KIC News

လါယူၤလံ ၁ သီ, ၂၀၂၅ နံၣ်, ခ့ၣ်အဲးစံၣ် တလၢၤကီၢ်စဲၣ်-ယ့ကီၢ်ဆၣ်ဟီၣ်ကဝီၤအပူၤပယီၤသုးကလၢၤတဖျၢၣ်လၢအိၣ်(အါယူၣ်တီၤ)သဝီလၢအမ့ၢ်ဝဲ(ခမရ-၃၄၃)သုးကလၢၤလူၢ်အံၤ(ယ့ဘလူ)တၢ်ပၢၢ်ဆၢသုးကရူၢ်ထီၣ်မၤန့ၢ်ကွံၥ်ဝဲဒၣ်ဖဲတနံၤအံၤလါယူၤလံ(၁)သီအနံၤအဂ့ၢ်တၢ်ပၢၢ်ဆၢသုးကရူၢ်အပှၤဘၣ်မူဘၣ်ဒါပၥ်ဂၢၢ်ပၥ်ကျၢၤစံးဝဲဒၣ်န့ၣ်လီၤ. ပယီၤသုးကလၢၤလူၢ်အဝဲအံၤန့ၣ်ဘၣ်တၢ်စးထီၣ်ဒုးအီၤဖဲတနံၤအံၤဂီၤခီ(၅)နၣ်ရံၣ်အဆၢကတီၢ်ဒီးဖဲ(၅း၄၅)မံးနံးအဆၢကတီၢ်န့ၣ်တၢ်ထီၣ်မၤန့ၢ်ကွံၥ်ဝဲဒၣ်အဂ့ၢ်(ယ့ဘလူ)တၢ်ပၢၢ်ဆၢသုးကရူၢ်အပှၤဘၣ်မူဘၣ်ဒါတဂၤစံးဝဲဒၣ်ဒ်အံၤန့ၣ်လီၤ. အဝဲစံးဝဲလၢ "ဖဲတဂီၤညါအံၤလီၤတၢ်နုၥ်လီၤခးဝဲဒၣ်သုးကလၢၤမီၤနီၤ. သုးကီၣ်ကးသုးကလၢၤလူၢ်တဖျၢၣ်လၢအိၣ် (ခမရ-၃၄၃)သုး ဟီၣ်ကဝီၤအပူၤန့ၣ်ပဝဲ(ယ့ဘလူ)သုးကရူၢ်ထီၣ်မၤန့ၢ်ကွံၥ်ဝဲဒၣ်န့ၣ်လီၤ." အဂ့ၢ်စံးဝဲဒၣ်န့ၣ်လီၤ. လၢန့ၣ်အမဲၥ်ညါလၢတၢ်ထီၣ်ဒုးဘျီဝဲအံၤအပူၤန့ၣ်(ယ့ဘလူ)သုးကရူၢ်အပှၤဘၣ်သံကွံၥ်ဝဲဖဲတၢ်ဒုးအပူၤတဂၤအဂ့ၢ်အဝဲစံးအါထီၣ်ဝဲန့ၣ်လီၤ. (ယ့ဘလူ)တၢ်ပၢၢ်ဆၢသုးကရူၢ်အံၤန့ၣ်မ့ၢ်ဝဲဖီၣ်စုကဝဲၤကရူၢ်တဖုလၢအဟူးဂဲၤမၤဝဲဒုးယၤရဲၣ်ကျဲၤဖဲ(တလၢၤကီၢ်စဲၣ်,ယ့ကီၢ်ဆၣ်ဟီၣ်ကဝီၤအပူၤလၢတၢ်ထီဒါပၢၢ်ဆၢဝဲသုးမီၤစိရိၤလၢအဟံးန့ၢ်ဆူၣ်တၢ်စိတၢ်ကမီၤတဖုအံၤဒီးပှၤလၢဘၣ်ထွဲဒီးသုးကီၣ်ကးသ့ၣ်တဖၣ်အဂ့ၢ်သ့ၣ်ညါဘၣ်န့ၣ်လီၤ.

လါယူၤလံ ၁ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢချၢၣ်လွံၢ်ထူၣ်ကီၢ်ရ့ၣ်,မူကီၢ်ဆၣ်ဟီၣ်ကဝီၤအပူၤခီဖျိပယီၤသုးကီၣ်ကးတကပၤ သူဝဲကလံၤကျါကဘီယူၤဟဲခးလီၤစၢၤန့ၢ်ဝဲအပှၤတၢ်မဲၥ်ညါဖိသ့ၣ်တဖၣ်ဖဲ(ဝဲဒီဝဲကၠံ)သဝီပူၤအဃိပှၤသဝီဖိဘၣ်သံ(၁၁)ဂၤ,ဘၣ်ဒိအဂၤ(၄၀)ဘျဲၣ်ဒီးလၢအကျါပှၤလီၢ်အိၣ်ကမှံဖိစ့ၢ်ကီးပၣ်ဃုၥ်ဝဲအဂ့ၢ်မူကီၢ်ဆၣ်ပှၤလီၢ်ကဝီၤဖိစံးဝဲန့ၣ်လီၤ. ဖဲလါယူၤ(၂၉)သီအနံၤန့ၣ်မ့ၢ်လၢလီၢ်ကဝီၤတၢ်ပၢၢ်ဆၢသုးပၥ်ဖှိၣ်နုၥ်လီၤခးဝဲပယီၤသုးကီၣ်ကးအပှၤလၢအအိၣ်ဖဲ(ဝဲဒီဝဲကၠံ)သဝီပူၤသ့ၣ်တဖၣ်အံၤဝံၤအလီၢ်ခံသုးကီၣ်ကးအံၤလၢကလံၤကျါကဘီယူၤတဆီဟဲခးလီၤစၢၤန့ၢ်ဝဲတၢ်အဃိဘၣ်သံဝဲသဝီဖိ(၁၁)ဂၤ,ဘၣ်ဒိနးနးကျံးကျံးဒီးဘၣ်ဒိတဆံးတက့ၢ်အိၣ်ဝဲအဂၤ(၄၀)ဃၣ်ဃၣ်အဂ့ၢ်မူကီၢ်ဆၣ်ပှၤလီၢ်ကဝီၤဖိတဂၤစံးဝဲဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤ. "တၢ်ဒုးန့ၣ်စးထီၣ်ကဲထီၣ်ဖဲ(၂၉)သီအနံၤ,ဂီၤခီ(၂)နၣ်ရံၣ်ဃၣ်ဃၣ်မီၤနီၤ. အဝဲသ့ၣ်မၤဝဲတနၢၤလၢၤဘၣ်ဒီးဃ့ဝဲတၢ်မၤစၢၤ လၢကဘီယူၤဝံၤစးထီၣ်ဟဲကွံၥ်လီၤတၢ်ဖဲန့ၣ်လီၤ. ပှၤဘၣ်ဒိအဒိၣ်အဆံးခဲလၢၥ်န့ၣ်အိၣ်ဝဲအဂၤ(၄၀)ဃၣ်ဃၣ်လီၤ. ပှၤ သံခီန့ၣ်ပန့ၢ်ဘၣ်တၢ်ကစီၣ်လၢအိၣ်ဝဲဒၣ်(၁၁)လံန့ၣ်လီၤ. ဒီးလၢတၢ်ဆါဟံၣ်စ့ၢ်ကီးပှၤဘၣ်ဒိနးနးအိၣ်ဝဲလီၤ. လၢပှၤသံ ကျါန့ၣ်ပပှၤလီၢ်အိၣ်ကမှံဖိပၣ်ဃုၥ်ဝဲန့ၣ်လီၤ." အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. လၢန့ၣ်အမဲၥ်ညါကမျၢၢ်ပှၤသဝီဖိဘၣ်သံဘၣ်ဒိဘၣ်ထံးသ့ၣ်တဖၣ်အကျါပၣ်ဃုၥ်ဝဲပှၤဖိဒံဖိသၣ်,သူၣ်က့သးပှၢ်သ့ၣ်တဖၣ်အသိးပှၤလီၢ်အိၣ်ကမှံဖိလၢဟဲဃ့ၢ်အိၣ်ကဒုအသးဖဲ(ဝဲဒီဝဲကၠံ)သဝီအံၤအပူၤသ့ၣ်တဖၣ်စ့ၢ်ကီးပၣ်ဃုၥ်ဝဲဒၣ်အဂ့ၢ်ပှၤလီၢ်ကဝီၤဖိဝဲန့ၣ်စံးအါထီၣ်ဝဲအသိးသ့ၣ်ညါဘၣ်န့ၣ်လီၤ. ပယီၤသုးကီၣ်ကးသုးကလၢၤတၢ်လီၢ်လၢတၢ်ပၢၢ်ဆၢသုးပၥ်ဖှီၣ်နုၥ်လီၤခးဝဲဒၣ်အံၤအိၣ်ဆီလီၤအသးဖဲသဝီအပူၤဒီးမ့ၢ်ပယီၤသုးကလၢၤတၢ်လီၢ်တဖျၢၣ်လၢမၤတံၥ်တၥ်,မၤကီမၤခဲကမျၢၢ်သ့ၣ်တဖၣ်အသိးသမံသမိးဖီၣ်ကမျၢၢ်ဒီးဃ့အီၣ်ကျိၣ်စ့မၤဝဲဒ်အံၤအဃိဖဲ(၂၉)သီအနံၤဂီၤခီ(၂)နၣ်ရံၣ်အဆၢကတီၢ်န့ၣ်ဘၣ်တၢ်နုၥ်လီၤခးဝဲဒ်အံၤလီၤအဂ့ၢ်သ့ၣ်ညါဘၣ်န့ၣ်လီၤ. ဒ်န့ၣ်အသိးခီဖျိလၢတၢ်ဒုးကဲထီၣ်ဒီးကဘီယူၤဟဲခးလီၤတၢ်ဝံၤအလီၢ်ခံကမျၢၢ်ပှၤသဝီဖိသ့ၣ်တဖၣ်အိၣ်လၢသဝီအပူၤတဘူၣ်လၢၤဘၣ်အဃိလၢကဃ့ၢ်ဟးထီၣ်လၢသဝီပူၤအဂီၢ်ဟးထီၣ်ဝဲတသ့တညီဒံးဘၣ်ဒီးခီဖျိတၢ်ပံးဃၥ်ဝဲကျဲတၢ်လဲၤတၢ်က့ၤအဃိကတီၢ်အံၤဘၣ်အိၣ်လၢပျံၤတၢ်ဖုးပူၤအဂ့ၢ်လီၢ်ကဝီၤဖိလၢအိၣ်ဘူးဖဲန့ၣ်တဂၤစံးဝဲဒၣ်န့ၣ်လီၤ. ဖဲတၢ်နုၥ်လီၤခးဝဲပယီၤသုးကီၣ်ကးဘျီဝဲအံၤအပူၤဒ်ဖၠူ(ပကဖ)တၢ်ပၥ်ဖျါပူၤအသိးန့ၣ်တၢ်ဒုးအံၤယံၥ်ဝဲ(၅)နၣ်ရံၣ်ဃၣ်ဃၣ်အတီၢ်ပူၤဒီးပယီၤသုးကီၣ်ကးတကပၤအပှၤသံတစှၤန့ၢ်အဂၤ(၁၀)ဘၣ်အသိးလၢတၢ်ပၢၢ်ဆၢသုးပၥ်ဖှိၣ်တကပၤဘၣ်သံ(၁)ဂၤဒီးဘၣ်ဒိ(၁)တဂၤအဂ့ၢ်ဖၠူ(ပကဖ)ပၥ်ဖျါစ့ၢ်ကီးဝဲန့ၣ်လီၤ.

လါယူၤလံ ၁သီ, ၂၀၂၅နံၣ်, ခ့ၣ်အဲးစံၣ်, တလါအံၤလါယူၤလံဒီတလါအတီၢ်ပူၤဒ်အလီၤဘၣ်ဝဲကီၢ်သူလ့ၤတၢ်သူၣ်သ့ၣ်မုၢ်နံၤအသိးန့ၣ်,တနံၤအံၤလါယူၤလံထီၣ်(၁)သီအနံၤအပူၤခ့ၣ်အဲၣ်ယူၣ်ဖၣ်အၣ်ကီၢ်ရ့ၣ်သ့ၣ်ပှၢ်ဝဲၤကျိၤတီခိၣ်ရိၢ်မဲမၤဝဲတၢ်သူၣ်သ့ၣ်အတၢ်ရဲၣ်တၢ်ကျဲၤတခါဖဲသုးက့(၇)ဖၣ်အၣ်ကီၢ်ရ့ၣ်လူၢ်ပျဲၢ်ကီၢ်ဆၣ်,ကွံလီၤဖျိသဝီကရူၢ်(ကွံလီၤဖျိသဝီသီတီၤဖုၣ်ကၠိကရၢၢ်)အပူၤန့ၣ်လီၤ. ဒီးတနံၣ်အံၤကီၢ်သူလ့ၤတၢ်သူၣ်သ့ၣ်မုၢ်နံၤအတၢ်ရဲၣ်တၢ်ကျဲၤအပူၤအတၢ်ကိးသတြီမ့ၢ်ဝဲ“မၤလါထီၣ်က့ၤကစၢၢ်ကလိ,မၤဂ့ၤထီၣ်က့ၤဟီၣ်ခိၣ်ဒီးသူၣ်ထီၣ်က့ၤကီၢ်သူလ့ၤ”အဂ့ၢ်,ခ့ၣ်အဲၣ်ယူၣ်လီၢ်ခၢၣ်သးသ့ၣ်ပှၢ်ဝဲၤကျိၤတၢ်သူၣ်လီၤဝီၤလီၤတၢ်မၤဂုၥ်ထီၣ်ပသီထီၣ်ဝဲၤဒ့မူဒါခိၣ်,စီၤမ့လ်ဒၢၣ်မူစီၤမ့လ်ဒၢၣ်မူလၢပၣ်ဃုၥ်ပၣ်ဂီၢ်ဝဲဖဲတၢ်ရဲၣ်တၢ်ကျဲၤအပူၤတဂၤအံၤစံးဝဲဒ်အံၤန့ၣ်လီၤ. “တနံၣ်ညါအံၤပတၢ်ဂ့ၢ်ခိၣ်တီဒုမ့ၢ်ဝဲမၤလါထီၣ်က့ၤကစၢၢ်ကလိ,မၤဂ့ၤထီၣ်က့ၤဟီၣ်ခိၣ်ဒီးသူၣ်ထီၣ်က့ၤကီၢ်သူလ့ၤန့ၣ်လီၤ.ဘၣ်မနုၤအဃိလဲၣ်ပမ့ကွၢ်ကဒါက့ၤန့ၣ်,ပကသူၣ်ထီၣ်ကီၢ်သူလ့ၤအဂီၢ်န့ၣ်ကဘၣ်ထွဲလိၥ်ဝဲအသးဒီးကစၢၢ်ကလိ,ဟီၣ်ခိၣ်ကပံၥ်လီၤ.ဟီၣ်ခိၣ်ကပံၥ်ကစၢၢ်ကလိမ့တဂ့ၤဘၣ်ဒုပကသူထီၣ်ကီၢ်သူလ့ၤတသ့ဘၣ်,အဃိန့ၣ်,ပကဘၣ်မၤဂ့ၤထီၣ်မၤလါထီၣ်,သူၣ်လီၤက့ၤသ့ၣ်မုၢ်ဝၣ်ဘိဒ်သိး(တၢ်ကသံၣ်ကသုၣ်)သုတကဲထီၣ်တဂ့ၤအဂီၢ်အဂ့ၢ်”စံးဝဲဒၣ်န့ၣ်လီၤ. တနံၤအံၤတၢ်မၤဝဲတၢ်သူၣ်သ့ၣ်ဖဲကွံလီၤဖျိသဝီသီတီၤဖုၣ်ကၠိကရၢၢ်အပူၤလီၢ်ခၢၣ်သးသ့ၣ်ပှၢ်ဝဲၤကျိၤခိၣ်နၢ်,ဖၣ်အၣ်ကီၢ်ရ့ၣ်သ့ၣ်ပှၢ်ဝဲၤကျိၤခိၣ်နၢ်ကရူၢ်ကရၢ,ကၠိသရၣ်သရၣ်မုၣ်,ကၠိဖိဃုၥ်ဒီးဒူသဝီကမျၢၢ်အဂၤ(၇၀)ဃၣ်ဃၣ်ပၥ်ဖှိၣ်သးသူၣ်သကိးဝဲဒၣ်သ့ၣ်အဂ့ၢ်,သ့ၣ်ညါဘၣ်န့ၣ်လီၤ. ခီဖျိတၢ်မၤန့ၢ်ဝဲတၢ်သူၣ်သ့ၣ်အတၢ်ရဲၣ်တၢ်ကျဲၤလၢကၠိဖိဒီးဒူသဝီကမျၢၢ်တဖၣ်အသိးအကျါဒ်အံၤအဖီခိၣ်မ့ၢ်ဝဲတၢ်ကဲဘျူးလၢကၠိဖိတဖၣ်အဂီၢ်ဒီးဒူသဝီဖိတဖၣ်အဂီၢ်အဂ့ၢ်,ကွံလီၤဖျိတီၤဖုၣ်ကၠိသရၣ်မုၣ်နီၢ်မုၣ်စၢ်ဃံစံးဝဲဒၣ်ဒ်အံၤန့ၣ်လီၤ. “တၢ်ရဲၣ်တၢ်ကျဲၤအံၤအဖီခိၣ်တူၢ်ဘၣ်လၢသးခုလီၤ.ဖိသၣ်သ့ၣ်တဖၣ်သ့ၣ်ညါအါထီၣ်ဝဲသ့ၣ်ပှၢ်န့ၣ်မ့ၢ်တၢ်ကဲဘျူးလၢကၠိဒီးဒူသဝီဖိအဂီၢ်တကးဘၣ်,ခီဖျိသူၣ်လီၤဝဲသ့ၣ်တဖၣ်အံၤအဃိလၢခံပဒူသဝီသနၥ်က့သ့ၣ်ထူၣ်ဝၣ်ဘိကအါထီၣ်ဝဲလီၤ”အဂ့ၢ်စံးဝဲဒၣ်န့ၣ်လီၤ. တၢ်ဒုးအိၣ်ထီၣ်ဝဲကီၢ်သူလ့ၤတၢ်သူၣ်သ့ၣ်အမုၢ်နံၤအံၤအတၢ်ပညိၣ်မ့ၢ်ဝဲဒ်သိး,ကီၢ်သူလ့ၤတၢ်ပၢဟီၣ်ကဝီၤအပူၤသ့ၣ်မုၢ်ဝၣ်ဘိကအါထီၣ်,ကမျၢၢ်ဒီးသ့ၣ်ပှၢ်ဝဲၤကျိၤခိၣ်နၢ်တဖၣ်အတၢ်မၤသကိးတၢ်လၢတၢ်ကွၢ်ထွဲကတီၤသ့ၣ်ပှၢ်,တၢ်ဒီသဒၢသ့ၣ်ပှၢ်တၢ်မၤတဖၣ်ပူၤတၢ်ဂုၤထီၣ်ပသီထီၣ်အဂံၢ်ဘါကအါထီၣ်အဂီၢ်,ဒီးပှၤကိးဂၤဒဲးတၢ်အဲၣ်ထံကျိထံကွၥ်,သ့ၣ်မုၢ်ဝၣ်ဘိ,ဆၣ်ဖိကီၢ်ဖိတဖၣ်ကအိၣ်ထီၣ်ကွ့ၢ်ကွ့ၢ်အဂီၢ်အဂ့ၢ်,သ့ၣ်ညါဘၣ်ဒ်သ့ၣ်ပှၢ်ဝဲၤကျိၤခိၣ်နၢ်ပှၤဘၣ်မူဘၣ်ဒါတဖၣ်စံးဝဲဒၣ်အသိးန့ၣ်လီၤ. ဒ်န့ၣ်အသိး,၂၀၁၇)နံၣ်တၢ်စးထီၣ်ပၥ်ပနီၣ်ဝဲကီၢ်သူလ့ၤတၢ်သူၣ်သ့ၣ်အမုၢ်နံၤအလီၢ်ခံကိးနံၣ်ဒဲးတၢ်မၤဝဲတၢ်သူၣ်သ့ၣ်အတၢ်ရဲၣ်တၢ်ကျဲၤအပူၤတၢ်သူၣ်ဝဲသ့ၣ်တဖၣ်အိၣ်ဝဲအကလုၥ်ကလုၥ်ဒီးတနံၣ်အံၤတၢ်မၤဝဲတၢ်သူၣ်သ့ၣ်အတၢ်ရဲၣ်တၢ်ကျဲၤတဖၣ်အံၤပှဲၤထီၣ်ဝဲ(၈)ဝီတဝီလံ,အဂ့ၢ်ပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.

လါယူၤ ၃၀ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ်(သုးက့ ၃)လၢၢ်ဒိၣ်ကီၢ်ဆၣ်အပူၤ ပယီၤသုးမီၤစိရိၤအကဘီ ယူၤလဲၤ တ့ၢ်လီၤကဒီးမ့ၣ်ပိၢ်အဃိ ကမျၢၢ်ဘၣ်ဒိ(၅)ဂၤအကျါပၣ်ဃုၥ်၀ဲဖိသၣ်(၃)ဂၤဒီးဟံၣ်တၢ်သူၣ်ထီၣ်ဟးဂီၤ၀ဲ(၉)ဖျၢၣ်အဂ့ၢ်န့ၣ် ခ့ၣ်အဲၣ်ယူၣ် လီၢ်ခၢၣ်သးတၢ်ကစီၣ်ထုးထီၣ်ပၥ်ဖျါ၀ဲဖဲတနံၤအံၤန့ၣ်လီၤ. ဖဲလါယူၤ ၂၈ သီ မုၢ်ဃ့ၢ်လီၤ ၁း၂၂ မံးနံးအဆၢကတီၢ် လၢဟ့သၤ၀ဲသ၀ီအပူၤခီဖျိသုးမီၤစိရိၤအကဘီယူၤလဲၤတ့ၢ်လီၤမ့ၣ်ပိၢ်အဃိ ဟံၣ်တၢ်သူၣ်ထီၣ်ဟးဂီၤ(၉)ဖျၢၣ်အမဲၥ်ညါ သးစၢ် ကိၤခၠ့ၣ်တိ(၂၂)နံၣ်,နီၢ်ဒီစွ့ၤ(၃၆)နံၣ်, ၀ၤဆိၤအူ(၁၂)နံၣ်,...

လါယူၤ ၃၀ သီ, ၂၀၂၅ နံၣ်, ခ့ၣ်အဲးစံၣ် ကညီကီၢ်စဲၣ်-အၣ်ဖၣ်ဝ့ၢ်ဟီၣ်ကဝီၤအပူၤလၢကဟဲဆူမဲၥ်ညါခံသီအတီၢ်ပူၤအံၤဃိၣ်လိၥ်ကျိထံကဟဲဒိၣ်ထီၣ်ဝဲတုၤလၢ တၢ်ဘၣ်ယိၣ်ပနီၣ်အတၢၣ်သ့ဝဲအဂ့ၢ်မူခိၣ်ကလံၤသီၣ်ဂီၤဝဲၤကျိၤထုးထီၣ်ပၥ်ဖျါဝဲဖဲမဟါလါယူၤ(၂၉)သီအနံၤန့ၣ်လီၤ. ဖၣ်အၣ်ဝ့ၢ်အပူၤအံၤဒ်အပူၤကွံၥ်မဟါလါယူၤအသီ(၃၀)အနံၤတၢ်ထိၣ်ဒွးကွၢ်ဝဲဒၣ်အသိးန့ၣ်ဃိၣ်လိၥ်ကျိထံအံၤကတုၤထီၣ်လၢတၢ်ဘၣ်ယိၣ်ပနီၣ်အတၢၣ်အဂီၢ်လိၣ်တ့ၢ်က့ၤထဲဒၣ်(၂)ပျၢ်ဘျဲၣ်လီၤဘၣ်ဆၣ်လၢကဟဲဆူမဲၥ်ညါခံသီအတီၢ်ပူၤန့ၣ်တုၤထီၣ်ဝဲဒၣ်သ့ဒီးခီဖျိတကီၢ်ခါခဲအံၤမူခိၣ်စူၤအိၣ်ဝဲတပယူၥ်ဃီအဂ့ၢ်လီၢ်ကဝီၤဖိသ့ၣ်တဖၣ်စံးဝဲအသိးသ့ၣ်ညါဘၣ်န့ၣ်လီၤ. ကမျၢၢ်လီၢ်ကဝီၤဖိတဂၤစံးဝဲလၢ "တကီၢ်ခါခဲအံၤန့ၣ်မူခိၣ်စူၤအိၣ်ဝဲခဲအံၤခဲအံၤလီၤ. မူခိၣ်မ့ၢ်စူၤအါထီၣ်န့ၣ်ထံကဒိၣ်ဘျၢ ဝဲဒၣ်သ့န့ၣ်လီၤ. လၢကဝီၤဒ့နီၣ်ဂံၢ်(၂), တၢ်ပၢခိၣ်အလီၢ်ဒီးဖၣ်အၣ်ထံကျိၤကၢၢ်နံၤတကပၤန့ၣ်ဘၣ်ပလီၢ်သးလီၤ." အဂ့ၢ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. လၢတၢ်န့ၣ်အဃိကမျၢၢ်လၢအိၣ်ဖၣ်အၣ်ဝ့ၢ်တၢ်လီၢ်လီၤဖုၣ်,တၢ်ပၢၤခိၣ်ဒီးထံကျိကၢၢ်နံၤကပၤသ့ၣ်တဖၣ်ဒ်သိးကသ့ၣ်ညါဆိဘၣ်ဝဲထံဒိၣ်တၢ်အိၣ်သးကသ့အဂီၢ်ဒီးကသုးဘၣ်လီၢ်သုးဘၣ်ကျဲဆူတၢ်လီၢ်လၢအဘူးဒီးအဝဲသ့ၣ်ကသ့အဂီၢ်အဂ့ၢ်န့ၣ်မူခိၣ်ကလံၤသီၣ်ဂီၤအဝဲၤကျိၤဟ့ၣ်ပလီၢ်စ့ၢ်ကီးဝဲဒၣ်န့ၣ်လီၤ. ဒ်အန့ၣ်အသိးဖဲအပူၤကွံၥ်နံၣ်အတီၢ်ပူၤန့ၣ်ကညီကီၢ်စဲၣ်ဟီၣ်ကဝီၤလၢကီၢ်ဆၣ်(၇)ဘ့ၣ်အပူၤမ့ၢ်လၢမူခိၣ်စူၤတပယူၥ်ဃီအဆၢတတဲၥ်ဘၣ်အဃိကစၢၢ်ထံသ့ၣ်တဖၣ်ဟဲယွၤလီၤ,ထံကျိသ့ၣ်တဖၣ်ဟဲဒိၣ်ထီၣ်ဝဲဒၣ်အဖီခိၣ်ထံလုၢ်ဘၢတၢ်ကဲထီၣ်ဝဲအသးဒီးဝ့ၢ်ပူၤပှၤကမျၢၢ်(၁၅,၀၀၀)ဃၣ်ဃၣ်ဘၣ်တူၢ်ဘၣ်ဝဲထံလုၢ်ဘၢတၢ်အဂ့ၢ်သ့ၣ်ညါဘၣ်န့ၣ်လီၤ.

မဲၥ်ချံမ့တထံၣ်တၢ်ဘၣ်ဆၣ်အိၣ်ဒီးအကလုၢ်ဖိလၢမၤမုၥ်ပှၤသးလၢအမ့ၢ်“စီၤခုၣ်ဆှံ” လါယူၤ ၂၉ သီ, ၂၀၂၅ နံၣ်, ခ့ၣ်အဲးစံၣ် ကညီပှၤသး၀ံၣ်တၢ်ဖိ စီၤခုၣ်ဆှံ အံၤတဘျီအခါတၢ်သး၀ံၣ်လၢအထုးထီၣ်၀ဲတဖၣ်လၢကီၢ်ပယီၤ,ထံဆၢကီၢ်ဆၢ တၢ်လီၢ်တဖၣ်ပှၤသူၣ်ဘီၣ်သးစၢ်မုၢ်ကနီၤဖိၣ်သၣ်ခွါလၢၥ်ဃုၥ်တုၤလၢပှၤသူၣ်က့သးပှၢ်, ပှၤအိၣ်ဒီးဟံၣ်ဖိဃီဖိတဖၣ်ဘၣ်သူၣ် ဘၣ်သး၀ဲအတၢ်သး၀ံၣ်တဖၣ်န့ၣ်လီၤ. စီၤခုၣ်ဆှံအိၣ်ဒီးအကလုၢ်ဖိလၢအမုၥ်ထုးန့ၢ်ပှၤအသူၣ်အသးလီၤသယုၢ်သညိဒီးလၢန့ၣ်အမဲၥ်ညါတၢ်သး၀ံၣ်လၢအသး၀ံၣ်၀ဲတဖၣ်န့ၣ်အနီၢ်ကစၢ်ဒၣ်၀ဲဒ့၀ဲလၢအစုန့ၣ်လီၤ. ဖဲအတၢ်သး၀ံၣ်စိၤခါဆၢကတီၢ်န့ၣ် လၢတၢ်ဘူၣ်တၢ်ဘါအကျါမ့ၢ်ဂ့ၤ,လၢပှၤဒိးတ့ဒိးဖျီသး အခါမ့ၢ်ဂ့ၤ, လၢဘူၣ်ပူၤပွဲပူၤ အကျါတခါ ဂ့ၤတခါဂ့ၤန့ၣ် တၢ်အိးထီၣ်ကနၣ်၀ဲစီၤခုၣ်ဆှံအတၢ်သး၀ံၣ်အခွ့ၢ်တဖၣ်ဒီး လီၤဆီဒၣ်တၢ်မ့မ့ၢ်ပှၤအိၣ်လၢသုးက့(၁)ပူၤ တဖၣ်န့ၣ် တသ့ၣ်ညါအ၀ဲဘၣ်န့ၣ်ကအိၣ်လၢအစှၤလီၤ. စီၤခုၣ်ဆှံ အံၤအိၣ်၀ဲဒၣ်လၢဒူသထူၣ်ကီၢ်ရ့ၣ်(သုးက့ ၁)ဘံလ့ကီၢ်ဆၣ်ထံဆံၣ်ဘီသ၀ီအပူၤဒီး အပုၢ်အ၀ဲၢ်တအိၣ် မ့ၢ်ပှၤအိၣ်ဒၣ်ထဲတဂၤဧိၤန့ၣ်လီၤ....

လါယူၤ ၂၈ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ဘျံးဒဝဲၢ်ကီၢ်ရ့ၣ်, ကစၢၢ်ဒိၣ်ကီၢ်ဆၣ် ဖဲအပူၤကွံၥ်လါယူၤ(၂၆)သီအနံၤန့ၣ်က ညီဒီကလုၥ်တၢ်ထူၣ်ဖျဲးသုးမုၢ်ဒိၣ်သုးရ့ၣ်(၁၂),အသုးဒ့(၂)ဒီးတၢ်ပၢၢ်ဆၢသုးပၥ်ဖှိၣ်နုၥ်လီၤခးဝဲပယီၤသုးတၢ်လီၢ်ဖဲ(မ့ဒး)သဝီသီခါဖၠၣ်ကရၢၢ်အပူၤဝံၤဒိၣ်စိန့ၢ်က့ၤဝဲတၢ်လီၢ်အဂ့ၢ်ခ့ၣ်အဲၣ်ယူၣ်-ဘျံးဒဝဲၢ်ကီၢ်ရ့ၣ်ထုးထီၣ်ပၥ်ဖျါဝဲဒၣ်န့ၣ်လီၤ. ပယီၤသုးလၢအဟဲအိၣ်ဆီလီၤပၥ်လီၤအတၢ်လီၢ်တၢ်ကျဲဖဲ(မ့ဒး)သဝီသီခါဖၠၣ်ကရၢၢ်အပူၤသ့ၣ်တဖၣ်အံၤဖဲလါယူၤ(၂၆)သီ, မုၢ်ဃ့ၢ်လီၤ(၁)နၣ်ရံၣ်အဆၢကတီၢ်(KNLA)ဒီးတၢ်ပၢၢ်ဆၢသုးပၥ်ဖှိၣ်စးထီၣ်နုၥ်လီၤခးဝဲဒၣ်ဒီးဖဲမုၢ်ဃ့ၢ်လီၤ(၃)နၣ်ရံၣ် အဆၢကတီၢ်တၢ်ထီၣ်ဒိၣ်စိန့ၢ်က့ၤဝဲတၢ်လီၢ်အံၤအဂ့ၢ်(KNLA)သုးရ့ၣ်(၁၂)အသုးရ့ၣ်ခိၣ်သုးခိၣ်ဒိၣ်ဂီၢ်ဂ့ၢ်စီၤဒါဒါစံးဝဲဒ်အံၤန့ၣ်လီၤ. "ဖဲ(၂၆)သီန့ၣ်ပပှၤနုၥ်လီၤခးဝဲဒၣ်မီၤနီၤ. ပပှၤနုၥ်လီၤခးဝဲဒၣ်ဒီးဒုၣ်ဒါန့ၣ်ဘၣ်ဒိဘၣ်ထံးအါဝဲအဃိဂုၥ်လီၤက့ၤအခံန့ၣ် လီၤ. မ့မ့ၢ်လၢတၢ်ဒုးန့ၣ်တၢ်ဆၢကတီၢ်ယံၥ်ဝဲ(၂)နၣ်ရံၣ်လီၤ. ပယီၤသုးန့ၣ်က့ၤဂုၥ်လီၤက့ၤအခံဖဲအသုးကလၢၤ(ဝ့ဝး)အ ပူၤန့ၣ်လီၤ. အဝဲသ့ၣ်န့ၣ်ကဟဲထီၣ်ဒိၣ်စိဟီၣ်ကဝီၤဒီးကဟဲဆ့ၣ်နီၤဝဲဒၣ်မီၤနီၤ. မ့ၢ်လၢပပှၤခးဝဲအဃိဂုၥ်က့ၤဝဲအခံလီၤ." အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. ဖဲတၢ်နုၥ်လီၤခးဝဲပယီၤသုးလၢအိၣ်ဆီလီၤအသးဖဲ(မ့ဒး)သဝီအပူၤအဆၢကတီၢ်ပယီၤသုးအပှၤသ့ၣ်တဖၣ်ဂုၥ်လီၤက့ၤအခံဆူ(ဝ့ဝၣ်)သုးကလၢၤအပူၤန့ၣ်လီၤ. တၢ်ဒုးဘျီဝဲအံၤအပူၤန့ၣ်ပယီၤသုးကီၣ်ကးအပှၤသံ(၅)ဂၤအသိးတၢ်မၤန့ၢ်ဃုၥ်...

လါယူၤ ၂၇ သီ, ၂၀၂၅ နံၣ်, ခ့ၣ်အဲးစံၣ် ကသံၣ်မူၤဘှီးလၢအလုၢ်အပှ့ၤလီၤလၢ၀ဲစ့ပယီၤအကကွဲၢ်(၁၀)လၢတၢ်ဖီၣ်န့ၢ်၀ဲဖဲကညီကီၢ်စဲၣ် မၠၣ်၀တံၣ်ဒီး စွ့ၤကိၣ်ကိၤဟီၣ်က၀ီၤ ပူၤတဖၣ် ဖဲမဟါလါယူၤ ၂၆ သီအနံၤ လၢအလီၤဘၣ်၀ဲဟီၣ်ခိၣ်ဒီဘ့ၣ်တၢ်ထီဒါတၢ်မူၤတၢ်ဘှီးမုၢ်နံၤအံၤန့ၣ် ကညီသုးခိးကီၢ်ဆၢ (BGF)ဒွဲၣ်အူအီၣ်မၤဟးဂီၤကွံၥ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤ. မၠၣ်၀တံၣ်,စွ့ၤကိၣ်ကိၤဟီၣ်က၀ီၤလၢတနံၣ်အတီၢ်ပူၤ ကသံၣ်မူၤဘှီးလၢအမ့ၢ်ညါဖီ,(ICE),ကသံၣ်ကသ့ၣ်,ပံၤသူ,ပံၤ၀ါဃုၥ်ဒီး ကသံၣ် မူၤဘှီးအဂၤလၢ(BGF)ဖီၣ်န့ၢ်၀ဲတဖၣ်အံၤ (BGF)ပှၤဘၣ်မူဘၣ်ဒါတဂၤတီခိၣ်ရိၣ်ဒွဲၣ်အူအီၣ်မၤဟးဂီၤကွံၥ်၀ဲခဲလၢၥ်အဂ့ၢ်န့ၣ် ပှၤလၢဘူးဒီး(BGF)တဖၣ်စံး၀ဲန့ၣ်လီၤ. ကသံၣ်မူၤဘှီးလၢအမၤဟးဂီၤ၀ဲကညီဖိအတၢ်အိၣ်မူခါဆူညါအဂီၢ်သ့ၣ်တဖၣ်အံၤဒီးပတီၢ်ထီကသံၣ်မူၤဘှီးလၢအဟဲထီၣ်သီ သ့ၣ်တဖၣ်အံၤ...

လါယူၤ ၂၇ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ချၢၣ်လွံၢ်ထူၣ်ကီၢ်ရ့ၣ်, ဖဲလၢၢ်ဒိၣ်ကီၢ်ဆၣ်ဟီၣ်ကဝီၤအပူၤဖဲအပူၤကွံၥ်လါယူၤ(၂၅)သီအနံၤန့ၣ်ကညီဒီက လုၥ်တၢ်ထူၣ်ဖျဲးသုးမုၢ်ဒိၣ်သုးက့နီၣ်ဂံၢ်(၃)ဒီးတၢ်ပၢၢ်ဆၢသုးပၥ်ဖှိၣ်ထီၣ်မၤန့ၢ်ကွံၥ်ဝဲပယီၤသုးကလၢၤသ့ၣ်တဖၣ်အဆၢကတီၢ်တၢ်ဖီၣ်ချုးန့ၢ်ဝဲပယီၤသုးအပှၤ(၂၂)ဂၤအဂ့ၢ်ချၢၣ်လွံၢ်ထူၣ်ကီၢ်ရ့ၣ်ပှၤဘၣ်မူဘၣ်ဒါစံးဘၣ်ခ့ၣ်အဲးစံၣ်-ကညီတၢ်က စီၣ်န့ၣ်လီၤ. ဖဲလါယူၤ(၂၅)သီအနံၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်သုးရ့ၣ်(၈),(၉)ဒီးတၢ်ပၢၢ်ဆၢသုးပၥ်ဖှိၣ်ထီၣ်မၤန့ၢ်ဝဲပယီၤသုးကလၢၤ(ပယါဆ့ၣ်ကိ, တီၤဝ့ၤ, သထ့ကိ, တီၤစူၣ်)သ့ၣ်တဖၣ်အံၤအတီၢ်ပူၤန့ၣ်တၢ်ဖီၣ်ချုးန့ၢ်ဝဲပယီၤသုးအပှၤ(၂၂)ဂၤဒီး တၢ်ထံၣ်န့ၢ်စ့ၢ်ကီးဝဲပယီၤသုးအစိၢ်(၇)စိၢ်ဖဲသုးကလၢၤအပူၤအဂ့ၢ်ချၢၣ်လွံၢ်ထူၣ်ကီၢ်ရ့ၣ်နဲၣ်ရွဲၣ်သဃဲၤပဒိၣ်စီၤနဲၣ်ထူဘၠဲစံးဝဲဒၣ်န့ၣ်လီၤ. "လၢတၢ်ဒုးတဘျီအံၤအပူၤန့ၣ်ဒုၣ်ဒါသံပှၤထံၣ်န့ၢ်ဝဲန့ၣ်(၇)ဂၤဒီးပှၤဖီၣ်န့ၢ်ဝဲန့ၣ်(၂၂)ဂၤန့ၣ်လီၤ. ဒီးတၢ်မၤန့ၢ်ဝဲတၢ်ကစုကဝဲၤ ကျိဒိၣ်,ကျိဆံးခဲလၢၥ်န့ၣ်(၂၈)ခိၣ်န့ၣ်လီၤ. " အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. လၢန့ၣ်အမဲၥ်ညါတၢ်သ့ၣ်ညါဘၣ်စ့ၢ်ကီးလၢပယီၤသုးကီၣ်ကးအံၤဖဲတၢ်ထီၣ်ဒုးဘျီဝဲအံၤပူၤအဆၢကတီၢ်မ့ၢ်လၢတၢ်သံတၢ်ဘၣ်ဒိအိၣ်အါဝဲအဃိထုးလီၤကွံၥ်ဝဲအသးဒီးဃ့ၢ်ဖျိးထီၣ်ကွံၥ်ဝဲဒၣ်အဂ့ၢ်သ့ၣ်ညါဘၣ်စ့ၢ်ကီးလၢကလံၤထံးသုးဟီၣ်ကဝီၤနီၣ်ဂံၢ်(၂)သုးဒ့ဟီၣ်ကဝီၤတၢ်ပၥ်ဖျါပူၤအသိးန့ၣ်လီၤ. ဒ်တၢ်ပၢၢ်ဆၢသုးကရူၢ်ပၥ်ဖျါဝဲဒၣ်အသိးန့ၣ်ပယီၤသုးလၢတၢ်ဖီၣ်ချုးန့ၢ်ဝဲသ့ၣ်တဖၣ်အံၤဒ်ပှၤသုးဖိလၢတၢ်ဖီၣ်ချုးန့ၢ်အီၤသ့ၣ်တဖၣ်အတၢ်ဘျၢအိၣ်ဝဲအသိးန့ၣ်တၢ်အံးထွဲကွၢ်ထွဲကဟုကယၥ်အဝဲသ့ၣ်အဂ့ၢ်ပၥ်ဖျါဝဲဒၣ်န့ၣ်လီၤ. ဒ်န့ၣ်အသိးဖဲတၢ်နုၥ်လီၤထီၣ်ခးပယီၤသုးကလၢၤဘျီဝဲအံၤအပူၤန့ၣ်တၢ်မၤန့ၢ်ဃုၥ်ဝဲပယီၤသုးကျိဒိၣ်ကျိဆံးခဲလၢၥ်(၂၈)ခိၣ်ဒီးကျိချံပှၥ်သၣ်,သုးတၢ်ပီးတၢ်လီသ့ၣ်တဖၣ်အါအါဂီၢ်ဂီၢ်အဂ့ၢ်ချၢၣ်လွံၢ်ထူၣ်ကီၢ်ရ့ၣ်နဲၣ်ရွဲၣ်သဃဲၤပဒိၣ်စီၤနဲၣ်ထူဘၠဲစံးအါထီၣ်ဝဲအသိးသ့ၣ်ညါဘၣ်န့ၣ်လီၤ.

လါယူၤ ၂၆ သီ, ၂၀၂၅ နံၣ်, ခ့ၣ်အဲးစံၣ် လီၢ်က၀ီၤကမျၢၢ်ပှၤဃ့ၢ်မှံဟးဖျိးလၢအိၣ်ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်အပူၤ တဖၣ်အပူၤကွံၥ်နွံအခါန့ၣ် ခီဖျိတၢ်စူၤလၢထံတကဆှီဘၣ်အံၤအဃိအ၀ဲသ့ၣ်သဂၢၢ်ဘၣ်၀ဲတၢ်ဘ့ၣ်သးဒီးတၢ်လိၤကိၢ်တၢ်ဆါအဂ့ၢ်န့ၣ် သ့ၣ်ညါဘၣ်လၢကီၢ်ရ့ၣ်ပှၤဘၣ်မူဘၣ်ဒါန့ၣ်လီၤ. ကၠဲးထိၣ်ကီၢ်ဆၣ် ၀ီၢ်က့ကရူၢ်ဒီးခရၢၢ်ကရူၢ်ပူၤကမျၢၢ်တဖၣ်အံၤအပူၤကွံၥ်လါမ့ၤ ၁၀ ဘျဲၣ်အခါ ခီဖျိကျိဖးဒိၣ်,ကဘီယူၤအမဲၥ်ညါ ပယီၤသုးကျိၤနုၥ်လီၤဟူးဂဲၤအဃိ သ၀ီဖိခဲလၢၥ်ဃၣ်ဃၣ်ဘၣ်ဃ့ၢ်ထီၣ်၀ဲဒီးတနီၤန့ၣ်လဲၤစံၣ်အိၣ်၀ဲခူပူၤ၀့ၢ်ပူၤအိၣ်အသိးတနီၤန့ၣ် လဲၤစံၣ်အိၣ်၀ဲလၢပှၢ်ပူၤခိခိၣ်ပှၢ်လၢ်ကျါန့ၣ်လီၤ. တကီၢ်ခါခဲအံၤခီဖျိတၢ်စူၤခါအဖီခိၣ် လီၤဆီဒၣ်တၢ်ကမျၢၢ်လၢအလဲၤစံၣ်အိၣ်လၢကစၢ်ခိၣ်ကလိကျါတဖၣ် သဂၢၢ်ဘၣ်၀ဲ တၢ်ဘ့ၣ်သးကုသးတၢ်ဆါဘၣ်ဟဲကဲထီၣ်၀ဲဒ်အံၤလီၤအဂ့ၢ်န့ၣ် ကီၢ်ရ့ၣ်နဲၣ်ရွဲၣ် ပှၤကတိၤတၢ်ပၢ ပဒိၣ်စီၤအ့နဲၤ...