Home တၢ်ကစီၣ် ခီဖျိတၢ်ခိတၢ်သွဲဟဲအါထီၣ်အဃိသဲးကျီးကစၢ်တဖၣ်ဘၣ်ပတုာ်ကွံာ်တၢ်ဖံးတၢ်မၤ

ခီဖျိတၢ်ခိတၢ်သွဲဟဲအါထီၣ်အဃိသဲးကျီးကစၢ်တဖၣ်ဘၣ်ပတုာ်ကွံာ်တၢ်ဖံးတၢ်မၤ

297
0
Photo: CJ

လါနိၣ်၀့ဘၢၣ် ၁၆ သီႇ ၂၀၂၂ နံၣ်ႇ ခ့ၣ်အဲးစံၣ်

လၢတနီသရံၣ်ကီၢ်ခီဒိၣ် ဒ၀ဲၢ်ကီၢ်ဆၣ် မုၢ်ထီၣ်ဒူသ၀ီတဖၣ်အပူၤ ၦၤလၢအမၤကၤသဲးသၣ်တဖၣ်အံၤ ခီဖျိကျဲတၢ်ခိတၢ်သွဲဟဲအါထီၣ်ဒီးသဲးသၣ်စ့ၢ်ကီးအၦ့ၤတဂၢၢ်တကျၢၤဘၣ်အဃိ ကျိၣ်စ့တၢ်ဟဲနုာ်လီၤစှၤ၀ဲဒီး ဘၣ်ပတုာ်ကွံာ်တၢ်မၤကၤသဲးသၣ်တၢ်ဖံးတၢ်မၤအဂ့ၢ်န့ၣ် လီၢ်က၀ီၤကမျၢၢ်လၢအမၤကၤသဲးသၣ်တဖၣ်စံး၀ဲန့ၣ်လီၤႉ

စးထီၣ်ဖဲအပူၤကွံာ်လါအီးကထိဘၢၣ်တုၤလၢတလါအံၤလါနိၣ်၀့ဘၢၣ်န့ၣ် လၢဒ၀ဲၢ်ကီၢ်ဆၣ် မုၢ်ထီၣ်ဒူသ၀ီတဖၣ်အပူၤ ခီဖျိသဲးသၣ်အၦ့ၤတဂၢၢ်တကျၢၤဒီးဘၣ်ဟ့ၣ်လီၤကျဲတၢ်ခိတၢ်သွဲအဘူးအလဲဟဲအါထီၣ်ကွ့ၢ်ကွ့ၢ်တၢ်အိၣ်သးအဃိ ကမျၢၢ်လၢအမၤကၤသဲးသၣ်တဖၣ်အံၤအထိးနါ(အမၠး)တအိၣ်တ့ၢ်လၢအ၀ဲသ့ၣ်အဂီၢ်လၢၤဘၣ်ဒီးကျိၣ်စ့တၢ်ဟဲနုာ်လီၤစှၤ၀ဲအဂ့ၢ်န့ၣ်လီၢ်က၀ီၤကမျၢၢ်လၢအမၤကၤသဲးသၣ်တဂၤစံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“ပတၦ့ၤသဲးဒီဖျၢၣ်လၢာ်ဘၣ်ႉပဘၣ်စိာ်နးလီၤဘှံးဒိၣ်မးႉမ့၀ံၤသဲးဃ့တပီၢ်န့ၣ်ပဆါန့ၢ်ထဲ(၄၅၀၀)ကၠးလီၤႉမ့မ့ၢ်တၢ်ခိတၢ်သွဲဒုအါန့ၢ်အပူၤကွံာ်ဒံးမီၤနီၤႉသဲးသၣ်တဖၣ်န့ၣ်ပဘၣ်ဆှၢအီၤလၢ၀့ၢ်ပူၤအဃိကျဲဒီတဘိန့ၣ်အိၣ်ဒီးပယီၤသုးတြဲၤမီၤနီၤႉအ၀ဲသ့ၣ်ထၢ၀ဲ(တကလး)ဆူဖီခိၣ်လီၤႉသိလ့ၣ်တခိၣ်န့ၣ်အထိးနါ(အမၠး)တအိၣ်တ့ၢ်လၢၤဘၣ်ႉမ့၀ံၤဟီၣ်က၀ီၤပူၤနါက့တၢ်အိၣ်သးတဂ့ၤအါအါဘၣ်ႉကျိၣ်စ့တၢ်ဟဲနုာ်လီၤစှၤ၀ဲမီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

ၦၤလၢအမၤကၤသဲးသၣ်ဃ့တဖၣ်စ့ၢ်ကီးတၢ်ကီတၢ်ခဲအိၣ်အါမးလၢကလဲၤစိာ်ဆါသဲးသၣ်ဆူ၀့ၢ်ပူၤတၢ်ဆါတၢ်ၦ့ၤလီၢ်ဖးဒိၣ်အံၤဒီးကလဲၤလၢကျဲအဂီၢ်စ့ၢ်ကီးဘၣ်ကွဲး၀ဲလံာ်အုၣ်သးဒီဒူၣ်ညါအဂ့ၢ်န့ၣ် ၦၤမၤကၤသဲးသၣ်ဖိတဂၤစံး၀ဲဒ်အံၤ န့ၣ်လီၤႉ

“ကျဲပူၤခီဒၢးၦၤထၢတၢ်ခိတၢ်သွဲတကးဒံးဘၣ်သဲးသၣ်ခီန့ၣ်ဘၣ်လဲၤစိာ်ဆါလၢ၀့ၢ်ပူၤညါအဃိ(ပွဲရံု)နါက့ကဆှၢထီၣ်လၢ၀့ၢ်တကူၣ်အဂီၢ်န့ၣ်တၢ်ကီတၢ်ခဲအိၣ်စ့ၢ်မီၤနီၤႉကလဲၤအဂီၢ်န့ၣ်လိၣ်၀ဲဒၣ်လံာ်လဲၢ်ဒီဒူၣ်ညါႉမ့၀ံၤလံာ်လဲၢ်လၢအဂၤကဘၣ်ပၣ်ဒံးႉကဆါတၢ်တဘျီဘျီန့ၣ်တၢ်မၤဘံဘူဒိၣ်မး” အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ

ဒ်န့ၣ်အသိးလၢကညီကီၢ်စဲၣ်(ကီးတရံး)ကီၢ်ဆၣ် ကလံၤထံးဒူသ၀ီတဖၣ်အပူၤစ့ၢ်ကီး တနံၣ်အံၤၦၤမၤကၤသဲးသၣ်ဖိတဖၣ်လီၤစှၤ၀ဲအဂ့ၢ်န့ၣ် လီၢ်က၀ီၤၦၤဟ့ၣ်တၢ်ကစီၣ်ဖိစံး၀ဲအသိးသ့ၣ်ညါဘၣ်န့ၣ်လီၤႉ