လါယူၤလံ ၂၂ သီ, ၂၀၂၆ နံၣ်, ခ့ၣ်အဲးစံၣ်
လၢကလဲၤထီၣ်ဆူခ့ၣ်အဲယူၣ်-ကညီဒီကလုၥ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅) ဖၣ်ပူၣ်ဟီၣ်ကဝီၤပူၤအံၤအဂီၢ် ပယီၤသုးကျိၤ လၢအဟဲထီၣ်တဖၣ်အံၤ ထီၣ်ဂၢၢ်အသးဖဲကတၢတံၥ် ဖယါကိ(ဘုရားကုန်း)တၢ်လီၢ်ဒီး တၢ်ဒုးစ့ၢ်ကီးကဲထီၣ်ကိးမုၢ်နံၤဒဲးဃၣ်ဃၣ် အဃိ ပယီၤသုးသဂၢၢ်ဘၣ်ဝဲတၢ်သံတၢ်ဘၣ်ဒိဘၣ်ထံးအိၣ်ထီၣ်ဝဲတပယူၥ်ဃီအဂ့ၢ်န့ၣ် သ့ၣ်ညါဘၣ်လၢ(KNLA)ပှၤဘၣ်မူ ဘၣ်ဒါ အအိၣ်န့ၣ်လီၤ.
လၢကမၤမိၢ်ဝ့ၢ်အံၤတဆီ ပယီၤသုးကျိၤလၢအဟဲထီၣ်တဖၣ်အံၤ ဟဲထီၣ်အိၣ် ဝဲဖဲကတၢတံၥ်ဆၢခိၣ် ဖယါကိဟီၣ်ကဝီၤ အခိၣ် အဃၢၤန့ၣ်တၢ်ဆၢကတီၢ်ထီၣ်ဘးဝဲလၢတလါဃၣ်ဃၣ်လံဘၣ်ဆၣ် ခီဖျိဘၣ်တၢ်အိၣ်ခိးခးလီၤအဝဲသ့ၣ်လၢဟီၣ်ကဝီၤကညီဒီ ကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ်အဃိ ပယီၤသုးအံၤဆဲးထီၣ်ဝဲဆူညါတန့ၢ်အိၣ်ထီၣ်ဂၢၢ်အသးဒံးဖဲန့ၣ် တုၤလၢခဲအံၤ န့ၣ်လီၤ.
(သုးက့ ၅)ပှၤကတိၤတၢ်ပၢ ပဒိၣ်စီၤထိၣ်ရီၤဘ့ၤ စံးဝဲလၢ “ပယီၤသုးန့ၣ်ဆီလီၤသးတတီၤဘၣ်တတီၤစးထီၣ်လၢကမၤမိၢ် တုၤဃီၤ လၢ အတုၤတၢ်လီၢ်ခဲအံၤဖယါကိ ဘၢၣ်စၢၤန့ၣ် ဒီတကျိၤညါလီၤ. ဘၣ်ဆၣ်ပှၤခး အဝဲသ့ၣ်လၢတၢ်ဒ့ၣ်စၢၤအိၣ်မၢ်မၢ်လီၤ. ဒုၣ်ဒါ အတၢ်အိၣ်သးန့ၣ်ဖးနးလံ. တိဝဲကိးမုၢ်နံၤတိဝဲတန့ၢ်ဘၣ်,တၢ်ဒုးစ့ၢ်ကီးကဲထီၣ်ကိးမုၢ် မုၢ်ဒဲးလီၤ. အဃိန့ၣ်အတၢ်သံ တၢ်ဘၣ်ဒိ ဘၣ်ထံးဒု တအိၣ်တတီၤ,အိၣ်တတီၤလီၤ.တၢ်မၢၤအတၢ်ဘၣ်ဒိဘၣ်ထံးအါန့ၢ်အီၤ လၢကတၢတံၥ်ဆၢခိၣ် ဖယါကိတၢ်လီၢ်ခဲအံၤ န့ၣ်လီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤန့ၣ်လီၤ.
လီၤဆီဒၣ်တၢ်ဖဲအပူၤကွံၥ်တလါအံၤလါယူၤလံ ၁၆ သီတုၤ ၁၉ သီ လၢတၢ်ဒုးကဲထီၣ်(၄)သီအတီၢ်ပူၤအံၤန့ၣ် ပယီၤသုး တကပၤ သံဘၣ်ဒိဘၣ်ထံးအိၣ်ဝဲဒီး ဘၣ်ဃးတၢ်သံတၢ်ဘၣ်ဒိဘၣ်ထံးအနီၣ်ဂံၢ်နီၣ်ဒွးန့ၣ်တၢ်မၤလီၤတံၢ်ဝဲမ့တန့ၢ်ဘၣ်ဆၣ် လီၤတံၢ်တခါလၢ ဘၣ်ဒိဘၣ်ထံးအကျါပၣ်ဃုၥ်ဝဲသုးရ့ၣ်ခိၣ်(၁)ဂၤဒီးသုးဒ့ခိၣ်(၄)ဂၤ ပၥ်ဖှိၣ်ခဲလၢၥ်(၅)ဂၤအဂ့ၢ်န့ၣ် (သုးက့ ၅)ပှၤဘၣ်မူ ဘၣ်ဒါ စံးဝဲန့ၣ် လီၤ.
ဒ်တၢ်ပၢၢ်ဆၢကရူၢ်ကရၢလၢအိၣ်ဟီၣ်ကဝီၤပူၤဖဲန့ၣ်တဖၣ်စံးဝဲအသိးန့ၣ် စးထီၣ်လၢလါမ့ၤထီၣ်တၢတနွံတုၤဃီၤ လၢခဲအံၤလၢ (၂)လါဘျဲၣ်တၢ်ဒုးအတီၢ်ပူၤန့ၣ် ပယီၤသုးတကပၤသံဘၣ်ဒိဘၣ်ထံးအနီၣ်ဂံၢ်ကအိၣ်ဝဲလၢ(၁၀၀) ဃၣ်ဃၣ်လံအသိး အပူၤကွံၥ်သံ ဘၣ်ဒိဘၣ်ထံးတဖၣ်အကျါစ့ၢ်ကီးပၣ်ဃုၥ်ဝဲသုးရ့ၣ်ခိၣ်,သုးဒ့ခိၣ်ပတီၢ်သ့ၣ်တဖၣ်အိၣ်ဝဲ အဂ့ၢ်န့ၣ် သ့ၣ်ညါဘၣ်န့ၣ်လီၤ.
ပယီၤသုးအံၤလၢတၢ်ဒုးအပူၤသံဘၣ်ဒိဘၣ်ထံးမ့အါဝဲဒီး ဆဲးထီၣ်ဝဲဆူညါမ့တန့ၢ်ဘၣ်ဘၣ်ဆၣ်သနါက့ ခီဖျိခိၣ်နၢ်တၢ်ဖီ ခိၣ် တၢ်ကလုၢ်အဃိ မ့မ့ၢ်တခီတဂုၤလီၢ်ခံ, ဂုၥ်ကျဲးစၢးလဲၤထီၣ်ဝဲလၢၥ်ဂံၢ်လၢၥ်ဘါအဂ့ၢ်န့ၣ် (သုးက့ ၅) ပှၤကတိၤတၢ်ပၢ ပဒိၣ်စီၤထိၣ်ရီၤဘ့ၤ စံးအါထီၣ်ဝဲန့ၣ်လီၤ.
“အဝဲသ့ၣ်န့ၣ်ခီဖျိလၢခိၣ်နၢ်တၢ်ဖီခိၣ်နဲၣ်လီၤအဃိ ဂုၤလီၢ်ခံတသ့ဘၣ်ဒ်န့ၣ်ဧါ. မ့တမ့ၢ်ဘၣ်ခီ အတၢ်အိၣ်မူန့ၣ် သံဒီး တလီၤတိၢ်, မူဒီးတလီၤဆီဘၣ်ဒ်န့ၣ်ဧါတသ့ၣ်ညါဘၣ်. တိကျဲကိးနံၤဒဲးနါက့တိဝဲတန့ၢ်ဘၣ်. မ့ဘၣ်ဟ့ၣ်အဒိန့ၣ် ဒုၣ်ဒါ အတၢ်ဟဲထီၣ်တဘျီ ညါအံၤန့ၣ် လီၤဂၥ်ဒ်သိးဆၣ်ဖိကီၢ်ဖိ ကျီၢ်,ပနၢ်လၢအအဲၣ်ဒိးနုၥ်လီၤလၢပှၤကရၢၢ်ပူၤဒ်န့ၣ်လီၤ. ခံခါတခါန့ၣ်အဝဲသ့ၣ်ဟဲထီၣ်လၢ ကျဲဒီတကျိၤန့ၣ်မၤအၢမၤသီ,မၤဘၣ်ဒိ ဘၣ်ထံးတၢ်အဃိ ဖျါလၢအဝဲသ့ၣ်ကစၢ်ဒၣ် ဝဲပၥ်ဖျါလီၤ က့ၤအသးလၢအမ့ၢ်သုးတဖုလၢ မၤတရီတပါ,မၤဘၣ်ဒိဘၣ်ထံး, မၤအၢမၤသီတၢ်,မၤနါစိၤတၢ်လီၤ”အဂ့ၢ်န့ၣ် စံးဝဲ န့ၣ်လီၤ.
တကီၢ်ခါခဲအံၤပယီၤသုးကျိၤလၢအဟဲထီၣ်တဖၣ်အံၤ စးထီၣ်လၢကမၤမိၢ်တုၤဃီၤလၢကတၢတံၥ် ကျဲတၢ်ဒ့ၣ်စၢၤ ဒီတဘိန့ၣ် အဝဲသ့ၣ်ရၤလီၤဝဲအသုးအိၣ်ဝဲကတၢၢ်တၢၢ်အသိး တၢ်လီၢ်လၢအဝဲသ့ၣ်နုၥ်လီၤဟံန့ၢ်လီၢ်ကျဲဃုၥ်ဒီးဖယါကိ(ဘုရားကုန်း)အံၤန့ၣ် ဒုးယၤတၢ်ဖ့ၣ်စၢစ့ၢ်ကီးဆဲးကဲထီၣ်ဝဲလၢခံခီခံကပၤအဘၢၣ် စၢၤ အဖၢမုၢ်တုၤလၢခဲအံၤန့ၣ်လီၤ.
