လါယနူၤအါရံၤ ၂၂ သီႇ ၂၀၂၃ သီႇ ခ့ၣ်အဲးစံၣ်
လၢအ့ၣ်ယၣ်၀တံၣ်ကီၢ်ခီဒိၣ်(အ့ၤမဲ)ကီၢ်ဆၣ်အပူၤန့ၣ် ဖဲလါယနူၤအါရံၤ ၂၀ သီ ဂီၤခီ ၁၀ နၣ်ရံၣ်ဃၣ်ဃၣ် အဆၢကတီၢ်(အ့ၤမဲ)ဟီၣ်က၀ီၤပယီၤသုးနုာ်လီၤဖီၣ်၀ဲကညီလံာ်လဲၢ်တၢ်ဆဲးတၢ်လၤကမံးတံာ်ဖိ သးစၢ်(စးသ့စီၣ်မ့)အံၤလၢဟံၣ်ပူၤဒီးက့ၤကိး၀ဲဒၣ်အဂ့ၢ်န့ၣ် ၦၤလၢဘူးဒီးအီၤတဖၣ်စံး၀ဲန့ၣ်လီၤႉ
ပယီၤသုးဖီၣ်က့ၤကိးစးသ့စီၣ်မ့အံၤလၢတၢ်ဂ့ၢ်မနုၤလဲၣ်န့ၣ်တၢ်တသ့ၣ်ညါ၀ဲဘၣ်အသိးလၢ(အ့ၤမဲ)ပၢၤကီၢ်၀ဲၤလီၢ်အံၤတဆီတၢ်ဆှၢအီၤဆူ(မၠီမၠး)ဒီးကတီၢ်ခဲအံၤတၢ်ဖီၣ်ဒုးဃာ်အီၤတၢ်လီၢ်ဖဲလဲၣ်န့ၣ်အဟံၣ်ဖိဃီဖိဟးဃုသ့ၣ်ညါ၀ဲတန့ၢ်ဒံးဘၣ်အဂ့ၢ်န့ၣ် ၦၤလၢဘူးဒီးအဟံၣ်ဖိဃီဖိတဂၤစံး၀ဲဒ်အံၤန့ၣ်လီၤႉ
“ပယီၤသုးဟဲလၢအဟံၣ်န့ၣ်ကဘၣ်ဖဲ ၁၀ နၣ်ရံၣ် ၁၁ နၣ်ရံၣ်န့ၣ်မီၤနီၤႉပယီၤဟဲတုၤဘျီက့ၤကိးအီၤလီၤႉ က့ၤကိး၀ဲလၢ(အ့ၤမဲ)ပၢၤကီၢ်၀ဲၤလီၢ်ႉ မ့၀ံၤဘျီကအိၣ်ဖဲဟါခီ ၆ နၣ်ရံၣ်ဃၣ်ဃၣ်န့ၣ် ၦၤဘိၣ်ဘၢအမဲာ်သၣ် ၦၤက့ၤကိးအီၤလၢတၢ်သမံသမိးတၢ်လီၢ်မီၤနီၤႉတုၤလၢခဲအံၤန့ၣ်ၦၤဟးဃုသ့ၣ်ညါအဖၢမုၢ်လီၤႉဘၣ်ဆၣ်မ့ၢ်အလဲၤတုၤဖဲလဲၣ်န့ၣ်တုၤလၢခဲအံၤၦၤဆဲးကျိးတန့ၢ်ဘၣ်” အဂ့ၢ်န့ၣ် စံး၀ဲန့ၣ်လီၤႉ
ပယီၤသုးဖီၣ်စးသ့စီၣ်မ့အံၤလၢတၢ်ဂ့ၢ်မနုၤလဲၣ်န့ၣ်အဟံၣ်ဖိဃီဖိစ့ၢ်ကီးတသ့ၣ်ညါ၀ဲဘၣ်အသိး တချုးတၢ်ဖီၣ်အီၤဒံးဘၣ် အပူၤကွံာ်လါယနူၤအါရံၤ ၁၃ သီအနံၤန့ၣ် ဖဲတၢ်မၤတၢ်အိၣ်ဖှိၣ်ဖဲ(အ့ၤမဲ)ကညီလံာ်လဲၢ် တၢ်ဆဲးတၢ်လၤ၀ဲၤဒၢးအံၤလၢလံာ်လဲၢ်တၢ်ဆဲးတၢ်လၤအဂ့ၢ်အကျိၤအခါန့ၣ်စ့ၢ်ကီး ပယီၤသုးဖီၣ်သမံသမိးအီၤလၢအမ့ၢ်တၢ်ဒီသဒၢကမျၢၢ်(PDF)သုးမ့ၢ်ဧါႇတမ့ၢ်ဧါဒံးန့ၣ်လီၤႉ
တၢ်ဖီၣ်အီၤ၀ံၤအလီၢ်ခံလါယနူၤအါရံၤ ၁၄ သီအနံၤန့ၣ် စးသ့စီၣ်မ့ ဟဲက့ၤပူၤဖျဲးထီၣ်လၢတၢ်အုၣ်ခီၣ်အီၤအဃိ၀ံၤ...
လါယနူၤအါရံၤ ၂၁ သီႇ ၂၀၂၃ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ် ဒူပျာ်ယာ်ကီၢ်ရ့ၣ် (ကၠၤအ့စ့ၣ်ကၠံ)ကီၢ်ဆၣ်အပူၤ ဖဲတနံၤအံၤ ၂၁ သီ ဂီၤခီအဆၢကတီၢ်န့ၣ် သုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢ(လ့၀ါဖျိ)သ၀ီတၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA) နီၣ်ဂံၢ်(၂)ဒုးယၤ၀ဲၤလီၢ်အဃိ မ့ၣ်အူအီၣ်ကွံာ်၀ဲတၢ်သူၣ်ထီၣ်တနီၤအဂ့ၢ်န့ၣ် သ့ၣ်ညါဘၣ်လၢၦၤဘၣ်မူဘၣ်ဒါအအိၣ် န့ၣ်လီၤႉ
ခီဖျိသုးမိၤစိရိၤကဘီယူၤဟဲတ့ၢ်လီၤမ့ၣ်ပိၢ်အဃိမ့ၣ်အူအီၣ်၀ဲ(DKBA)သုးဟံၣ်ဖိဃီဖိအဟံၣ်အဃီတနီၤဒီး ခီဖျိမ့ၣ်ပိၢ်အံၤလီၤတဲာ်ပိၢ်ဖးထီၣ်၀ဲဖဲတၢ်ဆါဟံၣ်ကပၤဒီးတၢ်ဘါယွၤသရိာ်ကပၤအဃိ တၢ်ဘၣ်ဒိဘၣ်ထံးဟးဂူာ်ဟးဂီၤအိၣ်၀ဲအဂ့ၢ်န့ၣ် သ၀ီၦၤဘၣ်မူဘၣ်ဒါတဂၤစံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
“ကဘီယူၤဟဲတ့ၢ်လီၤမ့ၣ်ပိၢ်ဖဲမုၢ်နၤခီ ၁ နၣ်ရံၣ်န့ၣ်ႉဟဲတ့ၢ်လီၤ၀ဲဖဲ(DKBA)သုးကလၢၤတၢ်လီၢ်တဖျၢၣ်ႇ တၢ်ကွဲးတၢ်ကါကသံၣ်ဒၢးလီၢ်ကပၤန့ၣ်တဖျၢၣ်ႇတၢ်ဘါယွၤသရိာ်ကပၤ(ကၠီၣ်တီၤ)န့ၣ်တဖျၢၣ်မီၤနီၤႉ လၢတၢ်ကနုာ်လီၤတြဲၤအိၣ်ခိးတၢ်လီၢ်နါက့ဟဲတ့ၢ်လီၤ၀ဲစ့ၢ်ႉတ့ၢ်လီၤ၀ဲမ့ၣ်ပိၢ်ကအိၣ်(၆)ဖျၢၣ်ညါႉဘၣ်ဒိ၀ဲဒၣ်တဂၤ”အဂ့ၢ်န့ၣ် စံး၀ဲန့ၣ်လီၤႉ
ခီဖျိသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢလ့၀ါဖျိသ၀ီဒီး(DKBA)သုးကလၢၤတၢ်လီၢ်အခိၣ်အဃၢၤအဃိ သ၀ီဖိတဖၣ်ဃ့ၢ်ထီၣ်ဟးပလဲာ်အသးလံအဂ့ၢ်န့ၣ်သ့ၣ်ညါဘၣ်န့ၣ်လီၤႉဘၣ်ဃးတၢ်ဟဲတ့ၢ်လီၤမ့ၣ်ပိၢ်တၢ်အိၣ်သးအံၤ ခ့ၣ်အဲးစံၣ်–ကညီတၢ်ကစီၣ်၀ဲၤလီၢ်ခိၣ်သ့ၣ် ဂုာ်ကျဲးစၢးဆဲးကျိး၀ဲတၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA) ၦၤဘၣ်မူဘၣ်ဒါတဖၣ်ဘၣ်ဆၣ်ဆဲးကျိးတန့ၢ်ဒံး၀ဲဘၣ်အဃိ ပာ်ဂၢၢ်ပာ်ကျၢၤတၢ်ဘၣ်ဒိဘၣ်ထံးတၢ်ဟးဂူာ်ဟးဂီၤ နီၣ်ဂံၢ်စရီတန့ၢ်ဒံး၀ဲဘၣ်န့ၣ်လီၤႉ
DKBA (နီၣ်ဂံၢ် ၂) ဒုးယၤ၀ဲၤလီၢ်လၢသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်အံၤ ဘၣ်တၢ်တီခိၣ်ရိၣ်မဲအီၤလၢသုးခိၣ်ဒိၣ်စိ စီၤအ့ၤ၀ါဒီး စးထီၣ်ခိ၀ံၣ်–၁၉ တၢ်ဆါကဲထီၣ်သးအခါန့ၣ် အ၀ဲသ့ၣ်ကရူၢ်အိးထီၣ်န့ၢ်၀ဲတၢ်ဆါဟံၣ်အံၤလၢ...
လါယနူၤအါရံၤ ၂၁ သီႇ ၂၀၂၃ နံၣ်ႇ ခ့ၣ်အဲးစံၣ်
လၢတလၢၤကီၢ်စဲၣ် ယ့–မီၣ်လမၠဲၣ်ကီၢ်ဆၣ် (မီၣ်ကန့ၤ)ကရူၢ်အပူၤန့ၣ် ဖဲလါယနူၤအါရံၤ ၂၀ သီ ဂီၤခီ ၉ နၣ်ရံၣ် အဆၢကတီၢ် တၢ်ခိးခးပယီၤသုး(၆)ဂၤဖဲယွၤသ့ၣ်သ၀ီ ပယီၤသုး(၃၁၇)ကျိဖးဒိၣ်သုးရ့ၣ်တၢ်လီၢ်ကပၤန့ၣ်အဃိ ပယီၤသုးသံ၀ဲ(၅)ဂၤဒီးမၤန့ၢ်၀ဲကျိ ၃ ခိၣ်အဂ့ၢ်န့ၣ် ယ့တၢ်ပၢၢ်ဆၢသုး(YGF)ကရူၢ် တၢ်ဘိးဘၣ်ရၤလီၤမူဒါခိၣ် စီၤခ့ၣ်သ့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
ပယီၤသုး(၆)ဂၤအံၤဖဲလၢအလဲၤဆှၢၦၤကၠိဖိ၀ံၤဟဲက့ၤဒိး၀ဲဒီးသိၣ်လ့ၣ်ယီၢ်(ဆဲးကဲး)သၢခိၣ်လၢကျဲအခါန့ၣ် (YGF)ကရူၢ်အိၣ်ခိးခး၀ဲလၢတၢ်ဘၢၣ်စၢၤကအိၣ်(၅)မံးနံးဃၣ်ဃၣ်အဃိပယီၤသုးသံ၀ဲတဘျီဃီဖဲန့ၣ်(၅)ဂၤဒီး ဘၣ်ဒိ၀ဲနးနးကျံၤကျံၤ(၁)ဂၤအဂ့ၢ်န့ၣ် စီၤခ့ၣ်သ့ၣ် စံး၀ဲဒ်အံၤန့ၣ်လီၤႉ
“ပယီၤသုးလၢအအိၣ်တ့ၢ်တဂၤန့ၣ်နါက့တပူၤဘၣ်အဘၣ်ဒိစ့ၢ်ကီးလီၤႉအတသံဒံးဘၣ်အဃိအက့ၤခးဆၢကဒါတၢ်ႉယဆိမိၣ်အသံဒုကသံလီၤႉအ၀ဲသ့ၣ်သိလ့ၣ်ယီၢ်(ဆဲးကဲး) ခီန့ၣ်ပဒွဲၣ်အူအီၣ်တချုးဘၣ်ႉပထၢချုးန့ၢ်ထဲကျိ (၃) ခိၣ်လီၤႉတၢ်ကဲထီၣ်သးနါက့အိၣ်ဘူးဒီးပယီၤသုးအိၣ်တၢ်လီၢ်မီၤနီၤႉအ၀ဲသ့ၣ်က့ၤခးလီၤကျိဖးဒိၣ်စးထီၣ်လၢဂီၤခီတုၤလၢမုၢ်ထူၣ်ညါ” အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲလါယနူၤအါရံၤ ၂၀ သီအနံၤန့ၣ်လီၤႉ
တၢ်ကဲထီၣ်သး၀ံၤအလီၢ်ခံပယီၤသုးကျိဖးဒိၣ်လီၢ်အံၤက့ၤခးလီၤကဒါကျိဖးဒိၣ်ဆူတၢ်ကဲထီၣ်သးအလီၢ်အံၤတပယူာ်ဃီဒီးမၤအါထီၣ်အသုးဂံၢ်ဘါအဃိဘၣ်ဂုၤကဒါလီၢ်ခံအဂ့ၢ်န့ၣ် အ၀ဲစံးအါထီၣ်၀ဲန့ၣ်လီၤႉ
“တၢ်ကဲထီၣ်သးန့ၣ်အိၣ်ဘူးဒီးပယီၤသုး(မအတ–၃၁၇)အဃိအ၀ဲသ့ၣ်က့ၤခးလီၤကဒါကျိဖးဒိၣ်တပယူာ်ဃီလီၤႉ ခီဖျိပယီၤသုးနါက့ဟဲအါထီၣ်အဃိပထၢန့ၢ်ကျိချုး(၃)ခိၣ်လီၤဒီးဘၣ်ယိၣ်လၢပၦၤကဘၣ်ဒိဘၣ်ထံးအဃိပဟးထီၣ်ကဒါဖဲန့ၣ်လီၤ”အဂ့ၢ်န့ၣ် စီၤခ့ၣ်သ့ၣ် စံးအါထီၣ်၀ဲန့ၣ်လီၤႉ
ဘၣ်ဃးဒီးတၢ်ဂ့ၢ်ကဲထီၣ်သးအံၤမ့မ့ၢ်ပယီၤသုးတကပၤထုးထီၣ်ပာ်ဖျါ၀ဲတအိၣ်နီတမံၤဒံးဘၣ်န့ၣ်လီၤႉ...
လါယနူၤအါရံၤ ၂၁ သီႇ ၂၀၂၃ နံၣ်ႇ ခ့ၣ်အဲးစံၣ်
လၢတနီသရံၣ်ကီၢ်ခီဒိၣ် ပလီၢ်ကီၢ်ဆၣ်အပူၤ ဖဲလါယနူၤအါရံၤ ၁၉ သီ မုၢ်ထူၣ်အဆၢကတီၢ်န့ၣ် ပယီၤသုးနုာ်လီၤဒွဲၣ်အူအီၣ်(စှိၣ်ပိၤ)သ၀ီဖိအဟံၣ်လၢတၢ်ဂ့ၢ်တအိၣ်နီတမံၤဘၣ်ဒီးဖီၣ်စ့ၢ်ကီး၀ဲလီၢ်က၀ီၤကမျၢၢ်(၁၅)ဂၤအဂ့ၢ်န့ၣ်သ့ၣ် ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ
ပယီၤသုးဒွဲၣ်အူအီၣ်၀ဲ(စှိၣ်ပိၤ)သ၀ီပူၤဟံၣ်(၃)ဖျၢၣ်ဒီးဖီၣ်က့ၤကိး၀ဲလီၢ်က၀ီၤကမျၢၢ်(၁၅)အသိး ပယီၤသုးတဖၣ်တုၤလၢခဲအံၤအိၣ်ဒံးဖဲသ၀ီပူၤအဃိလီၢ်က၀ီၤသ၀ီဖိအဂၤ(၅၀၀၀)ဃၣ်ဃၣ်ဘၣ်ဃ့ၢ်ထီၣ်၀ဲအဂ့ၢ်န့ၣ် ဟီၣ်က၀ီၤတၢ်ဒီသဒၢကမျၢၢ်ၦၤဘၣ်မူဘၣ်ဒါတဂၤစံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“တၢ်ဒုးကဲထီၣ်တအိၣ်နီတမံၤဘၣ်နုာ်လီၤဒွဲၣ်အူအီၣ်ၦၤဟံၣ်လၢသ၀ီပူၤႉစးထီၣ်ဒွဲၣ်၀ဲဖဲမုၢ်ထူၣ် ၁၁ နၣ်ရံၣ် အခါန့ၣ်ႉခဲအံၤသ၀ီဖိတဖၣ်ဟးပလဲာ်သးအဖၢမုၢ်လီၤႉဖီၣ်ဃာ်ၦၤသ၀ီဖိ(၁၅)န့ၣ်တုၤလၢခဲအံၤတစုလီၤ တပျၢ်လီၤ၀ဲဒံးဘၣ်ႉဖီၣ်သူ၀ဲလၢကဒီသဒၢလီၤသးအဂီၢ်လီၤႉမ့မ့ၢ်ခံခီခံကပၤခီန့ၣ်တၢ်ခးလိာ်သးကဲထီၣ်တအိၣ်ဒံးဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
ပယီၤသုးနုာ်လီၤဒွဲၣ်အူအီၣ်သ၀ီပူၤဟံၣ်(၃)ဖျၢၣ်တကးဒံးဘၣ်အမဲာ်ညါနုာ်လီၤဟုၣ်က့ၤစိာ်၀ဲကမျၢၢ်တၢ်ဖိတၢ်လံၤလၢလုၢ်ဒိၣ်ၦ့ၤဒိၣ်တဖၣ်စ့ၢ်ကီးအသိးကတီၢ်ခဲအံၤ(စှိၣ်ပိၤ)သ၀ီဖိဖိလၢအဘၣ်ဃ့ၢ်ထီၣ်တဖၣ်ကတီၢ်ခဲအံၤလိၣ်ဘၣ်၀ဲဂ့ၢ်ဂီၢ်အူတၢ်အီၣ်တၢ်အီဒီးအိၣ်ဆိးလီၢ်ကျဲအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
လီၢ်က၀ီၤကမျၢၢ်လၢတအဲၣ်ဒိးပာ်ဖျါအမံၤတဂၤစံး၀ဲလၢ“မ့ၣ်အူအီၣ်ကွံာ်ဟံၣ်(၃)ဖျၢၣ်ညါႉမ့၀ံၤအ၀ဲသ့ၣ်နုာ်လီၤဟံစ့ၢ်ကီးကမျၢၢ်အတၢ်ဖိတၢ်လံၤလၢအလုၢ်ဒိၣ်ၦ့ၤဒိၣ်လၢသ၀ီပူၤမီၤနီၤႉတကးဒံးဘၣ်ဟးခးနါစိၤကျိလၢအအဲၣ်ဒိးခး၀ဲန့ၣ်ခး၀ဲလီၤႉကမျၢၢ်လၢတၢ်ဖီၣ်အီၤသ့ၣ်တဖၣ်အံၤတုၤလၢခဲအံၤတၢ်တပျၢ်လီၤ၀ဲဒံးဘၣ်ႉလိၣ်ဘၣ်အခိၣ်သ့ၣ်ဒုတၢ်အီၣ်တၢ်အီလီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
ပယီၤသုးတဖၣ်အံၤတုၤလၢလါယနူၤအါရံၤ ၂၀ သီ ဂီၤခီန့ၣ် အိၣ်ဒံး၀ဲလၢသ၀ီပူၤဒီး ပယီၤသုးနုာ်လီၤဒွဲၣ်အူအီၣ်သ၀ီပူၤဟံၣ်အခါန့ၣ်တၢ်ခးလိာ်သးကဲထီၣ်ဒီးတၢ်ဒီသဒၢကမျၢၢ်သုးအံၤတအိၣ်၀ဲဘၣ်ဒီး ဟးခးပျံၤခးဖုးတၢ်လၢတၢ်ဂ့ၢ်တအိၣ်နီတမံၤဘၣ်အဂ့ၢ်န့ၣ် ဂံၢ်ခီၣ်ထံးၦၤဟ့ၣ်တၢ်ကစီၣ်ဖိတဖၣ်စံး၀ဲန့ၣ်လီၤႉ
လါယနူၤအါရံၤ ၂၀ သီႇ ၂၀၂၃ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ကီးတရံး၀့ၢ်ခိၣ်၀့ၢ်ဃၢၤဒူသ၀ီတဖၣ်အပူၤန့ၣ် တၢ်ဒုးကဲထီၣ်အဃိလီၢ်က၀ီၤကမျၢၢ်လၢအဘၣ်ဃ့ၢ်တၢ်ဒုးသ့ၣ်တဖၣ်အံၤဆါတၢၤကွံာ်အကျီၢ်ပနၢ်တဖၣ်အဂ့ၢ်န့ၣ် လီၢ်က၀ီၤၦၤဃ့ၢ်တၢ်ဒုးဖိတဖၣ်စံး၀ဲန့ၣ်လီၤႉ
လၢကီးတရံး၀့ၢ်ခိၣ်၀့ၢ်ဃၢၤ ကီးနွဲၢ်ကရူၢ်ဒီးမီမးကရူၢ်အပူၤန့ၣ် တၢ်ဒုးကဲထီၣ်လၢပယီၤသုးဒီးတၢ်ပၢၢ်ဆၢသုးပာ်ဖှိၣ် အဘၢၣ်စၢၤအခါန့ၣ်ကမျၢၢ်အကျီၢ်ပနၢ်သံဘၣ်ဒိဘၣ်ထံး၀ဲအါမးဒီးဖဲအပူၤကွံာ်လါဒံၣ်စ့ဘၢၣ် ၁၆ သီအနံၤ ခီဖျိတၢ်ဒုးက့ၤကဲထီၣ်ကဒါအဃိ အ၀ဲသ့ၣ်ကွၢ်ထွဲအကျီၢ်ပနၢ်တချုးလၢၤဘၣ်ဒီးဘၣ်ဆါတၢၤကွံာ်၀ဲဒ်န့ၣ်လီၤအဂ့ၢ်န့ၣ် လီၢ်က၀ီၤကမျၢၢ်လၢတအဲၣ်ဒိးပာ်ဖျါအမံၤတဂၤစံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“တၢ်ဒုးကဲထီၣ်တဘျီအံၤဒုဖးဒိၣ်ညါႉပယီၤသုးခးလီၤကျိဖးဒိၣ်လၢသ၀ီပူၤတပယူာ်ဃီအဃိ ကျီၢ်ပနၢ်သံဘၣ်ဒိဘၣ်ထံးအိၣ်ဒီဒူၣ်ညါမီၤနီၤႉသ၀ီဖိတဖၣ်နါက့ဘၣ်ဟးစံၣ်တုၤလၢခဲအံၤဟဲက့ၤအိၣ်လၢသ၀ီပူၤတဘူၣ်ဒံးဘၣ်ႉဘၣ်စံၣ်ဘၣ်ဃ့ၢ်အဃိပကွၢ်ထွဲပကျီၢ်ပနၢ်တချုးလၢၤဘၣ်မီၤနီၤႉပမ့ထံၣ်ကျီၢ်ပနၢ်ဟးထီၣ်အီၣ်အဆၣ်လၢသ၀ီချၢန့ၣ်ပဖီၣ်အီၤဒီးပဆါတၢၤကွံာ်အီၤဖဲအကန့ၢ်၀ဲဒ်န့ၣ်လီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
ကီးတရံးလီၢ်က၀ီၤဒူဖိသ၀ီဖိတဖၣ်အါဒၣ်တက့ၢ်န့ၣ်လၢတၢ်လုၢ်အီၣ်နီၢ်ခိသးသမူအဂီၢ်ဘုၣ်အီၣ်၀ဲကျီၢ်ပနၢ်ႇမၤအီၣ်မၤအီကျီးဒီးခီဖျိတၢ်ဒုးက့ၤကဲထီၣ်ကဒါလၢဟီၣ်က၀ီၤပူၤအဃိကျီၢ်ပနၢ်ဆၣ်ဖိကီၢ်ဖိလၢအိၣ်သ၀ီပူၤတဖၣ်သံဘၣ်ဒိဘၣ်ထံး၀ဲအါမးဒီးဘၣ်ကိၢ်ဘၣ်ဂီၤလၢခါဆူညါဟံၣ်ဖိဃီဖိကအီၣ်ကအီအဂ့ၢ်န့ၣ် လီၢ်က၀ီၤကမျၢၢ်တဖၣ်စံး၀ဲန့ၣ်လီၤႉ
“ပ၀ဲၦၤသ၀ီဖိတဖၣ်အံၤဒုအခိၣ်သ့ၣ်န့ၣ်ပမၤအီၣ်ကျီးႇဘုၣ်အီၣ်၀ဲကျီၢ်ပနၢ်ဒ်န့ၣ်လီၤမီၤနီၤႉခီဖျိတၢ်ဒုးကဲထီၣ်အဃိပကျီၢ်ပနၢ်အခီၣ်ကၢ်အိၣ်ႇအသံနါက့အိၣ်လီၤႉၦၤလၢအကျီၢ်ပနၢ်သံတဖၣ်န့ၣ်အသူၣ်ဟးဂီၤသးဟးဂီၤအဟီၣ်အိၣ်လီၤႉယၤန့ၣ်ယကျီၢ်အိၣ် (၁၆) ဒုယက့ၤထံၣ်ကဒါက့ၤ (၈) ဒုဒံးလီၤႉအပူၤကွံာ်ကျီၢ်တခိၣ်န့ၣ်ပၦ့ၤဘၣ်အကလီၢ် (၂၀) ကၠးခဲအံၤနဆါန့ၢ်က့ၤထဲ (၁၁) ကလီၢ်လီၤ” အဂ့ၢ်န့ၣ် ကီးတရံးကလံၤထံးလီၢ်က၀ီၤကမျၢၢ်တဂၤစံး၀ဲန့ၣ်လီၤႉ
ဖဲအပူၤကွံာ်(၂)နံၣ်ဘျဲၣ် တချုးသုးဟံးန့ၢ်တၢ်စိတၢ်ကမီၤကဲထီၣ်သးဒံးဘၣ်အခါ လၢကီးတရံး၀့ၢ်ဃၢၤကီးနွဲၣ်ကရူၢ်ဒီး မီမးကရူၢ်အပူၤန့ၣ် ၦၤဘုၣ်ကျီၢ်ပနၢ်ကအိၣ်လၢအဒုး(၈၀၀)ဃၣ်ဃၣ်ညါဒီးဘၣ်ဆၣ်ခဲအံၤအဒု(၁၀၀)မးတအိၣ်တ့ၢ် လၢၤဘၣ် အဂ့ၢ်န့ၣ်ၦၤၦ့ၤဆါကျီၢ်ပနၢ်လၢဟီၣ်က၀ီၤပူၤတဖၣ်စံး၀ဲန့ၣ်လီၤႉ
“တၢ်ဒုးကဲထီၣ်အဃိလၢၦၤကဘုၣ်ကျီၢ်ပနၢ်အဂီၢ်န့ၣ်တၢ်ကီတၢ်ခဲအိၣ်မီၤနီၤႉကျဲတၢ်လဲၤထီၣ်က့ၤလီၤနါက့ကီခဲထီၣ်ႇပ၀ဲဒၣ်နါက့ပဘၣ်က့ၤဆါကဒါတဆီအၦ့ၤတအိၣ်ဘၣ်မီၤနီၤႉသ၀ီဖိတဖၣ်နါက့လၢအကျီၢ်ပနၢ်ကဆှူကွံာ်ဒ်န့ၣ်အဂီၢ်န့ၣ်အ၀ဲသ့ၣ်အဲၣ်ဒိးဆါတၢၤကွံာ်အကျီၢ်ပနၢ်ချ့ချ့လၢကသံၣ်ကသီၦ့ၤႇတၢ်လၢၤဘူၣ်လၢာ်စ့အဂီၢ်ဒ်န့ၣ်မီၤနီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
သုးဟံးန့ၢ်တၢ်စိတၢ်ကမီၤကဲထီၣ်၀ံၤအလီၢ်ခံလၢကီးတရံးကီၢ်ဆၣ်အပူၤ ပယီၤသုးဒီးတၢ်ပၢၢ်ဆၢသုးပာ်ဖှိၣ်ကရူၢ်...
လါယနူၤအါရံၤ ၂၀ သီႇ ၂၀၂၃ နံၣ်ႇ ခ့ၣ်အဲးစံၣ်
လၢတနီသရံၣ်ကီၢ်ခီဒိၣ် သယဲၣ်ခၠီ၀့ၢ်ပူၤန့ၣ် ပယီၤသုးခးပိၢ်ထီၣ်ကျိလၢမုၢ်နၤခီလၢတၢ်ဂ့ၢ်တအိၣ်နီတမံၤဘၣ်အဂ့ၢ်န့ၣ် ကမျၢၢ်လၢအိၣ်၀့ၢ်ပူၤတဖၣ်စံး၀ဲန့ၣ်လီၤႉ
တလါအံၤအတီၢ်ပူၤလၢ(သယဲၣ်ခၠီ)၀့ၢ်ပူၤန့ၣ်ပယီၤသုးခးပိၢ်ထီၣ်ကျိလၢမုၢ်နၤခီလၢတၢ်ဂ့ၢ်တအိၣ်နီတမံၤဘၣ်အဃိ ကမျၢၢ်လၢအိၣ်၀့ၢ်ပူၤတဖၣ်ဘၣ်မံလၢတၢ်ပျံၤတၢ်ဖုးပူၤအဂ့ၢ်န့ၣ် ကမျၢၢ်လၢအိၣ်၀့ၢ်ပူၤတဂၤစံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“ဖဲမဟါမုၢ်နၤခီ ၁၁ နၣ်ရံၣ်ဃၣ်ဃၣ်အဆၢကတီၢ်န့ၣ် ပနၢ်ဟူကျိသီၣ်ထီၣ်မီၤနီၤႉ ကျိသီန့ၣ်ဘၣ်လၢၦၤမံအဆၢကတီၢ်ႉအဆၢကတီၢ်ဖဲန့ၣ်၀့ၢ်ပူၤအံၤၦၤဟးထီၣ်တၢ်ချၢတအိၣ်လၢၤဘၣ်ႉအ၀ဲသ့ၣ်ခးတၢ်ဒ်အံၤအဃိပဘၣ်ပျံၤလၢမ့ၢ်ကျိချံကလီၤတဲာ်လၢပဟံၣ်ဖီခိၣ်ဆံးယံၤလဲၣ်မီၤနီၤႉတလါအံၤအတီၢ်ပူၤန့ၣ်ပနၢ်ဟူကျိသီၣ်ခဲအံၤခဲအံၤလီၤႉကျိသီၣ်န့ၣ်ကဘၣ်မ့ၢ်ဖဲ(သယဲၣ်ခၠီ)ပၢၤကီၢ်၀ဲၤလီၢ်န့ၣ်လီၤႉတၢ်ဒုးမ့ကဲထီၣ်န့ၣ်မ့ၢ်ကဘၣ်လဲၤစံၣ်အိၣ်ဖဲလဲၣ်မးတသ့ၣ်ညါဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲလါယနူၤအါရံၤ ၁၉ သီအနံၤန့ၣ်လီၤႉ
ခီဖျိပယီၤသုးခးပိၢ်ထီၣ်ကျိလၢတၢ်ဂ့ၢ်တအိၣ်နီတမံၤအံၤဘၣ်အဃိကမျၢၢ်တဖၣ်လၢမုၢ်နၤခီန့ၣ်ပျံၤတၢ်ဖုးတၢ်ဒီး သုးမီၤစိရိၤစုတီၤဖီလာ်(လ၀က)ပၢပြးကရူၢ်ဟးသံသမိးၦၤနီၣ်ဂံၢ်ႇဖးဖီမုၢ်စရီလၢၦၤဟံၣ်အခါန့ၣ်တနၢ်ဟူၦၤခးပိၢ်ထီၣ်ကျိဘၣ်အဂ့ၢ်န့ၣ် ကမျၢၢ်အိၣ်၀့ၢ်ပူၤလၢအဂၤတဂၤစံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“ဖဲမဟါမုၢ်နၤခီန့ၣ်ပနၢ်ဟူကျိပိၢ်ထီၣ်အကလုၢ်ဖးဒိၣ်ခံထံၣ်ဒီးပနၢ်ဟူၦၤမၤခးပိၢ်ထီၣ်ကျိမီၤနီၤႉ မ့မ့ၢ်ပၢပြးသးၦၢ်ဟးထၢတၢ်ဖးစရီလၢမုၢ်နၤခီအခါန့ၣ်ခီဒုပတနၢ်ဟူကျိသီၣ်ဘၣ်ႉမ့ၢ်အဘၣ်ဖုးအတီၤခီဧါဒုပတသ့ၣ်ညါဘၣ်ႉမ့ၢ်ဘၣ်ဖုးၦၤဟဲထၢတၢ်ဖးစရီလၢမုၢ်နၤခီန့ၣ်ဧါႇမ့မ့ၢ်တခီဘၣ်ဖုးလၢကျိပိၢ်ထီၣ်ခီဧါႉတၢ်အံၤဘၣ်ပျံၤက့ၤလၢမုၢ်နၤခီကတုၤဃီၤက့ၤခီလီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲလါယနူၤအါရံၤ ၁၉ သီအနံၤန့ၣ်လီၤႉ
ပယီၤသုးတြဲၤအိၣ်ခိးတၢ်လီၢ်လၢအိၣ်(သယဲၣ်ခၠီ)ကီၢ်ဆၣ်ပူၤတဖၣ်အံၤစ့ၢ်ကီးခးပိၢ်ထီၣ်ကျိလၢတၢ်ဂ့ၢ်တအိၣ်နီတမံၤဘၣ်အိၣ်၀ဲတလီၢ်လီၢ်ဒီးအိၣ်ခိးဖီၣ်သမံသမိးလီၢ်က၀ီၤကမျၢၢ်လၢတၢ်ဂ့ၢ်တအိၣ်နီတမံၤဘၣ်ႇဃ့အီၣ်စ့အိၣ်၀ဲအဂ့ၢ်န့ၣ် ဂံၢ်ခီၣ်ထံးၦၤဟ့ၣ်တၢ်ကစီၣ်ဖိတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ
လါယနူၤအါရံၤ ၁၉ သီႇ ၂၀၂၃ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၄)ဟီၣ်က၀ီၤ လၢၢ်ကဆီကီၢ်ဆၣ်အပူၤန့ၣ် ကီၢ်သူလ့ၤသုးမုၢ်ဒိၣ်(KTLA)အပှၤလၢဟူးဂဲၤဖဲကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးရ့ၣ်(၂၀၃)ဟီၣ်က၀ီၤပူၤ အံၤတဖၣ် မၤသံ၀ဲကမျၢၢ်(၈)ဂၤတၢ်ကစီၣ်သန့ကွဲးပာ်ဖျါထီၣ်၀ဲအိၣ်တနီၤအဖီခိၣ်အံၤ (KTLA)က့ၤခီၣ်ဆၢကဒါ၀ဲန့ၣ်လီၤႉ
ဖဲအပူၤကွံာ်လါယနူၤအါရံၤ ၁၃ သီအနံၤန့ၣ် ခ့ၣ်အဲၣ်ယူၣ်(သုးက့ ၄)ကွဲၤကလုၢ်တၢ်ကစီၣ်သန့ထုးထီၣ်ပာ်ဖျါ၀ဲလၢ (သုးက့ ၄)ဟီၣ်က၀ီၤ သုးခိၣ် စီၤနၢၤဒါမၠးတီခိၣ်ရိၣ်မဲ(KTLA)သုးကရူၢ်အၦၤလိာ်ဘၢလိာ်ကွီၢ်ကမျၢၢ်တဖၣ်အံၤ လၢတၢ်မဲာ်ချံဒီးမၤသံကွံာ်၀ဲကမျၢၢ်(၈)ဂၤအံၤဖဲယွၤဟ့ၣ်လူၢ်ဒီးနါမတိၢ်သ၀ီဘၢၣ်စၢၤတၢ်ဂ့ၢ်အံၤအဖီခိၣ် (KTLA)အခိၣ် စီၤနၢၤဒါမၠး က့ၤခီၣ်ဆၢကဒါ၀ဲဒ်အံၤန့ၣ်လီၤႉ
အ၀ဲစံး၀ဲလၢ“ယသံကွၢ်ယၦၤန့ၣ်တမ့ၢ်ဘၣ်ႉပၦၤန့ၣ်တမၤတၢ်ဒ်န့ၣ်ဘၣ်ႉနၢ်ဟူ၀ဲလၢတၢ်ကစီၣ်န့ၣ်ၦၤလၢအမၤတၢ်န့ၣ်အိၣ်ပာ်စၢၤလၢတၢ်ကိပူၤႉယသမံသမိးကွၢ်န့ၣ်တမ့ၢ်ပၦၤဘၣ်ႉတဲ၀ဲဒၣ်လၢအမ့ၢ်ဒုးဒါတၢ်မဲာ်ချံဧါန့ၣ်ဘၣ်ဆၣ်ယသံကွၢ်န့ၣ်တမ့ၢ်ယၦၤဘၣ်ႉသနါက့ယဆိမိၣ်အကစၢ်ကဒဲကဒဲလၢတၢ်ကိပူၤႇမ့ၢ်ၦၤသ၀ီဖိဧါႇၦၤမၤတၢ်ဒုပတသ့ၣ်ညါလီၤတံၢ်ဘၣ်”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
ဒ်ကွဲၤကလုၢ်ထုးထီၣ်ပာ်ဖျါ၀ဲအသိးန့ၣ် ဖဲလါယနူၤအါရံၤ ၁၃ သီအနံၤ (KTLA)အၦၤအိၣ်ဖဲယွၤဟ့ၣ်လူၢ်ကီၢ်ဆၢအံၤ လိာ်ဘၢလိာ်ကွီၢ်၀ဲကမျၢၢ်တဖၣ်အံၤလၢတၢ်မဲာ်ချံဒီး မၤသံ၀ဲကမျၢၢ်(၈)ဂၤအံၤဖဲယွၤဟ့ၣ်လူၢ်ဒီးနါမတိၢ်သ၀ီဘၢၣ်စၢၤ အဂ့ၢ်န့ၣ် ပာ်ဖျါ၀ဲန့ၣ်လီၤႉ
ဟီၣ်က၀ီၤတၢ်လီၢ်၀ဲန့ၣ်အပူၤ ခ့ၣ်အဲၣ်ယူၣ်(သုးက့ ၄)ဟူးဂဲၤ၀ဲအသိး ဖီၣ်စုက၀ဲၤကရူၢ်ကရၢလၢအဂၤသ့ၣ်တဖၣ် စ့ၢ်ကီးဟူးဂဲၤ၀ဲဒၣ်အိၣ်န့ၣ်လီၤႉဘၣ်ဃးဒီးတၢ်မၤသံကမျၢၢ်(၈)ဂၤတၢ်ဂ့ၢ်အံၤမ့ၢ်တၢ်ကရၢကရိဖဲလဲၣ်တဒူၣ်မၤ၀ဲလဲၣ်န့ၣ်တၢ်ထုးထီၣ်ပာ်ဖျါအီၤလၢအဖိးသဲစးတအိၣ်ဒံး၀ဲဘၣ်အသိး ခ့ၣ်အဲးစံၣ်–ကညီတၢ်ကစီၣ်၀ဲၤလီၢ်ခိၣ်သ့ၣ်စ့ၢ်ကီး ပာ်ဂၢၢ်ပာ်ကျၢၤအီၤလီၤလီၤဆီဆီတန့ၢ်ဒံး၀ဲဘၣ်န့ၣ်လီၤႉ
တကးဒံးဘၣ်ခ့ၣ်အဲးစံၣ်–ကညီတၢ်ကစီၣ်၀ဲၤလီၢ်ခိၣ်သ့ၣ်ဂုာ်ကျဲးစၢးဆဲးကျိးခ့ၣ်အဲၣ်ယူၣ်(သုးက့ ၄)ၦၤဘၣ်မူဘၣ်ဒါတဖၣ်အိၣ်၀ဲဘၣ်ဆၣ်ဆဲးကျိးတန့ၢ်ဘၣ်ဒီးအ၀ဲသ့ၣ်တကပၤစ့ၢ်ကီးထုးထီၣ်ပာ်ဖျါ၀ဲလီၤလီၤဆီဆီတအိၣ်ဒံး၀ဲဘၣ်န့ၣ်လီၤႉ
လါယနူၤအါရံၤ ၁၉ သီႇ ၂၀၂၃ နံၣ်ႇ ခ့ၣ်အဲးစံၣ်
လၢတလၢၤကီၢ်စဲၣ် သၤဖၠူၤစယၣ်ကီၢ်ဆၣ်အပူၤန့ၣ် ဖဲလါယနူၤအါရံၤ ၁၈ သီ ၈ီၤခီ ၆း၃၀ အဆၢကတီၢ် ယ့တၢ်ပၢၢ်ဆၢသုးကရူၢ်(YGF)နုာ်လီၤခး၀ဲ(ထ့ဆှူ)သ၀ီပူၤ ပၢၤကီၢ်၀ဲၤလီၢ်အံၤအဃိ ပၢၤကီၢ်သံ(၃)ဂၤဒီး ဘၣ်ဒိ၀ဲ(၅)ဂၤအဂ့ၢ်န့ၣ် (YGF)ထုးထီၣ်ပာ်ဖျါ၀ဲန့ၣ်လီၤႉ
ပၢၤကီၢ်၀ဲၤလီၢ်ကရၢၢ်ပူၤန့ၣ်ပၢၤကီၢ်အိၣ်၀ဲအဂၤ(၁၀)ဃၣ်ဃၣ်လီၤအသိးဖဲယ့တၢ်ပၢၢ်ဆၢ(YGF)သုးပာ်ဖှိၣ်ကရူၢ် နုာ်လီၤခး၀ဲအခါတၢ်ခးလိာ်သးကဲထီၣ်ဒီးပၢၤကီၢ်သ့ၣ်တဖၣ်အံၤကအိၣ်အမံးနံး(၂၀)ဃၣ်ဃၣ်ဒီး ထီၣ်၀ဲပၢၤကီၢ်၀ဲၤလီၢ်အံၤတန့ၢ်၀ဲဘၣ်အဂ့ၢ်န့ၣ်(YGF)လံာ်တၢ်ပာ်ဖျါပူၤပာ်ဖျါ၀ဲန့ၣ်လီၤႉ
“ပယီၤသုးမၤအါထီၣ်သုးဂံၢ်ဘါႉပၢၤကီၢ်၀ဲၤလီၢ်အံၤသုးဂံၢ်ဘါကအိၣ်အဂၤ (၁၀) ဃၣ်ဃၣ်လီၤႉ ပယီၤသုးဟဲထီၣ်မၤစၢၤအ၀ဲသ့ၣ်ႉဖဲမဟါန့ၣ်အ၀ဲသ့ၣ်ခးလီၤကျိဖးဒိၣ်လၢပအိၣ်ဟူးဂဲၤတၢ်လီၢ်ဒီတနံၤကျၢၤညါ” အဂ့ၢ်န့ၣ် (YGF)သုးဖိ ဘိၤကၠၤယ့ၣ် စံး၀ဲန့ၣ်လီၤႉ
ဘၣ်ဃးဒီးတၢ်နုာ်လီၤခးပၢၤကီၢ်၀ဲၤလီၢ်အံၤတၢ်ကစီၣ်ရၤလီၤသးလၢ(social media)ပူၤအိၣ်၀ဲဘၣ်ဆၣ် မ့မ့ၢ်လၢပယီၤသုးတကပၤခီန့ၣ်ထုးထီၣ်ပာ်ဖျါ၀ဲလီၤလီၤဆီဆီတအိၣ်၀ဲဘၣ်န့ၣ်လီၤႉ
ဒ်န့ၣ်အသိးဖဲအပူၤကွံာ်လါယနူၤအါရံၤ ၁၁ သီအနံၤစ့ၢ်ကီး လၢတလၢၤကီၢ်စဲၣ် လမဲကီၢ်ဆၣ်အပူၤန့ၣ် ယ့တၢ်ပၢၢ်ဆၢသုးကရူၢ်(YGF)နုာ်လီၤခး၀ဲ(န့ၣ်ကယ့ၤ)သ၀ီပၢၤကီၢ်၀ဲၤလီၢ်အံၤအခါ ပၢၤကီၢ်ဃ့ၢ်ထီၣ်၀ဲခဲလၢာ်ဒီး ဒွဲၣ်အူအီၣ်ကွံာ်၀ဲပၢၤကီၢ်၀ဲၤလီၢ်အဂ့ၢ်န့ၣ် (YGF)ထုးထီၣ်ပာ်ဖျါဒံး၀ဲန့ၣ်လီၤႉ
လါယနူၤအါရံၤ ၁၉ သီႇ ၂၀၂၃ နံၣ်ႇ ခ့ၣ်အဲးစံၣ်
တရူးထံဖိကီၢ်ဖိလၢအိၣ်(စွ့ၤကိၣ်ကိၤ)၀့ၢ်သီပူၤလၢအတဖိးသဲစးဘၣ်သ့ၣ်တဖၣ်အံၤဖဲအ၀ဲသ့ၣ်ဟးထီၣ်က့ၤလီၤအခါဒိး၀ဲသိလ့ၣ်နီၣ်ဂံၢ်လၢအအိၣ်ဒီးတရူးလံာ်မဲာ်ဖျၢၣ်အံၤဒီးဟးထီၣ်က့ၤလီၤလၢမၠၣ်၀တံၣ်၀့ၢ်ပူၤအခါစ့ၢ်ကီးတၢ်သမံသမိးအ၀ဲသ့ၣ်တအိၣ်နီတမံၤဘၣ်အဂ့ၢ်န့ၣ် ကမျၢၢ်လၢအိၣ်၀့ၢ်ပူၤတဖၣ်စံး၀ဲန့ၣ်လီၤႉ
တရူးထံဖိကီၢ်ဖိလၢအိၣ်(စွ့ၤကိၣ်ကိၤ)၀့ၢ်သီ ကၣ်စံၣ်နိၣ်တၢ်ဖံးတၢ်မၤလီၢ်လၢအတဖိးသဲစးဘၣ်သ့ၣ်တဖၣ်အံၤ စှၤသီအတီၢ်ပူၤအ၀ဲသ့ၣ်ဟးထီၣ်က့ၤဒိး၀ဲသိလ့ၣ်နီၣ်ဂံၢ်လၢအအိၣ်ဒီးတရူးအလံာ်မဲာ်ဖျၢၣ်စိာ်ဃုာ်၀ဲကျိအိၣ်အသိးအ၀ဲသ့ၣ်လ့ၢ်ထီၣ်လ့ၢ်လိၤလၢမၠၣ်၀တံၣ်၀့ၢ်ပူၤအခါစ့ၢ်ကီးတၢ်တသမံသမိးအ၀ဲသ့ၣ်တအိၣ်၀ဲဘၣ်ဒီးတၢ်ပျဲဟးထီၣ်က့ၤလီၤအ၀ဲသ့ၣ်သဘျ့လီၤအဂ့ၢ်န့ၣ်ကမျၢၢ်လၢအိၣ်မၠၣ်၀တံၣ်၀့ၢ်ပူၤလၢအထံၣ်တၢ်ကဲထီၣ်သးဒီးအမဲာ်တဂၤစံး၀ဲဒ်အံၤန့ၣ်လီၤႉ
“တရူးတဖၣ်အံၤအဟးထီၣ်က့ၤလီၤန့ၣ်အပျဲၢ်ပိာ်အခံစိာ်ဃုာ်၀ဲကျိသၢဂၤလွံၢ်ဂၤညါအဃိ ပယီၤသုးတြဲၤအိၣ်ခိးသမံသမိးတၢ်လီၢ်တဖၣ်နါက့မ့မ့ၢ်သိလ့ၣ်လၢအနီၣ်ဂံၢ်အိၣ်ဒီးတရူးလံာ်မဲာ်ဖျၢၣ်န့ၣ် အတသမံသမိး၀ဲဘၣ်ႉ၀့ၢ်ပူၤဒုပယီၤသုးဟးဆှၣ်သမံသမိးတၢ်အိၣ်လီၤႉမ့မ့ၢ်တရူးထံဖိကီၢ်ဖိနုာ်လီၤအိၣ်လၢအတဖိးသဲစးဟးထီၣ်က့ၤလီၤအီသံးမူးဒ်န့ၣ်ခီန့ၣ်အ၀ဲသ့ၣ်မၤ၀ဲတဘူၣ်ဘၣ်” အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
အပူၤကွံာ်ဒီကလုာ်ဒံၣ်မိၣ်ကရ့ၣ်စံၣ်ပၣ်တံၣ်(NUG)ပဒိၣ်ပၢတၢ်စိၤအခါန့ၣ်တၢ်ကစီၣ်ဟူထီၣ်ဒံးလၢတၢ်ကပတုာ်ကွံာ််(စွ့ၤကိၣ်ကိၤ)၀့ၢ်သီတၢ်တိာ်ကျဲၤအိၣ်၀ဲဘၣ်ဆၣ်သုးဟံးန့ၢ်တၢ်စိတၢ်ကမီၤကဲထီၣ်၀ံၤအလီၢ်ခံပတုာ်ကွံာ်သးတအိၣ်၀ဲဘၣ်ဒီးမ့မ့ၢ်တခီဆဲးအိၣ်ဆဲးလဲၤတရံးသးအဖၢမုၢ်ဒံးလီၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
လၢစွ့ၤကိၣ်ကိၤတရူး၀့ၢ်သီ(ကၤစံၤနိၤ)လီၢ်ႇတၢ်မုာ်လၤသးဖှံလီၢ်ႇ(online)တၢ်တၤကျိၣ်တၤစ့လီၢ်သ့ၣ်တဖၣ်အံၤ ၦၤထံဂုၤကီၢ်ဂၤလၢအတဖိးသဲစးတဖၣ်ဟဲဖံးတၢ်မၤတၢ်အိၣ်၀ဲဒီးနုာ်လီၤခူသူၣ်၀ဲလၢကီၢ်ကၠီၣ်တဲၣ်–ကီၢ်ပယီၤကီၢ်ဆၢ လၢအတဖိးသဲစး ဟဲဂဲၤလိာ်ကွဲတၢ်တၤကျိၣ်တၤစ့ဒီးဟဲမုာ်လၤသးဖှံ၀ဲအါမးအဂ့ၢ်န့ၣ် ကမျၢၢ်လၢအိၣ်ဘူးဖဲန့ၣ်တဖၣ် စံး၀ဲန့ၣ်လီၤႉ
“ခဲအံၤ(စွ့ၤကိၣ်ကိၤ)ဒုလီၤဘီလီၤမုၢ်ဒိၣ်မးလီၤႉတရူးထံဖိကီၢ်ဖိဒီးၦၤထံဂုၤကီၢ်ဂၤဖိလၢအတဖိးသဲစးဘၣ်တဖၣ်အိၣ်ဖဲန့ၣ်ဒီဒူၣ်ညါႉမ့မ့ၢ်ၦၤကီၢ်ပယီၤဖိဒီးၦၤကညီဖိခီန့ၣ်ဘၣ်မၤတၢ်လၢတၢ်ဖီလာ်ဒ်န့ၣ်လီၤႉဘၣ်ခိးတ့ထီၣ်ဘှီထီၣ်တၢ်ဒ်န့ၣ်မီၤနီၤႉခီဖျိကျိၣ်စ့တၢ်ဟဲနုာ်ဂ့ၤအဃိၦၤဟဲအိၣ်ဖဲအံၤအိၣ်ဒီဒူၣ်ညါႉၦၤဒိးလဲလီၤဟံၣ်ကရၢၢ်တဖၣ်နါက့န့ၢ်ဒိၣ်မးႉကီၢ်ပူၤတၢ်အိၣ်သးတဂ့ၤဘၣ်နါက့မ့မ့ၢ်(စွ့ၤကိၣ်ကိၤ)ဒုလီၤဘီလီၤမုၢ်ဒိၣ်မးန့ၣ်ပတဲအီၤသ့လီၤမီၤနီၤ” အဂ့ၢ်န့ၣ် ၦၤလၢအမၤ(ကၤစံၤနိၤ)တၢ်သူၣ်ထီၣ်ဘှီထီၣ်လီၢ်တဂၤစံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
စွ့ၤကိၣ်ကိၤ၀့ၢ်သီ(ကၣ်စံၣ်နိၣ်)တၢ်ဖံးတၢ်မၤလီၢ်သ့ၣ်တဖၣ်အံၤတရူးထံဖိကီၢ်ဖိတကးဒံးဘၣ်အမဲာ်ညါၦၤကီၢ်ကၠီၣ်တဲၣ်ဖိဒီးၦၤထံဂုၤကီၢ်ဂၤတဖၣ်ဟဲနုာ်လီၤအိၣ်ဆိးဖံးအီၣ်မၤအီၣ်တၢ်အိၣ်၀ဲအါမးအသိးသုးမီၤစိရိၤခိၣ်နၢ်အဒံၣ်အဖိတဖၣ်စ့ၢ်ကီးဟဲဟးလိာ်ကွဲမၤမုာ်လၤသးဖှံအသးဒီးဟဲလိာ်ကွဲတၢ်တၤကျိၣ်တၤစ့အိၣ်၀ဲတလီၢ်လီၢ်အဂ့ၢ်န့ၣ် လီၢ်က၀ီၤဂံၢ်ခီၣ်ထံးၦၤဟ့ၣ်တၢ်ကစီၣ်ဖိတဖၣ်စံး၀ဲန့ၣ်လီၤႉ
လါယနူၤအါရံၤ ၁၈ သီႇ ၂၀၂၃ နံၣ်ႇ ခ့ၣ်အဲးစံၣ်
လၢကညီကီၢ်စဲၣ် တၢ်ကြဲၢ်ကီၢ်ဆၣ်အပူၤန့ၣ် တကီၢ်ခါခဲအံၤခီဖျိဆီဘၣ်တၢ်ဆါကဲထီၣ်သးလၢ တၤကယါကရူၢ်ဒီးပတးကရူၢ် ဒူသ၀ီတဖၣ်အပူၤအဃိ လီၢ်က၀ီၤကမျၢၢ်တဖၣ်ဆှူ၀ဲအါမးအဂ့ၢ်န့ၣ် သ့ၣ်ညါဘၣ်န့ၣ်လီၤႉ
တၢ်ကြဲၢ်ကီၢ်ဆၣ်ဒူသ၀ီတဖၣ်အပူၤန့ၣ်လီၢ်က၀ီၤကမျၢၢ်(၈၀)မျးကယၤအံၤဒ်သိးဟံၣ်ဖိဃီဖိကျိၣ်စ့တၢ်ဟဲနုာ်ကအိၣ်အဂီၢ်အါဒၣ်တက့ၢ်ဘုၣ်အီၣ်၀ဲဆီဒီးဖဲတလါအံၤလါယနူၤအါရံၤအတီၢ်ပူၤန့ၣ်ဆီဘၣ်တၢ်ဆါကဲထီၣ်သးတပယူာ်ဃီသံ၀ဲအါအါဂီၢ်ဂီၢ်န့ၣ်လီၤႉ
ခီဖျိဆီလၢလီၢ်က၀ီၤသ၀ီဖိဘုၣ်၀ဲတဖၣ်အံၤသံ၀ဲအါအါဂီၢ်ဂီၢ်အဃိတၢ်ကီတၢ်ခဲအိၣ်ထီၣ်လၢကသံၣ်ကသီၦ့ၤႇၦၤဂ့ၢ်၀ီဒီးဒံၣ်ဖိကၠိတၢ်လၢာ်ဘူၣ်လၢာ်စ့တဖၣ်အဂီၢ်အဂ့ၢ်န့ၣ် တၤကယါသ၀ီ နီၢ်အဲစၤမိ စံးဘၣ်ခ့ၣ်အဲးစံၣ်–ကညီတၢ်ကစီၣ် ဒ်အံၤန့ၣ်လီၤႉ
“ပမ့ဘုၣ်ဆီလၢဟံၣ်န့ၣ်ပဆါဘၣ်တနံၣ်န့ၣ် (၂) ဘျီညါႉစ့လၢပဆါဆီန့ၢ်အပိၣ်အဘျဲၣ်တဖၣ်ပဆူးဃာ်အီၤမီၤနီၤႉလၢပဒံၣ်ပဖိကၠိတၢ်လၢာ်ဘူၣ်လၢာ်စ့ႇသ၀ီပူၤၦၤမ့မၤဘူၣ်မၤဘါဒီးပသမူသကိးမ့ဟဲဟးလၢပဟံၣ်ပတူၢ်လိာ်မုာ်အ၀ဲသ့ၣ်အိၣ်အဃိ ပဘုၣ်၀ဲဒၣ်ဆီအံၤလီၤမီၤနီၤ” အဂ့ၢ်န့ၣ်စံး၀ဲန့ၣ်လီၤႉ
လၢကညီကီၢ်စဲၣ်အပူၤအါဒၣ်တက့ၢ်တၢ်စူၤခါဒီးမူခိၣ်ကလံၤသီၣ်ဂီၤဆီတလဲသးအဆၢကတီၢ်န့ၣ် ဆီဘၣ်တၢ်ဆါဟဲကဲထီၣ်သးအါ၀ဲဒီးဘၣ်ဆၣ်တၢ်ဂိၢ်ခါအကတီၢ်ဆီဘၣ်တၢ်ဆါဒ်အံၤကဲထီၣ်သးတအိၣ်ဘၣ်အဃိ လီၢ်က၀ီၤကမျၢၢ်တပာ်သူၣ်ပာ်သးဘၣ်၀ဲအဖီခိၣ်အံၤဆီဘၣ်သံ၀ဲအါအါဂီၢ်ဂီၢ်ကဲထီၣ်သးဒ်အံၤလီၤအဂ့ၢ်န့ၣ် စီၤတၤအဲ လၢအဘုၣ်ဆီတဂၤစံး၀ဲဒ်အံၤန့ၣ်လီၤႉ
“အခီၣ်ထံးန့ၣ်ပဆိမိၣ်လၢတၢ်အ့ၣ်အီၤအဃိအသံဒ်န့ၣ်လီၤမီၤနီၤႉလၢခံမးဆီတဖၣ်ဟးတသ့လၢၤဘၣ်အခီၣ်လီၤဘျ့မးပသ့ၣ်ညါအီၤလီၤႉဟံၣ်လၢအိၣ်သ၀ီပူၤဖဲအံၤတဖၣ်နါက့အဆီသံခဲလၢာ်ႇအခီၣ်လီၤဘျ့ဟးတသ့လၢၤဘၣ်ဘျီ သံကွံာ်၀ဲခဲလၢာ်လီၤ” အဂ့ၢ်န့ၣ် စံး၀ဲန့ၣ်လီၤႉ
ဆီလၢအဘၣ်တၢ်ဆါအခီၣ်လီၤဘျ့ဟးတသ့လၢၤဘၣ်သ့ၣ်တဖၣ်အံၤန့ၣ်လီၢ်က၀ီၤကမျၢၢ်တနီၤကျဲဒုးအီၣ်၀ဲ(ရဲယို)လၣ်အထံအိၣ်၀ဲဘၣ်ဆၣ်ဆီတဖၣ်ဆဲးသံ၀ဲဒၣ်တပယူာ်ဃီန့ၣ်လီၤႉ
လၢတၢ်န့ၣ်အဃိသ၀ီလၢအိၣ်ဘူးတၢ်ခိၣ်တၢ်ဃၢၤဖဲန့ၣ်သ့ၣ်တဖၣ်စ့ၢ်ကီးဘၣ်ယိၣ်၀ဲလၢဆီဆါကဘၣ်ကူဘၣ်ဂာ်အဃိ စှၤသီအတီၢ်ပူၤအံၤၦၤၦ့ၤအီၣ်ဆီတအိၣ်လၢၤဘၣ်အသိးဆီစ့ၢ်ကီးအၦ့ၤတအိၣ်၀ဲလၢၤဘၣ်အဂ့ၢ်န့ၣ် တၤကယါသ၀ီဖိတဖၣ်စံး၀ဲန့ၣ်လီၤႉ
တၢ်ကြဲၢ်ကီၢ်ဆၣ် တၤကယါကရူၢ်ဒီးပတးကရူၢ်ပူၤ သ၀ီ(၁၈)ဖျၢၣ် လီၢ်က၀ီၤသ၀ီဖိတဖၣ်အါဒၣ်တက့ၢ်န့ၣ် ဘုၣ်အီၣ်၀ဲဆီဒီးစးထီၣ်ဖဲလါယနူၤအါရံၤထီၣ် ၃ သီအနံၤန့ၣ် ဆီဘၣ်တၢ်ဆါသံ၀ဲအါအါဂီၢ်ဂီၢ်အဃိ အ၀ဲသ့ၣ်ဆှူ၀ဲဒၣ်အါမးအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ