လါယူၤလံအတီၢ်ပူၤ သုးမီၤစိရိၤအကဘီယူၤဒီးကျိဖးဒိၣ်အံၤအဃိ ပိၥ်မုၣ်သံ ၆၄ ဂၤ
လါအီကူး ၇ သီ, ၂၀၂၅ နံၣ်, ခ့ၣ်အဲးစံၣ် ကီၢ်ပယီၤပူၤလၢသုးမီၤစိရိၤအတၢ်လုၢ်သ့ၣ်ခါပတၥ်မၤကမၣ်ပှၤဂ့ၢ်ဝီခွဲးယၥ်ဒ်အမ့ၢ်တၢ်သူကဘီယူၤဒီးကျိဖးဒိၣ်အံၤအဃိ လါယူၤလံတလါအတီၢ်ပူၤ ပိၥ်မုၣ်ဘၣ်သံဝဲ ၆၄ ဂၤ အဂ့ၢ်န့ၣ် ကီၢ်ပယီၤပိၥ်မုၣ်ကရၢ(BWU) ထုးထီၣ်ပၥ်ဖျါဝဲန့ၣ်လီၤ. ပိၥ်မုၣ်ပိၥ်မၢၤလၢအသံသ့ၣ်တဖၣ်အံၤအါဒၣ်တက့ၢ်န့ၣ် ကဲထီၣ်သးလၢကဘီယူၤဒီးပယီၤသုးခးလီၤကျိဖးဒိၣ်အဃိလီၤအဂ့ၢ်န့ၣ် BWU နဲၣ်ရွဲၣ်သဃဲၤ-၁ မၣ်ဝ့ၤက စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. အဝဲစံးဝဲလၢ“ခီဖျိလၢပယီၤသုးကဘီယူၤတ့ၢ်လီၤမ့ၣ်ပိၢ်ဒီးခးလီၤကျိဖးဒိၣ်အဃိ လၢပျီပူၤန့ၣ်ဘၣ်သ့ၣ်သ့ၣ်ပှၤသံအနီၣ်ဂံၢ်ကအါန့ၢ် အဝဲအံၤဒံး. ဖဲသုးကီၣ်ကးမၤတၢ်ပတုၥ်တၢ်ခးအတီၢ်ပူၤအံၤအဝဲသ့ၣ်ခးလီၤကျိဖးဒိၣ်တလီၢ်လီၢ်လီၤ. စးထီၣ်ဖဲသုးဟံန့ၢ်တၢ်စိတၢ်ကမီၤ အလီၢ်ခံအံၤ မ့ဘၣ်ကွၢ်ဘၣ်ဃးတၢ်လုၢ်သ့ၣ်ခါပတၥ်ပှၤဂ့ၢ်ဝီခွဲးယၥ်အံၤဟဲအိၣ်အါထီၣ်”အဂ့ၢ်န့ၣ် စံးဝဲန့ၣ်လီၤ. တကးဒံးဘၣ်စးထီၣ်လၢသုးဟံန့ၢ်တၢ်စိတကမီၤအတီၢ်ပူၤန့ၣ် ပိၥ်မုၥ်ပိၥ်မၢၤသ့ၣ်တဖၣ်ဖဲတၢ်ဖီၣ်ဒီးသမံသမိးအဝဲသ့ၣ် အခါန့ၣ် ဘၣ်တၢ်မၤစူးမၤဆါမၤပယွဲအီၤတကးဒံးဘၣ်အမဲၥ်ညါဘၣ်တၢ်သူဝဲမုၣ်ခွါသွံၣ်ထံးတၢ်စုဆူၣ်ခီၣ်တကးလၢအဝဲသ့ၣ်ဖီခိၣ် အိၣ်ထီၣ်ဝဲ လၢကျဲအဘိဘိအဂ့ၢ်န့ၣ် BWU စံးအါထီၣ်ဝဲန့ၣ်လီၤ. ဒ်(BWU)လံၥ်တၢ်ပၥ်ဖျါပူၤပၥ်ဖျါဝဲအသိးန့ၣ် ခီဖျိလၢကျိဖးဒိၣ်ဒီးကဘီယူၤအံၤအဃိ စကဲကီၢ်ခီဒိၣ်ပူၤန့ၣ် ပိၥ်မုၣ်သံ(၂၈)ဂၤ, မါတလ့ကီၢ်ခီဒိၣ် ၉ ဂၤ, မကွ့ကီၢ်ခီဒိၣ် ၃ ဂၤ, ဝ့ၢ်တကူၣ် ၁ ဂၤ ဒီးပကိကီၢ်ခီဒိၣ်ပူၤန့ၣ် ၁ ဂၤ ,ကခၠ့ၣ်ကီၢ်စဲၣ်ပူၤ ၂ ဂၤ, ကရ့ၣ်နံၣ် ၉ ဂၤ, ယိၤဒိၣ်ကီၢ်စဲၣ် ၄ ဂၤ, တလၢၤကီၢ်စဲၣ် ၂ ဂၤ,...
ထံမိၢ်ပှၢ်ဟီၣ်ကဝီၤပူၤ သုးခိၣ်အဲၣ်ခွံအပှၤခိးခးဝဲအဃိ KNLA ဘၣ်ဒိကဒီး ၄ ဂၤ အဂ့ၢ် KNU စံးဝဲ
လါအီကူး ၇ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဘျံးဒဝဲၢ်ကီၢ်ရ့ၣ်(သုးက့ ၄)ထံမိၢ်ပှၢ်ဟီၣ်ကဝီၤပူၤ ဖဲမဟါအနံၤန့ၣ် (KTLA)သုးခိၣ် အဲၣ်ခွံ အပှၤခိးခးဝဲ (KNLA)အပှၤအဃိ ဘၣ်ဒိဘၣ်ထံးဝဲ(၄)ဂၤအဂ့ၢ်န့ၣ် ကီၢ်ရ့ၣ်တၢ်ကစီၣ်ထုးထီၣ်ပၥ်ဖျါဝဲအသိး သ့ၣ်ညါဘၣ် န့ၣ်လီၤ. ဖဲမဟါလါအီကူး ၆ သီ ဂီၤခီ ၁၀း၀၀ နၣ်ရံၣ်အဆၢကတီၢ်န့ၣ် (KNLA)တကပၤလၢကလဲၤလီၤဟံန့ၢ်တၢ်ဘံၣ်တၢ်ဘၢအဂီၢ် ဖဲအလဲၤတုၤဖဲဝ့ၢ်တၢ်အဲၣ်-ထံခံကျဲအဘၢၣ်စၢၤ ကဆီဝါသဝီ သီခါဖၠၣ်ဃၢၤအခါန့ၣ် ကီၢ်သူလ့ၤသုးမုၢ်ဒိၣ်(KTLA)လၢအဘၣ် တၢ်တီခိၣ်ရိၣ်မဲအီၤလၢသုးခိၣ်အဲၣ်ခွံအံၤအပှၤတဖၣ် ခိးခးဝဲအဃိတၢ်ဘၣ်ဒိဘၣ်ထံးဘၣ်ဟဲကဲထီၣ်ဝဲဒ်အံၤလီၤအဂ့ၢ်န့ၣ် လံၥ်တၢ်ပၥ်ဖျါအပူၤစံးဝဲန့ၣ်လီၤ. ဘၣ်ဃးတၢ်ဂ့ၢ်ကဲထီၣ်သးဘျီဝဲအံၤန့ၣ် ဘျံးဒဝဲၢ်ကီၢ်ရ့ၣ် နဲၣ်ရွဲၣ်ပဒိၣ်စီၤအဲၣ်နၤ စံးဘၣ်ခ့ၣ်အဲးစံၣ်-ကညီတၢ်ကစီၣ်လၢ “အဝဲသ့ၣ် န့ၣ်ပၥ်ပှၤလၢဒုၣ်ဒါဖးယံၤလံမီၤ.ဝဲဒၣ်န့ၣ်ပဆိမိၣ်လၢကညီဖိကဒဲကဒဲလီၤ.သနါက့အဝဲမ့မၤတၢ်ဒ်အံၤဒုအတမ့ၢ်ပှၤကညီဖိလၢၤဘၣ်.မ့ၢ်ဒၣ်ဒုၣ်ဒါလီၤ.ဒုၣ်ဒါစံးတၢ်န့ၣ်တမ့ၢ်ပှၤကညီကလုၥ်အသးအိၣ်လၢအသးပူၤလၢၤဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်စီၣ် န့ၣ်လီၤ. ဒ်န့ၣ်အသိးဟီၣ်ကဝီၤလၢကဲထီၣ်သးခဲအံၤအပူၤကွံၥ်ဖဲလါယူၤလံ ၂၀ သီအနံၤန့ၣ်စ့ၢ်ကီး (KTLA)ခိးခးဝဲဟီၣ်ကဝီၤ(KNLA) သုးကရူၢ်ဖဲ ထံခံ-ဝ့ၢ်တၢ်အဲၣ်ကျဲကဲ ထီၣ်ဒံးဝဲဒၣ်န့ၣ်လီၤ. လၢန့ၣ်အမဲၥ်ညါခံခီခံကပၤအဘၢၣ်စၢၤအပူၤကွံၥ် စးထီၣ်လၢတၢ်ဘၣ်ဂံၥ်ဂူၥ်ကဲထီၣ်ဒီအတီၢ်ပူၤအံၤန့ၣ် အိၣ်ထီၣ်ပၢၢ်တုၤလၢ တၢ်သံတၢ်ပှၢ်တၢ်ဘၣ်ဒိဘၣ်ထံး အတပတီၢ်ညါအသိး လၢတၢ်ဂ့ၢ်အဃိစ့ၢ်ကီး ခံခီခံကပၤလိၥ်ဘၢလိၥ်ကွီၢ်ကဒါလိၥ်သးအိၣ်ထီၣ် ဝဲတုၤလၢခဲအံၤန့ၣ်လီၤ. တကးဒံးဘၣ်သုးခိၣ်အဲၣ်ခွံအံၤ မ့ၢ်ပှၤလၢအထီဒါဝဲခ့ၣ်အဲၣ်ယူၣ် အတၢ်ဖံးတၢ်မၤအဃိ (KNLA)တကပၤဒ်မူဒါအိၣ်အသိးကဘၣ် က့ၤခီၣ်ဆၢခးကဒါဝဲ အဂ့ၢ်န့ၣ် ကီၢ်ရ့ၣ်နဲၣ်ရွဲၣ် ပဒိၣ်စီၤအဲၣ်နၤ...
ပယီၤသုးကဘီယူၤလဲၤခးလီၤတၢ်ဒီးလဲၤတ့ၢ်လီၤကဒီးတၢ်ဘိၣ်လၢဂီၤလ့ၤဒုးယၤသုးကလၢၤပူၤ
လါအီကူး ၆ သီ, ၂၀၂၅ နံၣ်, ခ့ၣ်အဲးစံၣ် ဖဲတနံၤအံၤလါအီကူး ၆ သီ ဂီၤခီ ၁၀း၃၀ ဃၣ်ဃၣ်အဆၢကတီၢ်န့ၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူပျၥ်ယၥ်ကီၢ်ရ့ၣ် (သုးက့ ၆) ကီးတရံးကီၢ်ဆၣ် ထံညၣ်လံၣ်သဝီလၢအိၣ်ဂီၤလ့ၤသုးကလၢၤအံၤ ပယီၤသုးကဘီယူၤခံဘ့ၣ်လဲၤခးလီၤတၢ်(၂)ဘျီ တ့ၢ်လီၤဝဲမ့ၣ်ပိၢ်တစှၤန့ၢ်(၁၆)ဖျၢၣ်အဂ့ၢ်န့ၣ် ဂံၢ်ခီၣ်ထံးတၢ်ကစီၣ်ထံးဝဲအသိးသ့ၣ်ညါဘၣ်န့ၣ်လီၤ. တနံၤဃီကဘီယူၤလဲၤခးလီၤတၢ်ဝံၤ ဖဲမုၢ်ဃ့ၢ်လီၤ ၁း၀၀ နၣ်ရံၣ်ဘျဲၣ်အဆၢကတီၢ်န့ၣ်စ့ၢ်ကီး ပယီၤသုးကဘီယူၤ လဲၤတ့ၢ်လီၤဝဲ တၢ်ဘိၣ်ကအိၣ်လၢ(၁၅)ဘိၣ်ဃၣ်ဃၣ်ညါဒီး တၢ်ဘိၣ်သ့ၣ်တဖၣ်အံၤတၢ်တယးကွၢ်ဝဲလၢကမ့ၢ်တၢ်အီၣ်တၢ်အီဒီး ကျိချံပှၥ်သၣ် အဘိၣ်သ့ၣ်တဖၣ်အဂ့ၢ်န့ၣ် တၢ်ပၢၢ်ဆၢကရူၢ်လၢအိၣ်တၢ်မဲၥ်ညါတဂၤ စံးဝဲန့ၣ်လီၤ. အဝဲစံးဝဲလၢ“ကဘီယူၤစးထီၣ်ခးလီၤတၢ်ဖဲမဂီၤ ၁၀း၂၉ မံးနံးန့ၣ် ခံဘျီ, ကဘီယူၤတဘ့ၣ်န့ၣ်ခးလီၤတၢ်ခံဘျီ. အလီၤတဲၥ်လၢ ထံညၣ်လံၣ်တကပၤန့ၣ်လီၤ. မ့ဝံၤဖဲ ၁း၀၀ နၣ်ရံၣ်ဘျဲၣ်န့ၣ်ကဘီယူၤဟဲတ့ၢ်လီၤတၢ်ဘိၣ်လၢဂီၤလ့ၤသုးကလၢၤပူၤ. ကအိၣ်လၢ(၁၆)ဘိၣ်လၢန့ၣ်ညါ.အလီၤတဲၥ်ဘူးတလၢဒီးသုးကလၢၤအဃိ မ့ၢ်ပှၤလဲၤဟံန့ၢ်ဧါတန့ၢ်ဧါတသ့ၣ်ညါဒံးဘၣ်. ဘၣ်ဒီပှၤလဲၤ တန့ၢ်ဒံးဘၣ်,အဝဲသ့ၣ်စ့ၢ်ကီးတန့ၢ်ဝဲဒၣ်စ့ၢ်ဘၣ်.”အဂ့ၢ်န့ၣ် စံးဘၣ်ခ့ၣ်အဲး စံၣ်- ကညီတၢ်ကစီၣ်န့ၣ်လီၤ. ဂီၤလ့ၤဒုးယၤသုးကလၢၤအံၤစးထီၣ်ဖဲဟီၣ်ကဝီၤ(KNLA)သုးပၥ်ဖှိၣ်ထီၣ်ခးဝဲတုၤလၢခဲအံၤန့ၣ်တၢ်ဒုးကဲထီၣ်ဝဲကိးမုၢ်နံၤဒဲးဃၣ်ဃၣ် အသိးပယီၤသုးလၢအိၣ်သုးကလၢၤပူၤအံၤသ့ၣ်တဖၣ်စ့ၢ်ကီးဟးထီၣ်တၢ်ချၢတန့ၢ်ဘၣ်အဃိ တၢ်ဒုးတၢ်ယၤဒီတကတီၢ် အပူၤ လၢကဘီယူၤအံၤတဆီသုးမီၤစိရိၤလဲၤတ့ၢ်လီၤန့ၢ်အပှၤကျိချံပှၥ်သၣ်ဒီးတၢ်အီၣ်တၢ်အီဘိၣ်သ့ၣ်တဖၣ်ကအိၣ်တစှၤန့ၢ်အဘျီ(၁၀)လံအဂ့ၢ်န့ၣ် လီၢ်ကဝီၤပှၤဘမူဘၣ်ဒါစံးဝဲအသိးသ့ၣ်ညါဘၣ်န့ၣ်လီၤ. တကးဒံးဘၣ်တဘျီလၢ်လၢ်ဖဲသုးမီၤစိရိၤကဘီယူၤလဲၤတ့ၢ်လီၤန့ၢ်အပှၤတၢ်ဘိၣ်အခါန့ၣ် တလီၤတဲၥ်လၢသုးကလၢၤပူၤ ခဲလၢၥ်ဘၣ် မ့မ့ၢ်တခီလီၤတဲၥ်လၢသုးကလၢၤချၢအိၣ်ဝဲအဃိ တၢ်ပၢၢ်ဆၢသုးပၥ်ဖှိၣ်ကရူၢ်တကပၤမၤန့ၢ်ဝဲတၢ်ဘိၣ်လၢအပူၤပၣ်ဃုၥ်ဝဲကျိချံပှၥ် သၣ်အံၤ အိၣ်လံဝဲအါမးအဂ့ၢ်န့ၣ် သ့ၣ်ညါဘၣ်န့ၣ်လီၤ. လၢန့ၣ်အမဲၥ်ညါညါဟီၣ်ကဝီၤဖဲန့ၣ်အပူၤ...
ဒီၣ်ဖးခိၣ်ဝ့ၢ်ပူၤ တၢ်စူၤထံကစၢၢ်လီၤဟီၣ်ခိၣ်လၥ်အဃိကမျၢၢ်သံ(၈)ဂၤအကျါပၣ်ဃုၥ်ဟံၣ်ဖိဃီဖိ ၄ ဂၤတဒူၣ်
လါအီကူး ၆ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ တီအူကီၢ်ရ့ၣ်(သုးက့ ၂)ဒီၣ်ဖးခိၣ်ကီၢ်ဆၣ် ဒီၣ်ဖးခိၣ်ဝ့ၢ်ကဝီၤဒ့,ဒူသဝီတနီၤအပူၤ ခီဖျိတၢ်စူၤ ထံကစၢၢ်လီၤဟီၣ်ခိၣ်လၥ်အံၤအဃိ တုၤလၢတနံၤအံၤလါအီကူး ၆ သီ ဂီၤခီန့ၣ် ကမျၢၢ်သံအိၣ်(၈)ဂၤလံဒီး ဖဲန့ၣ်အကျါ ပၣ်ဃုၥ် ဝဲဟံၣ် ဖိဃီဖိ(၄)ဂၤတဒူၣ်အဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါလၢအိၣ်ဖဲန့ၣ်တဖၣ် စံးဝဲန့ၣ်လီၤ. ဒီၣ်ဖးခိၣ်ကီၢ်ဆၣ်ပူၤစးထီၣ်ဖဲအပူၤကွံၥ်နွံအခါန့ၣ်တုၤလၢခဲအံၤတၢ်စူၤကိးမုၢ်နံၤဒဲးထံကစၢၢ်လီၤထံဒိၣ်ထီၣ်တကးဒံးဘၣ် ကၢၢ်လၥ်ဟီၣ်ခိၣ်လၥ်အံၤအဃိ ဖဲမဟါမုၢ်နၤခီအဆၢကတီၢ်န့ၣ် ကဝီၤဒ့-၁ ဟံၣ်ဖိဃီဖိဒီဖိမိၢ်ဒီဖိပၢ်(၄)ဂၤအံၤဘၣ်သံကွံၥ်ဝဲ တကးဒံးဘၣ်အမဲၥ်ညါလၢကဝီၤဒ့-၃ ဒီး သီၣ်ယ့ၤခၣ်(သောက်ရေခပ်)သဝီတကပၤန့ၣ်စ့ၢ်ကီးကမျၢၢ်သံဝဲ(၄)ဂၤအဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါလၢအိၣ်ဖဲန့ၣ်တဂၤ စံးဝဲန့ၣ်လီၤ. အဝဲစံးဝဲလၢ“တဂီၤညါအံၤတၢ်စူၤဒိၣ်ဟီၣ်ခိၣ်လၥ်အဃိဖိသၣ်ဒီပုၢ်ဝဲၢ်(၂)ဂၤဃုၥ်ဒီးအမိအပါစူၥ်ကွံၥ်သးပှၤထံၣ်က့ၤဖဲတဂီၤညါအံၤလီၤ.လၢမဟါတနံၤန့ၣ်နါက့ပှၤသံအိၣ်(၃)ဂၤ,(၄)ဂၤလံ.ကမျၢၢ်တဖၣ်ဘၣ်ကွၢ်ဆၢၣ်မဲၥ်တၢ်ဖၣ်အံၤအဃိပဆၢမုၢ်လၢ်လၢပှၤကဆီၣ်ထွဲမၤစၢၤပှၤမီၤနီၤ.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. ဟံၣ်ဖိဃီဖိတဒူၣ်လၢအသံအံၤန့ၣ် ဖိသၣ်အမိဒီးအပါန့ၣ်အသးနံၣ်ကအိၣ်ဝဲ (၃၀)ဘျဲၣ် မ့မ့ၢ်အဖိပိၥ်မုၣ် တဂၤန့ၣ်အသးနံၣ်အိၣ် (၉)နံၣ်, အပိၥ်ခွါတဂၤန့ၣ်အိၣ်(၄)နံၣ်န့ၣ်လီၤ. တကးဒံးဘၣ်တကီၢ်ခါတုၤလၢခဲအံၤတၢ်စူၤကၢၢ်လၥ်ထံကစၢၢ်လီၤဒံးအဃိ ကမျၢၢ်လီၤမၢ်အိၣ်ဒံးဝဲ(၂)ဂၤတၢ်ဃုဝဲတဘၣ်ဒံးဘၣ် အဂ့ၢ်န့ၣ် လီၢ်ကဝီၤကမျၢၢ်တဂၤဃီဝဲန့ၣ်စံးဝဲန့ၣ်လီၤ. သၣ်တီၣ်ကၠံကီၢ်ဆၣ်ပူၤ အပူၤကွံၥ်နံၣ်တၢ်စူၤဖးဒိၣ်အိၣ်ဘၣ်ဆၣ် ကၢၢ်လၥ်,တၢ်သံတၢ်ပှၢ်,တၢ်လီၤမၢ်,တၢ်ဟးဂူၥ်ဟးဂီၤ ကဲထီၣ် ဒ်သိးခဲအံၤအံၤတအိၣ်တ့ၢ်နီတဘျီဒံးဘၣ် အဂ့ၢ်န့ၣ် လီၢ်ကဝီၤကမျၢၢ် စံးဝဲအသိးသ့ၣ်ညါဘၣ်န့ၣ်လီၤ. တကတီၢ်ဃီတနံၣ်အံၤတၢ်စူၤခါအတီၢ်ပူၤတၢ်သံတၢ်ပှၢ်,တၢ်လီၤမၢ်တကးဒံးဘၣ် တိၤ,ဟံၣ်ဃီ,ကျီးပူၤတၢ်ထူၣ်တၢ်ဘိစ့ၢ်ကီး ဟးဂီၤဝဲအါမးဘၣ်ဆၣ်မၤလီၤတံၢ်စရီတန့ၢ်ဒံးဘၣ်အဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါတဖၣ်စံးဝဲန့ၣ်လီၤ. စးထီၣ်ဖဲအပူၤကွံၥ်လါယူၤလံအသီ ၂၀ ဃၣ်ဃၣ်အခါန့ၣ် ခ့ၣ်အဲၣ်ယူၣ်တၢ်ပၢကီၢ်ရ့ၣ်/သုးက့ဟီၣ်ကဝီၤ ဝ့ၢ်,ဒူသဝီ, ကဝီၤဒ့ လၢအိၣ်ဘူးထံကျိဖးဒိၣ်,ထံကျိဖိတၢ်လီၢ်လီၤဖုၣ်သ့ၣ်တဖၣ် တၢ်စူၤထံဒိၣ်ထီၣ်ဝဲလၢတၢ်လီၢ်သကုၤဆးဒးဒီး...
ဘျံးဒဝဲၢ်ကီၢ်ရ့ၣ်အပူၤပယီၤသုးကျိၤပှၤအဂၤ(၆၀)လၢဟဲထီၣ်တဖၣ်တၢ်ခိးခးအဃိသံ(၄)ဂၤ,ဘၣ်ဒိ(၅)
လါအီကူး ၆ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ဘျံးဒဝဲၢ်ကီၢ်ရ့ၣ်,လၢၢ်ဒိၣ်စိကီၢ်ဆၣ်ဟီၣ်ကဝီၤအပူၤဖဲလါအီကူၥ်(၄)သီအနံၤန့ၣ်တလၢၤတၢ်ပၢၢ်ဆၢသုး,က ညီတၢ်ပၢၢ်ဆၢသုးမုၢ်ဒိၣ်ဃုၥ်ဒီးသိၣ်မှံပၢၢ်ဆၢသုးပၥ်ဖှိၣ်သ့ၣ်တဖၣ်ခိးခးဝဲပယီၤသုးမီၤစိရိၤသုးကျိၤလၢဟဲထီၣ်ပှၤနီၣ်ဂံၢ်အိၣ်အဂၤ(၆၀)အံၤအဃိပယီၤသုးသံ(၄)ဂၤ,ဘၣ်ဒိ(၅)ဂၤအဂ့ၢ်(MSRF)ပၥ်ဖျါဝဲဖဲတနံၤအံၤလါအီကူၥ်(6)သီအနံၤန့ၣ်လီၤ. ပယီၤသုးမီၤစိရိၤအံၤလၢတၢ်ကထီၣ်ဒိၣ်စိဒီးမၤအါထီၣ်အသုးဂံၢ်ဘါလၢကီၢ်ဆၢ(နၣ်အ့ၣ်တီၤ)သုးကလၢၤအဂီၢ်တၢ်ဒုးကဲထီၣ်ဝဲဒၣ်ဒီးတၢ်ပၢၢ်ဆၢသုးပၥ်ဖှိၣ်ကရူၢ်အဘၢၣ်စၢၤဖဲ(ကီၣ်လဲ)သဝီဃၢၤအဃိပယီၤသုးတကပၤတၢ်သံတၢ်ဘၣ်ဒိအိၣ်ထီဝဲအဖီခိၣ်အသုးကျိၤဘၣ်ဂုၥ်လီၤက့ၤဝဲအခံစ့ၢ်ကီးအဂ့ၢ်သ့ၣ်ညါဘၣ်ဒ်တၢ်ပၥ်ဖျါပူၤအသိးန့ၣ်လီၤ. တၢ်ဒုးအံၤစးထီၣ်အသးဖဲလါအီကူၥ်(၄)သီအနံၤ,မုၢ်ဃ့ၢ်လီၤ(၁)နၣ်ရံၣ်ဘျဲၣ်အဆၢကတီၢ်ဒီးတုၤလီၤလၢ(၂)နၣ်ရံၣ်အဆၢကတီၢ်တၢ်ဒုးအံၤဝံၤဝဲန့ၣ်လီၤ. တၢ်ဒုးအပူၤပယီၤသုးမီၤစိရိၤအပှၤသံ(၄)ဂၤ, ဘၣ်ဒိတစှၤန့ၢ်(၅)ဂၤဘၣ်အသိးမ့မ့ၢ်လၢ တၢ်ပၢၢ်ဆၢသုးပၥ်ဖှိၣ်တကပၤဘၣ်ဒိ(၂)ဂၤလၢတၢ်လီၤဘၣ်ယိၣ်တအိၣ်ဘၣ်အဂ့ၢ်(MSRF)ပှၤကတိၤတၢ်ပၢစံးဝဲန့ၣ်လီၤ. အဝဲစံးဝဲလၢ "လၢဒုၣ်ဒါတကပၤန့ၣ်သံဝဲ(၄)ဂၤလီၤ. ပှၤသံ(၄)ဂၤအံၤအကျါပှၤ(၃)ဂၤအစိၣ်န့ၣ်ပယီၤသုးအံၤက့ၤစိၥ် ဃုၥ်ဝဲလီၤ. အစိၣ်အိၣ်တ့ၢ်က့ၤဝဲတစိၢ်မီၤနီၤ." အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. လၢန့ၣ်အမဲၥ်ညါတၢ်ဒုးအပူၤတၢ်မၤန့ၢ်ဃုၥ်စ့ၢ်ကီးဝဲဒၣ်ပယီၤသုးမီၤစိရိၤအသုးကျိၤအပှၤတၢ်စုကဝဲၤ MA-4 ကျိ (၁)ခိၣ်, ၆၀မမ မ့ၣ်ပိၢ်ချံ(၄)ဖျၢၣ်, အံၣ်နၣ်ကါမ့ၣ်ပိၢ်(၂)ဖျၢၣ်, MA ကျိဆၣ်ဒၢ (၇) ဘ့ၣ်, ဒီး MA ကျိချံအဖျၢၣ်(၁၀၀)ဘျဲၣ်သ့ၣ်တ ဖၣ်န့ၣ်လီၤ. လၢတၢ်တြီဆၢဒုးထီၣ်ဒါဝဲပယီၤသုးမီၤစိရိၤသုးကျိၤအဝဲအံၤန့ၣ်မ့ၢ်ဝဲ တလၢၤကီၢ်စဲၣ်တၢ်ပၢၢ်ဆၢသုး(MSRF), ကညီဒီက လုၥ်တၢ်ထူၣ်ဖျဲးသုးမုၢ်ဒိၣ်(KNLA)လၢအမ့ၢ်သုးက့(၆),သုးရ့ၣ်(၂၇), ယီမၣ်ညၣ်တလၢၤသုးမုၢ်ဒိၣ်(R.M.A), တီနီသုးကျိၤ -၂(YGF), တီနီသုးကျိၤ-၃(KBDF),ဒုးယၤနီၣ်ဂံၢ်(၃၃),တီနီဒုးယၤဟူးဂဲၤသုးကျိၤဒီး(KTLA)ဆၣ်ကပီၤသုးရ့ၣ်သ့ၣ်တဖၣ်ပ ၥ်ဃုၥ်ဝဲန့ၣ်လီၤ
သထူၣ်ကီၢ်ဆၣ်ပူၤ သဝီဖိလၢပယီၤသုးဖီၣ်အီၤတဖၣ်တုၤခဲအံၤတပျၢ်လီၤက့ၤဝဲဒံးဘၣ်
လါအီကူး ၅ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)သထူၣ်ကီၢ်ဆၣ် ဒူသဝီကမျၢၢ်လၢပယီၤသုးဖီၣ်တ့ၢ်ဃၥ် ဝဲန့ၢ်လၢတနွံဃၣ်ဃၣ်အံၤတဖၣ်တုၤလၢခဲအံၤတၢ်တပျၢ်လီၤဝဲဒံးဘၣ်အဂ့ၢ်န့ၣ် ကီၢ်ရ့ၣ်နဲၣ်ရွဲၣ် ပှၤကတိၤတၢ်ပၢ ပဒိၣ်စီၤအ့နဲၤ စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. ဖဲအပူၤကွံၥ်လါအီကူး ၃၀ သီအနံၤန့ၣ် သုးမီၤစိရိၤအနီၣ်ဂံၢ်(၉)သုးလၢအိၣ်ဆီလီၤသးဖဲအလၣ်တယၣ်(အလံတစ်ရာ) တဖၣ်အံၤ နုၥ်လီၤဖီၣ်ဝဲမိကီကရူၢ် (ပုတိန်ရိုး)သ၀ီဖိပိၥ်ခွါ(၈)ဂၤလၢသဝီပူၤဝံၤက့ၤကိးဝဲဆူတၢ်ထၢဖှိၣ်သုးသီ တၢ်လီၢ် ဝဲၤဒၢးန့ၣ်လီၤ. (ပုတိန်ရိုး)သဝီဖိ ၈ ဂၤလၢပယီၤသုးဖီၣ်က့ၤကိးဝဲသ့ၣ်တဖၣ်အံၤမ့ၢ်ဝဲ အီၤမၠဲၤ(၄၄)နံၣ်,မ့အီၤ(၄၀)နံၣ်,ဘိၤစီ(၃၈)နံၣ်,အီၤအီၤ(၃၇)နံၣ်, ယၤနဲၤ(၃၇)နံၣ်, န့ၤနဲၤ(၃၀)နံၣ်, ကွံၤကွံၤ(၁၉)နံၣ် ဒီး ဖိသါ(၂၀)နံၣ် သ့ၣ်တဖၣ်အံၤန့ၣ်လီၤ.ဒ်န့ၣ်အသိးခဲအံၤသဝီဖိလၢတၢ်ဖီၣ် က့ၤကိးဝဲတဖၣ် တၢ်ဆၢကတီၢ်န့ၢ်လၢတနွံလံဘၣ်ဆၣ်တၢ်ဆဲးကျိးတန့ၢ်ဒီးအဟံၣ်ဖိဃီဖိဘၣ်ဒီး တၢ်တပျၢ်လီၤဝဲဒံးဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ. တကးဒံးဘၣ်တၢ်တနံၤဃီဝဲန့ၣ်စ့ၢ်ကီး စွ့ၣ်ယီၣ်ပၠးကရူၢ် လါအီၣ်ဃၢၤသဝီဖိ စီၤသဲၣ်စှ့ၤ(၅၀)နံၣ်ဒီး ကၠးတရီသဝီဖိ စီၤကါနံၤ(၂၈)နံၣ် ၂ ဂၤအံၤ ပယီၤသုးဖီၣ်အီၤလၢကျဲကဲထီၣ်ဒံးဝဲဒီး ဘၣ်ဆၣ်သဝီဖိ(၂)ဂၤအံၤအကျါ မ့မ့ၢ်လၢစီၤသဲၣ်စှ့ၤအံၤခီန့ၣ် မ့ၢ်လၢအသးပှၢ် တစဲးအဃိတၢ်ဘၣ်လဲၤရ့ထီၣ်အီၤလၢစ့ပယီၤ အကလီၢ်(၃၀)ကၠးအဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါစံးဝဲန့ၣ်လီၤ. ဘၣ်ဃးပယီၤသုးနုၥ်လီၤဖီၣ်ကမျၢၢ်လၢ(ပုတိန်ရိုး)သဝီဒီးဖီၣ်ဝဲစွ့ၣ်ယီၣ်ပၠးကမျၢၢ်တၢ်ဂ့ၢ်အံၤန့ၣ် ဒူသထူၣ်ကီၢ်ရ့ၣ် နဲၣ်ရွဲၣ် ပှၤကတိၤတၢ်ပၢ ပဒိၣ်စီၤအ့နဲၤ စံးဝဲလၢ“သုးကီၣ်ကး နီၣ်ဂံၢ်(၉)သုးန့ၣ်နုၥ်လီၤဝဲလၢ(ပုတိန်ရိုး)သ၀ီပူၤဘျီဖီၣ်ဝဲသဝီဖိ ၈ ဂၤ. မ့မ့ၢ် လၢစွ့ၣ်ယီၣ်ပၠးကရူၢ်ပူၤ...
တၢ်ဟဲခး(BGF)ကဲထီၣ်တၢ်ဂ့ၢ်အဖီခိၣ်အံၤကဘှါဆှဲသကိးအီၤလၢစီၤနီၢ်ခိၣ်အဂ့ၢ်န့ၣ် သုးခိၣ်စီၤတ့ၤဝ့ ဃ့ကညးဝဲ
လါအီကူး ၃ သီ, ၂၀၂၅ နံၣ်, ခ့ၣ်အဲးစံၣ် တၢ်သဘံၣ်သဘုၣ်တၢ်ခးလိၥ်သးလၢအဟဲကဲထီၣ်လၢမုၢ်တြီၢ်ကီၢ်ရ့ၣ်(သုးက့ ၅) ဘုသိၣ်ကီၢ်ဆၣ်ပူၤ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)အပှၤဒီး ကညီသုးခိး ကီၢ်ဆၢ(BGF)အဘၢၣ်စၢၤအံၤ ဒ်သိးသုတဆဲးကဲထီၣ်လၢၤ တဂ့ၤအဂီၢ် ကဘှါဆှဲသကိးအီၤလၢစီၤနီၢ်ခိၣ်အဂ့ၢ်န့ၣ် သုးခိၣ်ကျၢၢ်ဖိ စီၤတ့ၤဝ့ ဃ့ကညးဝဲန့ၣ်လီၤ. ဖဲမဟါလါအီကူး ၂ သီ ဟါခီ ၃း၃၀ ဃၣ်ဃၣ်အဆၢကတီၢ်န့ၣ် (BGF) ၁၀၁၃ သုးရ့ၣ် သုးရ့ၣ်ခိၣ် သုးခိၣ်စီၤလၣ်ကၠဲၤအပှၤ လၢအိၣ်ဆီလီၤသး ဖဲဝါဒူသဝီအံၤတဖၣ် ဟီၣ်ကဝီၤ(KNLA) သုးရ့ၣ်(၁၀၂) သုးဒ့-၃ လဲၤခးစဲးပြဲးဝဲတဘျီအဂ့ၢ်န့ၣ် (BGF)ပှၤဘၣ် မူဘၣ်ဒါတကပၤစံးဝဲန့ၣ်လီၤ. တကးဒံးဘၣ်မၤကဒီးဖဲတနံၤအံၤလါအီးကူး ၃ သီ ဂီၤခီ ၇း၃၀ အဆၢကတီၢ်န့ၣ် သုးဒ့-၃ အပှၤ လဲၤခးကဒီးဝဲ(BGF)လၢအိၣ် တဃ့ၣ်ခိၣ်သဝီအံၤတဘျီအဂ့ၢ်န့ၣ် စံးဝဲန့ၣ်လီၤ. အဃိဘၣ်ဃးတၢ်ဂ့ၢ်လၢအဟဲကဲသးခဲအံၤတဖၣ်ခါဆူမဲၥ်သုတအိၣ်ထီၣ်လၢၤတဂ့ၤအဂီၢ်န့ၣ် ကဘှါဆှဲဃုသကိးအစၢလၢစီၤနီၢ်ခိၣ် အဂ့ၢ်န့ၣ် (BGF)သုးဟီၣ်ကဝီၤ-၂ အခိၣ်သုးခိၣ်ကျၢၢ်ဖိ စီၤတ့ၤဝ့ ဃ့ကညးစံးဝဲဒ်အံၤန့ၣ်လီၤ. “ဖဲမဟါန့ၣ်ပှၤသုးက့(၅)အပှၤ ဟဲခးပပှၤဖဲတဃ့ၣ်ခိၣ်န့ၣ်တဘျီ.ဖဲတဂီၤအံၤန့ၣ်ဟဲခးကဒီးဝဲဖဲဝါဒူန့ၣ်တဘျီ.တမံၤဂ့ၤတမၠိဂ့ၤ တၢ်ဂ့ၢ်ကီမ့အိၣ်ထီၣ်န့ၣ်ပတဲဃၥ်အိၣ်လၢကအိၣ်သကိးလီၤသးလၢစီၤနီၢ်ခိၣ်န့ၣ်.မ့ၢ်မတဂၤကမၣ်လဲၣ်,မ့ၢ်မတဂၤဘၣ်လဲၣ်မီၤနီၤ. ပပှၤမ့ကဘၣ်န့ၣ်ပကဘှီက့ၤ,အ၀ဲသ့ၣ်ပှၤမ့ကမၣ်ဒီးဘှီ.ပကဘၣ်မၤဒ်န့ၣ်.တဘၣ်မ့ၢ်လၢတခါခါဒီးခးဒ်န့ၣ်ဘၣ်.ပှၤကညီဖိကဒဲကဒဲ ခးလိၥ်သးဒ်အံၤကလဲၤန့ၢ်ထံန့ၢ်ကီၢ်ဒ်လဲၣ်ခးလီၤသးတဘၢးဘၢးအံၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ ဒ် BGF ပှၤဘၣ်မူဘၣ်ဒါစံးဝဲအသိးန့ၣ် BGF...
မူဒီးလၢၢ်ဒိၣ်ကီၢ်ဆၣ်ပူၤထံဒိၣ်ဃိၣ်ယွၤအံၤအဃိ ဟံၣ်ခိၣ်(၁၆၀၀၀)ဘျဲၣ်လိၣ်ဘၣ်ဂ့ၢ်ဂီၢ်အူတၢ်ဆီၣ်ထွဲမၤစၢၤ
လါအီကူး ၄ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ မူကီၢ်ဆၣ်ဒီးလၢၢ်ဒိၣ်ကီၢ်ဆၣ်ခံဘ့ၣ်အံၤအပူၤ ခီဖျိထံဒိၣ်ဃိၣ်ယွၤအံၤအဃိ ဟံၣ်ခိၣ် (၁၆၀၀၀)ဘျဲၣ်လိၣ်ဘၣ်ဝဲဂ့ၢ်ဂီၢ်အူတၢ်ဆီၣ်ထွဲမၤစၢၤအဂ့ၢ်န့ၣ် ကီၢ်ဆၣ်ခံဘ့ၣ်ဘၣ်ထွဲကညီဂ့ၢ်ဂီၢ်အူတၢ်တိစၢၤမၤစၢၤကရူၢ် ထုးထီၣ် ပၥ်ဖျါဝဲန့ၣ်လီၤ. ဒ်မူကီၢ်ဆၣ်လံၥ်တၢ်ပၥ်ဖျါပူၤပၥ်ဖျါဝဲအသိးန့ၣ် စးထီၣ်ဖဲလါယူၤလံ ၂၃ သီအနံၤ တၢ်စူၤတပယူၥ်ဃီဒီးထံဒိၣ်ထီၣ်ဝဲလၢ ဟီၣ်ကဝီၤ တၢ်လီၢ်သကုၤဆးဒးအပူၤန့ၣ်လီၤ. အဃိလၢထံဒိၣ်ဃိၣ်ယွၤအံၤအဖီခိၣ် ဒူသဝီပၥ်ဖှိၣ်(၁၀၆)ဖျၢၣ်, ဟံၣ်ခိၣ် (၁၁,၃၇၇) ဖျၢၣ်, ပှၤနီၣ်ဂံၢ် (၆၁,၇၈၇)ဂၤဘၣ်သုးလီၢ်သုးကျဲဒီး ကၠိဘၣ်ပံးသး(၁၈)ဖျၢၣ် န့ၣ်လီၤ. တကးဒံးဘၣ်ခီဖျိလၢထံဒိၣ်ဃိၣ်ယွၤဟီၣ်ခိၣ်လၥ်အံၤအဃိ ဟံၣ်လီၤထွံကွံၥ်ဝဲ(၁၆)ဖျၢၣ်လီၤဒီးကမျၢၢ်ဘၣ်ဒိဝဲ(၂)ဂၤအသိး စံၥ်လီၢ်ပၥ်ဖှိၣ်(၄,၂၅၀)အ့ကၢၣ်လီၤဘျၢဝဲလၢထံကျါအဂ့ၢ်န့ၣ် စံးဝဲန့ၣ်လီၤ. လၢတၢ်န့ၣ်အဃိဒူသဝီကမျၢၢ်လၢအသဂၢၢ်ဘၣ်ထံဒိၣ်ဃိၣ်ယွၤအံၤတဖၣ်အဂီၢ် လိၣ်ဘၣ်ဝဲဂ့ၢ်ဂီၢ်အူတၢ်ဆီၣ်ထွဲမၤစၢၤအဖီခိၣ် ကီၢ်ပူၤကီၢ်ချၢဘၣ်ထွဲကရူၢ်ကရၢတဖၣ်ကဆီၣ်ထွဲမၤစၢၤသကိးဘၣ်တၢ်လိၣ်ဘၣ်အံၤအဂ့ၢ်န့ၣ် မူကီၢ်ဆၣ်ဂ့ၢ်ဂီၢ်အူတၢ်တိစၢၤမၤစၢၤ ကမံးတံၥ် ဃ့ထီၣ်ဝဲဒၣ်န့ၣ်လီၤ. ဒ်န့ၣ်အသိးလၢလၢၢ်ဒိၣ်ကီၢ်ဆၣ်အပူၤစ့ၢ်ကီး လၢတၢ်စူၤထံဒိၣ်ဃိၣ်ယွၤအံၤအဃိ ဒူသဝီ(၈၀)ဖျၢၣ်, ဟံၣ်ခိၣ် (၅,၄၉၅)ဖျၢၣ်, ပှၤနီၣ်ဂံၢ်(၂၈,၁၆၂)ဂၤသဂၢၢ်ဘၣ်ဝဲထံဒိၣ်ဃိၣ်ယွၤတၢ်ကီတၢ်ခဲအံၤအဂ့ၢ်န့ၣ် လံၥ်တၢ်ပၥ်ဖျါအပူၤပၥ်ဖျါဝဲန့ၣ်လီၤ. ဘၣ်ဆၣ်လၢၢ်ဒိၣ်ကီၢ်ဆၣ်ပူၤ ဒူသဝီလၢတၢ်ပၥ်ဖျါထီၣ်ဝဲ(၈၀)အကျါလီၤဆီဒၣ်တၢ်သဝီ(၈)ဖျၢၣ်ဃၣ်ဃၣ်ပူၤကမျၢၢ်တဖၣ် သဂၢၢ်ဘၣ်ထံဒိၣ်ဃိၣ်ယွၤအမဲၥ်ညါ ပှၤသ့ၣ်တဖၣ်အံၤအိၣ်လၢသဝီပူၤတဘူၣ်ဘၣ်ဟးအိၣ်ကဒုသး လၢတၢ်ဘံၣ်တၢ်ဘၢအလီၢ် ကအိၣ်လၢ(၃)နံၣ်လံအဃိ လိၣ်ဘၣ်ဝဲဂ့ၢ်ဂီၢ်အူတၢ်အီၣ်တၢ်အီ,တၢ်ခိၣ်ဒုး,ကသံၣ်ကသီသ့ၣ်တဖၣ်အဂ့ၢ်န့ၣ် လီၢ်ကဝီၤပှၤဘၣ်မူ ဘၣ်ဒါ စံးဝဲန့ၣ်လီၤ. ဘၣ်ဃးတၢ်ဂ့ၢ်အံၤ လၢၢ်ဒိၣ်ကီၢ်ဆၣ် ကညီဂ့ၢ်ဂီၢ်အူတၢ်တိစၢၤမၤစၢၤကမံးတံၥ် ပှၤကတိၤတၢ်ပၢ စီၤအဲၣ်ကီၢ်တီ စံးဝဲလၢ “ဘၣ်ဃး ထံဒိၣ်ဒုထံဒိၣ်လၢတၢ်လီၢ်ပူၤဒဲးလီၤ.ဘၣ်ဆၣ်လီၤဆီဒၣ်တၢ်လၢထံရူၢ်ကီၢ်သဲးအတၢ်ဂ့ၢ်ကီ,တၢ်ဒုးတၢ်ယၤကဲထီၣ်အဃိဘၣ်ဃ့ၢ်မှံဟးဖျိးတနီၤ,တအိၣ်ဘၣ်လၢဒူသဝီပူၤဘၣ်တနီၤမီၤ.အဝဲသ့ၣ်ဘၣ်ဟးအိၣ်လၢစံၥ်ပျီတၢ်ခိၣ်တၢ်ဃၢၤဒ်န့ၣ်.ခဲအံၤမူခိၣ်စူၤထံဒိၣ်ထီၣ်အဃိအဝဲသ့ၣ်ဘၣ်ကွၢ်ဆၢၣ်မဲၥ်တၢ်အါန့ၢ်ပှၤအဂၤဒံးမီၤနီၤ.ဖဲလၢၢ်ဒိၣ်ကီၢ်ဆၣ်ပူၤအံၤဒူသဝီကအိၣ်ဝဲ(၈)ဖျၢၣ်,(၉)ဖျၢၣ်ညါလၢအသဂၢၢ်ဘၣ်တၢ်အံၤန့ၣ်.ပက့ၤကွၢ်ကဒါက့ၤအဝဲသ့ၣ်လၢဟံၣ်ဖိဃီဖိတၢ်လိၣ်နီၢ်နီၢ်န့ၣ်မ့ၢ်ဝဲအိၣ်ဆိးလီၢ်ကျဲ,တၢ်အီၣ်တၢ်အီ,တၢ်အိၣ်ဆူၣ်အိၣ်ချ့ဒီးတကးဒံးဘၣ်တၢ်ကူၣ်ဘၣ်ကူၣ်သ့တကပၤစ့ၢ်ကီးကဲထီၣ်တၢ်ဂ့ၢ်ကီ”အဂ့ၢ်န့ၣ်...
ကွၢ်ထွဲကဟုကယၥ်ဒီးဃုန့ၢ်ဝဲပယီၤသုးလၢတၢ်ဖီၣ်န့ၢ်အီၤတဖၣ်အတၢ်ဖံးတၢ်မၤအဂ့ၢ်(KNU)ထုးထီၣ်ပၥ်ဖျါဝဲ
လါအီကူၥ် ၄သီ, ၂၀၂၅နံၣ်, ခ့ၣ်အဲးစံၣ်, ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,ချၢၣ်လွံၢ်ထူၣ်ကီၢ်ရ့ၣ်မူကီၢ်ဆၣ်ဟီၣ်ကဝီၤအပူၤပယီၤသုးလၢတၢ်ဖီၣ်န့ၢ်ဝဲတဖၣ်အံၤတၢ်ကွၢ်ထွဲကဟုကယၥ်ဃၥ်ဝဲဒီးဃုန့ၢ်ဝဲတၢ်ဖံးတၢ်မၤသ့ၣ်တဖၣ်အဂ့ၢ်,ခ့ၣ်အဲၣ်ယူၣ်ထုးထီၣ်ပၥ်ဖျါဝဲဒၣ်ဖဲတနံၤအံၤလါအီကူၥ်(၄)သီအနံၤန့ၣ်လီၤ. အပူၤကွံၥ်လါယူၤလံ(၂၅)သီအနံၤအပူၤ,တီၣ်စူးဒီးတီၣ်ဝံၣ်တၢ်ဒုးအပူၤပယီၤသုးလၢ(KNLA)ကညီတၢ်ထူၣ်ဖျဲးသုးမုၢ်ဒိၣ်ဒီးတၢ်ပၢၢ်ဆၢသုးပၥ်ဖှိၣ်ဖီၣ်န့ၢ်ဝဲသ့ၣ်တဖၣ်အံၤ,သုးရ့ၣ်(၁၉)ပှၤဘၣ်မူဘၣ်ဒါတဖၣ်ကွၢ်ထွဲဝဲအီၤဒ်သုးတၢ်သိၣ်တၢ်သီတၢ်ဘျၢသဲးစးအသိးဂ့ၤဂ့ၤဘၣ်ဘၣ်အဂ့ၢ်,ခ့ၣ်အဲၣ်ယူၣ်ပၥ်ဖျါဝဲဒၣ်န့ၣ်လီၤ. ပယီၤသုးဖိလၢတၢ်ဖီၣ်န့ၣ်ဝဲတဖၣ်အံၤဒ်ခ့ၣ်အဲၣ်ယူၣ်ထံရုၢ်ကီၢ်သဲးတၢ်သိၣ်တၢ်သီတၢ်ဘျၢအသိး,တၢ်ဟ့ၣ်ဝဲအီၤထံရုၢ်ကီၢ်သဲးတၢ်မၤလိဒီးခ့ၣ်အဲၣ်ယူၣ်ထံရုၢ်ကီၢ်သဲးအတၢ်အိၣ်ဆၢထၢၣ်ဝံၤအလီၢ်ခံ,ဒ်အလီၢ်အိၣ်ဝဲအသိးတၢ်မၤစၢၤဆီၣ်ထွဲကဟုကယၥ်က့ၤဝဲအီၤဒ်သိးကအိၣ်ဆၢထၢၣ်က့ၤဒ်ကမျၢၢ်တဂၤအသိးအဂ့ၢ်,လီၢ်ကဝီၤပှၤဘၣ်မူဘၣ်ဒါတဂၤစံးဝဲဒ်အံၤန့ၣ်လီၤ. “ဘၣ်ဃးဒီးတၢ်ရဲၣ်ကျဲၤဝဲတၢ်ဖီၣ်န့ၢ်ပယီၤသုးဖိတဖၣ်ဂ့ၢ်ဝီခီန့ၣ်,အဆိကတၢၢ်တၢ်မၤနီၣ်မၤဃါအဝဲသ့ၣ်မုၢ်နံၤမုၢ်သီ,တၢ်ဟ့ၣ်ဝဲအီၤထံရုၢ်ကီၢ်သဲးတၢ်မၤလိ,တၢ်ဒုးသ့ၣ်ညါနၢ်ပၢၢ်အီၤလၢခ့ၣ်အဲၣ်ယူၣ်တၢ်အိၣ်ဆၢထၢၣ်တၢ်သိၣ်တၢ်သီတၢ်ဘျၢတဖၣ်,အဝဲသ့ၣ်ကဘၣ်လူၤပိၥ်မၤထွဲဝဲ,ဒ်အလီၢ်အိၣ်ဝဲအသိးအဝဲသ့ၣ်မၤထွဲဝဲအဖီခိၣ်တၢ်ဟ့ၣ်က့ၤအဝဲသ့ၣ်တၢ်သဘျ့ဒ်ကမျၢၢ်တဂၤအသိးဒီးတၢ်ဆီၣ်ထွဲမၤစၢၤက့ၤအဝဲသ့ၣ်ဒ်သိးကဖံးအီၣ်မၤအီၣ်သ့ဝဲအဂီၢ်”အဂ့ၢ်စံးဝဲဒၣ်န့ၣ်လီၤ. တီၣ်စူးဒီးတီၣ်ဝံၣ်တၢ်ဒုး(၂)တီၤအပူၤ(KNLA)ကညီတၢ်ထူၣ်ဖျဲးသုးမုၢ်ဒိၣ်ဒီးတၢ်ပၢၢ်ဆၢသုးပၥ်ဖှိၣ်တဖၣ်မၤန့ၢ်ဝဲစုကဝဲၤအါအါဂီၢ်ဂီၢ်ဒီး,ဖီၣ်န့ၢ်ဝဲပယီၤသုးခဲလၢၥ်(၂၆)ဂၤအဂ့ၢ်,ခ့ၣ်အဲၣ်ယူၣ်ပၥ်ဖျါဝဲဒၣ်န့ၣ်လီၤ. လၢန့ၣ်အမဲၥ်ညါ,ပယီၤသုးလၢတၢ်ဖီၣ်န့ၢ်ဝဲ(၂၆)ဂၤအံၤမ့မ့ၢ်ပှၤလၢက့ၤအိၣ်ဆိးက့ၤဝဲလၢအနီၢ်ကစၢ်တၢ်လီၢ်တၢ်ကျဲသ့ဝဲညီဝဲတဖၣ်တခီတၢ်က့ၤဆှၢက့ၤဝဲဂ့ၤဂ့ၤဘၣ်ဘၣ်အဂ့ၢ်,ခ့ၣ်အဲၣ်ယူၣ်တၢ်ပၥ်ဖျါအပူၤပၥ်ဖျါဝဲဒၣ်စ့ၢ်ကီးန့ၣ်လီၤ. တကးဒံးဘၣ်,မူကီၢ်ဆၣ်အပူၤပယီၤသုးလၢတၢ်ဖီၣ်န့ၢ်ဝဲတဖၣ်အံၤ,အါတက့ၢ်မ့ၢ်ဝဲပှၤလၢအဘၣ်တၢ်ထၢန့ၢ်ဆူၣ်အီၤလၢတၢ်ကဘၣ်ကဲသုးဒီး,တနီၤတခီမ့ၢ်ပှၤလၢအကဲသုးအနံၣ်ပှဲၤထီၣ်ဒီးတအဲၣ်ဒိးကဲလၢၤသုးသ့ၣ်တဖၣ်လီၤအဂ့ၢ်,ခ့ၣ်အဲၣ်ယူၣ်ပၥ်ဖျါဝဲဒၣ်န့ၣ်လီၤ. ပယီၤသုးလၢတၢ်ဖီၣ်န့ၣ်ဝဲတဖၣ်အံၤ,(KNU)တကပၤအံးထွဲကွၢ်ထွဲကဟုကယၥ်လုၢ်အီၣ်လုၢ်အီ,ရဲၣ်သဲကတီၤပၢဆှၢဝဲဒၣ်ဂ့ၤဂ့ၤဝါဝါဘၣ်ဆၣ်,သုးကီၣ်ကးတကပၤရၤလီၤဝဲတၢ်ကစီၣ်လၢအကမၣ်တဖၣ်အကလုၥ်ကလုၥ်အိၣ်ဝဲအဖီခိၣ်,ကအိၣ်ဒီးတၢ်ပလီၢ်ပဒီသးအဂ့ၢ်လံၥ်ထုးထီၣ်ပၥ်ဖျါအပူၤ(KNU)ဘိးဘၣ်ဒုးသ့ၣ်ညါဝဲဒၣ်န့ၣ်လီၤ.
အသီ(၉၀)အတီၢ်ပူၤကဒိၣ်စိက့ၤကညီကီၢ်စဲၣ်အပူၤတၢ်လီၢ်(၂)တီၤအဂ့ၢ်,သုးကီၣ်ကးဘိးဘၣ်ရၤလီၤဝဲ
လါအီကူး ၂သီ, ၂၀၂၅နံၣ်, ခ့ၣ်အဲးစံၣ်, ကမၤဘှ့ၣ်မၤဘှီၣ်က့ၤဖီၣ်စုကဝဲၤကရူၢ်ကရၢအတၢ်ပူထီၣ်လီထီၣ်ဒီးဒုးအိၣ်ထီၣ်က့ၤဟီၣ်ကဝီၤတၢ်မုၥ်တၢ်ခုၣ်သဲးစးတၢ်တၢ်ဒိၣ်စိအဂီၢ်,အသီ(၉၀)အတီၢ်ပူၤကဒိၣ်စိက့ၤဝဲကညီကီၢ်စဲၣ်တၢ်လီၢ်(၂)တီၤအဂ့ၢ်,သုးကီၣ်ကးထုးထီၣ်ပၥ်ဖျါဝဲဂ့ၢ်ဝီၢ်အူအတၢ်ပၥ်ဖျါဖဲဖဲမဟါလါယူၤလံ(၃၁)သီအနံၤန့ၣ်လီၤ. သုးကီၣ်ကးဂ့ၢ်ဝီၢ်အူအတၢ်ပၥ်ဖျါအပူၤ,အသီ(၉၀)အတီၢ်ပူၤကဒိၣ်စိက့ၤဝဲဖီၣ်စုကဝဲၤကရူၢ်ကရၢအတၢ်လီၢ်တၢ်ကျဲတဖၣ်အကျါပၣ်ဃုၥ်ဝဲဒၣ်ဒီးခ့ၣ်အဲးယူၣ်ကညီဒီကလုၥ်စၢဖှိၣ်ကရၢတၢ်ပၢသုးက့(၆)ကီးတရံးကီၢ်ဆၣ်ဒီးနိၣ်တကီကီၢ်ဆၣ်တဖၣ်အဂ့ၢ်,သ့ၣ်ညါဘၣ်န့ၣ်လီၤ. ဘၣ်ဃးဒီးသုးကီၣ်ကးအတၢ်ဘိးဘၣ်ပၥ်ဖျါအဖီခိၣ်,ခ့ၣ်အဲၣ်ယူၣ်ပှၤကတိၤတၢ်ပၢ(ပဒိၣ်စီၤတီနံ)စံးဘၣ်ခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤ. “သုးကီၣ်ကးတဲဝဲဒ်အံၤန့ၣ်တမ့ၢ်ထဲခဲအံၤဘၣ်,ဃုလါတဘျီဃုလါတဘျီတဲဝဲထီဘိလီၤ.အဝဲသ့ၣ်ပၥ်ဖျါဝဲဒ်အံၤန့ၣ်မ့ၢ်ဒၣ်အဲၣ်ဒိးပၥ်ဖျါဝဲဒၣ်လၢပဝဲတၢ်ပၢၢ်ဆၢသ့ၣ်တဖၣ်အံၤပဒိၣ်စိဒိၣ်ကမီၤအဃိ,အဝဲသ့ၣ်တကပၤကဘၣ်မၤက့ၤ,ကဘၣ်ဂုၤက့ၤဝဲဒၣ်တုၤအန့ၢ်န့ၣ်လီၤ.သုးကီၣ်ကးအတၢ်စိကမီၤလီၤပအၣ်ကွံၥ်န့ၣ်တမ့ၢ်ထဲပကီၢ်ဆၣ်ခံဘ့ၣ်အံၤဘၣ်,ပသုးက့(၇)ဘ့ၣ်အပူၤအတၢ်စိကမီၤတအိၣ်လၢၤဘၣ်.အန့ၣ်မးန့ၣ်တမ့ၢ်လၢပထီၣ်ဒုးအီၤလိၤလိၤအဃိဘၣ်,ခီဖျိအဝဲသ့ၣ်သဂၢၢ်ဘၣ်ဝဲကီၢ်ပယီၤဒီတဘ့ၣ်အတၢ်ထီဒုၣ်ထီဒါအဃိအဲၣ်ဒိးပၥ်ဘၢဝဲတၢ်နီၢ်ကီၢ်လၢအကဲထီၣ်သးအဃိပဘၣ်တဲအလီၢ်တအိၣ်ဘၣ်.”အဂ့ၢ်စံးဝဲဒၣ်န့ၣ်လီၤ. လၢန့ၣ်အမဲၥ်ညါ,ကညီကီၢ်စဲၣ်အပူၤတၢ်ပၢၢ်ဆၢသုးပၥ်ဖှိၣ်ပၢဆှၢတ့ၢ်ဝဲဟီၣ်ကဝီၤသ့ၣ်တဖၣ်အံၤအိၣ်ဒၣ်တၢ်လၢတၢ်ပၢၢ်ဆၢကရူၢ်ကရၢတဖၣ်အတၢ်ပၢဆှၢပူၤအဂ့ၢ်,ပဒိၣ်တီနံစံးအါထီၣ်ဝဲဒၣ်န့ၣ်လီၤ. ဒီးတကီၢ်ခါခဲအံၤတၢ်ပၢၢ်ဆၢပၢၤဃၥ်ဝဲတၢ်လီၢ်တၢ်ကျဲတဖၣ်န့ၢ်ဝဲအါအါဂီၢ်ဂီၢ်လံအဂ့ၢ်န့ၣ်,ပဒိၣ်တီနံကတိၤပၥ်ဖျါစ့ၢ်ကီးဝဲဒ်အံၤန့ၣ်လီၤ. “နီၢ်နီၢ်တခီန့ၣ်,ဟီၣ်ကဝီၤလၢပပၢဆှၢတ့ၢ်သ့ၣ်တဖၣ်န့ၣ်,ခဲအံၤလီၤကွံၥ်လၢပစုပူၤလိၤလိၤလီၤ.ပကွၢ်က့ၤစးထီၣ်လၢပရဲလိၥ်ကျိမုၢ်ထီၣ်မ့ၢ်ဂ့ၤ,မုၢ်နုၥ်မ့ၢ်ဂ့ၤ,လၢဝ့ၢ်တကူၣ်,မါတလ့ကါကျဲမ့ၢ်ဂ့ၤ,ဟဲက့ၤလီၤက့ၤကဒါက့ၤတုၤလၢ(မိၣ်တမးကွ့ၣ်)သ့ၣ်တဖၣ်န့ၣ်မ့ၢ်ဂ့ၤအိၣ်ဒၣ်လၢပစုပူၤ,ပမ့ဘၣ်တဲကဒီးလၢသုးက့(၆),သုးက့(၄)ကါကျဲတကပၤန့ၣ်,တမ့ၢ်ထဲမုၢ်ထီၣ်တကပၤဘၣ်,တုၤလၢမုၢ်နုၥ်တကပၤပမၤန့ၢ်,တကးဘၣ်တုၤလၢပီၣ်လဲၣ်နံၤန့ၣ်,ပဒိၣ်စိဒိၣ်ကမီၤန့ၢ်န့ၣ်ပတဲသ့လီၤ.မ့မ့ၢ်လၢထံဆၢကီၢ်ဆၢဒုပတလိၣ်တဲလၢၤဘၣ်.”အဂ့ၢ်စံးဝဲဒၣ်န့ၣ်လီၤ. သုးကီၣ်ကးအံၤအသီ(၉၀)အတီၢ်ပူၤကဒိၣ်စိက့ၤဝဲမါတလ့,စကဲ,မကွ့ကီၢ်ခီဒိၣ်တဖၣ်အသိး,ကဒိၣ်စိက့ၤဝဲကခၠ့ၤ,ကယါ,ရခၢၣ်,ယိၤဒိၣ်ဒီးခၠီကီၢ်စဲၣ်အပူၤကီၢ်ဆၣ်တၢ်လီၢ်တၢ်ကျဲတဖၣ်အဂ့ၢ်,ပၥ်ဖျါစ့ၢ်ကီးဝဲဒၣ်လၢဂ့ၢ်ဝီၢ်အူတၢ်ဘိးဘၣ်ရၤလီၤအပူၤန့ၣ်လီၤ. လၢတၢ်အံၤအဖီခိၣ်,သုးကီၣ်ကးအံၤအတၢ်ပၢဆှၢဟီၣ်ကဝီၤအပူၤပၥ်ဖျါဝဲလၢကဘၣ်ဒိၣ်စိက့ၤဝဲတၢ်လီၢ်တၢ်ကျဲအိၣ်တ့ၢ်ဒၣ်ထဲစှၤကိးတီၤဘၣ်ဆၣ်,တၢ်နီၢ်နီၢ်တခီအတၢ်ပၢတၢ်ြပးလီၤပအၣ်ကွံၥ်ဝဲလၢကီၢ်ဆၣ်အဘ့ၣ်(၁၀၀)ဃၣ်ဃၣ်အပူၤအိၣ်ဝဲအဂ့ၢ်ခ့ၣ်အဲၣ်ယူၣ်ပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.