီၣ်ချ့သုးရ့ၣ်(ခမရ–၅၅၇)ဒီးသုးကျိၤသုးပာ်ဖှိၣ်တဖၣ်နုာ်လီၤ၀ဲလၢနိၣ်တကီကီၢ်ဆၣ် (၀ါးဘိုးကုန်း)သ၀ီႇ(ချက်ကလေးကုန်း)ႇ(ပဲတီကုန်း)အစူၣ်ႇ(အုန်းတစ်ပင်)ႇ(ချောင်း၀)သ၀ီပူၤ အနီၣ်ဂံၢ်ကအိၣ်လၢအဂၤ(၁၀၀)ဃၣ်ဃၣ်ညါဒီးဖီၣ်ကိးသူ၀ဲကမျၢၢ်အဂၤ(၅၀)ဃၣ်ဃၣ်အံၤဒ်တၢ်ဒီသဒၢစုက၀ဲၤတခါအသိးအဂ့ၢ်န့ၣ် နိၣ်တကီကီၢ်ဆၣ် ကမျၢၢ်ပၢပြးကရူၢ် ထုးထီၣ်ပာ်ဖျါ၀ဲဖဲလါမးရှး ၈ သီအနံၤန့ၣ်လီၤႉ ပယီၤသုးကျိၤနုာ်လီၤဟးထီၣ်က့ၤလီၤဒ်အံၤန့ၣ်ကဘၣ်မ့ၢ်တၢ်ဂ့ၢ်လၢကဟဲ ၂၇ သီအနံၤန့ၣ်လီၤဘၣ်၀ဲသုးမုၢ်ဒိၣ်မုၢ်နံၤဒီး လၢတၢ်န့ၣ်အဃိကဘၣ်မ့ၢ်အမၤပၠး၀ဲဟီၣ်က၀ီၤတၢ်ဒိၣ်စိဒ်န့ၣ်လီၤအဂ့ၢ်န့ၣ် နိၣ်တကီကီၢ်ဆၣ် ကမျၢၢ်ပၢပြးကရူၢ် သိၣ်မှံၤတၢ်ရ့လိာ်မုာ်လိာ်မူဒါခိၣ် အူည့မ့ စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဖဲအပူၤကွံာ်လါမးရှး ၁၅ သီအခါစ့ၢ်ကီး လၢကၠၤအ့စ့ၣ်ကၠံ၀့ၢ်(သံပုရာ)ကရူၢ်ႇ(မကျည်းကလပ်)သ၀ီဒီး (ကော့ကမာ)သ၀ီဘၢၣ်စၢၤန့ၣ် တၢ်ဒုးကဲထီၣ်၀ဲလၢပယီၤသုးဒီးတၢ်ပၢၢ်ဆၢသုးကရူၢ်အဘၢၣ်စၢၤအဃိ...

လါမးရှး ၂၄ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ်ပူၤတကီၢ်ခါခဲအံၤခီဖျိဘီးက့ၣ်တံၢ်အၦ့ၤထီၣ်ကအိၣ်လၢခံဆးညါအဃိ လၢတၢ်သူၣ်တၢ်ဖျးတၢ်ဖံးအီၣ်မၤအီၣ်လီၢ်ကျီးပူၤန့ၣ်ၦၤသူၣ်ၦၤဖျးအါက့ၤထဲလၢဘီးက့ၣ်တဖၣ်လီၤအဂ့ၢ်န့ၣ် သ့ၣ်ညါဘၣ်လၢၦၤသူၣ်ဘီးက့ၣ်ဖိတဖၣ်အအိၣ်န့ၣ်လီၤႉ ဘီးက့ၣ်တံၢ်အဃ့တတၣ်န့ၣ်အၦ့ၤအိၣ်၀ဲ(၅၀၀ႇ၀၀၀)ကလီၢ်ဘျဲၣ်ညါဒီးမ့မ့ၢ်တပီၢ်န့ၣ်အၦ့ၤအိၣ်၀ဲ(၉၀၀)ကၠးႇ အဒ့ဃ့တဒ့န့ၣ်အၦ့ၤအိၣ်၀ဲ(၂၀၀)ကၠးဘျဲၣ်ညါအဃိၦၤသူၣ်ဘီးက့ၣ်ဟဲအါထီၣ်ကအိၣ်လၢအဆး(၁၀)ညါအဂ့ၢ်န့ၣ် နိၣ်တကီကီၢ်ဆၣ်ပူၤ ၦၤၦ့ၤဘီးက့ၣ်တံၢ်ဖိတဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ အ၀ဲစံး၀ဲလၢ“ဘီက့ၣ်တံၢ်အၦ့ၤဂ့ၤအဃိစံာ်လီၢ်ႇနံၣ်သိလီၢ်ႇရီဘၢၣ်ကျီးလီၢ်ႇပၢၢ်တုၤလၢဟံၣ်ကပိၤကပၤန့ၣ်ၦၤသူၣ်က့ၤထဲဘီးက့ၣ်လီၤႉကျီးလီၢ်ဟီၣ်ခိၣ်လီၢ်တနီၤန့ၣ်ၦၤသူၣ်ကဒါထဲဘီးက့ၣ်လီၤမီၤနီၤႉတၢ်လၢာ်ဘူၣ်လၢာ်စ့နါက့စှၤဒီးအမၠးန့ၢ်အါအဃိၦၤသူၣ်ဘီးက့ၣ်ဟဲအါထီၣ်လၢအဆး(၁၀)ညါ”အဂ့ၢ်န့ၣ် စံး၀ဲန့ၣ်လီၤႉ လၢကညီကီၢ်စဲၣ် နိၣ်တကီႇကီးတရံးႇမၠၣ်၀တံၣ်ႇကၠဲးဒိဒီးဃိၣ်သၢဖျၢၣ်ကီၢ်ဆၣ် ဒူသ၀ီတဖၣ်အပူၤ အါဒၣ်တက့ၢ်တၢ်သူၣ်တၢ်ဖျးလီၢ်န့ၣ်ၦၤသူၣ်ဆီတလဲက့ၤ၀ဲလၢဘီးက့ၣ်ဒီး တၢ်ဆှၢထီၣ်ဆါအီၤလၢတလၢၤကီၢ်စဲၣ် မူၣ်ဒိၤႇ မီၣ်လမၠဲၣ်(ပွဲရုံ)ဒီးမၠၣ်၀တံၣ်ကီၢ်ဆၢသ့ၣ်တဖၣ်အဂ့ၢ်န့ၣ် သ့ၣ်ညါဘၣ်လၢၦၤကူၣ်လဲၤမၤကၤတၢ်ဖိတဖၣ် အအိၣ်န့ၣ်လီၤႉ ဃိၣ်သၢဖျၢၣ်လီၢ်က၀ီၤကမျၢၢ်တဂၤစံး၀ဲလၢ“ဖဲမဟိဘီးက့ၣ်တံၢ်တတၣ်န့ၣ်အၦ့ၤအိၣ်ထဲ(၂၅၀ႇ၀၀၀)ကၠးလီၤႉ မ့မ့ၢ်လၢယိၤကီၢ်တကံလိန့ၣ်အၦ့ၤအိၣ်(၃)ဘးဘျဲၣ်ခဲအံၤထီၣ်တုၤလၢ(၆)ဘးဘျဲၣ်လံအဃိအၦ့ၤထီၣ်ကအိၣ်လၢတ၀၁်ညါမီၤနီၤႉဘီးက့ၣ်န့ၣ်ၦၤက့ၤခူၣ်ထီၣ်ကဒါအတံၢ်ဖဲလါဖ့ၤဘြူၤအါရံၤဒီးလါမးရှးအခါမီၤနီၤႉတနံၣ်အံၤလၢၦၤကသူၣ်၀ဲအဂီၢ်န့ၣ်ၦၤမၢ်လီၤဘီးက့ၣ်အဒ့ဒီဒူၣ်ညါ”အဂ့ၢ်န့ၣ် စံး၀ဲန့ၣ်လီၤႉ ဘီးက့ၣ်တံၢ်သ့ၣ်တဖၣ်အံၤတၢ်ဆှၢထီၣ်အီၤဆူတရူးကီၢ်ႇယိၤကီၢ်ဒီးတၢ်က့ၤထုးထီၣ်တ့က့ၤအီၤလၢဆီဆၣ်ႇ ထိးဆၣ်ႇညၣ်ဆၣ်ဒီးဆၣ်ဖိကီၢ်ဖိလၢအဂၤအဆၣ်သ့ၣ်တဖၣ်အိၣ်၀ဲအဂ့ၢ်န့ၣ် သ့ၣ်ညါဘၣ်လၢၦၤၦ့ၤဘီးက့ၣ်တံၢ်ဖိတဖၣ်အအိၣ်န့ၣ်လီၤႉ ကီၢ်ကၠီၣ်တဲၣ်ပူၤခီဖျိတနံၣ်အံၤမူခိၣ်ကလံၤသီၣ်ဂီၤတၢ်အိၣ်သးဒီးဘီးက့ၣ်တံၢ်အလီၢ်န့ၣ်တၢ်သူၣ်ဖျးကဒါတၢ်လၢအဂၤတဖၣ်အဃိဘီးက့ၣ်တံၢ်ဟးထီၣ်လီၤစှၤ၀ဲဒီးလၢတၢ်န့ၣ်အဃိကီၢ်ပယီၤပူၤဘီးက့ၣ်တံၢ်အၦ့ၤဘၣ်ထီၣ်၀ဲဒ်အံၤလီၤအဂ့ၢ်န့ၣ် ၦၤၦ့ၤဘီးက့ၣ်ဖိဒီးၦၤကူၣ်လဲၤမၤကၤတၢ်ဖိတဖၣ်စံး၀ဲန့ၣ်လီၤႉ လၢ၀့ၢ်တကူၣ်ကီၢ်ခီႇပကိကီၢ်ခီႇအ့ၣ်ယၣ်၀တံၣ်ကီၢ်ခီႇကခၠ့ၣ်ကီၢ်စဲၣ်ႇရၢၣ်ခၢၣ်ကီၢ်စဲၣ်ႇ ကညီကီၢ်စဲၣ်ကလံၤထံးဟီၣ်က၀ီၤတဖၣ်အပူၤန့ၣ်ၦၤသူၣ်ဘီးက့ၣ်အါကတၢၢ်ဒီးကီၢ်ပယီၤဒီတဘ့ၣ်အပူၤ ဟီၣ်ခိၣ်လီၢ်လၢတၢ်သူၣ်ဘီးက့ၣ်န့ၣ်ကအိၣ်အအ့ကၢၣ်(၁)ကလီၢ်ဘျဲၣ်ညါအဂ့ၢ်န့ၣ် တၢ်သူၣ်တၢ်ဖျးကိတိာ်၀ဲၤကျိၤ ထုးထီၣ်ပာ်ဖျါ၀ဲတၢ်ဂ့ၢ်တၢ်ကျိၤအသိး သ့ၣ်ညါဘၣ်န့ၣ်လီၤႉ

လါမးရှး ၂၄ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ဒူသထူၣ်ကီၢ်ရ့ၣ် ကၠဲၣ်ထိၤကီၢ်ဆၣ်အပူၤ စးထီၣ်လါမးရှး ၁၆ သီတုၤလၢခဲအံၤတစု ခီဖျိပယီၤသုခးလီၤကျိဖးဒိၣ်လၢသ၀ီပူၤအဃိ လီၢ်က၀ီၤကမျၢၢ်ဘၣ်ဃ့ၢ်ထီၣ်၀ဲအဂၤ(၂ႇ၀၀၀)ဃၣ်ဃၣ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဂံၢ်ခီၣ်ထံးၦၤဟ့ၣ်တၢ်ကစီၣ်ဖိတဖၣ်အအိၣ်န့ၣ်လီၤႉ တကီၢ်ခါခဲအံၤခီဖျိပယီၤသုးခးလီၤကျိဖးဒိၣ်အဃိ(ငှက်ပျောတော)ကရူၢ်(ဇီးပြောင်း)ကရူၢ် ဟံၣ်အဖျၢၣ်(၅၀၀)ၦၤနီၣ်ဂံၢ်အဂၤ(၂၀၀၀)ဃၣ်ဃၣ်ဘၣ်ဃ့ၢ်ထီၣ်၀ဲဒီးလၢတၢ်အီၣ်တၢ်အီတၢ်အိၣ်တၢ်ဆိးအဂီၢ်ဘၣ်အိၣ်ဘၣ်အီၣ်နါစိၤ၀ဲဒ်န့ၣ်လီၤအဂ့ၢ်န့ၣ် လီၢ်က၀ီၤကမျၢၢ်တဂၤစံး၀ဲန့ၣ်လီၤႉ အ၀ဲစံး၀ဲလၢ“လီလီစဲၤခဲအံၤဒုတၢ်မၤဘူၣ်ကစၢ်တအိၣ်ဒံးဘၣ်ႉဘၣ်အိၣ်ဘၣ်အီၣ်နါစိၤ၀ဲဒ်န့ၣ်လီၤမီၤနီၤႉ တဘျီတခီၣ်ကဘီယူၤမ့တဟဲဘၣ်လၢမုၢ်ဆါခီန့ၣ်ပက့ၤကွၢ်ပဟံၣ်ပဃီအိၣ်ဘၣ်ဆၣ်ပအိၣ်လၢဟံၣ်ဒုတဘူၣ်ဒံးဘၣ်” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဖဲအပူၤကွံာ်လါမးရှး ၁၆ သီဒီး ၂၀ သီအခါန့ၣ် ခီဖျိပယီၤသုးတြိၤ(၄၄)ဒီးစုတီၤဖီလာ်သုးရ့ၣ်လၢအိၣ်ကၠဲၣ်ထိၤ၀့ၢ်ပူၤ တဖၣ်အံၤခးလီၤကျိဖးဒိၣ်အဃိ ကမျၢၢ်သံ(၂)ဂၤဒီးဘၣ်ဒိ(၂)ဂၤဒံးအဂ့ၢ်န့ၣ် ခ့ၣ်အဲၣ်ယူၣ်–လီၢ်ခၢၣ်သး ထုးထီၣ်ပာ်ဖျါ၀ဲဖဲလါမးရှး ၂၂ သီအနံၤန့ၣ်လီၤႉ လၢန့ၣ်အမဲာ်ညါစးထီၣ်လါမးရှး ၂၀ သီလီၢ်ခံန့ၣ် ခီဖျိပယီၤသုးခးလီၤကျိဖးဒိၣ်ကအိၣ်ကိးမုၢ်နၤဒဲးဃၣ်ဃၣ်ညါအဃိ ကမျၢၢ်သံဘၣ်ဒိဘၣ်ထံးအိၣ်၀ဲဒီးကမျၢၢ်လၢအဃ့ၢ်မှံဟးဖျိးတဖၣ်အံၤစ့ၢ်ကီးတၢ်ကီတၢ်ခဲအိၣ်ထီၣ်လၢတၢ်အီၣ်တၢ်အီတကပၤအဂ့ၢ်န့ၣ် ကၠဲၣ်ထိၤကမျၢၢ်တဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ အ၀ဲစံး၀ဲလၢ“စးထီၣ်ဖဲအသီ(၂၀)လီၢ်ခံန့ၣ်ပယီၤသုးခးလီၤကျိဖးဒိၣ်ကအိၣ်ကိးမုၢ်နံၤဒဲးဃၣ်ဃၣ်ညါႉမ့၀ံၤအ၀ဲသ့ၣ်ဒီၣ်တဲာ်ကွံာ်၀ဲဒၣ်(လီတဲစိ)အကျိၤႉပယီၤသုးခးနါစိၤတၢ်အဃိၦၤသ၀ီဖိသံအိၣ်တနီၤႉၦၤမၤစၢၤၦၤဃ့ၢ်မှံဟးဖျိးတဖၣ်နါက့လဲၤလၢန့ၣ်တကပၤတဘူၣ်ဘၣ်အဃိတၢ်ကီတၢ်ခဲအိၣ်လၢကအီၣ်ကအီမီၤနီၤ”အဂ့ၢ်န့ၣ် စံး၀ဲန့ၣ်လီၤႉ ဖဲအပူၤကွံာ်လါမးရှး ၈ သီအခါစ့ၢ်ကီး...

လါမးရှး ၂၄ သီ‚ ၂၀၂၃ နံၣ်‚ ခ့ၣ်အဲးစံၣ် လၢကညီကီၢ်စဲၣ် ကီးတရံးကီၢ်ဆၣ်ကလံၤစိး(ကြောင်လျှာကုန်း)ပူၤခီဖျိပယီၤသုးခးလီၤကျိဖးဒိၣ်အဃိ ကမျၢၢ်ဘၣ်ဒိ(၄)ဂၤအကျါပၣ်ဃုာ်၀ဲဖိသၣ်မုၣ်ဖိ(၉)နံၣ်တဂၤအဂ့ၢ်န့ၣ် သ၀ီဖိစံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ ဖဲလါမးရှး ၂၃ သီ မုၢ်ဃ့ၢ်လီၤ ၃ နၣ်ရံၣ်ဃၣ်ဃၣ်အဆၢကတီၢ် ပယီၤသုး(ခလရ–၉၇)သုးရ့ၣ်လၢအိၣ်ကီးတရံး၀့ၢ်ပူၤ တဖၣ်အံၤ ခးလီၤတပျုာ်တပျီာ်ကျိဖးဒိၣ်လၢ(ကြောင်လျှာကုန်း)သ၀ီပူၤအဃိ သ၀ီဖိဘၣ်ဒိဘၣ်ထံး၀ဲ(၄)ဂၤအဂ့ၢ်န့ၣ် သ၀ီဖိလၢတအဲၣ်ဒိးပာ်ဖျါအမံၤတဂၤစံး၀ဲန့ၣ်လီၤႉ အ၀ဲစံး၀ဲလၢ“တနံၤညါအံၤတၢ်ဒုးကဲထီၣ်တအိၣ်ဘၣ်ႉပယီၤသုးခးနါစိၤကျိဖးဒိၣ်ႉသ၀ီဖိဘၣ်ဒိ(၄)ဂၤႉမ့ၢ်ပယီၤသုးနၢ်ဟူတၢ်ကစီၣ်မနုၤလဲၣ်ဒုတသ့ၣ်ညါဘၣ်ႉမ့မ့ၢ်၀ဲဒၣ်ဒုပတသ့ၣ်ညါဘၣ်နီတမံၤဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် ဖဲလါမးရှး ၂၃ သီအနံၤန့ၣ်လီၤႉ သ၀ီဖိလၢအဘၣ်ဒိဘၣ်ထံးတဖၣ်န့ၣ်မ့ၢ်၀ဲအူထိကၠံၤ(ကိး)ဖါပဲၣ် ၅၀ နံၣ်ႇ နီၢ်ဖီဘီ(၅၀)နံၣ်ႇ စီၤမ့ထဲၣ်(၁၈)နံၣ်ႇ နီၢ်တကၠိၤဖီ(၉)နံၣ်သ့ၣ်တဖၣ်ဒီးၦၤသ့ၣ်တဖၣ်အံၤတၢ်လဲၤဆှၢအ၀ဲသ့ၣ်ဆူဖၣ်အၣ်တၢ်ဆါဟံၣ်အဂ့ၢ်န့ၣ် သ့ၣ်ညါဘၣ်လၢ(ကြောင်လျှာကုန်း)သ၀ီဖိအအိၣ်န့ၣ်လီၤႉ “ၦၤလဲၤဆှၢအ၀ဲသ့ၣ်လၢဖၣ်အၣ်တၢ်ဆါလၢၤလံႉမ့မ့ၢ်နီၢ်ဖီဘီန့ၣ်ဘၣ်၀ဲဒၣ်အချၢဃံႇဘၣ်နးတစဲးႉအသွံၣ်လီၤဒီဒူၣ်ညါႉတဲ၀ဲလၢအမဲာ်မူၤႇမ့မ့ၢ်အ၀ဲန့ၣ်တၢ်ဘၣ်ယိၣ်အိၣ်လီၤ”အဂ့ၢ်န့ၣ် ၦၤလၢမၤစၢၤၦၤဘၣ်ဒိဘၣ်ထံးဖိတဂၤ စံးဘၣ် ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဒ်န့ၣ်အသိးဖဲအပူၤကွံာ်လါမးရှး ၂၁ သီအခါစ့ၢ်ကီး ပယီၤသုး(၉၇)သုးရ့ၣ်လၢအိၣ်ကီးတရံး၀့ၢ်ပူၤအံၤတဖၣ် ခးတပျုာ်တပျီာ်ကျိဖးဒိၣ်အဃိဘၣ်၀ဲဒၣ်(ရွာသစ်ကုန်း)သ၀ီပူၤဟံၣ်တၢ်သူၣ်ထီၣ်ဒီးဆၣ်ဖိကီၢ်ဖိသံဘၣ်ဒိဘၣ်ထံး၀ဲအိၣ်ဒၣ်န့ၣ်လီၤႉ

လါမးရှး ၂၃ သီႇ ၂၀၂၃ နံၣ်ႇ ခ့ၣ်အဲးစံၣ် သုးကျိၤလၢအိၣ်ဒီကလုာ်ဃူဖိးပဒိၣ် တၢ်ဒီသဒၢကမျၢၢ်ကိာ်တိာ်၀ဲၤကျိၤ ကလံၤထံးကီၢ်ခီသုးဟီၣ်က၀ီၤ နီၣ်ဂံၢ်(၃)ပူၤတဖၣ်ပာ်ဖှိၣ်ထီၣ်သးမၤ၀ဲအဆိကတၢၢ်တဘျီတၢ်ခးလိကျိဖးဒိၣ်တၢ်မၤလိ၀ံၤ၀ဲလံအဂ့ၢ်န့ၣ် သုးကျိၤၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ သုးကျိၤကိးကျိၤဒဲးကမျၢၢ်သုးတဖၣ်အံၤတၢ်ဟ့ၣ်အ၀ဲသ့ၣ်တၢ်ခးလိကျိဖးဒိၣ်တၢ်မၤလိတခါလၢတၢ်ပၢၢ်ဆၢဟီၣ်က၀ီၤတၢ်လီၢ်တတီၤအပူၤဒီးဖဲလါမးရှး ၁၉ သီအနံၤ တၢ်မၤ၀ဲတၢ်ပျၢ်တၢ်သိၣ်လိမူးတၢ်ရဲၣ်တၢ်ကျဲၤအဂ့ၢ်န့ၣ် ကလံၤထံးကီၢ်ခီ သုးဟီၣ်က၀ီၤခိၣ်–၂ စီၤရှါ စံး၀ဲန့ၣ်လီၤႉ အ၀ဲစံး၀ဲလၢ“သုးကျိၤကိးဖုဒဲးန့ၣ်ၦၤဟ့ၣ်လီၤ၀ဲဒၣ်တၢ်ခးလိကျိဖးဒိၣ်တၢ်မၤလိခဲလၢာ်လီၤႉမ့မ့ၢ်လၢသုးကျိၤခဲလၢာ်ပာ်ဖှိၣ်ထီၣ်သးမၤ၀ဲဒၣ်တၢ်ခးလိကျိဖးဒိၣ်အံၤမ့ၢ်၀ဲအဆိကတၢၢ်တဘျီလီၤႉတၢ်လၢကဘၣ်အိၣ်ကတီၤဆိသးန့ၣ်အရ့ဒိၣ်၀ဲလီၤႉဒ်သိးဖီတၢၣ်လၢပလိၣ်ဘၣ်အံၤကတုၤ၀ဲအဂီၢ်န့ၣ်သုးတၢ်သိၣ်လိအံၤကဲထီၣ်တၢ်တိစၢၤမၤစၢၤလီၤႉ ပအဲၣ်ဒိးတဲလၢတၢ်ပၢၢ်ဆၢအဂီၢ်န့ၣ်ပဟူးဂဲၤဖံးမၤအီၤလၢလၢၦဲၤၦဲၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ တၢ်မၤတၢ်ပျၢ်တၢ်သိၣ်လိမူးတၢ်ရဲၣ်တၢ်ကျဲၤဘျီ၀ဲအံၤအပူၤန့ၣ်(နဂါနီ)‚နဂါးဖြူ‚Cobra‚တီနီၢ်ႇကျားဖြူ‚ကျားသစ်နက်‚‚ကစၢၢ်သူ‚(SOF)‚(ဂဠုန်)သုးကျိၤကိးဖုဒဲးသုးဖိသံၣ်ဖိသ့ၣ်တဖၣ်ဟ့ၣ်ထီၣ်၀ဲတၢ်ယူးယီၣ်ဆူတၢ်ဒီသဒၢကမျၢၢ်သုးမုၢ်ဒိၣ် နီၣ်တယၢ်အအိၣ်ဒီးတၢ်ရဲၣ်တၢ်ကျဲၤအပူၤသုးကျိၤၦၤဘၣ်မူဘၣ်ဒါတဖၣ်ကတိၤဟ့ၣ်ဂံၢ်ဟ့ၣ်ဘါလီၤတၢ်အသိးတၢ်ဟ့ၣ်ထီၣ်တၢ်ယူးယီၣ်ဆူသုးဖိသံၣ်ဖိလၢအဟ့ၣ်လီၤသးသမူလၢတၢ်ပၢၢ်ဆၢပူၤတဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ကလံၤထံးကီၢ်ခီသုးဟီၣ်က၀ီၤနီၣ်ဂံၢ်(၃)အံၤအိၣ်ဆီလီၤသးလၢကီၢ်ပယီၤကလံၤထံး(ကီၢ်ခီဒိၣ်)ဒီး(ကီၢ်စဲၣ်)သ့ၣ်တဖၣ်အပူၤဒီးခးလိာ်အသးဒီးတနီသရံၣ်သုး၀ဲၤလီၢ်သ့ၣ်ႇမုၢ်ထီၣ်ကလံၤထံးကီၢ်ခီသုး၀ဲၤလီၢ်ခိၣ်သ့ၣ်ဒီးသုးကီၢ်ခီသုးကျိၤ လၢအဂၤတဖၣ်အိၣ်၀ဲကိးမုၢ်နံၤဒဲးန့ၣ်လီၤႉဒ်န့ၣ်အသိးအ၀ဲသ့ၣ်အံၤပာ်ဖှိၣ်ဒုးသကိးဃုာ်တၢ်ဒီးကလုာ်ဒူၣ်တၢ်ပၢၢ်ဆၢသုးဖိသံၣ်ဖိတဖၣ်စ့ၢ်ကီးအဂ့ၢ်န့ၣ် ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ

လါမးရှး ၂၃ သီႇ ၂၀၂၃ နံၣ်ႇ ခ့ၣ်အဲးစံၣ် လၢတနီသရံၣ်ကီၢ်ခီဒိၣ် လီလိၤကီၢ်ဆၣ်အပူၤ ပယီၤသုးဟးနုာ်လီၤဒွဲၣ်အူအီၣ်သ၀ီတဖျၢၣ်၀ံၤတဖျၢၣ်ဒီး မၤသံ၀ဲလီၢ်က၀ီၤကမျၢၢ်တဂၤစ့ၢ်ကီးအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ လၢလီလိၤကီၢ်ဆၣ်အပူၤ ဖဲလါမးရှး ၂၁ သီ မုၢ်ထူၣ် ၁၂ နၣ်ရံၣ်ဃၣ်ဃၣ်အဆၢကတီၢ် ပယီၤသုးနုာ်လီၤလၢ(ညောပြင်)သ၀ီဒီး(အောက်ကျောက်၀ပ်)သ၀ီပူၤ၀ံၤဒွဲၣ်အူအီၣ်ကွံာ်ဟံၣ်အဖျၢၣ်(၁၅၀)ဃၣ်ဃၣ်အံၤလၢတၢ်ဂ့ၢ်တအိၣ်နီတမံၤဘၣ်ဒီးမၤသံကွံာ်သ၀ီဖိတဂၤစ့ၢ်ကီးအဂ့ၢ်န့ၣ် လီၢ်က၀ီၤကမျၢၢ်တဂၤစံး၀ဲဒ်အံၤန့ၣ်လီၤႉ “အ၀ဲသ့ၣ်ဒွဲၣ်အူအီၣ်ဟံၣ်ခဲလၢာ်န့ၣ်ကအိၣ်အဖျၢၣ်(၁၀၀)ဘျဲၣ်ညါႉဒွဲၣ်အူအီၣ်၀ဲသ၀ီဒီတဖျၢၣ်ညါမီၤနီၤႉ မ့၀ံၤအ၀ဲသ့ၣ်ခးသံ၀ဲသ၀ီဖိသးစၢ်အနံၣ်(၂၀)ဘျဲၣ်န့ၣ်တဂၤႉသ၀ီလၢသုးမီၤစိရိၤစုတီၤဖီလာ်ကရူၢ်(ပျူစောထီး)အိၣ်၀ဲနါက့အ၀ဲသ့ၣ်ဒွဲၣ်အူ၀ဲလီၤႉမ့မ့ၢ်သ၀ီလၢ(PDF)အိၣ်၀ဲဒုနးဒိၣ်ဒီးတစဲး”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ ခီဖျိပယီၤသုးဒွဲၣ်အူအီၣ်သ၀ီအဃိကမျၢၢ်လၢပယီၤသုးဒွဲၣ်အူအီၣ်အဟံၣ်တဖၣ်အံၤဒီးသ၀ီလၢအိၣ်တၢ်ခိၣ်တၢ်ဃၢၤဖဲန့ၣ်(၅)ဖျၢၣ်ဃၣ်ဃၣ်ကမျၢၢ်တဖၣ်ပျံၤတၢ်ဖုးတၢ်ဘၣ်ဃ့ၢ်ထီၣ်၀ဲအဂ့ၢ်န့ၣ် သ့ၣ်ညါဘၣ်လၢတၢ်ဒီသဒၢကမျၢၢ်သုးကရူၢ် အအိၣ်န့ၣ်လီၤႉ လီလိၤကီၢ်ဆၣ် တၢ်ဒီသဒၢကမျၢၢ်သုးကရူၢ် တၢ်ဘိးဘၣ်ရၤလီၤမူဒါခိၣ်တဂၤ စံး၀ဲလၢ“ သ၀ီဖိဘၣ်လဲၤစံၣ်အိၣ်လၢကစၢၢ်ကလိကျါခဲလၢာ်လီၤႉတၢ်ပၢၢဆၢသုးကရူၢ်လၢအိၣ်ကီၢ်ဆၣ်ပူၤတဖၣ်ဂုာ်စ့ၢ်ကီး ကျဲးစၢးတၢ်လၢကမျၢၢ်ၦၤဃ့ၢ်မှံဟးဖျိးတဖၣ်အဂီၢ်သၦၢ်ၦၢ်လီၤ”အဂ့ၢ်န့ၣ် စံး၀ဲန့ၣ်လီၤႉ လၢတနီသရံၣ်ကီၢ်ခီဒိၣ် ကီၢ်ဆၣ်ဒီးဒူသ၀ီတဖၣ်အပူၤ စးထီၣ်(၂၀၂၁)လါစဲးပထ့ဘၢၣ်တုၤလၢ(၂၀၂၃) လါဖ့ၤဘြူၤအါရံၤန့ၣ် ခီဖျိပယီၤသုးဒီးသုးမီၤစိရိၤစုတီၤဖီလာ်ကရူၢ်တဖၣ်အံၤအတၢ်ဟူးတၢ်တၢ်ဂဲၤတၢ်ဖံးတၢ်မၤအဃိ မ့ၣ်အူအီၣ်ဟးဂီၤ၀ဲကမျၢၢ်အဟံၣ်ခဲလၢာ်အိၣ်၀ဲ(၄၃၅)ဖျၢၣ်အဂ့ၢ်န့ၣ် တနီသရံၣ်ကီၢ်ခီ (Southern Monitor) ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ ဖဲအပူၤကွံာ်စှၤသီအခါစ့ၢ်ကီးပယီၤသုးနုာ်လီၤဒွဲၣ်အူအီၣ်(ကရင်ကြီး)သ၀ီပူၤဟံၣ်(၉)ဖျၢၣ်ဒီး(ပညစ်)သ၀ီပူၤဟံၣ်(၄)ဖျၢၣ်တကးဒံးဘၣ်အမဲာ်ညါက့ၤစိာ်၀ဲလီၢ်က၀ီၤသ၀ီဖိအတၢ်ဖိတၢ်လံၤလုၢ်ဒိၣ်ၦ့ၤဒိၣ်ႇတၢ်အီၣ်တၢ်အီဒီး ဆၣ်ဖိကီၢ်ဖိလၢဟံၣ်သ့ၣ်တဖၣ်အဂ့ၢ်န့ၣ်...

လါမးရှး ၂၃ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤလၢအမ့ၢ်ချၢၣ်လွံၢ်ထူၣ်ကီၢ်ရ့ၣ်ဒီးဒူသထူၣ်ကီၢ်ရ့ၣ်အပူၤ စးထီၣ်တလါအံၤလါမးရှးခံနွံတနွံန့ၣ် ပယီၤသုးခးလီၤကျိဖးဒိၣ်‚ကဘီယူၤဟဲတ့ၢ်လီၤမ့ၣ်ပိၢ်ဟဲအါထီၣ်၀ဲအဂ့ၢ်န့ၣ် ခ့ၣ်အဲၣ်ယူၣ်–လီၢ်ခၢၣ်သးထုးထီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ ဖဲအပူၤကွံာ်လါမးရှး ၂၀ သီအနံၤန့ၣ် သုးမီၤစိရိၤကဘီယူၤဟဲခးလီၤတၢ်လၢ(ချၢၣ်လွံၢ်ထူၣ်ကီၢ်ရ့ၣ်)လၢၢ်ဒိၣ်ဒီး စွ့ၣ်ကၠ့ၣ်ကီၢ်ဆၣ်ဒူသ၀ီပူၤအိၣ်၀ဲ(၉)ဘျီဒီးတ့ၢ်လီၤ၀ဲမ့ၣ်ပိၢ်ကအိၣ်(၂၈)ဖျၢၣ်ညါအဃိကမျၢၢ်ဘၣ်ဒိ(၁)ဂၤအသိး ဟံၣ်ဟးဂီၤ(၅)ဖျၢၣ်ႇတီၤဖုၣ်ကၠိဟးဂီၤ၀ဲ(၁)ဖျၢၣ်ဒီး သ၀ီ(၂၁)ဖျၢၣ် ကမျၢၢ်အဂၤ(၃၀၀၀)ဘျဲၣ်ဘၣ်ဃ့ၢ်ထီၣ်၀ဲအဂ့ၢ်န့ၣ် ခ့ၣ်အဲၣ်ယူၣ်–လီၢ်ခၢၣ်သး ထုးထီၣ်ပာ်ဖျါ၀ဲဖဲလါမးရှး ၂၂ သီအနံၤန့ၣ်လီၤႉ ဒ်န့ၣ်အသိးလါမးရှး ၁၆ သီတုၤလၢ(၂၀)သီအနံၤ ခီဖျိ(ကၠဲၣ်ထိၤ)၀့ၢ်ပယီၤသုးတဖၣ်အံၤ ခးလီၤကျိဖးဒိၣ်ဆူ ဒူသထူၣ်ကီၢ်ရ့ၣ် ကၠဲၣ်ထိၤကီၢ်ဆၣ် ဇီးပြောင်း(၃)သ၀ီဒီး(ကရ၀င်းဆိပ်)သ၀ီပူၤအဃိလီၢ်က၀ီၤကမျၢၢ်သံ(၂)ဂၤႇ ဘၣ်ဒိ(၂)ဂၤအဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ လၢၢ်ဒိၣ်ကီၢ်ဆၣ်ပူၤတၢ်ဒုးကဲထီၣ်လၢပယီၤသုးဒီးတၢ်ပၢၢ်ဆၢသုးကရူၢ်အဘၢၣ်စၢၤ၀ံၤလီၢ်ခံ ခီဖျိပယီၤသုးသံဘၣ်ဒိဘၣ်ထံးအါဒီးအ၀ဲသ့ၣ်ကမၤအါထီၣ်ဂံၢ်ဘါအဂီၢ်ပယီၤသုးအံၤသူ၀ဲကဘီယူၤဟဲတ့ၢ်လီၤမ့ၣ်ပိၢ်လၢကမျၢၢ်ထံဖိကီၢ်ဖိအိၣ်ဆိးလီၢ်ကျဲဒူသ၀ီပူၤအဂ့ၢ်န့ၣ် လီၢ်က၀ီၤကမျၢၢ်တဂၤစံးဘၣ်ခ့ၣ်အဲးစံၣ်–ကညီတၢ်ကစီၣ် ဒ်အံၤန့ၣ်လီၤႉ အ၀ဲစံး၀ဲလၢ“တၢ်ဒုးကဲထီၣ်န့ၣ်ပယီၤသုးတကပၤသံအါမးႉၦၤလၢအသံတဖၣ်အံၤပယီၤသုးဘိၣ်ဘံထီၣ်၀ဲဒီး(တာလပတ်)ဘျီကွံာ်လီၤ၀ဲလၢထံကျိပူၤဒ်န့ၣ်လီၤႉမ့မ့ၢ်ပ၀ဲဒၣ်ခီကဘီယူၤမ့ဟဲဘူးထီၣ်ဒီးၦၤလံန့ၣ်ပစံၣ်လီၤအိၣ်လၢတၢ်ပူၤလီၤႉတၢ်ပူၤမ့တအိၣ်ဘၣ်ခီန့ၣ်ပဟးအိၣ်လၢသ့ၣ်ကဒုဖီလာ်လီၤႉမ့ၣ်ပိၢ်မ့လီၤတဲာ်လိၤလိၤၦၤဒုသံ၀ဲန့ၣ်ႉအါဒၣ်တက့ၢ်န့ၣ်ၦၤသံလၢအဘၣ်ဒီးကျိဖးဒိၣ်န့ၣ်အါ၀ဲလီၤ”အဂ့ၢ်န့ၣ် စံး၀ဲန့ၣ်လီၤႉ ပယီၤသုးခးလီၤကျိဖးဒိၣ်ဒီးကဘီယူၤဟဲတ့ၢ်လီၤမ့ၣ်ပိၢ်ဟဲအါထီၣ်ဒ်အံၤန့ၣ်ခီဖျိလၢသုးမီၤစိရိၤအံၤအတလူၤပိာ်မၤထွဲ၀ဲၦၤဂ့ၢ်၀ီတၢ်တိစၢၤမၤစၢၤတၢ်ဘျၢသဲးစးလၢဟီၣ်ခိၣ်ဒီဘ့ၣ်ပာ်လီၤ၀ဲအံၤဘၣ်ဒီးဆဲးလုၢ်သ့ၣ်ခါပတာ်၀ဲကွ့ၢ်ကွ့ၢ်လီၤအဂ့ၢ်န့ၣ် ကညီၦၤဂ့ၢ်၀ီခွဲးယာ်ကရူၢ်(KHRG)ၦၤကတိၤတၢ်ပၢ စီၤနၢၤဒၣ်ဆူ စံးဘၣ်ခ့ၣ်အဲးစံၣ်–ကညီတၢ်ကစီၣ်ဒ်အံၤန့ၣ်လီၤႉ အ၀ဲစံး၀ဲလၢ“အ၀ဲသ့ၣ်န့ၣ်လုၢ်သ့ၣ်ခါပတာ်မၤကမၣ်၀ဲဟီၣ်ခိၣ်ဒီဘ့ၣ်ၦၤဂ့ၢ်၀ီတၢ်တိစၢၤမၤစၢၤတၢ်ဘျၢသဲစးအံၤဖျိဖျိဖျါဖျါလီၤႉအ၀ဲသ့ၣ်န့ၣ်အတၢ်လူၤပိာ်မၤထွဲၦၤဂ့ၢ်၀ီခွဲးယာ်တအိၣ်ဘၣ်ဒီးပညိၣ်ထီၣ်ဒုး၀ဲကမျၢၢ်ထံဖိကီၢ်ဖိလိၤလိၤလီၤ”အဂ့ၢ်န့ၣ် စံး၀ဲန့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤအလီၢ်ခံတုၤလၢခဲအံၤလၢ(ခ့ၣ်အဲၣ်ယူၣ်)တၢ်ပၢဟီၣ်က၀ီၤဒူသ၀ီတဖၣ်အပူၤန့ၣ် ပယီၤသုးနုာ်လီၤလၢပျီပူၤႇခးလီၤကျိဖးဒိၣ်တကးဒံးဘၣ်သူစ့ၢ်ကီးကဘီယူၤဟဲခးလီၤတၢ်အဃိ လၢ(ခ့ၣ်အဲၣ်ယူၣ်)တၢ်ပၢဟီၣ်က၀ီၤတဖၣ်အပူၤန့ၣ်ကမျၢၢ်ၦၤဃ့ၢ်မှံဟးဖျိးအနီၣ်ဂံၢ်ပာ်ဖှိၣ်ခဲလၢာ်အိၣ်(၅၀၀ႇ၀၀၀)ဘျဲၣ်လံဒီးမ့မ့ၢ်ခ့ၣ်အဲၣ်ယူၣ်(သုးက့...

လါမးရှး ၂၃ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် နိၣ်တကီကီၢ်ဆၣ်အပူၤ သုးမီၤစိရိၤထုးထီၣ်(martial law)ဘၣ်ဆၣ် ပယီၤသုးၦၤဘၣ်မူဘၣ်ဒါအိးထီၣ်၀ဲတၢ်တၤကျိၣ်တၤစ့လီၢ်အံၤလၢ(၂၄)နၣ်ရံၣ်တၢ်ဆၢကတီၢ်ၦဲၤၦဲၤလီၤအဂ့ၢ်န့ၣ် သ့ၣ်ညါဘၣ်လၢကမျၢၢ်အိၣ်၀့ၢ်ပူၤတဖၣ်အအိၣ်န့ၣ်လီၤႉ လၢကၠၤအ့စ့ၣ်ကၠံ၀့ၢ် တၢ်သွၣ်ခိၣ်ကပၤ(အောင်)Hotel တၢ်သူၣ်ထီၣ်လီၢ်ခံန့ၣ် တၢ်အိးထီၣ်၀ဲတၢ်ဒုးတဖှံဆီလီၢ်ႇ တၢ်ဒိဖဲလီၢ်ဒီးတၢ်လိာ်ကွဲ(အနီထောင်)တၢ်တၤကျိၣ်တၤစ့လီၢ်အကလုာ်ကလုာ်တကးဒံးဘၣ်အမဲာ်ညါ နၦ့ၤသူကသံၣ်မူၤဘှီးသ့၀ဲညီညီကဒၣ်အဂ့ၢ်န့ၣ် ကမျၢၢ်အိၣ်၀့ၢ်ပူၤလၢတအဲၣ်ဒိးပာ်ဖျါအမံၤတဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲလါမးရှး ၂၀ သီအနံၤန့ၣ်လီၤႉ “တၢ်ဂဲၤလိာ်ကွဲ(အနီထောင်)တၢ်တၤကျိၣ်တၤစ့လီၢ်န့ၣ်အိၣ်(၅)ခါညါႉတၢ်လိာ်ကွဲလီၢ်တခါန့ၣ်တနံၤန့ၣ်ဘၣ်ဟ့ၣ်၀ဲအလဲ(၁၃၀ႇ၀၀၀)ကၠးမီၤနီၤႉဖဲန့ၣ်အိၣ်၀ဲဒၣ်တၢ်ဒုးတဖှံဆီႇတၢ်ဒိဖဲလီၢ်အိၣ်ခဲလၢာ်လီၤႉၦၤမၤတၢ်န့ၣ်မ့ၢ်၀ဲဒၣ်ပယီၤသုးႇသုးခိးကီၢ်ဆၢ(BGF)တဖၣ်လီၤႉမ့၀ံၤအ၀ဲသ့ၣ်က့ၤနီၤလီၤအီၣ်သးမီၤနီၤႉတၢ်လိာ်ကွဲလီၢ်န့ၣ်နၦ့ၤအီကသံၣ်ကသ့ၣ်န့ၢ်လီၤႉမ့မ့ၢ်တၢ်တၤကျိၣ်တၤစ့လီၢ်လၢအိၣ်(မီးသတ်ရုံး)ကပိၤကပၤတဖၣ်ခီန့ၣ်ပၢၤကီၢ်ဒီးပယီၤသုးအိၣ်ခိး၀ဲတၢ်ဘံၣ်တၢ်ဘၢမီၤနီၤ”အဂ့ၢ်န့ၣ်ကမျၢၢ်လၢအိၣ်၀့ၢ်ပူၤတဂၤစံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ သုးမီၤစိရိၤထုးထီၣ်(martial law)အဃိကမျၢၢ်လၢအိၣ်၀့ၢ်ပူၤတဖၣ်စးထီၣ်ဟါခီ ၆ နၣ်ရံၣ်တုၤလၢဂီၤခီ ၆ နၣ်ရံၣ်န့ၣ် ဘၣ်အိၣ်ဟံၣ်ပူၤလီၤဒီးအ၀ဲသ့ၣ်မ့ဟးထီၣ်လၢတၢ်ချၢန့ၣ်ဘံၣ်ဘၢအိၣ်ခိးတၢ်ဖဲ၀့ၢ်ပူၤတဖၣ်ခးစိ၀ဲဒီးကျိတကးဒံးဘၣ်အမဲာ်ညါဘၣ်လီၤလၢဃိာ်ပူၤစ့ၢ်ကီးအိၣ်၀ဲန့ၣ်လီၤႉဘၣ်ဆၣ်တၢ်တၤကျိၣ်တၤစ့လီၢ်လၢအ၀ဲသ့ၣ်အိးထီၣ်၀ဲအံၤခီန့ၣ်ၦၤဟဲဂဲာ်လိာ်ကွဲန့ၢ်(၂၄)နၣ်ရံၣ်ၦဲၤၦဲၤလီၤဒီးအိၣ်ခိးန့ၢ်၀ဲတၢ်ဘံၣ်တၢ်ဘၢလၢလၢၦဲၤၦဲၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤအလီၢ်ခံန့ၣ်တၢ်စးထီၣ်အိးထီၣ်တၢ်လိာ်ကွဲတၢ်တၤကျိၣ်တၤစ့လီၢ်သ့ၣ်တဖၣ်ဒီး ဖဲအပူၤကွံာ်လါဖ့ၤဘြူၤအါရံၤ ၂ သီအနံၤ သုးမီၤစိရိၤထုးထီၣ်ဘိးဘၣ်ရၤလီၤ၀ဲလၢနိၣ်တကီကီၢ်ဆၣ်အံၤမ့ၢ်၀ဲ သုးတၢ်ပၢတၢ်ပြး၀ံၤလီၢ်ခံန့ၣ် ၦၤဟဲဂဲၤလိာ်ကွဲလၢတၢ်တၤကျိၣ်တၤစ့လီၢ်သ့ၣ်တဖၣ်အံၤဟဲအါထီၣ်၀ဲဒီး ၦၤသူကသံၣ်မူၤဘှီးဒီးတၢ်ဟုၣ်တၢ်ဘျၣ်တဖၣ်ဟဲအါထီၣ်၀ဲအဂ့ၢ်န့ၣ် သ့ၣ်ညါဘၣ်လၢကမျၢၢ်အိၣ်၀့ၢ်ပူၤတဖၣ်အအိၣ် န့ၣ်လီၤႉ

လါမးရှး ၂၂ သီႇ ၂၀၂၃ နံၣ်ႇ ခ့ၣ်အဲးစံၣ် လၢတလၢၤကီၢ်စဲၣ် ပယီၤသုးဟဲထီၣ်ဒီးချံကဘီသုး(၂)ဘ့ၣ်မၤအါထီၣ်သုးဂံၢ်ဘါလၢ(ယ့ကီၢ်ဆၣ်)ပူၤအဂ့ၢ်န့ၣ် ယ့(YGF)တၢ်ပၢၢ်ဆၢကရူၢ် တၢ်ဘိးဘၣ်ရၤလီၤမူဒါခိၣ် စီၤခ့ၣ်သ့ၣ် စံး၀ဲန့ၣ်လီၤႉ လၢ(ယ့ကီၢ်ဆၣ်)အပူၤတၢ်ဒုးကဲထီၣ်၀ဲလၢပယီၤသုးဒီးဟီၣ်က၀ီၤတၢ်ပၢၢ်ဆၢသုးပာ်ဖှိၣ်အဘၢၣ်စၢၤခဲအံၤခဲအံၤဒီး ပယီၤသုးဟဲထီၣ်ဒီးကဘီသုးမၤအါထီၣ်သုးဂံၢ်ဘါလၢပယီၤသုးကလၢၤတၢ်လီၢ်ကအိၣ်အဂၤ(၅၀၀)ဃၣ်ဃၣ်ညါအဂ့ၢ်န့ၣ် ယ့(YGF)တၢ်ပၢၢ်ဆၢကရူၢ် တၢ်ဘိးဘၣ်ရၤလီၤမူဒါခိၣ် စီၤခ့ၣ်သ့ၣ် စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“စးထီၣ်ဖဲ ၁၇ သီန့ၣ်အ၀ဲသ့ၣ်ဟဲထီၣ်ဒီးချံသုး(၂)ဘ့ၣ်ဟဲထီၣ်မၤအါထီၣ်သုးဂံၢ်ဘါမီၤနီၤႉ အ၀ဲသ့ၣ်ထီၣ်မၤၦဲၤ၀ဲ၀ံၤဘျီမ့ၢ်အကလဲၤမၤၦဲၤဒံး၀ဲလၢ၀့ၢ်လၢအဂၤဒံးဧါဒုပတနၢ်ဟူဘၣ်ႉလီလီစဲၤခဲအံၤအိၣ်ဒံးဖဲ(ယ့)၀့ၢ်ပူၤန့ၣ်လီၤႉပနၢ်ဟူကဆှၢ၀ဲလၢ(ဘျံးဒ၀ဲၢ်)တကပၤန့ၣ်တ၀၁်မီၤနီၤႉသုးနီၣ်ဂံၢ်န့ၣ်ကအိၣ်အဂၤ(၅၀၀)ညါႉ မ့၀ံၤၦၤသုးဖိတနီၤန့ၣ်အခးလိသးလၢကျိအိၣ်မီၤနီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ခီဖျိပယီၤသုးဟဲထီၣ်ဒီးကဘီမၤအါထီၣ်သုးဂံၢ်ဘါဒ်အံၤအဃိ(ယ့ကီၢ်ဆၣ်)ပူၤလီၢ်က၀ီၤကမျၢၢ်တဖၣ် ဘၣ်ယိၣ်၀ဲလၢတၢ်ဒုးကဆူၣ်ထီၣ်ဒီးပယီၤသုးကဒွဲၣ်အူအီၣ်သ၀ီအဂ့ၢ်န့ၣ် လီၢ်က၀ီၤသ၀ီဖိိတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ဖဲသ၀ီပူၤအံၤပယီၤသုးဒိးလီၤဃာ်မ့ၣ်ပိၢ်ႉခဲအံၤအ၀ဲသ့ၣ်ဟဲထီၣ်ဒီးချံဟဲမၤအါထီၣ်အၦၤဒ်အံၤအဃိ ပလဲၤတဘူၣ်နီတလိၣ်လၢၤဘၣ်ႉပယီၤသုးမ့နုာ်လီၤလၢတၢ်လီၢ်ကိးတီၤဒဲးလံန့ၣ်ဒွဲၣ်အူအီၣ်ၦၤဟံၣ်အဃိပအိၣ်ဖဲအံၤ ပဘၣ်ယိၣ်တၢ်စ့ၢ်”အဂ့ၢ်န့ၣ် စံး၀ဲန့ၣ်လီၤႉ တကးဒံးဘၣ်လၢန့ၣ်အမဲာ်ညါ လၢတလၢၤကီၢ်စဲၣ်(ယ့ကီၢ်ဆၣ်)အပူၤ စးထီၣ်ဖဲလါယနူၤအါရံၤန့ၣ် ခီဖျိပယီၤသုးဒိးလီၤဃာ်မ့ၣ်ပိၢ်လၢ(ကြိုးတံတား)သ၀ီတၢ်ဖံးအီၣ်မၤအီၣ်လီၢ်အဃိ ၦၤမၤအီၣ်ကျီးဖိတဖၣ်တၢ်ကီတၢ်ခဲအိၣ်ထီၣ်လၢကလဲၤဖံးမၤတၢ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ် အအိၣ်န့ၣ်လီၤႉ ဒ်န့ၣ်အသိးလၢတလၢၤကီၢ်စဲၣ်(ယ့၀့ၢ်)တၢ်သမံသမိးတြဲၤလီၢ်ဒီးတိၤသ့ၣ်တဖၣ်န့ၣ်စ့ၢ်ကီး ပယီၤသုးမၤအါထီၣ်အသုးနီၣ်ဂံၢ်ဟဲအါထီၣ်အါန့ၢ်အပူၤကွံာ်ဒံးအဂ့ၢ်န့ၣ် ဟီၣ်က၀ီၤတၢ်ပၢၢ်ဆၢသုးပာ်ဖှိၣ်ကရူၢ် စံး၀ဲန့ၣ်လီၤႉ

လါမးရှး ၂၂ သီႇ ၂၀၂၃ နံၣ်ႇ ခ့ၣ်အဲးစံၣ် လၢချၢၣ်လွံၢ်ထူၣ်ကီၢ်ရ့ၣ် မိကီၢ်ဆၣ်အပူၤ ဖဲလါမးရှး ၂၀ သီ ဂီၤခီအဆၢကတီၢ်န့ၣ် ပယီၤသုးနုာ်လီၤလၢ (ဥသျှစ်ကုန်း)သ၀ီပူၤဒီးဖီၣ်က့ၤကိး၀ဲလီၢ်က၀ီၤကမျၢၢ်အဂၤ(၂၂)အကျါပၣ်ဃုာ်၀ဲသးစၢ်လၢအသးနံၣ်တၦဲၤဒံးဘၣ်(၃)ဂၤ အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ လီၢ်က၀ီၤကမျၢၢ်လၢတအဲၣ်ဒိးပာ်ဖျါအမံၤတဂၤစံး၀ဲလၢ“ဖဲမဟါဂီၤခီန့ၣ်ပယီၤသုးနုာ်လီၤလၢသ၀ီပူၤဒီးဖီၣ်က့ၤကိး၀ဲကမျၢၢ်(၂၂)ဂၤႉအဖီၣ်၀ဲအကျါန့ၣ်ပၣ်ဃုာ်သးစၢ်လၢအသးနံၣ်တၦဲၤဒံးဘၣ်န့ၣ်(၃)ဂၤႉပၣ်ဃုာ်ဒီးၦၤဃ့ၢ်တၢ်ဒုးလၢအဟဲစံၣ်အိၣ်လၢသ၀ီပူၤအံၤ(၄)ဂၤႉယဆိမိၣ်ကဘၣ်အကသူ၀ဲဒ်တၢ်ဒီသဒၢစုက၀ဲၤတခါအသိးလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲလါမးရှး ၂၀ သီအနံၤန့ၣ်လီၤႉ ဖဲန့ၣ်၀ံၤအလီၢ်ခံတၢ်ကစီၣ်ဟူထီၣ်သါလီၤလၢကမျၢၢ်လၢပယီၤသုးဖီၣ်အီၤတဖၣ်အကျါန့ၣ် တၢ်ပျၢ်လီၤက့ၤ၀ဲၦၤလၢအသးၦၢ်(၂)ဂၤဘၣ်ဆၣ်ခ့ၣ်အဲးစံၣ်–ကညီတၢ်ကစီၣ်၀ဲၤလီၢ်ခိၣ်သ့ၣ် ပာ်ဂၢၢ်ပာ်ကျၢၤ၀ဲလီၤလီၤ ဆီဆီတန့ၢ်ဒံး၀ဲဘၣ်န့ၣ်လီၤႉ တကီၢ်ခါခဲအံၤပယီၤသုးက့ၤကိးလီၢ်က၀ီၤကမျၢၢ်တဖၣ်ဒီးဆီလီၤသးအိၣ်၀ဲလၢ(အုန်းပင်စု)သ၀ီပူၤဒီး ခီဖျိပယီၤသုးခးလီၤကျိဖးဒိၣ်အဃိ(ဥသျှစ်ကုန်း)သ၀ီဖိတဖၣ်ဘၣ်ဃ့ၢ်ထီၣ်၀ဲအဂ့ၢ်န့ၣ် လီၢ်က၀ီၤကမျၢၢ်လၢတအဲၣ်ဒိးပာ်ဖျါအမံၤတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ “ပယီၤသုးဖီၣ်က့ၤကိးၦၤသ၀ီဖိန့ၣ်အမ့ၢ်လီၤႉတဲ၀ဲလၢပယီၤသုးမၢအတၢ်လဲၤပၠးန့ၢ်ကျဲလီၤႉပယီၤသုးခးလီၤကျိဖးဒိၣ်လၢသ၀ီပူၤႉၦၤသ၀ီတနီၤန့ၣ်စံၣ်ထီၣ်မီၤနီၤဘၣ်ဆၣ်စံၣ်ယံၤယံၤတသ့ဘၣ်ႉခီဖျိဘၣ်ဟဲက့ၤဒုးအီၣ်ဆၣ်ဖိကီၢ်ဖိအဆၣ်ဒံးအဃိလီၤႉတၢ်ဒုးမ့တကဲထီၣ်ဒံးဘၣ်န့ၣ်ၦၤတစံၣ်ဘၣ်ႇအါဒၣ်တက့ၢ်ၦၤအိၣ်လၢဟံၣ်လီၤအဃိပယီၤသုးမ့ဟဲနုာ်လီၤလံန့ၣ်ဖီၣ်ၦၤကညီႇခးသံၦၤကညီအိၣ်လီၤ”အဂ့ၢ်န့ၣ် စံး၀ဲန့ၣ်လီၤႉ လၢန့ၣ်အမဲာ်ညါဖဲလါမးရှး ၂၀ သီအနံၤစ့ၢ်ကီး ခီဖျိတၢ်ပၢၢ်ဆၢသုးကရူၢ်လဲၤခး(နတ်သံကွင်း)ပယီၤသုးကလၢၤအံၤ လၢ(ဒြိ)အဃိ ပယီၤသုးက့ၤခးလီၤကဒါကျိဖးဒိၣ်ဆူ(မိကီၢ်ဆၣ်)ဒူသ၀ီတဖၣ်အပူၤအဂ့ၢ်န့ၣ် လီၢ်က၀ီၤဂံၢ်ခီၣ်ထံးတၢ်ကစီၣ်စံး၀ဲအသိးသ့ၣ်ညါဘၣ်န့ၣ်လီၤႉ ဒ်န့ၣ်အသိးခီဖျိခးလီၤကျိဖးဒိၣ်ဆူ(မိကီၢ်ဆၣ်)ဒူသ၀ီပူၤအဃိသ၀ီ(၇)ဖျၢၣ်ကမျၢၢ်အဂၤ(၄၀၀၀)ဘျဲၣ်ဘၣ်ဃ့ၢ်ထီၣ်၀ဲအဂ့ၢ်န့ၣ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢလီၢ်ခၢၣ်သး ထုးထီၣ်ပာ်ဖျါ၀ဲဖဲလါမးရှး ၂၁ သီအနံၤန့ၣ် လီၤႉ