ခ့ၣ်အဲးစံၣ် – KIC News

လါယနူၤအါရံၤ ၂၆ သီႇ ၂၀၂၃ နံၣ်ႇ ခ့ၣ်အဲးစံၣ် ဖဲလါယနူၤအါရံၤ ၂၃ သီအနံၤန့ၣ် ကီၢ်သူလ့ၤသုးမုၢ်ဒိၣ်(KTLA)အၦၤ ခိးခး၀ဲ ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ (သုးက့ ၄) ကညီဒီကလုာ်တၢ်ထူၣ်ဖျဲးသုးမုၢ်ဒိၣ်-KNLA(သုးရ့ၣ်–၁၂)သုးရ့ၣ်ခိၣ်–၂ ဒီး ကစၢၢ်ဒိၣ်ကီၢ်ဆၣ် ထီဘိကမံးတံာ်ဖိ(၂)ဂၤအံၤအဂ့ၢ်န့ၣ် ခ့ၣ်အဲၣ်ယူၣ်(သုးက့ ၄) ထုးထီၣ်ပာ်ဖျါ၀ဲဖဲ ၂၄ သီအနံၤန့ၣ်လီၤႉ တၢ်ဂ့ၢ်ကဲထီၣ်သးခီန့ၣ်ဖဲလါယနူၤအါရံၤ ၂၃ သီ ဟါခီ ၇ နၣ်ရံၣ်အဆၢကတီၢ် ကီၢ်သူလ့ၤသုးမုၢ်ဒိၣ်(KTLA) စီၤကျ့ကျ့တီခိၣ်ရိၣ်မဲအၦၤအိၣ်ခိးခး၀ဲ(KNLA)သုးရ့ၣ်(၁၂)သးရ့ၣ်ခိၣ်–၂ သုးခိၣ်ဒိၣ်ဖိ စီၤတၢ်အဲၣ်အဲၣ်ဃုာ်ဒီး ကစၢၢ်ဒိၣ်ကီၢ်ဆၣ် ထီဘိကမံးတံာ်ပဒိၣ် စီၤကၤလံၤလါ(၂)ဂၤအံၤ ဖဲဖီၣ်တီၣ်သ၀ီဒီး(မံးလး ၄၀)သ၀ီဘၢၣ်စၢၤ လၢတၢ်ဂ့ၢ်တအိၣ်နီတမံၤဘၣ်အဃိ ဘၣ်ဒိ၀ဲခံဂၤလၢာ်အဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ ဘၣ်ဃးဒီးလံာ်တၢ်ထုးထီၣ်ပာ်ဖျါအံၤ(သုးက့...

လါယနူၤအါရံၤ ၂၅ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ဖၣ်ပူၣ်ကီၢ်ရ့ၣ် ကမၤမိၢ်ကီၢ်ဆၣ်အပူၤန့ၣ် ပယီၤသုးမၢဆူၣ်၀ဲကူၣ်သ့ၦၤမၤတၢ်ဖိဒီး ၦၤကၠိဖိသ့ၣ်တဖၣ်လၢကက့ၤထီၣ်ကဒါကၠိအဂ့ၢ်န့ၣ် လီၢ်က၀ီၤကမျၢၢ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ စးထီၣ်လၢကညီဒီကလုာ်တၢ်ထူၣ်ဖျဲးးသုးမုၢ်ဒိၣ်-KNLA(သုးက့ ၅)ထုးထီၣ်ပာ်ဖျါလၢပယီၤသုး၀ဲၤကျိၤဘၣ်ထွဲ ၦၤမၤတၢ်ဖိတဖၣ်ကဘၣ်ဟးထီၣ်လၢအ၀ဲသ့ၣ်ဟီၣ်က၀ီၤပူၤဒီးကဟးထီၣ်ကွံာ်လၢအ၀ဲသ့ၣ်လီၢ်လၤမူဒါတၢ်ဖံးတၢ်မၤပူၤ၀ံၤအလီၢ်ခံခီဖျိကူၣ်သ့ၦၤမၤတၢ်ဖိဒီးၦၤကၠိဖိတဖၣ်တလဲၤထီၣ်ကၠိလၢၤဘၣ်အဃိပယီၤသုးမၢဆူၣ်ၦၤက့ၤထီၣ်ကဒါကၠိဒ်အံၤလီၤအဂ့ၢ်န့ၣ် လီၢ်က၀ီၤကမျၢၢ်တဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ကူၣ်သ့ၦၤမၤတၢ်ဖိတဖၣ်တလဲၤထီၣ်ကၠိဘၣ်အ၀ဲသ့ၣ်ဟးစံၣ်အိၣ်ခူသူၣ်အဃိပယီၤသုးဟဲတုၤလၢဟံၣ်ခီၣ်ထံးမၢၦၤက့ၤထီၣ်ကဒါကၠိမီၤနီၤႉၦၤလၢအတတူၢ်လိာ်၀ဲဘၣ်တဖၣ်ခီန့ၣ်ဟးစံၣ်ပလဲာ်သသးလံမီၤနီၤႉၦၤကၠိဖိမိၢ်ပၢ်နါက့တၢ်ရဲၣ်တၢ်ကျဲၤတအိၣ်လၢကပာ်အဒံၣ်အဖိလၢကၠိဘၣ်အဃိပယီၤသုးဟဲလီၤကရၢကရိၦၤဖိသၣ်တုၤလၢဟံၣ်ခီၣ်ထံးညါႉမၢၦၤက့ၤထီၣ်န့ၢ်ဆူၣ်က့ၤကၠိႉခဲအံၤၦၤအတီၤတဆံကဘၣ်ဒိးစဲးအဂီၢ်န့ၣ်မၢၦၤက့ၤထီၣ်ကဒါကၠိဒ်န့ၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ခီဖျိပယီၤသုးမၤ၀ဲဒ်န့ၣ်အဃိကူၣ်သ့ၦၤမၤတၢ်ဖိဒီးၦၤကၠိဖိက့ၤထီၣ်ကဒါကၠိအိၣ်၀ဲတနီၤလံဒီး မ့မ့ၢ်ကူၣ်သ့ၦၤမၤတၢ်ဖိလၢတက့ၤထီၣ်ကဒါကၠိဘၣ်သ့ၣ်တဖၣ်ခီန့ၣ်ဟးစံၣ်ပလဲာ်သးအိၣ်၀ဲတနီၤအဂ့ၢ်န့ၣ် လီၢ်က၀ီၤကၠိသရၣ်မုၣ်တဂၤစံး၀ဲန့ၣ်လီၤႉ အ၀ဲစံး၀ဲလၢ“မ့မ့ၢ်ယၤဒုဒ်ၦၤဘိးဘၣ်ရၤလီၤအသိးန့ၣ်စးထီၣ် ၁ သီတုၤလၢအသီ ၁၀ န့ၣ် ယလဲၤလၢကၠိ၀ံၤလံႉ ဖဲန့ၣ်၀ံၤဘျီန့ၣ်ယတလဲၤလၢကၠိနီတဘျီလၢၤဘၣ်ႉပဘၣ်ပျံၤလၢအ၀ဲသ့ၣ်ကဟဲမၢပအိၣ်ခိးတၢ်ဃုထၢမူးဒီးအတီၤတဆံတၢ်ဒိးစဲးအဂီၢ်မီၤနီၤႉပပျံၤတၢ်အဃိပဟးစ့ၣ်ပလဲာ်သးယံၤထီၣ်ယံၤထီၣ်လီၤႉကၠိခိၣ်ဒုအဆဲးကျိးယၤမီၤနီၤႉအ၀ဲသ့ၣ်ဟံးန့ၢ်၀ဲတၢ်ဘံၣ်တၢ်ဘၢနါက့အိၣ်ဒၣ်အ၀ဲသ့ၣ်အိၣ်ခိးတၢ်ဒီးကျိႇကွၢ်လီတဲစိ(ဖိ)လဲလဲလီၤႉသရၣ်/မုၣ်တနီၤလဲၤထီၣ်အိၣ်မီၤနီၤ”အဂ့ၢ်န့ၣ် စံး၀ဲန့ၣ်လီၤႉ လၢန့ၣ်အမဲာ်ညါဖၣ်ပူၣ်၀့ၢ်ကူၣ်သ့ၦၤမၤတၢ်ဖိလၢအလီၤဘၣ်မူဒါဖဲအံၤတနီၤန့ၣ်ခီဖျိအ၀ဲသ့ၣ်သ့ၣ်ညါဃာ်တၢ်အိၣ်သးဒီးဘၣ်အိၣ်လၢပဒိၣ်ၦၤမၤတၢ်ဖိအဟံၣ်အဃိလဲၤထီၣ်ကၠိတဘူၣ်ဘၣ်နါက့ဘၣ်အိၣ်၀ဲလၢတၢ်ပျံၤတၢ်ဖုးပူၤအဂ့ၢ်န့ၣ် သရၣ်မုၣ်လၢလီၤဘၣ်မူဒါဖဲဖၣ်ပူၣ်၀့ၢ်ပူၤတဂၤစ့ၢ်ကီး စံး၀ဲဒ်အံၤန့ၣ်လီၤႉ “သရၣ်/မုၣ်လၢအဟံၣ်အိၣ်ဘူးတဖၣ်ခီဒုမ့မ့ၢ်ကၠိပံးအခါန့ၣ်အ၀ဲသ့ၣ်က့ၤလၢအဟံၣ်မီၤနီၤႉမ့မ့ၢ်ပ၀ဲဒၣ်ခီန့ၣ်ပကက့ၤလၢဖၣ်ပူၣ်ခီဒၢးတသ့ဘၣ်ႉဖဲတၢ်ခိၣ်တၢ်ဃၢၤအံၤခီဒၢးပဘူးပတံၢ်တအိၣ်စ့ၢ်ကီးဘၣ်ႉဟံၣ်တအိၣ်ဘၣ်အဃိလၢမုၢ်ဆါခီန့ၣ်ပဘၣ်လဲၤအိၣ်လၢပဒိၣ်ၦၤမၤတၢ်ဖိအဟံၣ်မီၤနီၤႉမ့မ့ၢ်မုၢ်နၤခီန့ၣ်ပမံတဘူၣ်ဘၣ်အဃိပလဲၤမံလၢပသ့ၣ်ညါသ့ၣ်ခီးလိာ်သးအဟံၣ်လီၤ” အဂ့ၢ်န့ၣ် စံး၀ဲန့ၣ်လီၤႉ ဖဲတလါအံၤလါယနူၤအါရံၤထီၣ် ၁ သီအနံၤန့ၣ် ခ့ၣ်အဲၣ်ယူၣ်(သုးက့ ၅)ထုးထီၣ်ဟ့ၣ်ပလီၢ်၀ဲလၢ လီၢ်က၀ီၤကမျၢၢ်ႇၦၤမၤတၢ်ဖိႇၦၤမၤတၢ်ဖိလၢအိၣ်ဟဲတၢ်လီၢ်အဂၤႇကီၢ်ဆၣ်ဒီးက၀ီၤဒ့ပၢပြးသးၦၢ်ႇ၀ဲၤကျိၤၦၤမၤတၢ်ဖိလၢအိၣ်ဖၣ်ပူၣ်၀့ၢ် ကမၤမိၢ်ကီၢ်ဆၣ်ဒီးက၀ီၤဒ့ဒူသ၀ီအပူၤတဖၣ်အံၤတဘၣ်ပာ်ဖှိၣ်မၤသကိးတၢ်ဒီးသုးမီၤစိရိၤဘၣ်ႇ ကဟးထီၣ်ကွံာ်လၢမူဒါလီၢ်လၤတၢ်ဖံးတၢ်မၤပူၤအဂ့ၢ်န့ၣ် ထုးထီၣ်ပာ်ဖျါတ့ၢ်ဃာ်၀ဲန့ၣ်လီၤႉ

လါယနူၤအါရံၤ ၂၅ သီႇ ၂၀၂၃ နံၣ်ႇ ခ့ၣ်အဲးစံၣ် ကီးတရံးကီၢ်ဆၣ် ကြုၢ်တုဟီၣ်က၀ီၤအပူၤ လၢ(ကၠဲ)ထံကျိ၀ၢ်ခီ ကါနံၤ–ညီၤယ့ၣ်သၤႇ ကီၣ်ကၤႇ သယဲၣ်တီသ၀ီတကပၤန့ၣ် တၢ်ဒုးကဲထီၣ်၀ဲလၢပယီၤသုးဒီးတၢ်ပၢၢ်ဆၢသုးပာ်ဖှိၣ်အဘၢၣ်စၢၤဒီး ခီဖျိကျိဖးဒိၣ်အဃိမ့ၣ်အူအီၣ်၀ဲသ၀ီဖိအဟံၣ်အဃီတဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ စးထီၣ်လါယနူၤအါရံၤ ၂၂ သီတုၤလၢလါယနူၤအါရံၤ ၂၄ သီအနံၤန့ၣ် လၢကြုၢ်တုဟီၣ်က၀ီၤအပူၤ တၢ်ဒုးဆူၣ်ထီၣ်၀ဲလၢပယီၤသုးဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်အဘၢၣ်စၢၤဒီး တၢ်ဒုးကဲထီၣ်အကတီၢ်ခီဖျိပယီၤသုးခးလီၤကျိဖးဒိၣ်အဃိ မ့ၣ်အူအီၣ်ကမျၢၢ်အဟံၣ်အဃီအိၣ်၀ဲအသိး လီၢ်က၀ီၤသ၀ီဖိဘၣ်ဃ့ၢ်ထီၣ်၀ဲစ့ၢ်ကီးအဂ့ၢ်န့ၣ် သ၀ီဖိတဖၣ်စံး၀ဲန့ၣ်လီၤႉ သယဲၣ်တီသ၀ီဖိတဂၤစံး၀ဲ“ပယီၤသုးခးလီၤကျိဖးဒိၣ်ဒီတနံၤကျၢၤလီၤႉကြုၢ်တုပယီၤသုး(၅၄၅/၅၄၆)ခးလီၤ၀ဲမီၤနီၤႉ မ့၀ံၤပယီၤသုးခးလီၤကျိဖးဒိၣ်ဘၣ်ဟးဂီၤ၀ဲဒၣ်(သယဲၣ်တီ)ႇ(ညီၤယ့ၣ်သၤ)သ၀ီဖိအဟံၣ်ဒီဒူၣ်ညါႉ မ့မ့ၢ်လၢ(ကါနံၤ)တကပၤခီန့ၣ်ခီဖျိပယီၤသုးကျိဖးဒိၣ်အဃိမ့ၣ်အူအီၣ်ဟံၣ်ကအိၣ်တၢ်လီၢ်(၂)တီၤ(၃)တီၤညါႉ ကညီဖီၣ်စုက၀ဲၤကရူၢ်ခး၀ဲနါက့မ့ၣ်အူအီၣ်ဟံၣ်အိၣ်စ့ၢ်လီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢကြုၢ်တုကီၢ်ဆၣ်(ကၠဲ)ထံကျိ၀ၢ်ခီ တလၢၤဒူသ၀ီတဖၣ်အပူၤန့ၣ်တၢ်ဒုးကဲထီၣ်အဃိ လၢဖၣ်အၣ်၀့ၢ်တဆီပယီၤသုးကျိၤတဖၣ်အံၤဟဲထီၣ်မၤအါထီၣ်သုးဂံၢ်ဘါလၢ(ကၠဲ)ထံကျိတိၤႇ ကီးတရံး–ကၠဲတိၤ ကပၤအဂ့ၢ်န့ၣ် ကမျၢၢ်လၢအထံၣ်တၢ်ကဲထီၣ်သးဒီးအမဲာ်တဖၣ်စံး၀ဲန့ၣ်လီၤႉ (ညီၤယ့ၣ်သၤ)သ၀ီဖိတဂၤစံး၀ဲ “တၢ်ဒုးကဲထီၣ်ဖဲမဂီၤအခါန့ၣ်ခီဖျိပယီၤသုးခးကျိဖးဒိၣ်အဃိ(ညီၤယ့ၣ်သၤ)သ၀ီႇ သယဲၣ်တီသ၀ီဖိတဖၣ်လဲၤဃ့ၢ်ထီၣ်၀ဲဒီးချံစဲးလၢ(သၤလဲၤ)သ၀ီႇခယါႇကီၣ်လဲၣ်ႇကီၣ်ကၠဲၣ်တကပၤန့ၣ်မီၤနီၤႉ တနီၤန့ၣ်လဲၤဃ့ၢ်ထီၣ်ဒီးချံစဲးလၢ(မီၣ်လမၠဲၣ်)တကပၤနါက့အိၣ်လီၤႉတနီၤန့ၣ်လဲၤဃ့ၢ်ထီၣ်အိၣ်၀ဲလၢ(ကြုၢ်တု)က၀ီၤဒ့(သီခါဖၠၣ်)ဖီလာ်နါက့အိၣ်လီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲမဟါလါယနူၤအါရံၤ ၂၄ သီ...

လါယနူၤအါရံၤ ၂၄ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ၀ီၢ်ရ့ၣ်ကီၢ်ဆၣ်ကီၢ်ဆၣ် တလၢၤကညီဟီၣ်က၀ီၤအဆၢ(စံနပ့ၤ)သ၀ီန့ၣ် ခီဖျိပယီၤသုးခးကျိအဃိ ဘၣ်ဒိ၀ဲသးစၢ်လၢအဒိးသိလ့ၣ်ယီၢ်(၁)ဂၤဒီးပိာ်မုၣ်လၢအိၣ်တၢ်ခိၣ်တၢ်ဃၢၤဖဲန့ၣ်(၁)ဂၤ နးနးကျံၤကျံၤအဂ့ၢ်န့ၣ် သ့ၣ်ညါဘၣ်လၢသ၀ီဖိအအိၣ်န့ၣ်လီၤႉ လၢ၀ီၢ်ရ့ၣ်ကီၢ်ဆၣ်အပူၤ (နါခွံ)သ၀ီဖိ စီၤလၣ်ချဲဒီးအသကိးတဂၤဖဲအ၀ဲသ့ၣ်ဒိးသိလ့ၣ်ယီၢ်(ဆဲးကဲး)လ့ၢ်လိၤဖဲ တလၢၤဒီးကညီဟီၣ်က၀ီၤအဆၢ(စံနပ့ၤ)သ၀ီကပၤအခါန့ၣ် ခီဖျိပယီၤသုးလၢအိၣ်ဖဲကျဲကပၤတဖၣ်ခးကျိအဃိ ဘၣ်ဒိ၀ဲဒၣ်(စီၤလၣ်ချဲ)အံၤအသိး ဘၣ်ဃုာ်စ့ၢ်ကီးပိာ်မုၣ်လၢအိၣ်တၢ်ခိၣ်တၢ်ဃၢၤဖဲန့ၣ်တဂၤအဂ့ၢ်န့ၣ် ၦၤလၢဘူးဒီးအဟံၣ်ဖိဃီဖိတဖၣ်စံး၀ဲန့ၣ်လီၤႉ အ၀ဲစံး၀ဲလၢ“အ၀ဲသ့ၣ်ခံဂၤန့ၣ်နီ၀ဲဒၣ်(ဆဲးကဲး)တဂၤတခိၣ်လဲၤတုၤဖဲ(စံနပ့ၤ)သ၀ီဆၢခိၣ်ဘျီန့ၣ် ပယီၤသုးအိၣ်ဖဲန့ၣ်တဖၣ်ကိးဃါအ၀ဲသ့ၣ်ႉအ၀ဲသ့ၣ်ပျံၤတၢ်နီထီၣ်ဆဲးကဲးဘျီပယီၤသုးခးစိကျိအဃိ ဘၣ်၀ဲဒၣ်(စီၤလၣ်ချဲ)အနၢ်ကုကပၤလီၤႉၦၤကလဲၤကူစါယါဘျါအီၤလၢ၀့ၢ်ပူၤန့ၣ်ပယီၤသုးတဟ့ၣ်လဲၤ၀ဲဘၣ်ႉ မ့မ့ၢ်ဆဲးကဲးခီဒုအက့ၤဟ့ၣ်ကဒါ၀ဲႉခဲအံၤအ၀ဲအိၣ်၀ဲလၢဂ့ၢ်ဂီၢ်အူတၢ်ကူစါယါဘျါအပူၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါခီဖျိပယီၤသုးခးစိကျိအဃိဘၣ်ဃုာ်၀ဲဒၣ်(စံနပ့ၤ)ပိာ်မုၣ်တဂၤအံၤအခီၣ်ကံၣ်ဒုၣ်စ့ၢ်ကီးဒီး ကတီၢ်ခဲအံၤအိၣ်၀ဲဒၣ်လၢတၢ်ကူစါယါဘျါပူၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤသ၀ီဖိတဖၣ်အအိၣ်န့ၣ်လီၤႉ ဖဲအပူၤကွံာ်လါယနူၤအါရံၤ ၁၄ သီအနံၤစ့ၢ်ကီး လၢတလၢၤကညီဟီၣ်က၀ီၤအဆၢ(သၤပယၤ)သ၀ီကပၤန့ၣ် ပယီၤသုးအိၣ်ဆီလီၤခူသူၣ်အသးဒီးဖဲအ၀ဲသ့ၣ်ကိးသမံသမိး၀ဲလီၢ်က၀ီၤကမျၢၢ်လၢကျဲအခါ ဖီၣ်တီၢ်မၤဒၢၣ်၀ဲလီၢ်က၀ီၤၦၤပိာ်ခွါဃုာ်ဒီးပိာ်မုၣ်ပိာ်မၢၤတဖၣ်နးနးကျံၤကျံၤဒံးအဂ့ၢ်န့ၣ် သ၀ီဖိလၢပယီၤသုးတီၢ်မၤဒၢၣ်အီၤတဖၣ်စံး၀ဲန့ၣ်လီၤႉ စးထီၣ်တလါအံၤလါယနူၤအါရံၤထီၣ် ၁ သီတုၤလၢ ၄ သီအနံၤန့ၣ် ပယီၤသုးလၢအိၣ်ဆီလီၤသးဖဲ(ခ့ၣ်အဲၣ်ယူၣ်) ၀ီၢ်ရ့ၣ်ကီၢ်ဆၣ်(လ့နိး)သ၀ီတဖၣ်အံၤဒီးတၢ်ပၢၢ်ဆၢသုးပာ်ဖှိၣ်အဘၢၣ်စၢၤတၢ်ဒုးကဲထီၣ်၀ံၤအလီၢ်ခံ ပယီၤသုးတပျဲၦၤဟးထီၣ်က့ၤလီၤလၢဃိၣ်သၢဖျၢၣ်–သရိာ်၀ါကျဲအံၤလၢာ်ဘၣ်န့ၣ်လီၤႉ ဒ်န့ၣ်အသိးခီဖျိတၢ်ဒုးအဃိလီၢ်က၀ီၤကမျၢၢ်လၢအဘၣ်ဃ့ၢ်ထီၣ်တဖၣ်အံၤစ့ၢ်ကီးပယီၤသုးနုာ်လီၤဟုၣ်က့ၤစိာ်၀ဲ(စ့ၤပၠ့)ႇလ့နိးဒီးကၠါမံသ၀ီဖိအတၢ်ဖိတၢ်လံၤလုၢ်ဒိၣ်ၦ့ၤဒိၣ်တဖၣ်လၢဟံၣ်ပူၤဒံးအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ

လါယနူၤအါရံၤ ၂၄ သီ‚ ၂၀၂၃ နံၣ်‚ ခ့ၣ်အဲးစံၣ် လၢကညီကီၢ်စဲၣ် ကၠၤအ့စ့ၣ်ကၠံကီၢ်ဆၣ် ခ့ၣ်အဲၣ်ယူၣ်–ဒူပျာ်ယာ်ကီၢ်ရ့ၣ် ဃိၣ်သၢဖျၢၣ်၀့ၢ်ပူၤ ဖဲလါယနူၤအါ၇ံၤ ၂၃ သီ ဟါခီအဆၢကတီၢ်န့ၣ် မ့ၣ်အူအီၣ်၀ဲသုးမီၤစိရိၤစုတီၤဖီလာ်၀ဲၤကျိၤဘၣ်ထွဲအ၀ဲၤဒၢးတၢ်လီၢ်(၄)ခါအဂ့ၢ်န့ၣ် သ့ၣ်ညါဘၣ်လၢကမျၢၢ်အိၣ်၀့ၢ်ပူၤတဖၣ်အအိၣ်န့ၣ်လီၤႉ ဖဲမုၢ်နၤခီ ၉ နၣ်ရံၣ်ဘျဲၣ်အဆၢကတီၢ်န့ၣ် တၢ်ပၢၢ်ဆၢသုးပာ်ဖှိၣ်နုာ်လီၤဒွဲၣ်အူအီၣ်၀ဲ ပၢပြး၀ဲၤကျိၤႇ သုးမီၤစိရိၤပ့ၢ်ဆှါရူ‚ တၢ်သမံသမိးၦၤနုာ်လီၤဟးထီၣ်က့ၤလီၤ၀ဲၤကျိၤဒီးကမျၢၢ်ဂံၢ်ဘါ၀ဲၤကျိၤႇမုာ်ခုၣ်ၦဲၤအါ၀ဲၤဒၢးတၢ်သူၣ်ထီၣ်တဖၣ်အံၤဒီး နၢ်ဟူကျိသီၣ်လၢဒီတ၀့ၢ်ညါအဂ့ၢ်န့ၣ် ကမျၢၢ်လၢအိၣ်၀့ၢ်ပူၤလၢတအဲၣ်ဒိးပာ်ဖျါအမံၤတဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ “မ့ၣ်အူအီၣ်ပၢပြးႇလ၀ကႇမုာ်ခုၣ်ၦဲၤအါ၀ဲၤဒၢးဒီး(စရဖ)၀ဲၤဒၢးတဖၣ်န့ၣ်ခဲလၢာ်လီၤႉတုၤလၢတဂီၤအံၤန့ၣ်ပထံၣ်မ့ၣ်အူခုၣ်ထီၣ်ဒံးႉပနၢ်ဟူကျိဖးဒိၣ်ႇကျိဖိသီၣ်ဒီတနၤကျၢၤညါႉပနၢ်ဟူလၢတၢ်သံတၢ်ဘၣ်ဒိဘၣ်ထံးအိၣ်လီၤႉပယီၤသုးႇပၢၤကီၢ်တဖၣ်အိၣ်ဖဲ၀့ၢ်ပူၤပၢၤကီၢ်၀ဲၤလီၢ်န့ၣ်လီၤႉပတထံၣ်အ၀ဲသ့ၣ်ဟးထီၣ်တၢ်ချၢသမံသမိးတၢ်ဒံးဘၣ်ႉ၀့ၢ်ပူၤဒုၦၤဟးထီၣ်က့ၤလီၤဒ်ညီနုၢ်အသိးလီၤ” အဂ့ၢ်န့ၣ် ကမျၢၢ်အိၣ်၀့ၢ်ပူၤတဂၤစံး၀ဲန့ၣ်လီၤႉ ဘၣ်ဃးဒီးတၢ်ဂ့ၢ်ကဲထီၣ်သးအံၤမ့ၢ်တၢ်ဟ့ၣ်ပလီၢ်၀ဲ၀ဲၤကျိၤၦၤမၤတၢ်ဖိအိၣ်ဃိၣ်သၢဖျၢၣ်၀့ၢ်ပူၤတဖၣ်တဘၣ်ဟ့ၣ်တၢ်ကစီၣ်ဆူသုးမီၤစိရိၤအအိၣ်ဘၣ်ႇတဘၣ်ပာ်ဖှိၣ်မၤသကိးတၢ်ဒီးအ၀ဲသ့ၣ်ဘၣ်လီၤန့ၣ် တၢ်ပၢၢ်ဆၢသုးပာ်ဖှိၣ်ကရူၢ်ဖိတဂၤစံး၀ဲအိၣ်ဘၣ်ဆၣ်မ့မ့ၢ်တၢ်ပၢၢ်ဆၢသုးပာ်ဖှိၣ်ခိၣ်နၢ်တဖၣ်ခီန့ၣ်ထုးထီၣ်ပာ်ဖျါ၀ဲလီၤလီၤဆီဆီတအိၣ်၀ဲဒံးဘၣ်န့ၣ်လီၤႉ သုးဟံးန့ၢ်ထံကီၢ်တၢ်စိတၢ်ကမီၤကဲထီၣ်၀ံၤအလီၢ်ခံလၢဃိၣ်သၢဖျၢၣ်၀့ၢ်(မဲၢ်ကသး)ႇသဘၠူၣ်ႇကၠ့ၤခၠီဒီး သ၀ီလၢအဂၤတဖၣ်အပူၤန့ၣ်သုးမိၤစိရိၤကဘီယူၤဟဲတ့ၢ်လီၤ၀ဲမ့ၣ်ပိၢ်အိၣ်၀ဲတလီၢ်လီၢ်န့ၣ်လီၤႉဖဲအပူၤကွံာ်လါယနူၤအါရံၤ ၂၁ သီအနံၤစ့ၢ်ကီး သုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢ(လ့၀ါဖျိ)သ၀ီပူၤအဃိ လီၢ်က၀ီၤၦၤသူၣ်ဘီၣ်သးစၢ်အဂၤ(၂၀၀)ဘျဲၣ်ဘၣ်ဆိကတီၢ်ကွံာ်တၢ်မၤလိအဂ့ၢ်န့ၣ် သ့ၣ်ညါဘၣ်လၢကမျၢၢ်အအိၣ် န့ၣ်လီၤႉ

လါယနူၤအါရံၤ ၂၄ သီႇ ၂၀၂၃ နံၣ်ႇ ခ့ၣ်အဲးစံၣ် လၢကီးတရံးကီၢ်ဆၣ်အပူၤ တၢ်နုာ်လီၤခးဒွဲၣ်အူအီၣ်(ကီၣ်ဘ့)ပၢၤကီၢ်တၢ်လီၢ်ကဲထီၣ်သး၀ံၤအလီၢ်ခံ ပယီၤသုးဖီၣ်န့ၢ်၀ဲဒီကလုာ်ဒံၣ်မိၣ်ခြ့ၣ်စံၣ်(NLD)ပၣ်တံၣ်ဖိတနီၤဒီး(CDM)တနီၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ ဖဲအပူၤကွံာ်လါယနူၤအါရံၤ ၁၆ သီ မုၢ်ထူၣ် ၁၂ နၣ်ရံၣ်ဘျဲၣ်အဆၢကတီၢ် တၢ်နုာ်လီၤဒွဲၣ်အူအီၣ် တၢ်တၤကျိၣ်တၤစ့လီၢ်ဒီးပၢၤကီၢ်တၢ်လီၢ်အခါန့ၣ် ကီၣ်ဘ့သ၀ီဖိသံဘၣ်ဒိဘၣ်ထံးအိၣ်၀ဲဒီး ဖဲန့ၣ်၀ံၤအလီၢ်ခံ ပယီၤသုးဖီၣ်န့ၢ်၀ဲ(NLD)ပၣ်တံၣ်ဖိတနီၤဒီး(CDM)တနီၤလၢသ၀ီပူၤအဖီခိၣ် ဘၣ်ယိၣ်လၢပယီၤသုးကဆဲးဖီၣ်တၢ်အဃိ လီၢ်က၀ီၤကမျၢၢ်ဟးစံၣ်ပလဲာ်သးအိၣ်၀ဲတနီၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ အ၀ဲစံး၀ဲလၢ“တၢ်ဒုးကဲထီၣ်၀ံၤနီၢ်တနံၤန့ၣ်ပယီၤသုးနုာ်လီၤဟံးန့ၢ်လီၢ်လၢသ၀ီပူၤဖဲကီၣ်ဘ့တၢ်ဆါဟံၣ်ႇ ကီၣ်ဘ့ပၢၤကီၢ်၀ဲၤလီၢ်အံၤ၀ံၤပယီၤသုးအိၣ်ခိးသမံသမိးတၢ်လၢသ၀ီကျဲနုာ်လီၤဟးထီၣ်န့ၣ်မီၤနီၤႉမ့၀ံၤဖဲ (၁၇ႇ၁၈ႇ၁၉)သီအခါန့ၣ် ပယီၤသုးဖီၣ်န့ၢ်(NLD)ပၣ်တံၣ်ကရၢဖိအိၣ်(၄)ဂၤညါႉ မ့၀ံၤဖီၣ်န့ၢ်ကဒီး၀ဲ(CDM) ၁ ဂၤႉ လီလီစဲၤၦၤဖီၣ်ချုးန့ၢ်(၅)ဂၤမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ၦၤလၢပယီၤသုးဖီၣ်န့ၢ်၀ဲသ့ၣ်တဖၣ်ခဲအံၤအဟံၣ်ဖိဃီဖိဆဲးကျိး၀ဲတန့ၢ်ဘၣ်ဒီးဘၣ်ယိၣ်လၢပယီၤသုးကဆဲးဖီၣ်တၢ်အဃိၦၤလၢအနုာ်လီၤမၤစၢၤတ့ၢ်တၢ်ဖဲ(၂၀၂၀)တၢ်ဃုထၢအခါန့ၣ်တဖၣ်စ့ၢ်ကီးအ၀ဲသ့ၣ်ဟးစံၣ်ပလဲာ်သးလၢာ်လံအဂ့ၢ်န့ၣ် လီၢ်က၀ီၤကမျၢၢ်တဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ လၢကီးတရံး(ကြုၢ်တု)ဟီၣ်က၀ီၤအပူၤခီဖျိတၢ်ဒုးကဲထီၣ်ဒိၣ်ဒိၣ်မုၢ်မုၢ်လၢပယီၤသုးဒီးတၢ်ပၢၢ်ဆၢသုးပာ်ဖှိၣ်အဘၢၣ်စၢၤအဃိကညီကလုာ်ဒူၣ်ဒူသ၀ီတကးဒံးဘၣ်အမဲာ်ညါပအိၣ်ကလုာ်ဒူၣ်သ၀ီလၢအမ့ၢ်(အံၤဘဲ)ႇထံဖူကျီၤဒီးတလၢၤကလုာ်ဒူၣ်သ၀ီလၢအမ့ၢ်(ကီၣ်ဘ့)ႇကီးပီၣ်မ့သ၀ီႇကမၣ်ယဲၣ်လီၢ်က၀ီၤတကပၤန့ၣ်စ့ၢ်ကီး ပယီၤသုးဟးလူၤသမံသမိးဖီၣ်၀ဲၦၤမၤ(CDM)တဖၣ်တပယူာ်ဃီအဂ့ၢ်န့ၣ်လီၢ်က၀ီၤကမျၢၢ်စံး၀ဲန့ၣ်လီၤ ႉ လီၢ်က၀ီၤဂံၢ်ခီၣ်ထံးကရၢဖိတဂၤစံး၀ဲ“တၢ်ဒုးမ့ကဲထီၣ်လံန့ၣ်ပယီၤသုးစးထီၣ်ဟးဖီၣ်၀ဲၦၤလၢအဘၣ်ထွဲဒီး(NLD)ပၣ်တံၣ်တဖၣ်လီၤႉၦၤလၢအမၤစၢၤတ့ၢ်ဃာ်(၂၀၂၀)တၢ်ဃုထၢလၢညါတဖၣ်န့ၣ်နါက့ပယီၤသုးဟးလူၤသံကွၢ်၀ဲအမံၤအသၣ်ႇဟးလူၤသံကွၢ်၀ဲလၢကျးပူၤႇလၢၦၤမၤမုၢ်ကျိၤ၀ဲၤကွာ်ဖိအအိၣ်ဒ်န့ၣ်မီၤနီၤႉ ခီဖျိၦၤဟ့ၣ်သုးမိၤစိရိၤတၢ်ကစီၣ်ဖိဒီးပယီၤသုးတဖၣ်ပာ်ဖှိၣ်ထီၣ်သးဟးဖီၣ်တၢ်အဃိၦၤမၤ(CSO)လၢဒူသ၀ီအဂီၢ်တဖၣ်နါက့ဘၣ်ဟးပလဲာ်သးစ့ၢ်လီၤ”အဂ့ၢ်န့ၣ် စံး၀ဲန့ၣ်လီၤႉ ဖဲစှၤသီအတီၢ်ပူၤအံၤခီဖျိပယီၤသုး(၅၄၅/၅၄၆)လၢအိၣ်ဆီလီၤသးဖဲ(ကြုၢ်တု)တဖၣ်အံၤခးလီၤကျိဖးဒိၣ်ဆူ(ကြုၢ်တု)မုၢ်နုာ်တလၢၤဒူသ၀ီတဖၣ်အပူၤအဃိလီၢ်က၀ီၤကမျၢၢ်သံဘၣ်ဒိဘၣ်ထံးအိၣ်၀ဲဒီးဟံၣ်ဃီဟးဂီၤအိၣ်စ့ၢ်ကီး၀ဲအဂ့ၢ်န့ၣ် ကီၣ်လ့‚ကီၣ်ပီၣ်‚မ့ယွၤလီၢ်က၀ီၤကမျၢၢ်စံး၀ဲအသိးသ့ၣ်ညါဘၣ်န့ၣ်လီၤႉ

လါယနူၤအါရံၤ ၂၃ သီႇ ၂၀၂၃ နံၣ်ႇ ခ့ၣ်အဲးစံၣ် ခီဖျိတၢ်ဒုးတၢ်ယၤအဃိကီးတရံး၀့ၢ်ခိၣ်၀့ၢ်ဃၢၤဒူသ၀ီလီၢ်က၀ီၤကမျၢၢ်လၢအဘၣ်ဃ့ၢ်ထီၣ်တဖၣ်အံၤ ဖဲအပူၤကွံာ်တနွံအခါန့ၣ် သုးခိးကီၢ်ဆၢ(BGF)ဟဲနုာ်လီၤအိၣ်ဆီလီၤသး၀ံၤအလီၢ်ခံ ဒုးသ့ၣ်ညါသ၀ီဖိလၢ ဟဲက့ၤအိၣ်လၢသ၀ီပူၤသ့လံဘၣ်ဆၣ်သ၀ီဖိတဖၣ်က့ၤအိၣ်၀ဲတဘူၣ်ဒံးဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲအပူၤကွံာ်လါဒံၣ်စ့ဘၢၣ်အခါန့ၣ်တၢ်ဒုးကဲထီၣ်၀ဲဒိၣ်ဒိၣ်မုၢ်မုၢ်လၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ဒီး ပယီၤသုးအဘၢၣ်စၢၤအဃိကီးတရံး၀့ၢ်ခိၣ်၀့ၢ်ဃၢၤသ၀ီတဖၣ်လၢအမ့ၢ်အီကြီသ၀ီႇကီးနွဲၣ်ႇယွၤသ့ၣ်ႇမၠိၣ်ဟီႇယွၤသ့ၣ်ကိသ၀ီ လီၢ်က၀ီၤကမျၢၢ်တဖၣ်ဘၣ်ဃ့ၣ်ထီၣ်၀ဲဒၣ်န့ၣ်လီၤႉ တၢ်ဒုးကဲထီၣ်၀ံၤအလီၢ်ခံဖဲစှၤသီအတီၢ်ပူၤအံၤ(BGF)နုာ်လီၤအိၣ်မၤအါထီၣ်သုးဂံၢ်ဘါအါအါဂီၢ်ဂီၢ်လၢ(တတၤကူ)သ၀ီႇကီးနွဲၣ်ႇကီးတရံး–မၠၣ်၀တံၣ်ကျဲဒီတကျိၤညါအသိး အ၀ဲသ့ၣ်တဲဘၣ်လီၢ်က၀ီၤကမျၢၢ်တဖၣ်အံၤလၢဟဲက့ၤအိၣ် လၢသ၀ီပူၤသ့၀ဲလံဘၣ်ဆၣ် ဖီၣ်စုက၀ဲၤကရူၢ်ကရၢမ့တအိၣ်မးက့ၤအိၣ်ကဘူၣ်၀ဲလီၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ လီၢ်က၀ီၤကမျၢၢ်တဂၤစံး၀ဲလၢ“ပအဲၣ်ဒိးက့ၤအိၣ်လၢပသ၀ီ၀ဲသၢၣ်ႉပနၢ်ဟူလၢ(BGF)ဟဲအိၣ်လၢသ၀ီပူၤဒီး ပယီၤသုးဟဲထီၣ်သုးထီၣ်အလီၢ်လၢ(စွ့ၤကၠဲၣ်မ့)ဃိၣ်မီၤနီၤႉအ၀ဲသ့ၣ်တဲ၀ဲလၢမ့အဲၣ်ဒိးဟဲက့ၤအိၣ်လၢသ၀ီပူၤန့ၣ်ဟဲက့ၤအိၣ်သ့လံတဲ၀ဲဒ်န့ၣ်ႉဖီၣ်စုက၀ဲၤတၢ်ကရၢကရိမ့တအိၣ်နီတဒူၣ်မးက့ၤအိၣ်လၢသ၀ီပူၤကဘူၣ်လီၤႉဖီၣ်စုက၀ဲၤတၢ်ကရၢကရိမ့အိၣ်တဒူၣ်ဒူၣ်ဒံးဒုပက့ၤအိၣ်တဘူၣ်ဘၣ်ႉဖဲမဟါန့ၣ်မ့ၣ်ပိၢ်ပိၢ်ဖးထီၣ်တဖျၢၣ်ဒံးႉမ့ၢ်အဘၣ်ဒိမနုၤလဲၣ်ဒုတသ့ၣ်ညါ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ သုးခိးကီၢ်ဆၢ(BGF)အံၤမ့အဲၣ်ဒိးလီၢ်က၀ီၤကမျၢၢ်က့ၤအိၣ်လၢသ၀ီပူၤန့ၣ် တကြၢးလၢအ၀ဲသ့ၣ်မၤအါထီၣ်သုးဂံၢ်ဘါဘၣ်အဂ့ၢ်န့ၣ် လီၢ်က၀ီၤသ၀ီဖိလၢအဂၤတဂၤစ့ၢ်ကီးစံး၀ဲဒ်အံၤန့ၣ်လီၤႉ “ခဲအံၤန့ၣ် (BGF)သုးအိၣ်ဆီလီၤသးတၢ်လီၢ်သကုၤဆးဒးလီၤႉအ၀ဲသ့ၣ်ဆီလီၤအသုးလၢတတၤကူသ၀ီႇကီးနွဲၣ်သ၀ီႇကီးတရံး–မၠၣ်၀တံၣ်ကျဲဒီတကျိၤညါလီၤႉမ့ၢ်အ၀ဲသ့ၣ်တၢ်ရဲၣ်တၢ်ကျဲၤကအိၣ်တခါခါဧါဒုတသ့ၣ်ညါဘၣ်” အဂ့ၢ်န့ၣ် စံး၀ဲန့ၣ်လီၤႉ စးထီၣ်လၢသုးခိးကီၢ်ဆၢ(BGF)ဆီလီၤအသုးလၢသ၀ီပူၤ၀ံၤအလီၢ်ခံမုၢ်ဆါခီန့ၣ်သ၀ီဖိက့ၤကွၢ်အဟံၣ်အဃီအိၣ်၀ဲတနီၤဒီး တၢ်အိၣ်သးမ့ဂၢၢ်မ့ကျၢၤထီၣ်ကဒါက့ၤမးကက့ၤအိၣ်လၢသ၀ီပူၤအဂ့ၢ်န့ၣ် လီၢ်က၀ီၤကမျၢၢ်စံးဘၣ်ခ့ၣ်အဲးစံၣ်–ကညီတၢ်ကစီၣ်ဒ်အံၤန့ၣ်လီၤႉ “နက့ၤအိၣ်နက့ၤမၤကဆှဲကဆှီတၢ်ဒုန့ၢ်မီၤနီၤႉနအိၣ်လၢအ၀ဲသ့ၣ်ခၢၣ်သးမ့တမုာ်ဘၣ်ခီဒုနဘၣ်ဟဲက့ၤမံလၢတၢ်လီၢ်လၢအဘံၣ်အဘၢအလီၢ်မီၤနီၤႉနဟဲက့ၤကွၢ်ဃုကျီၢ်ပနၢ်တဘၣ်တၢ်နီတမံၤဘၣ်ႉမ့မ့ၢ်တၢ်အိၣ်သးဒုနကဘၣ်အိၣ်ခိးကနၣ်ကွၢ်လီၤႉခဲအံၤၦၤသ၀ီဖိဟဲက့ၤကွၢ်အဟံၣ်ႇအကျီၢ်ပနၢ်ဘူၣ်လံႉတၢ်အိၣ်သးမ့ဂၢၢ်ထီၣ်ဒုပမုၢ်လၢ်လၢ (BGF)ကဟးထီၣ်ကွံာ်လီၤ” အဂ့ၢ်န့ၣ် စံး၀ဲန့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤအလီၢ်ခံလၢကီးတရံး၀့ၢ်ခိၣ်၀့ၢ်ဃၢၤဒူသ၀ီတဖၣ်အပူၤန့ၣ်တၢ်ဒုးကဲထီၣ်၀ဲတလီၢ်လီၢ်ဒီးဖဲအပူၤကွံာ်လါဒံၣ်စ့ဘၢၣ် ၁၆ သီအနံၤန့ၣ် ခီဖျိတၢ်ဒုးက့ၤကဲထီၣ်ကဒါအဃိ လီၢ်က၀ီၤကမျၢၢ်(၄၀၀၀)ဘျဲၣ် ဘၣ်ဃ့ၢ်မှံဟးဖျိး၀ဲတုၤလၢခဲအံၤတစုဒီးက့ၤအိၣ်လၢသ၀ီပူၤတဘူၣ်ဒံး၀ဲဘၣ်န့ၣ်လီၤႉ တၢ်ဒုးကဲထီၣ်အခါခီဖျိပယီၤသုးခးလီၤကျိဖးဒိၣ်တကးဒံးဘၣ်ကဘီယူၤစ့ၢ်ကီးဟဲတ့ၢ်လီၤမ့ၣ်ပိၢ်အဃိ ကမျၢၢ်သံ(၃)ဂၤအကျါပၣ်ဃုာ်၀ဲသီခါ(၁)ပါဒီးဘၣ်ဒိ၀ဲအဂၤ(၁၀)အသိး ကျီၢ်ပနၢ်ဆၣ်ဖိကီၢ်ဖိသံဘၣ်ဒိဘၣ်ထံး အိၣ်၀ဲန့ၣ်လီၤႉလၢန့ၣ်အမဲာ်ညါဟံၣ်ဃီဟးဂီၤ၀ဲအါမးဒီးပယီၤသုဒွဲၣ်အူအီၣ်ကမျၢၢ်အဟံၣ်အိၣ်အဖျၢၣ်(၁၀)ဘျဲၣ်ညါအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ

လါယနူၤအါရံၤ ၂၃ သီႇ ၂၀၂၃ နံၣ်ႇ ခ့ၣ်အဲးစံၣ် တၢ်ဃုထၢလၢသုးမီၤစိရိၤကမၤ၀ဲအံၤတၢ်နာ်န့ၢ်တအိၣ်၀ဲဘၣ်အဃိတပျဲတၢ်ကမၤတၢ်ဃုထၢလၢ(ဒူသထူၣ်)ကီၢ်ရ့ၣ်ပူၤဘၣ်အဂ့ၢ်န့ၣ် ခ့ၣ်အဲၣ်ယူၣ်–ကညီဒီကလု၁်စၢဖှိၣ်ကရၢ ဖၣ်အၣ်ကီၢ်ဆၣ် ပၢဆှၢတၢ်ကမံးတံာ် ထုးထီၣ်ပာ်ဖျါ၀ဲဖဲ လါယနူၤအါရံၤ ၂၀ သီအနံၤန့ၣ်လီၤႉ (ဖၣ်အၣ်ကီၢ်ဆၣ်)ပၢဆှၢတၢ်ကမံးတံာ်အံၤအိၣ်ဆၢထၢၣ်ဟူးဂဲၤ၀ဲလၢ(ခ့ၣ်အဲၣ်ယူၣ်)အတၢ်ဟံးစုနဲၣ်ကျဲတဖၣ်အသိးဒီး သုးမီၤစိရိၤအံၤထီဒါ၀ဲတၢ်ဃုထၢလၢကမျၢၢ်တူၢ်လိာ်အဲၣ်ဒိး၀ဲအံၤ၀ံၤဟံးဆူၣ်န့ၢ်ကွံာ်ထံကီၢ်တၢ်စိတၢ်ကမီၤဒီး လၢတၢ်ဂ့ၢ်ပိာ်ထွဲထီၣ်အခံဒ်အံၤအဃိ ဖဲၣ်ဒရၢၣ်ဒံၣ်မိၣ်ခြ့ၣ်စံၣ်ကီၢ်စၢဖှိၣ်လၢအနီၢ်နီၢ်အံၤတမ့ၢ်လၢအအိၣ်ဖျါထီၣ် ကသ့၀ဲလၢၤဘၣ်အဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ လၢန့ၣ်အမဲာ်ညါသုးမီၤစိရိၤအံၤလၢကလီန့ၢ်လွဲန့ၢ်ထံဂုၤကီၢ်ဂၤဒီးကမျၢၢ်ထံဖိကီၢ်ဖိတဖၣ်အဂီၢ်န့ၣ် ဂုာ်ကျဲးစၢးမၤ၀ဲတၢ်ဃုထၢလၢအယီၤအဘျၣ်အံၤအဃိတဟ့ၣ်အခွဲးလၢကမၤတၢ်ဃုထၢလၢတၢ်ပၢဟီၣ်က၀ီၤပူၤဘၣ်အသိးထုးထီၣ်ဟ့ၣ်ပလီၢ်လံာ်လံမ့ဆဲးမၤ၀ဲဒံးန့ၣ်ကဟံးန့ၢ်၀ဲအရ့တဲာ်တဲာ်ဖျုဖျုလီၤအဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲ န့ၣ်လီၤႉ လံာ်တၢ်ပာ်ဖျါပူၤၦၤကတိိၤတၢ်ပၢစံး၀ဲ“လၢဖၣ်အၣ်ကီၢ်ဆၣ် KNLA(သုးရ့ၣ် ၁)ဟီၣ်က၀ီၤအပူၤ လၢတၢ်ဃုထၢအဂီၢ်တၢ်မ့ဟးထၢစရီႇမ့မၤတၢ်ဃုထၢန့ၣ် ပကဟံးအရ့တဲာ်တဲာ်ဖျုဖျုလီၤန့ၣ် ဒ်အသိးအ၀ဲသ့ၣ်ကသ့ၣ်ညါ၀ဲအဂီၢ် ဒ်သုးရ့ၣ်ခိၣ်အတၢ်နဲၣ်လီၤအိၣ်အသိး ဖၣ်အၣ်ကီၢ်ဆၣ် ပၢဆှၢတၢ်ကမံးတံာ်ဖိ ပ၀ဲတဖၣ် ပဘၣ်ထုးထီၣ်၀ဲလံာ်အံၤလီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါ(ဒူသထူၣ်)ကီၢ်ရ့ၣ် ဒူသ၀ီတဖၣ်အပူၤန့ၣ် တုၤလၢခဲအံၤတၢ်ဟးထၢဟံၣ်ခိၣ်စရီတအိၣ်ဒံး၀ဲဘၣ်ဆၣ် ဖဲအပူၤကွံာ်ခံနွံဃၣ်ဃၣ်အခါန့ၣ်တၢ်ဟးထၢဟံၣ်ခိၣ်စရီလၢ၀့ၢ်ပူၤအိၣ်၀ဲအဂ့ၢ်န့ၣ် တၢ်ဘိးဘၣ်ရၤလီၤမူဒါခိၣ်တဂၤဃီ ၀ဲန့ၣ် စံးအါထီၣ်၀ဲန့ၣ်လီၤႉ လၢတၢ်ကမၤတၢ်ဃုထၢမူးအဂီၢ်သုးမီၤစိရိၤဘိးဘၣ်ရၤလီၤတ့ၢ်ဃာ်၀ဲလၢ(၂၀၂၃)စးထီၣ်လါယနူၤအါရံၤ ၉ သီတုၤလၢ...

လါယနူၤအါရံၤ ၂၃ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ်(သုးက့ ၃)ဟီၣ်က၀ီၤႇ လၢၢ်ဒိၣ်ကီၢ်ဆၣ်ဒီးမိကီၢ်ဆၣ်ပူၤ ဒူသ၀ီလီၢ်က၀ီၤကမျၢၢ်လၢအဃ့ၢ်တၢ်ဒုးသ့ၣ်တဖၣ်အံၤ ပယီၤသုးစံး၀ဲလၢမ့အဲၣ်ဒိးက့ၤအိၣ်လၢသ၀ီပူၤန့ၣ်ကဘၣ်ဟ့ၣ်စ့အဂ့ၢ်န့ၣ် ဟီၣ်က၀ီၤဂံၢ်ခီၣ်ထံးၦၤဟ့ၣ်တၢ်ကစီၣ်ဖိ စံး၀ဲအသိးသ့ၣ်ညါဘၣ်န့ၣ်လီၤႉ ဖဲအပူၤကွံာ်(၂၀၂၂)လါယူၤလံအခါန့ၣ် တၢ်ဒုးကဲထီၣ်၀ဲလၢတၢ်ပၢၢ်ဆၢသုးပာ်ဖှိၣ်ဒီးပယီၤသုးအဘၢၣ်စၢၤဒီး ခီဖျိပယီၤသုးခးလီၤကျိဖးဒိၣ်အဃိလၢၢ်ဒိၣ်ဒီးမိကီၢ်ဆၣ်ပူၤလီၢ်က၀ီၤကမျၢၢ်တဖၣ်အံၤဘၣ်လဲၤစံၣ်အိၣ်၀ဲလၢအဘူးအတံၢ်ဟံၣ်ႇတၢ်ဘါယွၤသရိာ်ႇကျီးပူၤႇကျီၢ်ကရၢတၢ်လီၢ်တဖၣ်ဒီးတုၤလၢခဲအံၤတစုပယီၤသုးခးလီၤဒံးကျိဖးဒိၣ်အဃိအ၀ဲသ့ၣ်က့ၤအိၣ်လၢသ၀ီပူၤတဘူၣ်ဒံးဘၣ်အဂ့ၢ်န့ၣ် ၦၤလၢဘူးဒီးၦၤဃ့ၢ်တၢ်ဒုးဖိတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ပနၢ်ဟူလၢပယီၤသုးတဲ၀ဲမ့အဲၣ်ဒိးက့ၤအိၣ်လၢသ၀ီပူၤန့ၣ်ဘၣ်ဟ့ၣ်စ့မီၤနီၤႉအ၀ဲသ့ၣ်က့ၤအိၣ်လၢသ၀ီပူၤတဘၣ်ဂီၢ်ဘၣ်ႉဘၣ်ဆၣ်ၦၤက့ၤအိၣ်တဘူၣ်ဘၣ်ႉအ၀ဲသ့ၣ်နါက့အတၢ်ဖံးတၢ်မၤဒိၣ်ဒိၣ်မုၢ်မုၢ်တအိၣ်စ့ၢ်ကီးဘၣ်ႉ မ့၀ံၤခီဖျိမုၢ်ကျိၤ၀ဲၤကွာ်တၢ်ဃံးတၢ်စ့ၤအဃိသးစၢ်လၢသ၀ီပူၤတဖၣ်လဲၤထီၣ်မၤက့ၤတၢ်လၢကီၢ်ကၠီၣ်တဲၣ်မီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါလီၢ်က၀ီၤကမျၢၢ်ဟ့ၣ်၀ဲပယီၤသုးစ့က့ၤနုာ်လီၤအိၣ်လၢသ၀ီပူၤအိၣ်၀ဲတနီၤအသိး ပယီၤသုးအိၣ်ခိးသမံသမိးတၢ်လၢကျဲပူၤအိၣ်၀ဲဒီးအ၀ဲသ့ၣ်တဲ၀ဲလၢမ့ထံၣ်ၦၤဟဲက့ၤနုာ်လီၤခူသူၣ်န့ၣ်တၢ်ကဘၣ်ဟဲရ့ထီၣ်အီၤလၢစ့ဒီးတၢ်မ့တဟဲရ့ထီၣ်အီၤဘၣ်န့ၣ်ကခးသံကွံာ်၀ဲအဂ့ၢ်န့ၣ် ကမျၢၢ်ၦၤဃ့ၢ်တၢ်ဒုးဖိတဂၤစံး၀ဲဒ်အံၤန့ၣ်လီၤႉ “ယတံဒီးၦၤသ၀ီဖိ (၆) ဂၤဖဲအက့ၤဒုးအီၣ်အဆၣ်ဖိကီၢ်ဖိအဆၣ်အခါန့ၣ်ပယီၤသုးဖီၣ်ချုးအီၤႉတဲ၀ဲမ့အဲၣ်ဒိးဟဲရ့ထီၣ်န့ၣ်ဘၣ်ဟ့ၣ်စ့တဲ၀ဲဒ်န့ၣ်ႉပနၢ်ဟူလၢၦၤရ့ထီၣ်တၢ်ဖိတဂၤန့ၣ်နါက့တၢ်ဖီၣ်ကဒါအီၤအဃိၦၤလဲၤရ့ထီၣ်တဘူၣ်ဘၣ်ႉမ့၀ံၤတၢ်မၤသံကွံာ်အီၤလီၤႉယမုဂါလၢအက့ၤဟံအီၣ်တၢ်အီၣ်တဂၤန့ၣ်နါက့အဘၣ်ဒီးကျိဖးဒိၣ်လၢကျဲပူၤမီၤနီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ အပူၤကွံာ်(၂၀၂၂)လါယူၤအတီၢ်ပူၤလၢချၢၣ်လွံၢ်ထူၣ်ကီၢ်ရ့ၣ်အပူၤန့ၣ် တၢ်ဒုးကဲထီၣ်၀ဲလၢ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ဒီးပယီၤသုးအဘၢၣ်စၢၤဒီး ခီဖျိပယီၤသုးခးလီၤကျိဖးဒိၣ်ဆူသ၀ီပူၤ တပယူ၁်ဃီအဃိ လၢၢ်ဒိၣ်ကီၢ်ဆၣ်ပူၤ(ယၤမၠိအီၤ)သ၀ီႇနီၤကိသ၀ီဒီး (မိကီၢ်ဆၣ်)ပူၤ ကၠိကိသ၀ီႇသဲကိႇနယွဲပ့ၤသ၀ီ ခဲလၢာ်အဖျၢၣ်(၃၀)လီၢ်က၀ီၤကမျၢၢ်(၁၆ႇ၁၃၇)ဘၣ်ဃ့ၢ်ထီၣ်၀ဲတုၤလၢခဲအံၤတစုန့ၣ်လီၤႉ ဒ်န့ၣ်အသိးတလါအံၤလါယနူၤအါရံၤ ၃ သီ တုၤလၢ ၇ သီ လၢ(၁၅)သီအတီၢ်ပူၤန့ၣ်...

လါယနူၤအါရံၤ ၂၃ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ကီၢ်သူလ့ၤတၢ်ပၢ(သုးက့ ၃)ဟီၣ်က၀ီၤအပူၤ လါယနူၤအါရံၤ ၁ သီတုၤလၢ ၁၅ သီအနံၤန့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ႇကညီဒီကလုာ်ဂၢၤသးကရၢ(KNDO)ဒီး ပယီၤသုးအဘၢၣ်စၢၤတၢ်ဒုးကဲထီၣ်အတီၢ်ပူၤန့ၣ် ပယီၤသုးသံ(၄၇)ဂၤအဂ့ၢ်န့ၣ် (ခ့ၣ်အဲၣ်ယူၣ်)လီၢ်ခၢၣ်သး ထုးထီၣ်ပာ်ဖျါ၀ဲဖဲလါယနူၤအါရံၤ ၂၀ သီအနံၤန့ၣ်လီၤႉ တလါအံၤလါယနူၤအါရံၤ ၁၅ သီအတီၢ်ပူၤ KNLA(သုးက့ ၃) အသုးရ့ၣ်(၈)ႇ သုးရ့ၣ်(၉)‚ ကညီဒီကလုာ်ဂၢၤသးကရၢ(KNDO) သုးရ့ၣ်(၃)ႇ (KNLA)စုတီၤဖီလာ်(Federal Wings Drone) သုးပာ်ဖှိၣ်ဒီးပယီၤသုးအဘၢၣ်စၢၤတၢ်ဒုးကဲထီၣ်၀ဲ(၅၅)ဘျီဒီး ပယီၤသုးသံ(၄၇)ဂၤအကျါပၣ်ဃုာ်၀ဲ သုးရ့ၣ်ခိၣ်ခံ(၁)ဂၤႇဘၣ်ဒိ၀ဲ(၁၉)ဂၤအဂ့ၢ်န့ၣ် ခ့ၣ်အဲၣ်ယူၣ် ထုးထီၣ်ပာ်ဖျါ၀ဲန့ၣ်လီၤႉ လၢန့ၣ်အမဲာ်ညါခီဖျိပယီၤသုးခးလီၤကျိဖးဒိၣ်ဆူချၢၣ်လွံၢ်ထူၣ်ကီၢ်ရ့ၣ်(သုးက့ ၃)လၢၢ်ဒိၣ်ကီၢ်ဆၣ်ႇ မိကီၢ်ဆၣ်တၢ်ပၢဟီၣ်က၀ီၤပူၤကိးမုၢ်နံၤဒဲးအဃိ လီၢ်က၀ီၤပိာ်မုၣ်ဘၣ်ဒိ၀ဲ(၁)ဂၤဒီးလီၢ်က၀ီၤကမျၢၢ်ဘၣ်ဃ့ၢ်ထီၣ်၀ဲ...