Home တၢ်ကစီၣ် ကီၢ်စဲၣ်သုးကီၣ်ကးခိၣ်အတၢ်ဟဲလၢဆိၣ်စံမၠဲၣ်အံၤ မ့ၢ်ဒၣ်ဟဲဟ့ၣ်လီၤလီၢ်က၀ီၤဖိတဖၣ်အခိၣ်ဂီၤအဂ့ၢ် DKBA စံး၀ဲ

ကီၢ်စဲၣ်သုးကီၣ်ကးခိၣ်အတၢ်ဟဲလၢဆိၣ်စံမၠဲၣ်အံၤ မ့ၢ်ဒၣ်ဟဲဟ့ၣ်လီၤလီၢ်က၀ီၤဖိတဖၣ်အခိၣ်ဂီၤအဂ့ၢ် DKBA စံး၀ဲ

441
0
Photo: DKBA

လါစဲးပထ့ဘၢၣ် ၂၉ သီႇ ၂၀၂၁ နံၣ်ႇ ခ့ၣ်အဲးစံၣ်

ဖဲတနံၤအံၤလါစဲးပထ့ဘၢၣ် ၂၉ သီအနံၤ ကညီကီၢ်စဲၣ်သုးကီၣ်ကးခိၣ် စီၤမၠ့ၣ်အူအတၢ်လဲၤလၢဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)သုး၀ဲၤလီၢ်သ့ၣ်ဆိၣ်စံမၠဲၣ်တၢ် လီၢ်အံၤ မ့ၢ်ဒၣ်တၢ်ဟဲဟ့ၣ်လီၤလီၢ်က၀ီၤဖိတဖၣ်အခိၣ်ဂီၤ(မၣ်ပိၤတ့ၤ)လီၤအဂ့ၢ်န့ၣ် DKBA တကပၤစံး၀ဲန့ၣ်လီၤႉ

ကီၢ်စဲၣ်သုးကီၣ်ကးခိၣ်ဃုာ်ဒီး ကီၢ်စဲၣ်ဘံၣ်ဘၢကိတိာ်ခိၣ် သုးခိၣ်ဒိၣ်စိ မၠိမ့နီၣ်အတၢ်လဲၤဘျီ၀ဲအံၤမ့ၢ်ဒၣ်ဟဲဟ့ၣ်လီၤ၀ဲလီၢ်က၀ီၤသ၀ီဖိ(၂၀၀)ဘျဲၣ်အခိၣ်ဂီၤလီၤအဂ့ၢ်န့ၣ် DKBA လီၢ်ခၢၣ်သးသုး၀ဲၤလီၢ်ခိၣ်သ့ၣ် သုးရိၣ်မဲခိၣ်(၂)သုးခိၣ်ဒိၣ်ဖိ စီၤစးမ့စံး၀ဲဒ်အံၤန့ၣ်လီၤႉ

“တနံၤညါအံၤအ၀ဲသ့ၣ်ဟဲ၀ဲဒၣ်တၢ်ဟ့ၣ်လီၤခိၣ်ဂီၤတၢ်ရဲၣ်တၢ်ကျဲၤအမူးလီၤႉ ဟဲဟ့ၣ်လီၤ၀ဲဒၣ်လ့ဂီၤႇ၀ၣ်မံၤကျါႇအူးကြ့ၣ်ထၣ်ႇဂီၤလ့ၤသ၀ီဖိအဂၤ(၂၀၀)ဘျဲၣ်အခိၣ်ဂီၤလီၤ”အဂ့ၢ်န့ၣ် အ၀ဲစံးဘၣ်ခ့ၣ်အဲးစံၣ်န့ၣ်လီၤႉ

တၢ်ဟ့ၣ်လီၤခိၣ်ဂီၤ(မၣ်ပိၤတ့ၤ)တၢ်ရဲၣ်တၢ်ကျဲၤမူးအပူၤ ကီၢ်စဲၣ်သုးကီၣ်ကးခိၣ်ႇဘံၣ်ဘၢကိတိာ်အမဲာ်ညါ မၠၣ်၀တံၣ်ကီၢ်ရ့ၣ်ခိၣ်ႇ(လ၀က)ၦၤဘၣ်မူဘၣ်ဒါတဖၣ်ဟဲထီၣ်၀ဲဒီး မ့ၢ်ဒၣ်အဟဲလၢတၢ်ဟ့ၣ်လီၤခိၣ်ဂီၤတၢ်ရဲၣ်တၢ်ကျဲၤအမူးလီၤဒီး တပၣ်ဃုာ်ဒီးတၢ်ရဲၣ်တၢ်ကျဲၤအဂၤဘၣ်အဂ့ၢ်န့ၣ် သုးခိၣ်ဒိၣ်ဖိ စီၤစးမ့စံးအါထီၣ်၀ဲန့ၣ်လီၤႉ

Photo: DKBA

လၢအတၢ်ဟဲဘျီညါအံၤအဂီၢ် ကျဲဒီတဘိန့ၣ်(DKBA)သုးဟံးန့ၢ်၀ဲတၢ်ဘံၣ်တၢ်ဘၢအသိး ပယီၤသုးသိလ့ၣ်လၢအပၣ်ဃုာ်ဒီးသုးတဖၣ်ႇသုးခိးကီၢ်ဆၢ(BGF)သုးတဖၣ်ႇဟီၣ်က၀ီၤပၢၤကီၢ်သုးသိလ့ၣ် အခိၣ်(၂၀)ဘျဲၣ်ဟံးန့ၢ်၀ဲတၢ်ဘံၣ်တၢ်ဘၢစ့ၢ်ကီးအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ

တၢ်ဟ့ၣ်လီၤထံကီၢ်ခိၣ်ဂီၤတၢ်ရဲၣ်တၢ်ကျဲၤအမူးအံၤဘၣ်တၢ်မၤအီၤဖဲ(DKBA)သုး၀ဲၤလီၢ်ခိၣ် သ့ၣ်ဆိၣ်စံမၠဲၣ်သ၀ီ သူမှဲခံတၢ်လီၢ်န့ၣ်လီၤႉ တၢ်ဟ့ၣ်လီၤ၀ဲလီၢ်က၀ီၤသ၀ီဖိ(၂၇၀)ဂၤလၢထံကီၢ်ခိၣ်ဂီၤ၀ံၤ ဖဲမုၢ်ဃ့ၢ်လီၤ ၁ နၣ်ရံၣ် ၄၀ မံးနံးဃၣ်ဃၣ်န့ၣ်ကီၢ်စဲၣ်သုးကီၣ်ကးခိၣ်ဒီးဘံၣ်ဘၢကိတိာ်သ့ၣ်တဖၣ်က့ၤကဒါ၀ဲဒၣ် န့ၣ်လီၤႉ

ဖဲအ၀ဲသ့ၣ်လဲၤလၢတၢ်ဟ့ၣ်လီၤထံကီၢ်ခိၣ်ဂီၤအမူး၀ံၤအလီၢ်ခံ ကီၢ်စဲၣ်သုးကီၣ်ကးခိၣ်ဒီးအၦၤတဖၣ် ဟဲက့ၤနုာ်လီၤ၀ဲလၢလ့ၣ်ကီာ်၀့ၢ်သီအပူၤစ့ၢ်ကီးန့ၣ်လီၤႉ ဒ်န့ၣ်အသိးဖဲမဟါ(လါစဲးပထ့ဘၢၣ် ၂၈)သီအနံၤ ပယီၤသုးတဖၣ်နုာ်လီၤသံဒိးသံကွၢ်တၢ်လၢလ့က့ၣ်ကီာ်၀့ၢ်သီအပူၤဒံးန့ၣ်လီၤႉ