တၢ်လိ၁်ကွီၢ်ကညီသးစၢ်စးသ့စီၣ်မ့လၢတၢ်စုဆူၣ်ခီၣ်တကးတၢ်ဘျၢသဲစးဒီးဖျါလီၤဂ၁်လၢတၢ်မၤဒၢၣ်အီၤ
လါဖ့ၤဘြူၤအါရံၤ ၁၅ သီႇ ၂၀၂၃ နံၣ်ႇ ခ့ၣ်အဲးစံၣ် လၢတနီသရံၣ်ကီၢ်ခီဒိၣ် အ့ၤမဲကီၢ်ဆၣ်အပူၤ ဖဲအပူၤကွံာ်လါယနူၤအါရံၤ ၂၀ သီအနံၤ ပယီၤသုးဖီၣ်၀ဲကညီလံာ်လဲၢ်တၢ်ဆဲးတၢ်လၤကမံးတံာ်သးစၢ်စးသ့စီၣ်မ့၀ံၤအလီၢ်ခံ ဖဲလါဖ့ၤဘြူၤအါရံၤ ၁၃ သီ အနံၤန့ၣ် တၢ်ထုးထီၣ်သမံသမိးအီၤလၢရူဒီး တၢ်လိာ်ကွီၢ်အီၤလၢတၢ်စုဆူၣ်ခီၣ်တကးတၢ်ဘျၢသဲစး (၅၀)‚(၅၂)သ့ၣ်တဖၣ်အဂ့ၢ်န့ၣ် ၦၤလၢဘူးဒီးအီၤတဖၣ်စံး၀ဲန့ၣ်လီၤႉ စးသ့စီၣ်မ့အံၤနုာ်လီၤပၣ်ဃုာ်မၤသကိးတၢ်လၢကညီလံာ်လဲၢ်တၢ်ဆဲးတၢ်လၤအပူၤဒီးဖဲပယီၤသုးဖီၣ်စးသ့စီၣ်မ့ ၀ံၤအလီၢ်ခံ ဖဲလါဖ့ၤဘြူၤအါရံၤ ၁၃ သီအနံၤန့ၣ် တၢ်ထုးထီၣ်သမံသမိးအီၤလၢရူဒီးဖဲန့ၣ်တၢ်လိာ်ကွီၢ်အီၤလၢ တၢ်စုဆူၣ်ခီၣ်တကးတၢ်ဘျၢသဲစးအသိး ဖျါလီၤဂာ်လၢတၢ်မၤဒၢၣ်ဃာ်စးသ့စီၣ်မ့အံၤအဂ့ၢ်န့ၣ် ၦၤလၢဘူးဒီးအီၤတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ဖဲမဟါန့ၣ်တၢ်တၢ်ထုးထီၣ်သမံသမိးစးသ့စီၣ်မ့လၢ(အ့ၤမဲမၠိၣ်မၣ်)ကွီၢ်ဘျီၣ်မီၤနီၤႉအ၀ဲသ့ၣ်လိာ်ကွီၢ်၀ဲလၢ (၅၀)(က)ဒီး(၅၂)(က)တၢ်စုဆူၣ်ခီၣ်တကးတၢ်ဘျၢသဲစးမီၤနီၤႉလိာ်ကွီၢ်၀ဲလၢအခဲအံၤမီၤနီၤ” အဂ့ၢ်န့ၣ် စံးဘၣ် ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ တကးဒံးဘၣ်လၢန့ၣ်အမဲာ်ညါတၢ်သမံသမိးစးသ့စီၣ်မ့အံၤလၢ(ပသံၣ်၀့ၢ်)တၢ်သမံသမိးလီၢ်ဒီးခီဖျိတၢ်မၤဒၢၣ်အီၤအဃိ အမဲာ်ချံထီၣ်ဂီၤတကပၤဒီးတၢ်မၤဒၢၣ်အစုအခီၣ်လီၢ်အိၣ်တ့ၢ်၀ဲအဂ့ၢ်န့ၣ် ၦၤလၢဘူးဒီးအီၤတဂၤဃီ၀ဲန့ၣ်စံးအါထီၣ်၀ဲ န့ၣ်လီၤႉ ဖဲအပူၤကွံာ်လါယနူၤအါရံၤ ၁၃ သီအနံၤ တၢ်မၤ၀ဲလံာ်လဲၢ်တၢ်ဆဲးတၢ်လၤတၢ်အိၣ်ဖှိၣ်အံၤလၢ(အ့ၤမဲ) ကညီလံာ်လဲၢ်တၢ်ဆဲးတၢ်လၤ၀ဲၤဒၢးအခါန့ၣ် ပယီၤသုးဖီၣ်က့ၤကိးသမံသမိး၀ဲစးသ့စီၣ်မ့အဆိကတၢၢ်တဘျီန့ၣ်လီၤႉ တၢ်ဖီၣ်သမံသမိးစးသ့စီၣ်မ့အဆိကတၢၢ်တဘျီ၀ံၤအလီၢ်ခံဖဲလါယနူၤအါရံၤ ၁၄ သီအနံၤန့ၣ် တၢ်ပျၢ်လီၤက့ၤအီၤဒီးတၢ်က့ၤဖီၣ်ကဒီးအီၤခံဘျီတဘျီအံၤတၢ်လိာ်ကွီၢ်အီၤလၢတၢ်စုဆူၣ်ခီၣ်တကးတၢ်ဘျၢသဲစးအံၤန့ၣ်လီၤႉ တၢ်နုာ်လီၤဖီၣ်စးသ့စီၣ်မ့တနံၤဃီ၀ဲန့ၣ်တၢ်ဖီၣ်ဃုာ်၀ဲ(အ့ၤမဲကီၢ်ဆၣ်)ကည့ၤကိကၠံသ၀ီသးၦၢ်ဒီးအမါအံၤစ့ၢ်ကီးအသိး အ၀ဲသ့ၣ်ခံဂၤအံၤစ့ၢ်ကီးတၢ်လိာ်ကွီၢ်၀ဲလၢတၢ်စုဆူၣ်ခီၣ်တကးတၢ်ဘျၢသဲစးဒီးတၢ်ကလဲၤဆှၢအီၤဆူ(မၠီမၠး)ဃိာ်ပူၤအဂ့ၢ်န့ၣ် ၦၤလဲၤထီၣ်ဒိနကနၣ်တၢ်ဖိတဂၤစံး၀ဲဒ်အံၤန့ၣ်လီၤႉ “ခဲအံၤတၢ်ထုးထီၣ်သမံသမိးအီၤမ့၀ံၤန့ၣ်ၦၤကဆှၢအီၤဆူ(မၠီမၠး)ဃိာ်ပူၤႉၦၤကလဲၤဆှၢအီၤခဲမုၢ်ဆ့ၣ်မီၤနီၤႉခဲအံၤတၢ်လိာ်ကွီၢ်အ၀ဲသ့ၣ်လၢတၢ်ဘျၢသဲစး (၅၀) ဒီး (၅၂) မီၤနီၤႉဃုာ်ဒီးစးသ့စီၣ်မ့န့ၣ်ခဲလၢာ် (၃) ဂၤမီၤနီၤႉတၢ်လိာ်ကွီၢ်အ၀ဲသ့ၣ် (၃) အံၤလၢတၢ်ဘျၢသဲစး၀ဲန့ၣ်လီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢ(အ့ၤမဲကီၢ်ဆၣ်)အပူၤကညီသးစၢ်စးသ့စီၣ်မ့အံၤဟူးဂဲၤဖံးမၤတၢ်လၢကညီလံာ်လဲၢ်တၢ်ဆဲးတၢ်လၤကလဲၤထီၣ်လဲၤထီအဂီၢ်တကးဒံးဘၣ်အမဲာ်ညါဟးမၤလိကလီန့ၢ်၀ဲကညီသူၣ်ဘီၣ်သးစၢ်တဖၣ်လၢ(ခီၣ်ဖၠူထၢၣ်)ဒီးလံာ်ကီၤလၤ၀ါန့ၣ်လီၤႉဒ်န့ၣ်အသိးပယီၤသုးလိာ်ဘၢလိာ်ကွီၢ်စးသ့စီၣ်မ့လၢအမ့ၢ်(PDF)အၦၤအံၤတမ့ၢ်၀ဲဘၣ်အဂ့ၢ်န့ၣ် ၦၤလၢအမၤသကိးဃုာ်တၢ်ဒီးအီၤတဖၣ်စံး၀ဲန့ၣ်လီၤႉ ဒ်န့ၣ်အသိးတချုးသုးဟံးန့ၢ်တၢ်စိတၢ်ကမီၤကဲထီၣ်ဒံးဘၣ်ဖဲအပူၤကွံာ်(၂၀၂၀)လါအီကူး ၁၂...
ပယီၤသုးခးလီၤကျိဖးဒိၣ်အဃိတပွဲဖိသံ(၁)ပါဒီးအူစ့ဘၣ်ဒိနးနးကျံၤကျံၤ(၁)ပါ
လါဖ့ၤဘြူၤအါရံၤ ၁၄ သီႇ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ၀ီၢ်ရ့ၣ်ကီၢ်ဆၣ်အပူၤ ခီဖျိပယီၤသုးခးလီၤကျိဖးဒိၣ်လီၤတဲာ်ပိၢ်ဖးထီၣ်လၢ(ကန့ၤကမီၣ်)သီခါဖၠၣ်ဖီခိၣ်အဃိ ဘၣ်သံ၀ဲတပွဲ(၁)ပါဒီး အူစ့ဘၣ်ဒိဘၣ်ထံးနးနးကျံၤကျံၤ(၁)ပါစ့ၢ်ကီးအဂ့ၢ်န့ၣ် သ့ၣ်ညါဘၣ်လၢသ၀ီဖိတဖၣ်အအိၣ်န့ၣ်လီၤႉ ဖဲအပူၤကွံာ်လါဖ့ၤဘြူၤအါရံၤ ၁၀ သီ ဂီၤခီအဆၢကတီၢ် လၢ(အီၤသပၠ့ၤ)သ၀ီဒီးတဃ့ၣ်ကျီးအဘၢၣ်စၢၤန့ၣ် တၢ်ဒုးကဲထီၣ်၀ဲလၢတၢ်ပၢၢ်ဆၢသုးပာ်ဖှိၣ်ဒီးပယီၤသုးအဘၢၣ်စၢၤ၀ံၤအလီၢ်ခံ ဖဲဟါခီ ၃ နၣ်ရံၣ်ဃၣ်ဃၣ် အဆၢကတီၢ်န့ၣ် ပယီၤသုးကျိဖးဒိၣ်သုးရ့ၣ်ခးလီၤကျိဖးဒိၣ်ဆူ(ကန့ၤကမီၣ်)သ၀ီပူၤအဃိ သီခါဖၠၣ်ဒီးဟံၣ်ဃီတၢ်သူၣ်ထီၣ်ဟးဂူာ်ဟးဂီၤ၀ဲဒီးတၢ်သံတၢ်ဘၣ်ဒိဘၣ်ထံးကဲထီၣ်၀ဲဒ်အံၤလီၤအဂ့ၢ်န့ၣ် သ၀ီဖိတဂၤစံး၀ဲဒ်အံၤန့ၣ်လီၤႉ (ကန့ၤကမီၣ်)သ၀ီဖိတဂၤစံး၀ဲလၢ “ပယီၤသုးကျိဖးဒိၣ်သုးရ့ၣ် (၃၈၇) လၢအိၣ်ဆီလီၤသးဖဲယွၤသ့ၣ်သ၀ီဃၢၤအံၤ ခးလီၤစိကျိဖးဒိၣ်ဆူ(ကမီၣ်ကန့ၤ)သ၀ီပူၤအဃိလီၤတဲာ်လၢသီခါဖၠၣ်ကရၢၢ်ပူၤ (၂) ဖျၢၣ်ႉမ့မ့ၢ်တပွဲဖိတပါန့ၣ်သံဖဲန့ၣ်တဘျီဃီလီၤႉလၢအူစ့တပါန့ၣ်ဘၣ်၀ဲအခီၣ်အစုခဲလၢာ်လီၤႉခဲအံၤၦၤလဲၤဆှၢအ၀ဲသ့ၣ်လၢ၀့ၢ်ပူၤႉသ၀ီဖိနါက့ဘၣ်ဒိ (၂) ဂၤဒံးႉၦၤဟံၣ်နါက့ဟးဂီၤအိၣ်မီၤနီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲလါဖ့ၤဘြူၤအါရံၤ ၁၂ သီအနံၤန့ၣ်လီၤႉ ဒ်န့ၣ်အသိးဖဲအပူၤကွံာ်လါဖ့ၤဘြူၤအါရံၤ ၁၀ သီအနံၤစ့ၢ်ကီး ပယီၤသုးပာ်ဖှိၣ်လၢအိၣ်ဒူပျာ်ယာ်ကီၢ်ရ့ၣ် (နိၣ်တကီကီၢ်ဆၣ်)၀ီၢ်ရီဟီၣ်က၀ီၤ(လိၣ်ရှါ)သ၀ီပူၤတဖၣ်အံၤ (နအ့ၤ)သ၀ီဖိစီၤမိန့ၤ၀့ လၢအလဲၤၦ့ၤစဲးဖီကဟၣ် တၢ်ဖိတၢ်လံၤလၢ(သၤဖၠူၤစယၣ်)၀့ၢ်အံၤဖဲအဟဲက့ၤလၢကျဲအခါ ပယီၤသုးတဖၣ်အံၤခးအီၤဒီးဘၣ်၀ဲအဟၢဖၢအဃိ တၢ်ကူစါယါဘျါအီၤလၢဂ့ၢ်၀ီအူအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ “အ၀ဲသ့ၣ်လဲၤထီၣ်ၦၤ့စဲးဖီကဟၣ်တၢ်ဖိတၢ်လံၤလၢ၀့ၢ်ပူၤခံဂၤမီၤနီၤႉလဲၤဒိး၀ဲဒီးဆဲးကဲးန့ၣ်ႉ ဖဲအ၀ဲသ့ၣ်ဟဲက့ၤလၢကျဲအခါန့ၣ်ခီဖျိ(လိၣ်ရှါ)ပယီၤသုးကလၢၤမဲာ်ညါကျဲပူၤန့ၣ်ၦၤကးတံၢ်ဃာ်၀ဲဒီး၀ၣ်အဃိ အ၀ဲသ့ၣ်ဟဲက့ၤဆှဲး၀ဲကျဲန့ၣ်ႉပယီၤသုးခးစိအ၀ဲသ့ၣ်အဃိဘၣ်၀ဲဒၣ်ၦၤအိၣ်လၢလီၢ်ခံတဂၤန့ၣ်ႉခီဖျိဘၣ်အၦံာ်ဖးဒိၣ်အဃိအဘၣ်က့ၤဆဲးထီၣ်က့ၤ၀ဲမီၤနီၤ” အဂ့ၢ်န့ၣ် ၦၤလၢအဘူးဒီးၦၤဘၣ်ဒိဘၣ်ထံးတဖၣ်အံၤစံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢ၀ီၢ်ရ့ၣ်ကီၢ်ဆၣ် သရိာ်၀ါ–ဃိၣ်သၢဖျၢၣ်ကျဲန့ၣ် ပယီၤသုးနုာ်လီၤအိၣ်ဆီလီၤသးလၢနိၣ်ခၠိနဲၣ်သ၀ီႇ လ့နိးႇလိၣ်ရှါႇစံနပ့ၤဒီးတကူၣ်တၢၣ်သ၀ီတဖၣ်အပူၤဒီး အိၣ်ခိးသမံသမိးလီၢ်က၀ီၤကမျၢၢ်လၢအဟးထီၣ်က့ၤလီၤတဖၣ် အိၣ်၀ဲတလီၢ်လီၢ်အသိး ဖီၣ်မၤဒၢၣ်လီၢ်က၀ီၤကမျၢၢ်ဒီးခးသံ၀ဲကမျၢၢ်အိၣ်(၅)ဂၤဃၣ်ဃၣ်လံအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤသ၀ီဖိတဖၣ်အအိၣ်န့ၣ်လီၤႉ ဖဲလါဖ့ၤဘြူၤအါရံၤ ၂ သီအနံၤ...
ပယီၤသုးခးလီၤကျိဖးဒိၣ်အဃိလီၢ်က၀ီၤကမျၢၢ်ပိ၁်မုၣ်ဘၣ်ဒိဘၣ်ထံး(၃)ဂၤ
လါဖ့ၤဘြူၤအါရံၤ ၁၄ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤ ချၢၣ်လွံၢ်ထူၣ်ကီၢ်ရ့ၣ် ဆီထံးကီၢ်ဆၣ်အပူၤ ဖဲလါဖ့ၤဘြူၤအါရံၤ ၁၁ သီ ကညီဒီကလုာ်မုၢ်နံၤအခါန့ၣ် ခီဖျိပယီၤသုးခးလီၤကျိဖးဒိၣ်ဆူ(ညီၤပ့ၤကၠံ)သ၀ီပူၤ အဃိ ကမျၢၢ်ပိာ်မုၣ်ပိာ်မၢၤဘၣ်ဒိဘၣ်ထံး၀ဲ(၃)ဂၤအဂ့ၢ်န့ၣ် သ့ၣ်ညါဘၣ််လၢလီၢ်က၀ီၤကမျၢၢ်အအိၣ်န့ၣ်လီၤႉ ပယီၤသုးခီၣ်ချ့သုးရ့ၣ်(ခမရ–၂၀)လၢအနုာ်လီၤအိၣ်ဆီလီၤသးဖဲ(ပစိၤမၠီ)သ၀ီပူၤအံၤတဖၣ် ဖဲလါဖ့ၤဘြူၤအါရံၤ ၁၁ သီ ဂီၤခီ ၄ နၣ်ရံၣ်ဃၣ်ဃၣ်အဆၢကတီၢ်န့ၣ် ခီဖျိအ၀ဲသ့ၣ်ခးလီၤကျိဖးဒိၣ်(၃)ဖျၢၣ်ဆူညီၤပ့ၤကၠံသ၀ီပူၤအဃိ ညီၤပ့ၤကၠံသ၀ီဖိပိာ်မုၣ်ဘၣ်ဒိဘၣ်ထံး၀ဲ(၃)ဂၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ ၦၤပိာ်မုၣ်ပိာ်မၢၤလၢအဘၣ်ဒိဘၣ်ထံး(၃)ဂၤအံၤန့ၣ်မ့ၢ်၀ဲညါစူၤလဲၤဒီးအဖိမုၣ်မၣ်ဖၠူၤစိအ့(၂၀)နံၣ်ဒီးမသါသါစိ(၃၆)နံၣ်တဖၣ်ဒီးမ့ၣ်အူအီၣ်ဟးဂီၤကွံာ်၀ဲဘုဖီတဖျၢၣ်စ့ၢ်ကီးအဂ့ၢ်န့ၣ် ခ့ၣ်အဲၣ်ယူၣ်လီၢ်ခၢၣ်သးတၢ်ကစီၣ်ဒီးတၢ်ဘိးဘၣ်ရၤလီၤ ၀ဲၤကျိၤ ထုးထီၣ်ပာ်ဖျါ၀ဲဖဲလါဖ့ၤဘြူၤအါရံၤ ၁၂ သီ အနံၤန့ၣ်လီၤႉ လီၢ်က၀ီၤကမျၢၢ်ပိာ်မုၣ်ပိာ်မၢၤ(၃)ဂၤလၢအဘၣ်ဒိဘၣ်ထံးသ့ၣ်တဖၣ်အံၤတၢ်လဲၤဆှၢအီၤဆူ(ချၢၣ်လွံၢ်ထူၣ်၀့ၢ်)တၢ်ဆါဟံၣ်ဒီးဖဲန့ၣ်အကျါမ့မ့ၢ်မၣ်သါသါစိအံၤဘၣ်ဒိနးတစဲးအဃိတၢ်ဆှၢအီၤဆူ(ပကိ)တၢ်ဆါဟံၣ်အဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ထုးထီၣ်ပာ်ဖျါပူၤအသိးသ့ၣ်ညါဘၣ်န့ၣ်လီၤႉ စှၤသီအတီၢ်ပူၤခီဖျိပယီၤသုးခးလီၤကျိဖးဒိၣ်ဆူ(ချၢၣ်လွံၢ်ထူၣ်)ကီၢ်ရ့ၣ်ပူၤဟဲအါထီၣ်အဃိ ကမျၢၢ်သံဘၣ်ဒိဘၣ်ထံးဟဲအါထီၣ်၀ဲအဂ့ၢ်န့ၣ် ၦၤဟူးဂဲၤမၤတၢ်လၢဟီၣ်က၀ီၤကညီၦၤဂ့ၢ်၀ီကရူၢ်တဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“လၢ(သုးက့ ၃)အံၤခဲအံၤဟဲက့ၤဆူၣ်ထီၣ်ကဒါလံႉပယီၤသုးခးလီၤကျိဖးဒိၣ်ကိးမုၢ်နၤဒဲးလီၤႉ လၢဆီထံးတကပၤန့ၣ်နါက့တၢ်ခးလိာ်သးကဲထီၣ်ပယီၤသုးခးလီၤကျိဖးဒိၣ်ကိးမုၢ်နံၤဒဲးလီၤႉလၢ(မူကီၢ်ဆၣ်)နါက့ဒ်န့ၣ်လီၤႉမ့၀ံၤၦၤဘၣ်ဒိဘၣ်ထံးနါက့ဟဲအထီၣ်ဒီဒူၣ်ညါႉပယီၤသုးခးလီၤကျိဖးဒိၣ်အဃိၦၤဃ့ၢ်မှံဟးဖျိးအနီၣ်ဂံၢ်ဟဲအါထီၣ်ကွ့ၢ်ကွ့ၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဖဲအပူၤကွံာ်လါဖ့ၤဘြူၤအါရံၤ ၅ သီအနံၤစ့ၢ်ကီး ခီဖျိပယီၤသုးခးလီၤကျိဖးဒိၣ်အဃိ ဖိသၣ်မုၣ်ဖိ(၅)နံၣ်တဂၤႇ (၁၅)နံၣ်ဆူဖီလာ်ဖိသၣ်ပိာ်မုၣ် ၃ ဂၤဒီး ၦၤနီၢ်ဒိၣ်ပိာ်မုၣ်(၂)ဂၤဘၣ်ဒိဘၣ်ထံး၀ဲအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ စးထီၣ်ဖဲ(၂၀၂၃)ထီၣ်သီန့ၣ် လၢခ့ၣ်အဲၣ်ယူၣ်(သုးက့ ၃)ဟီၣ်က၀ီၤ ချၢၣ်လွံၢ်ထူၣ်ကီၢ်ရ့ၣ်အပူၤန့ၣ် ပယီၤသုးမၤကမၣ်လုၢ်သ့ၣ်ခါပတ၁်၀ဲတၢ်မၤကမၣ်ၦၤဂ့ၢ်၀ီခွဲးယာ်ဟဲအါထီၣ်ဒီးတကီၢ်ခါခဲအံၤသ၀ီ(၆)ဖျၢၣ်လီၢ်က၀ီၤကမျၢၢ်ဘၣ်ဃ့ၢ်မှံဟးဖျိးအဂၤ(၅၀၀၀)ဘျဲၣ်အဂ့ၢ်န့ၣ် ထုးထီၣ်ပာ်ဖျါ၀ဲန့ၣ်လီၤႉ
တၢ်မၤသံသုးမီၤစိရိၤသးၦၢ်အဟံၣ်ဖိဃီဖိ(၇)ဂၤကဲထီၣ်၀ံၤအလီၢ်ခံတၢ်မၤဃံးထီၣ်တၢ်ဘံၣ်တၢ်ဘၢလၢပလီၣ်၀့ၢ်ပူၤ
လါဖ့ၤဘြူၤအါရံၤ ၁၃ သီႇ ၂၀၂၃ နံၣ်ႇ ခ့ၣ်အဲးစံၣ် လၢတနီသရံၣ်ကီၢ်ခီဒိၣ် ပလီကီၢ်ဆၣ် ပလီၣ်၀့ၢ် ကၠီၣ်လိကၠံကရူၢ်(ညီၤစှ့ၤကိ)သ၀ီအပူၤန့ၣ် ဖဲအပူၤကွံာ်လါဖ့ၤဘြူၤအါရံၤ ၁၁ သီ ဟါခီအဆၢကတီၢ် ၦၤဖီၣ်စုက၀ဲၤတဒူၣ်မၤသံ၀ဲသုးမီၤစိရိၤသးၦၢ် အဟံၣ်ဖိဃီဖိ(၇)ဂၤကဲထီၣ်၀ံၤအလီၢ်ခံ ပယီၤသုးမၤဃံးထီၣ်တၢ်ဘံၣ်တၢ်ဘၢအဂ့ၢ်န့ၣ်သ့ၣ်ညါဘၣ်လၢလီၢ်က၀ီၤ ကမျၢၢ်အိၣ်န့ၣ်လီၤႉ ဖဲလါဖ့ၤဘြူၤအါရံၤ ၁၁ သီ ဟါခီ ၈း၃၀ အဆၢကတီၢ်န့ၣ် လၢပလီကီၢ်ဆၣ် ပလီၣ်၀့ၢ်(ကၠီၣ်လိကၠံ)ကရူၢ် (ညီၤစှ့ၤကိ)သ၀ီအပူၤန့ၣ် ၦၤဖီၣ်စုက၀ဲၤလၢတၢ်တသ့ၣ်ညါအမံၤတဒူၣ် မၤသံ၀ဲသုးမီၤစိရိၤသးၦၢ်(အူမၠ့ၣ်အီၤ)အမါႇ အဖိမုၣ်ႇအလံၤသ့ၣ်တဖၣ်အဃိ ပယီၤသုးအိၣ်ခိးသမံသမိးမၤဃံးထီၣ်တၢ်ဘံၣ်တၢ်ဘၢလၢပလီၣ်၀့ၢ်ပူၤအဂ့ၢ်န့ၣ် ကမျၢၢ်လၢအိၣ်ပလီၣ်၀့ၢ်ပူၤတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“တဂီၤအံၤဖဲပလီၣ်၀့ၢ်န့ၣ်ပယီၤသုးဆီလီၤတြဲၤအိၣ်ခိးတၢ်ႉမ့၀ံၤသမံသမိး၀ဲသိလ့ၣ်ယီၢ်(ဆဲးကဲး)တဖၣ်မီၤနီၤႉအသံကွၢ်၀ဲနကလဲၤဖဲလဲၣ်ႇယဆိမိၣ်လၢအမၤတံာ်တာ်တၢ်ဒ်န့ၣ်လီၤႉမ့၀ံၤတဂီၤညါအံၤပယီၤသုးလဲၤထီၣ်ဒီးသိလ့ၣ်လၢသ၀ီ၀ဲန့ၣ်မီၤနီၤႉအနီၣ်ဂံၢ်အိၣ်ဆံးအါလဲၣ်ဒုတသ့ၣ်ညါဘၣ်ႉဖဲအံၤန့ၣ်ၦၤဟးထီၣ်တၢ်ချၢတဘူၣ်နီတဂၤဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ၦၤလၢအသံတဖၣ်န့ၣ်မ့ၢ်၀ဲသးၦၢ်အူမၠ့ၣ်အီၤအမါဒီၤကၠံၤနွဲၣ်(၆၂)နံၣ်ႇအဖိမုၣ်ဒီၤသါသါမီၤ(၄၂)နံၣ်ႇမီၤန့ၤထဲၣ်သ့(၁၇)နံၣ်ႇမီၤစ့ၤယၤအီၤ(၁၆)နံၣ်ႇမီၤစိမ့ပဲၤ(၁၃)နံၣ်ႇမၣ်မ့ၤစ့ၤဖၠူၤ(၉)နံၣ်ႇမီၤသါမါ(၁)နံၣ် သ့ၣ်တဖၣ်အဂ့ၢ်န့ၣ် ဟီၣ်က၀ီၤတၢ်ကစီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ ၦၤသ့ၣ်တဖၣ်အံၤဘၣ်တၢ်မၤသံအီၤလၢကရူၢ်ကရၢဖဲလဲၣ်တဒူၣ်လဲၣ်န့ၣ်တၢ်ထုးထီၣ်ပာ်ဖျါ၀ဲလၢအဖိးသဲစးတအိၣ်ဒံးဘၣ်န့ၣ်လီၤႉ ဘၣ်ဃးဒီးတၢ်ဂ့ၢ်အံၤ(Palaw People's Defense Force)တၢ်ဘိးဘၣ်ရၤလီၤမူဒါခိၣ်စံး၀ဲလၢ“ဖဲ ၁၁ သီ ဟါခီအခါန့ၣ် ၦၤတဒူၣ်ဟဲမၤသံ၀ဲမီၤနီၤႉၦၤမၤသံတၢ်ဖိန့ၣ်တုၤလၢခဲအံၤၦၤတသ့ၣ်ညါဒံးဘၣ်ႉၦၤလၢတၢ်မၤသံအီၤခဲအံၤန့ၣ်မ့ၢ်၀ဲဒၣ် သုးမီၤစိရိၤအသ၀ီသးၦၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ တကီၢ်ခါခဲအံၤလၢပလီကီၢ်ဆၣ်အပူၤန့ၣ်ဒူသ၀ီတဖၣ်အါဒၣ်တက့ၢ်ဘၣ်တၢ်ပၢပြးအီၤလၢသုးမီၤစိရိၤအသ၀ီသးၦၢ်လီၤဒီးအပူၤကွံာ်တၢ်မၤသံသုးမီၤစိရိၤသးၦၢ်ကဲထီၣ်အိၣ်၀ဲဘၣ်ဆၣ် တၢ်မၤသံဟံၣ်ဖိဃီဖိဒီတဖျၢၣ်ဒ်အံၤကဲထီၣ်မ့ၢ်၀ဲ အဆိကတၢၢ်တဘျီလီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
တၢ်နု၁်လီၤခး(ပကၤရံၤ)ပၢၤကီၢ်တၢ်လီၢ်၀ံၤအလီၢ်ခံကမျၢၢ်လၢအိၣ်တၢ်ခိၣ်တၢ်ဃၢၤဖဲန့ၣ်တဖၣ်ဃ့ၢ်ထီၣ်၀ဲ
လါဖ့ၤဘြူၤအါရံၤ ၁၃ သီႇ ၂၀၂၃ နံၣ်ႇ ခ့ၣ်အဲးစံၣ် လၢတနီသရံၣ်ကီၢ်ခီဒိၣ်အပူၤ ဟီၣ်က၀ီၤတၢ်ပၢၢ်ဆၢသုးပာ်ဖှိၣ်နုာ်လီၤခးဒ၀ဲၢ်၀့ၢ်ဃၢၤ(ပကၤရံၤ)သ၀ီပူၤ ပၢၤကီၢ်တၢ်လီၢ်ကဲထီၣ်သး၀ံၤအလီၢ်ခံ ခီဖျိပယီၤသုးခးလီၤတပျုာ်တပျီာ်ကျိဖးဒိၣ်တပယူာ်ဃီအဃိ လီၢ်က၀ီၤသ၀ီဖိဘၣ်ဃ့ၢ်ထီၣ်၀ဲအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ ပၢၤကီၢ်တၢ်လီၢ်လၢအိၣ်ဒ၀ဲၢ်၀့ၢ်(ပကၤရံၤ)သ၀ီပူၤအံၤ ဖဲအပူၤကွံာ်လါယနူၤအါရံၤ ၁၀ သီ ဂီၤခီ ၃း၃၀ ဃၣ်ဃၣ် အဆၢကတီၢ်န့ၣ် ဟီၣ်က၀ီၤတၢ်ပၢၢ်ဆၢသုးပာ်ဖှိၣ်ဒီးကီၢ်သူလ့ၤသုးမုၢ်ဒိၣ်(KTLA)နုာ်လီၤခး၀ဲအဂ့ၢ်န့ၣ် လီၢ်က၀ီၤကမျၢၢ်စံး၀ဲအသိးသ့ၣ်ညါဘၣ်န့ၣ်လီၤႉ လီၢ်က၀ီၤကမျၢၢ်လၢတအဲၣ်ဒိးပာ်ဖျါအမံၤတဂၤစံး၀ဲ“သ၀ီဖိတနီၤန့ၣ်လဲၤစံၣ်ထီၣ်လၢ၀့ၢ်ပူၤႉတနီၤခီန့ၣ်လဲၤအိၣ်လၢ အဘူးအတံၢ်အဟံၣ်မီၤနီၤႉလၢတၢ်အီၣ်တၢ်အီႇတၢ်အိၣ်တၢ်ဆိးတကပၤန့ၣ်တၢ်ကီတၢ်ခဲဖးဒိၣ်ညါ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့်ၣလီၤႉ ခံခီခံကပၤအဘၢၣ်စၢၤတၢ်ဒုးကဲထီၣ်ကအိၣ်အမံးနံး(၃၀)၀ံၤအလီၢ်ခံခီဖျိပယီၤသုးခးလီၤကျိဖးဒိၣ်တုၤလၢဂီၤခီ(၅)နၣ်ရံၣ်ဘျဲၣ်ညါအဃိလီၢ်က၀ီၤသ၀ီဖိတဖၣ်ဘၣ်နုာ်လီၤစံၣ်အိၣ်လၢတၢ်ပူၤအဂ့ၢ်န့ၣ် လီၢ်က၀ီၤသ၀ီဖိလၢအဂၤတဂၤစ့ၢ်ကီး စံး၀ဲဒ်အံၤန့ၣ်လီၤႉ “ပနၢ်ဟူကျိသီၣ်လၢဂီၤဂီၤသီသီလီၤႉပလဲၤထီၣ်ကွၢ်တဘူၣ်ဘၣ်ႉဂီၤခီ ၃ နၣ်ရံၣ်အဃိ ကစံၣ်ထီၣ်ဒၢးစံၣ်ထီၣ်တသ့ ဘၣ်ႉတၢ်ဒုးကဲထီၣ်လၢသ၀ီပူၤခဲအံၤခဲအံၤအဃိလၢပကအိၣ်အဂီၢ်ပခူၣ်ဃာ်တၢ်ပူၤအိၣ်မီၤနီၤႉၦၤသူၣ်က့သးၦၢ်လၢအစံၣ်တကဲဘၣ်တဖၣ်န့ၣ်ဘၣ်နုာ်လီၤအိၣ်၀ဲလၢတၢ်ပူၤလီၤမီၤနီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် ဖဲလါဖ့ၤဘြူၤအါရံၤ ၁၁ သီအနံၤန့ၣ်လီၤႉ တၢ်နုာ်လီၤခး(ပကၤရံၤ)ပၢၤကီၢ်တၢ်လီၢ်အခါန့ၣ်ဟီၣ်က၀ီၤတၢ်ဒီသဒၢကမျၢၢ်သုးသံ(၁)ဂၤဒီးဘၣ်ဒိ(၂)ဂၤအသိး ပယီၤသုးတကပၤစ့ၢ်ကီးသံဘၣ်ဒိဘၣ်ထံးအိၣ်၀ဲဒီးတၢ်သူၣ်ထီၣ်ဟးဂူာ်ဟးဂီၤအိၣ်၀ဲစ့ၢ်ကီးအဂ့ၢ်န့ၣ် တၢ်ပၢၢ်ဆၢသုးပာ်ဖှိၣ်တကပၤစံး၀ဲန့ၣ်လီၤႉ ဖဲအပူၤကွံာ်လါအ့ဖြ့ၣ်အခါစ့ၢ်ကီးကီၢ်သူလ့ၤသုးမုၢ်ဒိၣ်(KTLA)ႇဘျံးဒ၀ဲၢ်ကီၢ်ရ့ၣ်(ပကဖ)ဒီးသိၣ်မှံၤတဖၣ်ပာ်ဖှိၣ်ထီၣ်သးနုာ်လီၤဒွဲၣ်အူအီၣ်၀ဲ(ပကၤရံၤ)သ၀ီဟီၣ်က၀ီၤပၢၤကီၢ်၀ဲၤလီၢ်အသိးဖဲလါစဲးပထ့ဘၢၣ်အခါစ့ၢ်ကီးတၢ်ဒီသဒၢကမျၢၢ်သုးနုာ်လီၤခး၀ဲပၢၤကီၢ်၀ဲၤလီၢ်အံၤဒံးအဂ့ၢ်န့ၣ် လီၢ်က၀ီၤဂံၢ်ခီၣ်ထံးၦၤဟ့ၣ်တၢ်ကစီၣ်ဖိတဖၣ်စံး၀ဲအသိး သ့ၣ်ညါဘၣ်န့ၣ်လီၤႉ
ကမျၢၢ်ၦၤဃ့ၢ်တၢ်ဒုးလၢအိၣ်မုၢ်ထီၣ်ဟီၣ်က၀ီၤဒူသ၀ီပူၤတဖၣ်တၢ်အီၣ်တၢ်အီလီၤတူာ်ထီၣ်လံ
လါဖ့ၤဘြူၤအါရံၤ ၁၃ သီႇ ၂၀၂၃ နံၣ်ႇ ခ့ၣ်အဲးစံၣ် လၢတနီသရံၣ်ကီၢ်ခီဒိၣ် ဘျံးဒ၀ဲၢ်ကီၢ်ရ့ၣ် ဒ၀ဲၢ်ကီၢ်ဆၣ် မုၢ်ထီၣ်ဟီၣ်က၀ီၤအပူၤန့ၣ် ခီဖျိပယီၤသုးကးတံၢ်ဃာ်တၢ်စိာ်ထီၣ်စိာ်လီၤဟုသးအံၤယံၤထီၣ်လံအဃိ တကီၢ်ခါအံၤကမျၢၢ်ၦၤဃ့ၢ်တၢ်ဒုးဖိလၢအိၣ် ဟီၣ်က၀ီၤပူၤဖဲန့ၣ်တဖၣ်တၢ်အီၣ်တၢ်အီလီၤတူာ်ထီၣ်၀ဲလံအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ စးထီၣ်ဖဲအပူၤကွံာ်လါအီးကထိဘၢၣ်တုၤလၢတလါအံၤလါဖ့ၤဘြူၤအါရံၤန့ၣ်လၢ(ဒ၀ဲၢ်ကီၢ်ဆၣ်)မုၢ်ထီၣ်ဒူသ၀ီဟီၣ်က၀ီၤအပူၤခီဖျိပယီၤသုးကးတံၢ်ဃာ်တၢ်စိာ်ထီၣ်စိာ်လီၤဟုသးႇတၢ်အီၣ်ဃ့တဖၣ်ဒီးကးတံၢ်ဃာ်ကျဲအံၤန့ၢ်လၢယဲၢ်လါဘျဲၣ်လံအဃိကမျၢၢ်ၦၤဃ့ၢ်တၢ်ဒုးလၢအိၣ်ဟီၣ်က၀ီၤဖဲန့ၣ်အပူၤတဖၣ်ထံၣ်ဘၣ်၀ဲတၢ်အီၣ်တၢ်အီလီၤတူာ်အဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဂၤစံး၀ဲန့ၣ်လီၤႉ ၦၤလၢမၤစၢၤၦၤဃ့ၢ်တၢ်ဒုးအံၤစံး၀ဲ“လၢမုၢ်ထီၣ်ဟီၣ်က၀ီၤသ၀ီပူၤန့ၣ်ၦၤဃ့ၢ်တၢ်ဒုးအနီၣ်ဂံၢ်ကအိၣ်အဂၤ(၇၀၀၀)ဘျဲၣ်ညါႉတနံၤဘၣ်တနံၤန့ၣ်ၦၤဃ့ၢ်တၢ်ဒုးဖိအနီၣ်ဂံၢ်ဟဲအါထီၣ်ကွ့ၢ်ကွ့ၢ်လီၤႉၦၤနီၣ်ဂံၢ်ဟဲအါထီၣ်လၢအ၀ဲတကပၤနါက့ကးတံၢ်ဃာ်ကျဲ‚စိာ်ထီၣ်စိာ်လီၤတၢ်အီၣ်တၢ်အီဒၢးတန့ၢ်ဘၣ်ႉတချုးဖဲန့ၣ်ဘၣ်န့ၣ်သိလ့ၣ်တီၣ်တၢ်ဖိတၢ်လံၤဖးဒိၣ်နါက့ပယီၤသုးပာ်ပနီၣ်၀ဲမီၤနီၤလၢကဘၣ်စိာ်ၦဲၤထၢၣ်ၦဲၤထၢၣ်ဒ်န့ၣ်အိၣ်မီၤနီၤႉဖဲလီၢ်ခံအံၤလ့ၤတက့ၤတဟ့ၣ်စိာ်၀ဲလၢာ်ဘၣ်ႉခဲအံၤတၢ်အီၣ်တၢ်အီလီၤတူာ်ထီၣ်လံ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါလၢဘျံးဒ၀ဲၢ်–ထံခံကျဲန့ၣ်စ့ၢ်ကီးဖဲအပူၤကွံာ်လါယနူၤအါရံၤတုၤတလါအံၤန့ၣ် တၢ်ဒုးကဲထီၣ်၀ဲလၢတၢ်ဒီသဒၢကမျၢၢ်သုးဒီးပယီၤသုးအဘၢၣ်စၢၤတၢ်ဒုးကဲထီၣ်ကအိၣ်လၢအဘျီခံဆံဃၣ်ဃၣ်ညါအဃိ ပယီၤသုးမၤဃံးထီၣ်တၢ်စိာ်ထီၣ်စိာ်လီၤဟုသးလီၤဒ်အံၤလီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ခီဖျိပယီၤသုးမၤဃံးထီၣ်တၢ်ဒ်အံၤအဃိဟုသးလၢဟီၣ်က၀ီၤတၢ်ဒီသဒၢကမျၢၢ်သုးပာ်ဖှိၣ်ပာ်ဖှိၣ်ဃာ်၀ဲသ့ၣ်တဖၣ်အံၤ ဟ့ၣ်လီၤဆီၣ်ထွဲမၤစၢၤ၀ဲကမျၢၢ်တဖၣ်အဂ့ၢ်န့ၣ်(Dawei East Forest People's Defense Force)ဒ၀ဲၢ်–ပကဖ တၢ်ဘိးဘၣ်ရၤလီၤမူဒါခိၣ် ယီၤနံၤ စံး၀ဲန့ၣ်လီၤႉ အ၀ဲစံး၀ဲလၢ“လၢမုၢ်ထီၣ်ဟီၣ်က၀ီၤ(၀ၣ်ကၠိ)သ၀ီန့ၣ်ပယီၤသုးဒွဲၣ်အူအီၣ်ကမျၢၢ်အဟံၣ်မီၤနီၤႉကမျၢၢ်လၢပယီၤသုးဒွဲၣ်အူအီၣ်အဟံၣ်တဖၣ်န့ၣ်ပမၤစၢၤ၀ဲသ့ၣ်ႉကမျၢၢ်လၢပယီၤသုးဒွဲၣ်အူအီၣ်အဟံၣ်တဖၣ်တနီၤန့ၣ်ဘၣ်လဲၤအိၣ်၀ဲလၢအကျီးပူၤဒ်န့ၣ်လီၤႉအဃိန့ၣ်ဒ်သိးကကဲထီၣ်တၢ်တိစၢၤမၤစၢၤအဂီၢ်ပမၤစၢၤအ၀ဲသ့ၣ်လၢဟုသးဒီးတၢ်အီၣ်တၢ်အီလၢအဂၤတဖၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ တနံၣ်အံၤ(၂၀၂၃)လါယနူၤအါရံၤအတီၢ်ပူၤ လၢတနီသရံၣ်ကီၢ်ခီဒိၣ် ဒ၀ဲၢ်ကီၢ်ဆၣ်အပူၤန့ၣ် ပယီၤသုးဒွဲၣ်အူအီၣ်၀ဲကမျၢၢ်အဟံၣ်(၁၅)ဖျၢၣ်ႇလီလိကီၢ်ဆၣ်ပူၤန့ၣ်(၆)ဖျၢၣ်ဒီးပလီၣ်ကီၢ်ဆၣ်ပူၤန့ၣ်(၁၂)ဖျၢၣ် ခဲလၢာ်ဒွဲၣ်အူအီၣ်၀ဲ(၃၃)ဖျၢၣ်အဂ့ၢ်န့ၣ် သ့ၣ်ညါဘၣ်လၢတနီသရံၣ်ကီၢ်ခီဒိၣ်(Southern Monitor)တၢ်ပာ်ဖျါအပူၤန့ၣ် လီၤႉ
လူၢ်ပျဲၢ်ကီၢ်ဆၣ်အပူၤ(KNU)ဖၣ်အၣ်ကီၢ်ရ့ၣ်တီခိၣ်ရိၣ်မဲမၤ၀ဲကညီဒီကလု၁်မုၢ်နံၤၦဲၤထီၣ်(၇၅)၀ီတ၀ီမူးတၢ်ရဲၣ်တၢ်ကျဲၤ
လါဖ့ၤဘြူၤအါရံၤ ၁၂ သီႇ ၂၀၂၃ နံၣ်ႇ ခ့ၣ်အဲးစံၣ် လၢလူၢ်ပျဲၢ်ကီၢ်ဆၣ်(တရံးဖိကွံ)သ၀ီအပူၤန့ၣ် အဆိကတၢၢ်တဘျီခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဖၣ်အၣ်ကီၢ်ရ့ၣ်တီခိၣ်ရိၤမဲမၤ၀ဲကညီကလုာ်မုၢ်နံၤၦဲၤထီၣ်(၇၅)၀ီတ၀ီတၢ်ရဲၣ်တၢ်ကျဲၤမူးလၢအလီၤဘၣ်၀ဲ ဖဲလါဖ့ၤဘြူၤအါရံၤ ၁၁ သီအနံၤအံၤဒီးလီၢ်က၀ီၤကမျၢၢ်လၢအကယၤဟဲထီၣ်၀ဲဒၣ်န့ၣ်လီၤႉ တကီၢ်ခါထံရူၢ်ကီၢ်သဲးတၢ်သဘံၣ်သဘုၣ်အကတီၢ်ဘၣ်ဆၣ်ခီဖျိလီၢ်က၀ီၤဖဲအံၤအပူၤၦၤသ့ၣ်ညါကညီဒီကလုာ်မုၢ်နံၤအိၣ်စှၤဒီးဒ်သိးၦၤကသ့ၣ်ညါအါဒိၣ်ထီၣ်ကညီဒီကလုာ်မုၢ်နံၤအဂ့ၢ်အကျိၤအဂီၢ်ဒီးစၢၤသွဲၣ်သီလၢကဟဲခါဆူညါတဖၣ်ကသ့ဟံးထီၣ်ဖီၣ်ထီၣ်ကဒါမူဒါအဂီၢ်တၢ်မၤ၀ဲတၢ်ရဲၣ်တၢ်ကျဲၤအံၤလီၤအဂ့ၢ်န့ၣ် ခ့ၣ်အဲၣ်ယူၣ်(လီၢ်ခၢၣ်သး)သ့ၣ်ၦၢ်၀ဲၤကျိၤခိၣ် ပဒိၣ်မါဘးထိ စံး၀ဲန့ၣ်လီၤႉ အ၀ဲစံး၀ဲလၢ“ပကလုာ်အံၤဒ်သိးကဒိးန့ၢ်တၢ်စံၣ်ညီၣ်ပၢလီၤသးခွဲးယာ်န့ၣ်အခါအံၤတ၀ံၤတတဲာ်ဒံးဘၣ်ႉအဃိန့ၣ်တစိၤထီၣ်တစိၤလီၤအသိးအဲၣ်ကလုာ်ၦၤသးစၢ်ဖိသ့ၣ်တဖၣ်ဘၣ်ဆဲးမၤက့ၤကလုာ်ဂ့ၢ်၀ီတၢ်ဖံးတၢ်မၤကိးဂၤဒဲးလီၤႉ အခဲအံၤဒ်ကလုာ်တကလုာ်အသိးန့ၣ်တၢ်ခွဲးတၢ်ယာ်တန့ၢ်လၢလၢၦဲၤၦဲၤဒံးဘၣ်ႉအဃိန့ၣ်သူၣ်ဘီၣ်သးစၢ်တဖၣ်ဒ်တစိၤထီၣ်တစိၤလီၤအသိးန့ၣ်ကဘၣ်ဆဲးမၤမူဒါ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ တၢ်မၤ၀ဲကညီဒီကလုာ်မုၢ်နံၤတၢ်ရဲၣ်တၢ်ကျဲၤလၢအဆိကတၢၢ်ဘျီ၀ဲအံၤအပူၤန့ၣ် သ၀ီကရူၢ်(၃)ကရူၢ် လီၢ်က၀ီၤကမျၢၢ်အဂၤ(၄၀၀)ဃၣ်ဃၣ်ဟဲထီၣ်၀ဲဒီး ခ့ၣ်အဲၣ်ယူၣ်လီၢ်ခၢၣ်သး ပဒိၣ်မါဘးထိတကးဒံးဘၣ်အမဲာ်ညါ (ကီၢ်ရ့ၣ်)တၢ်ကရၢကရိဒီးတၢ်ဘိးဘၣ်ရၤလီၤ၀ဲၤကျိၤခိၣ် ပဒိၣ်နီၢ်ဆှံ၀ါႇ ခ့ၣ်အဲၣ်ယူၣ်(လူၢ်ပျဲၢ်)ကီၢ်ဆၣ် ၦၤဘၣ်မူဘၣ်ဒါႇ ကညီသးစၢ်ကရၢ(KYO)ႇကညီပိာ်မုၢ်ကရၢ(KWO)ႇလူၢ်ပျဲၢ်ကီၢ်ဆၣ် ကညီပၢၤကီၢ်သုးကရူၢ်(KNPF)ခိၣ်နၢ်တဖၣ် ဟဲထီၣ်၀ဲဒၣ်န့ၣ်လီၤႉ (တရံးဖိကွံ)လီၢ်က၀ီၤသးစၢ်နီၢ်ထံဆှံဖီလၢအဟဲထီၣ်တၢ်ရဲၣ်တၢ်ကျဲၤမူးအံၤစံး၀ဲ“ပ၀ဲဒၣ်သးစၢ်တဖၣ်အံၤပမ့တပၣ်ဃုာ်ႇပမ့တနုာ်လီၤမၤတၢ်လၢပၦၤကလုာ်အဂီၢ်ဘၣ်ႇပမ့တနုာ်လီၤပၣ်ဃုာ်လၢထံရူၢ်ကီၢ်သဲးအပူၤဘၣ်န့ၣ်တမ့ၢ်လၢပကဒိးန့ၢ်ဘၣ်တၢ်ထူၣ်ဖျဲးညီညီဘၣ်ႉတၢ်အဃိန့ၣ်ပ၀ဲသးစၢ်တဖၣ်အံၤကြၢးလၢပကနုာ်လီၤပၣ်ဃုာ်မၤသကိးတၢ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လီၢ်က၀ီၤကမျၢၢ်လၢဟဲထီၣ်ကညီဒီကလုာ်မုၢ်နံၤတၢ်ရဲၣ်တၢ်ကျဲၤဘျီ၀ဲအံၤအပူၤတဖၣ်စိာ်ဃုာ်၀ဲလံာ်က့ဖးလဲၢ်လၢအပၣ်ဃုာ်၀ဲတၢ်ကိးသတြီ(၄)ထံၣ်လၢအမ့ၢ်ဟ့ၣ်ကညီကီၢ်တဘျီဃီႇကညီတဘးပယီၤတဘးဒုးနဲၣ်ခဲအံၤႇပတသးလီထံလီၢ်ကီၢ်ပူၤတၢ်ဒုးတၢ်ယၤဘၣ်ႇပတသးလီကလုာ်တၢ်သဘံၣ်သဘုၣ်ဘၣ်န့ၣ်လီၤႉဒ်န့ၣ်အသိးတၢ်ရဲၣ်တၢ်ကျဲၤအပူၤခိၣ်နၢ်ၦၤဘၣ်မူဘၣ်ဒါဆှဲပၠးလီၤ၀ဲကညီဒီကလုာ်မုၢ်နံၤဟဲကဲထီၣ်အဂ့ၢ်အကျိၤတဖၣ်န့ၣ်လီၤႉ ဒ်န့ၣ်အသိးကညီဒီကလုုာ်မုၢ်နံၤလၢအလီၤဘၣ်၀ဲဖဲလါဖ့ၤဘြူၤအါရံၤ ၁၁ သီအနံၤအံၤန့ၣ် တၢ်မၤလၤကပီၤစ့ၢ်ကီး၀ဲလၢ(ခ့ၣ်အဲၣ်ယူၣ်)တၢ်ပၢဟီၣ်က၀ီၤတၢ်လီၢ်လၢအဂၤတဖၣ်အပူၤအိၣ်၀ဲအသိး လၢကညီကီၢ်စဲၣ် ဖၣ်အၣ်၀့ၢ်ဃၢၤ(ခလီၣ်နိၣ်)သ၀ီပူၤဒီး အ့ၣ်ယၣ်၀တံၣ်ကီၢ်ခီ ကၠီကိကီၢ်ဆၣ်(အနီၣ်စူၣ်)သ၀ီပူၤ အံၤစ့ၢ်ကီး တၢ်မၤ၀ဲမူးတၢ်ရဲၣ်တၢ်ကျဲၤအံၤန့ၣ်လီၤႉ ဖဲလါဖ့ၤဘူၤအါရံၤ(၁၁)သီအနံၤန့ၣ် ကညီဖိလၢအိၣ်ကီၢ်ပယီၤဒီတဘ့ၣ်အပူၤတဖၣ်အံၤ ဆၢတဲာ်လီၤ၀ဲလၢကလဲၤထီၣ်မၤ၀ဲကညီကမျၢၢ်တၢ်ပာ်ဖျါအံၤလၢ၀့ၢ်ပူၤဒီး ဒ်တၢ်ဆၢတဲာ်အသိးဖဲ(၁၉၄၈)နံၣ် လါဖ့ၤဘြူၤအါရံၤ ၁၁ သီအနံၤန့ၣ် ကညီဖိလၢအိၣ်ကီၢ်ပယီၤပူၤအံၤတဖၣ် လဲၤထီၣ်ပာ်ဖျါထီၣ်တၢ်ဘၣ်သး လၢလိၣ်ဘၣ်၀ဲကညီကီၢ်အံၤန့ၣ်လီၤႉ ဖဲ(၁၉၅၃)နံၣ် လါနိၣ်၀့ဘၢၣ် ၂၃ သီတုၤလၢ ၂၅ သီအနံၤန့ၣ်...
ကီးတရံး၀့ၢ်ပူၤတၢ်ဘိးဘၣ်ရၤလီၤ(Martial Law)၀ံၤအလီၢ်ခံၦၤလၢတၢ်ဖီၣ်ဟံးန့ၢ်အရ့အိၣ်အဂၤ(၅၀)ဘျဲၣ်လံ
လါဖ့ၤဘြူၤအါရံၤ ၁၂ သီႇ ၂၀၂၃ နံၣ်ႇ ခ့ၣ်အဲးစံၣ် သုးမီၤစိရိၤထုးထီၣ်ဘိးဘၣ်ရၤလီၤလၢကညီကီၢ်စဲၣ်(ကီးတရံး)၀့ၢ်အံၤမ့ၢ်၀ဲသုးတၢ်ပၢတၢ်ပြး(Martial Law)ဟီၣ်က၀ီၤ ၀ံၤအလီၢ်ခံန့ၣ် ပှၤလၢတၢ်ဖီၣ်ဟံးန့ၢ်အရ့အိၣ်၀ဲအဂၤ(၅၀)ဘျဲၣ်လံအဂ့ၢ်န့ၣ် လီၢ်က၀ီၤကမျၢၢ်လၢအိၣ်ကီးတရံး၀့ၢ်ပူၤ တဖၣ်စံး၀ဲန့ၣ်လီၤႉ ဖဲလါဖ့ၤဘြူၤအါရံၤ ၂ သီအနံၤန့ၣ် သုးမီၤစိရိၤထုးထီၣ်ဘိးဘၣ်ရၤလီၤ၀ဲလၢ(ကီးတရံး၀့ၢ်)အံၤ မ့ၢ်၀ဲသုးတၢ်ပၢတၢ်ပြးဟီၣ်က၀ီၤ၀ံၤအလီၢ်ခံ ၦၤလၢအဟးထီၣ်က့ၤလီၤမ့တလၢထီၣ်တၢ်ဆၢကတီၢ်တစဲးန့ၣ် တၢ်ဖီၣ်ထၢနုာ်၀ဲလၢဃိာ်ပူၤအိၣ်၀ဲအဂ့ၢ်န့ၣ် လီၢ်က၀ီၤကမျၢၢ်လၢတအဲၣ်ဒိးပာ်ဖျါအမံၤတဂၤစံး၀ဲန့ၣ်လီၤႉ အ၀ဲစံး၀ဲလၢ“ကီးတရံး၀့ၢ်ပူၤခဲအံၤၦၤထုးထီၣ်(Martial Law)လၢစးထီၣ်ဟါခီ(၇)နၣ်ရံၣ်တုၤလၢဂီၤခီ ၆ နၣ်ရံၣ်န့ၣ် တဘၣ်ဟးထီၣ်တၢ်ချၢဘၣ်ႉတၢ်ဆၢကတီၢ်မ့တလၢထီၣ်တစဲးမ့ထံၣ်ၦၤဟးလၢကျဲပူၤန့ၣ်ဖီၣ်၀ဲလီၤႉၦၤလၢတၢ်ဖီၣ်အီၤတဖၣ်န့ၣ်တၢ်ဆှိးထီၣ်အီၤလၢကွီၢ်ဘျီၣ်ဒီးအဟံၣ်ဖိဃီဖိဒၣ်လဲာ်လဲၤဆှၢန့ၢ်အ၀ဲသ့ၣ်မ့ၤဖိထံဖိတန့ၢ်ဘၣ်ႉပနၢ်ဟူလၢဘၣ်လီၤလၢဃိာ်ပူၤ(၆)လါမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါ(ကီးတရံး)၀့ၢ်ပူၤအံၤလီၢ်က၀ီၤကမျၢၢ်လၢတၢ်ဖီၣ်ချုးန့ၢ်၀ဲအိၣ်အဂၤ(၅၀)ဘျဲၣ်အကျါပၣ်ဃုာ်၀ဲပၢၤကီၢ်ၦၤမၤတၢ်ဖိ(၁)ဂၤႇတၢ်ထိၣ်ဟီၣ်ခိၣ်၀ဲၤကျိၤပှၤမၤတၢ်ဖိ(၁)ဂၤဒီးတၢ်ပျၢ်လီၤက့ၤ၀ဲထဲၦၤမၤတၢ်ဖိခံဂၤအံၤဒံးလီၤအဂ့ၢ်န့ၣ် သ့ၣ်ညါဘၣ်လၢသုးမီၤစိရိၤစုတီၤၦၤမၤတၢ်ဖိတဖၣ်အအိၣ်န့ၣ်လီၤႉ သုးမီၤစိရိၤအၦၤမၤတၢ်ဖိတဂၤစံး၀ဲ“ၦၤဖီၣ်ချုးန့ၢ်အိၣ်အဂၤ(၅၀)ဘျဲၣ်လံႉၦၤဖီၣ်န့ၢ်အကျါန့ၣ်ပၣ်ဃုာ်၀ဲပၢၤကီၢ်တဂၤဒီးတၢ်ထိၣ်ဟီၣ်ခိၣ်၀ဲၤကျိၤပှၤမၤတၢ်ဖိတဂၤမီၤနီၤႉၦၤခံဂၤန့ၣ်ပနၢ်ဟူလၢၦၤပျၢ်လီၤ၀ဲလံႉမ့မ့ၢ်ၦၤလၢအဂၤခီန့ၣ်တနၢ်ဟူတၢ်ပျၢ်လီၤ၀ဲဒံးဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ သုးမီၤစိရိၤထုးထီၣ်ဘိးဘၣ်ရၤလီၤ၀ဲလၢကညီကီၢ်စဲၣ်(ကီးတရံး)၀့ၢ်အံၤ ဒ်(၂၀၀၈)တၢ်ဘျၢသဲစး(၄၁၉)အသိး ဘၣ်ဃးပၢပြးဒီးစံၣ်ညီၣ်ပီတ့ဂ့ၢ်၀ီတဖၣ်အံၤတၢ်ပဘၣ်သူ၀ဲသုးတၢ်ပၢတၢ်ပြး(Martial Law)၀ံၤအလီၢ်ခံန့ၣ် ပယီၤသုးဟးဆှၣ်တၢ်လၢ၀့ၢ်ပူၤသမံသမိးဖီၣ်ကမျၢၢ်အိၣ်၀ဲအသိး ဖီၣ်ဃုာ်စ့ၢ်ကီးၦၤလၢအလဲၤဆါဂီၤတၢ်လၢ တၢ်ဆါတၢ်ၦ့ၤလီၢ်တဖၣ်အဂ့ၢ်န့ၣ် ကမျၢၢ်လၢအိၣ်၀့ၢ်ပူၤတဖၣ်စံး၀ဲန့ၣ်လီၤႉ
သုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢတၢ်ဘါယွၤသရိာ်ခိၣ်
လါဖ့ၤဘြူၤအါရံၤ ၁၁ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် မၠၣ်၀တံၣ်ကလံၤထံးန့ၣ် ဖဲလါဖ့ၤဘြူၤအါရံၤ(၉)သီဟါခီ ၈ နၣ်ရံၣ်အဆၢကတီၢ် သုးမီၤစိရိၤအကဘီယူၤ(၂)ဘ့ၣ်ဟဲတ့ၢ်လီၤမ့ၣ်ပိၢ်လၢ(ထံကပျၢၤ)သ၀ီတၢ်ဘါယွၤသရိာ်ခိၣ်အဂ့ၢ် ကညီဒီကလုာ်ဂၢၤသးကရၢ(KNDO) သုးရ့ၣ်(၈)အသုးရ့ၣ်ခိၣ် သုးခိၣ်ဒိၣ်ဂီၢ်ဂ့ၢ် စီၤအဲၣ်မၠးထူ စံး၀ဲန့ၣ်လီၤႉ တကီၢ်ခါခဲအံၤဟီၣ်က၀ီၤဖဲန့ၣ်အပူၤတၢ်ဒုးကဲထီၣ်၀ဲလၢပယီၤသုးဒီးတၢ်ပၢၢ်ဆၢသုးပာ်ဖှိၣ်အဘၢၣ်စၢၤဒီး သုးမီၤစိရိၤကဘီယူၤဟဲတ့ၢ်လီၤ၀ဲမ့ၣ်ပိၢ်ခံဖျၢၣ်လၢ(ထံကပျၢၤ)သ၀ီ ကညီခရံာ်ဖိတၢ်ဘါယွၤသရိာ်အဂ့ၢ်န့ၣ် သုးခိၣ်ဒိၣ်ဂီၢ်ဂ့ၢ် စီၤအဲၣ်မၠးထူ စံး၀ဲဒ်အံၤန့ၣ်လီၤႉ “ကဘၣ်ဖဲဂီၤခီ (၅) နၣ်ရံၣ်ဃၣ်ဃၣ်န့ၣ်သုးမီၤစိရိၤကဘီယူၤဟဲဆှၣ်တၢ်တဘ့ၣ်ႉမ့၀ံၤဖဲဟါခီ ၈ နၣ်ရံၣ်န့ၣ် ကဘီယူၤဟဲထီၣ်ဒီးတ့ၢ်လီၤ၀ဲမ့ၣ်ပိၢ် (၂) ဖျၢၣ်မီၤနီၤႉတၢ်ဘါယွၤသရိာ်ဒုဟးဂီၤဖးဒိၣ်ညါႉမ့မ့ၢ်သ၀ီဖိဒုဘၣ်ဒိဘၣ်ထံးတအိၣ်ဘၣ်” အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢခ့ၣ်အဲၣ်ယူၣ်(သုးက့ ၆)ဟီၣ်က၀ီၤ မၠၣ်၀တံၣ်ကလံၤထံး ကီးတရံးကီၢ်ဆၣ်အပူၤ ကမျၢၢ်ဃုာ်ဒီးဖီၣ်စုက၀ဲၤကရူၢ်လၢအဂၤတဖၣ်တဘၣ်ဟးထီၣ်က့ၤလီၤလၢဂီၤလ့ၤ–ထံကပျၢၤကျဲအံၤဘၣ်အဂ့ၢ်န့ၣ် (KNDO) သုးရ့ၣ် ၈ ထုးထီၣ်ဟ့ၣ်ပလီၢ်၀ဲဖဲလါဖ့ၤဘြူၤအါရံၤ ၈ သီအနံၤန့ၣ်လီၤႉ ဒ်န့ၣ်အသိးဖဲအပူၤကွံာ်လါယနူၤအါရံၤ ၁၃ သီအနံၤစ့ၢ်ကီး လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ သုးက့(၅) မုၢ်ြတီၢ်ကီၢ်ရ့ၣ် လူၤသီကီၢ်ဆၣ်အပူၤ သုးမီၤစိရိၤကဘီယူၤလဲၤတ့ၢ်လီၤမ့ၣ်ပိၢ်လၢ(ပ့က့)ကရူၢ် လ့၀ါသ၀ီ တၢ်ဘါယွၤသရိာ်အဃိ လီၢ်က၀ီၤကမျၢၢ်သံ(၅)အကျါပၣ်ဃုာ်၀ဲသရၣ်ဒိၣ်တဂၤဒီး ဘၣ်ဒိ၀ဲ(၇)ဂၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤၦၤဟ့ၣ်တၢ်ကစီၣ်ဖိတဖၣ်အအိၣ်န့ၣ်လီၤႉ
ဘီးက့ၣ်တံၢ်ၦ့ၤထီၣ်အဃိ ၦၤသူၣ်အီၣ်ဖျးအီၣ်တၢ်ဖိတဖၣ်ဘၣ်ဂီၢ်ဒိၣ်ထီၣ်
လါဖ့ၤဘြူၤအါရံၤ ၁၁ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ကၠၤအ့စ့ၣ်ကၠံကီၢ်ဆၣ်အပူၤ တကီၢ်ခါခဲအံၤဘီးက့ၣ်တံၢ်(၁)တၣ်န့ၣ်အၦ့ၤထီၣ်တုၤလၢ တကလီၢ်ဘျဲၣ်ညါအဃိ ၦၤသူၣ်အီၣ်ဖျးအီၣ်ဘီးက့ၣ်ဖိတဖၣ်ဘၣ်ဂီၢ်၀ဲဒိၣ်မးအဂ့ၢ်န့ၣ် သ့ၣ်ညါဘၣ်လၢၦၤဖံးအီၣ်မၤအီၣ်ဘီးက့ၣ်ဖိတဖၣ်အအိၣ်န့ၣ်လီၤႉ တကီၢ်ခါခဲအံၤဘီးက့ၣ်တံၢ်လၢတၢ်ကိက့လီၤဃာ်အီၤအဃ့တပီၢ်န့ၣ်အၦ့ၤအိၣ်၀ဲ(၇၀၀၀)ကၠးခိၣ်ဃၢၤညါဒီး (၁)တၣ်န့ၣ်အၦ့ၤအိၣ်တုၤလၢ(၃၈၀၀၀၀)ဘျဲၣ်ညါအဃိၦၤသူၣ်အီၣ်ဖျးအီၣ်ဘီးက့ၣ်ဖိတဖၣ်ဒွး၀ဲကဲးဒိၣ်မးဒီး ခီဖျိအၦ့ၤထီၣ်အဃိၦၤသူၣ်အီၣ်ဖျးအီၣ်ဘီးက့ၣ်ဟဲအါထီၣ်အါန့ၢ်ဒံးအပူၤကွံာ်နံၣ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ “ဖဲမဟိတနံၣ်န့ၣ်ဘီးက့ၣ်တံၢ်တတၣ်န့ၣ်အၦ့ၤအိၣ်ထဲ (၂၅၀၀၀၀) ကၠးလီၤႉတနံၣ်အံၤအၦ့ၤထီၣ်တကလီၢ်ဘျဲၣ်ညါအဃိဘၣ်ဂီၢ်၀ဲတစဲးမီၤနီၤႉအၦ့ၤထီၣ်အဃိၦၤသူၣ်အါထီၣ်က့ၤလၢဘီးက့ၣ်တံၢ်လီၤႉမူခိၣ်ကလံၤသီၣ်ဂီၤဘၣ်လီၢ်ဘၣ်စးအဃိတနံၣ်အံၤဘီးက့ၣ်တံၢ်ဟးထီၣ်အါမး” အဂ့ၢ်န့ၣ် ကၠၤအ့စ့ၣ်ကၠံကီၢ်ဆၣ် စီၤ၀့ကၠံၤလၢအသူၣ်အီၣ်ဖျးအီၣ်ဘီးက့ၣ်အံၤ စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢကၠၤအ့စ့ၣ်ကၠံကီၣ်ဆၣ် ၀ီၣ်ရီဟီၣ်က၀ီၤ ဃိၣ်သၢဖျၢၣ်ႇကၠဲးဒိႇစမံၣ်ကျိမုၢ်ထီၣ် ဒူသ၀ီတဖၣ်အပူၤန့ၣ် ၦၤသူၣ်အီၣ်ဖျးအီၣ်၀ဲဘီးက့ၣ်အါကတၢၢ်ဒီးကီၢ်ဆၣ်လၢအဂၤတဖၣ်စ့ၢ်ကီးစးထီၣ်သူၣ်၀ဲဘီးက့ၣ်လံအဂ့ၢ်န့ၣ် သ့ၣ်ညါဘၣ်လၢၦၤခိးၦ့ၤတၢ်ဖိတဖၣ်အအိၣ်န့ၣ်လီၤႉ “တနံၣ်အံၤလၢကီၢ်ပူၤမ့ၢ်ဂ့ၤႇကီၢ်ချၢမ့ၢ်ဂ့ၤၦၤဟဲၦ့ၤဘီးက့ၣ်အါအဃိအၦ့ၤဂ့ၤထီၣ်မီၤနီၤႉတလၢၤကီၢ်စဲၣ်(ပွဲရုံ)နါက့ၦ့ၤ၀ဲစ့ၢ်လီၤႉလၢကီၢ်ကၠီၣ်တဲၣ်နါက့ၦၤဆှၢထီၣ်စ့ၢ်ႉၦၤမ့ထုးထီၣ်အီၤတုၤလၢတၢ်အီၣ်တၢ်အီဒုၦၤသူၣ်အီၣ်ဖျးအီၣ်ဘီးက့ၣ်တဖၣ်အံၤကဘၣ်ဂီၢ်၀ဲမီၤနီၤႉ” ၦၤခိးၦ့ၤဘီးက့ၣ်တံၢ်ဖိတဂၤစံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဘီးက့ၣ်အံၤတၢ်စးထီၣ်သူၣ်လီၤအီၤဖဲလါအ့ဖြ့ၣ်အဆၢကတီၢ်ဒီးတၢ်က့ၤခူၣ်ထီၣ်ကဒါအတံၢ်ဖဲဖ့ၤဘြူၤအါရံၤႇလါမးရှးအကတီၢ်န့ၣ်လီၤႉဒ်န့ၣ်အသိးလၢကီၢ်ကၠီၣ်တဲၣ်အပူၤန့ၣ်ဘီးက့ၣ်တံၢ်တဖၣ်အံၤတၢ်က့ၤထုးထီၣ်တ့က့ၤ၀ဲလၢဆၣ်ဖိကီၢ်ဖိအဆၣ်ဒီးတၢ်ဖိတၢ်လံၤလၢအဂၤသ့ၣ်တဖၣ်အိၣ်၀ဲအဂ့ၢ်န့ၣ် သ့ၣ်ညါဘၣ်လၢၦၤၦ့ၤဘီးက့ၣ်တံၢ်ဖိတဖၣ် အအိၣ်န့ၣ်လီၤႉ