လါယူၤ ၂ သီ, ၂၀၂၆ နံၣ်, ခ့ၣ်အဲးစံၣ်
လၢခ့ၣ်အဲၣ်ယူၣ် (သုးက့ ၅)ဟီၣ်ကဝီၤ ဖၣ်ပူၣ်ဒုးယၤသုးကလၢၤဒီး (သုးက့ ၆)ဟီၣ်ကဝီၤ ဂီၤလ့ၤဒုးယၤသုးကလၢၤန့ၣ် စးထီၣ် ဖဲတဂီၤအံၤတၢ်ဒုးက့ၤဆူၣ်ထီၣ်ကဒါဝဲဒိၣ်ဒိၣ်မုၢ်မုၢ်ဒီး ပယီၤသုးအံၤသုတဘၣ်ဟ့ၣ်ဆှူကွံၥ်သုးကလၢၤအံၤတဂ့ၤအဂီၢ် ခီၣ်ဆၢ ဒီသဒၢအသး သူဝဲဒၣ်ဒြိ,ကျိဖးဒိၣ်,ကဘီယူၤဟဲခးလီၤဝဲတၢ်အဆၢတတဲၥ်ဝဲဘၣ်အဂ့ၢ်န့ၣ် သ့ၣ်ညါဘၣ်လၢဂံၢ်ခီၣ်ထံး ပှၤဟ့ၣ် တၢ်ကစီၣ်ဖိအအိၣ်န့ၣ်လီၤ.
ဖဲတနံၤအံၤလါယူၤ ၂ သီ ဂီၤခီဂီၤဂီၤအဆၢကတီၢ်န့ၣ် လၢကထီၣ်မၤန့ၢ်ဝဲဂီၤလ့ၤသုးကလၢၤအံၤအဂီၢ် ဟီၣ်ကဝီၤ(KNLA) သုးပၥ်ဖှိၣ်ထီၣ်သဖှိခးဝဲအဃိ တၢ်ဒုးကဲထီၣ်ဝဲလၢခံခီခံကပၤအဘၢၣ်စၢၤဒိၣ်ဒိၣ်မုၢ်မုၢ်ဒီး လၢတၢ်ဒုးဘျီဝဲအံၤအပူၤ တၢ်ပၢၢ်ဆၢ သုးပၥ်ဖှိၣ်ကရူၢ်တကပၤ တၢ်ဘၣ်ဒိဘၣ်ထံးအိၣ်ဝဲအဂ့ၢ်န့ၣ် ပှၤလၢအဘူးဒီးတၢ်ပၢၢ်ဆၢသုးကရူၢ်တဂၤ စံးဝဲန့ၣ်လီၤ.
“ဂီၤလ့ၤသုးကလၢၤန့ၣ်ပှၤစးထီၣ်က့ၤထီၣ်ကဒါအီၤဖဲတဂီၤအံၤဂီၤခီ ၄ နၣ်ရံၣ်ခိၣ်ဃၢၤန့ၣ်လီၤ.ပနၢ်ဟူလၢတနံၤအံၤပှၤကထီၣ် တုၤအန့ၢ်လီၤ.ပယီၤသုးတကပၤနါက့သုးကလၢၤအံၤသုတလီၤတဂ့ၤအဂီၢ်န့ၣ် လၢ(၂၇၅)အံၤတဆီန့ၣ် ပယီၤသုးပျၢ်လီၤဝဲ...
လါယူၤ ၂ သီ, ၂၀၂၆ နံၣ်, ခ့ၣ်အဲးစံၣ်
ဖဲအပူၤကွံၥ်စးထီၣ်လၢလါမးရှးတုၤလၢလါမ့ၤလၢၥ်လၢ(၃)လါအတီၢ်ပူၤ လီၢ်ခၢၣ်သးကညီသးစၢ်ကရၢ(KYO)တီခိၣ်ရိၣ်မဲ အိးထီၣ်ဝဲ တၢ်ကိၢ်ခါသးစၢ်တၢ်မၤလိ()ဝံၤ ဖဲလါမ့ၤလၢၥ်အံၤန့ၣ်တၢ်မၤလိအံၤဝံၤဝဲဒၣ်အဂ့ၢ်န့ၣ် ထုးထီၣ်ပၥ်ဖျါဝဲဖဲတနံၤအံၤလါယူၤ ၂ သီအံၤ န့ၣ်လီၤ.
တၢ်ကိၢ်ခါသးစၢ်တၢ်မၤလိလၢ(Summer Youth Camp)လၢတၢ်အိးထီၣ်ဝဲဒၣ်ဘျီဝဲအံၤန့ၣ် ဘၣ်တၢ်မၤအီၤတဘျီဃီ လၢ ဒူသထူၣ်ကီၢ်ရ့ၣ်(သုးက့ ၁), ချၢၣ်လွံၢ်ထူၣ်ကီၢ်ရ့ၣ် (သုးက့ ၃),ဘျံးဒဝဲၢ်ကီၢ်ရ့ၣ်(သုးက့ ၄), ဒူပျၥ်ယၥ်ကီၢ်ရ့ၣ်(သုးက့ ၆)ဒီး ဖၣ်အၣ်ကီၢ်ရ့ၣ်(သုးက့ ၇)ဟီၣ်ကဝီၤ သ့ၣ်တဖၣ်အံၤအပူၤဒီး သးစၢ်ပိၥ်မုၣ်(၁၄၅)ဂၤ,ပိၥ်ခွါ(၂၀၃)ဂၤ ပၥ်ဖှိၣ်ခဲလၢၥ်(၃၄၈)ဂၤ ဖျိထီၣ်ဝဲတၢ်မၤလိအံၤန့ၣ်လီၤ.
ဒ်န့ၣ်အသိးဒီးလၢတၢ်မၤလိအံၤအပူၤန့ၣ် ကညီသူၣ်ဘီၣ်သးစၢ်အမဲၥ်ညါ ကီၢ်သူလ့ၤတၢ်ပၢဟီၣ်ကဝီၤအပူၤ တလၢၤသူၣ်ဘီၣ်သးစၢ်, ပအိၣ်သူၣ်ဘီၣ်သးစၢ်ဒီးထံဆၢကီၢ်ဆၢဘၣ်ကီဘၣ်ခဲဒဲကဝီၤအပူၤသူၣ်ဘီၣ်သးစၢ်တကးဒံးဘၣ်သူၣ်ဘီၣ်သးစၢ်လၢအိၣ်တၢ်လီၢ် အဂၤသ့ၣ်တဖၣ်စ့ၢ်ကီးဟဲထီၣ်ဝဲတၢ်မၤလိအံၤအိၣ်ဝဲအဂ့ၢ်န့ၣ် (KYO)စံးဝဲန့ၣ်လီၤ.
တၢ်ကိၢ်ခါတၢ်မၤလိလၢ(၃)လါတၢ်ဆၢကတီၢ်အပူၤန့ၣ်...
လါယူၤ ၁ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ်(သုးက့ ၃)လၢၢ်ဒိၣ်ကီၢ်ဆၣ်အပူၤ ပယီၤသုးလၢအိၣ်ဆီလီၤသးဖဲန့ၣ် တဖၣ်ပညိၣ်ခးလီၤဝဲကျိဖးဒိၣ်ဆူသဝီပူၤအဃိ ဟံၣ်ဖိဃီဖိဒီဖိမိၢ်ဒီဖိပၢ်သံဝဲ(၃)ဂၤဒီးဖဲန့ၣ်အကျါပၣ်ဃုၥ်ဝဲဖိသၣ်(၁)ဂၤအဂ့ၢ်န့ၣ် (KPSN)ထုးထီၣ်ပၥ်ဖျါဝဲအသိးသ့ၣ်ညါဘၣ်န့ၣ်လီၤ.
ဖဲအပူၤကွံၥ်လါမ့ၤ ၃၀ သီအနံၤန့ၣ် ပယီၤသုးခီၣ်သုးရ့ၣ်(ခလရ-၂၆၄)သုးရ့ၣ်လၢအိၣ်ဆီလီၤသးဖဲပဲ ပ့စလိၣ် သဝီပူၤ သ့ၣ်တဖၣ်အံၤ ခးလီၤဝဲ(၁၅၅ မမ)ကျိဖးဒိၣ်တဖျၢၣ်ဆူဝ့ၢ်ဒီခိၣ်သဝီပူၤန့ၣ်လီၤ.
ခီဖျိလၢကျိဖးဒိၣ်အံၤအဃိ ဟံၣ်လီၤပှီၢ်ဟးဂီၤဝဲတဖျၢၣ်ဒီး ဟံၣ်တဖျၢၣ်အံၤအပူၤ ဖိသၣ်(၉)နံၣ်အံၤဃုၥ်ဒီးအမိၢ်(၄၅)နံၣ်, အပါ(၄၇)နံၣ် ၃ ဂၤအံၤ သံဝဲဒၣ်တဘျီဃီဖဲတၢ်ကဲထီၣ်သးအံၤန့ၣ်လီၤ.
တကးဒံးဘၣ်လၢန့ၣ်အမဲၥ်ခီဖျိလၢကျိဖးဒိၣ်အံၤအဃိ သးစၢ်ပိၥ်မုၣ်(၁၈)နံၣ်တဂၤစ့ၢ်ကီးဘၣ်ဒိဘၣ်ထံးဝဲအဂ့ၢ်န့ၣ် (KPSN)လံၥ်တၢ်ပၥ်ဖျါအပူၤစံးဝဲန့ၣ်လီၤ.
ဘၣ်ဃးတၢ်ဂ့ၢ်အံၤ လၢၢ်ဒိၣ်ကီၢ်ဆၣ် ပှၤကတိၤတၢ်ပၢ ပဒိၣ်စီၤဝါမုၢ် စံးဝဲလၢ“ပှၤလၢအဘၣ်ဒိတဂၤအံၤနါက့အကဲဝဲဒၣ် ပှၤဒီမါဝၤခံဂၤလၢအသံအံၤအဖိမုၣ်လီၤ.ကျိဖးဒိၣ်လီၤတဲၥ်အခါန့ၣ်ဘၣ်လၢအဝဲသ့ၣ်မၤဝဲပှၤသးပှၢ်လုၢ်လၢ်တၢ်ဘါမီၤ.ဒုၣ်ဒါခးလီၤကျိဖးဒိၣ်ဘျီဘၣ်ဝဲအဟံၣ်,မ့ဝံၤသံဃုၥ်ဒီးအမိအပါ,အပုၢ်(၃)ဂၤလၢၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ပယီၤသုးလၢအိၣ် ပ့စလိၣ် သ့ၣ်တဖၣ်အံၤ ညီနုၢ်န့ၣ်ခးလီၤဝဲကျိဖးဒိၣ်ဆူလီၢ်ကဝီၤကမျၢၢ်ဒူသဝီပူၤအိၣ်ဝဲတလီၢ်လီၢ်အဃိ...
ဟံၣ်ဖိဃီဖိဒီးတၢ်ပၢၢ်ဆၢဂီၢ်ကဲဘျုးဝဲကိးကပၤဒဲးလၢအမ့ၢ် ပှၤနီချံဖိ ဖါတံၢ်စီၤညၣ်လါ
...
လါမ့ၤ ၂၉ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ဘံလ့ကီၢ်ဆၣ် လ့က့ၣ်ဒီးတးပီသဝီ(၂)ဖျၢၣ်အံၤအပူၤပယီၤသုးမၢပှၤကမျၢၢ်ဟဲက့ၤအိၣ်လၢ သဝီပူၤဘၣ်ဆၣ် ပယီၤသုးအံၤဆဲးအိၣ်ဆီလီၤသးဒံးသဝီပူၤ,တၢ်ဒုးစ့ၢ်ကီးဆဲးကဲထီၣ်ဒံးအဃိ လီၢ်ကဝီၤကမျၢၢ်လၢအဃ့ၢ်ထီၣ် အါဒၣ်တက့ၢ် က့ၤဟံၣ်က့ၤဃီတဘူၣ်ဒံးဝဲဘၣ်အသိးကၠိစ့ၢ်ကီးတၢ်ကီတၢ်ခဲလၢတၢ်ကအိးထီၣ်ဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဖဲအပူၤကွံၥ်လါအ့ဖြ့ၣ်ထီၣ်သီသီအခါန့ၣ် ပယီၤသုးကလၢၤ(၂)ဖျၢၣ်လၢအိၣ်ဆီသးဖဲတးပီဒီးလ့က့ၣ်သဝီပူၤအံၤတဖၣ် ဟီၣ်ကဝီၤ(KNLA)သုးပၥ်ဖှိၣ် လဲၤကဝီၤခးဝဲဝံၤလီၢ်ခံ ခီဖျိပယီၤသုးကဘီယူၤဟဲခးလီၤတၢ်ကိးမုၢ်နံၤဒဲးအဃိ ဟံၣ်ဃီတၢ်သူၣ်ထီၣ် ဟးဂီၤဝဲဒၣ်အါမးတကးဒံးဘၣ် ကမျၢၢ်လၢအိၣ်ဘူးဖဲတၢ်ခိၣ်တၢ်ဃၢၤဖဲန့ၣ်အဂၤ(၂၀၀၀၀)ဃၣ်ဃၣ်ဘၣ်ဃ့ၢ်ထီၣ်ဝဲဒၣ်န့ၣ်လီၤ.
ဖဲန့ၣ်ဝံၤလီၢ်ခံလါအ့ဖြ့ၣ် ၁၂ သီအနံၤ (KNLA)သုးပၥ်ဖှိၣ်ထီၣ်မၤန့ၢ်ဝဲလ့က့ၣ်သုးကလၢၤဘၣ်ဆၣ် လၢကထီၣ်န့ၢ်က့ၤ သုးကလၢၤအံၤအဂီၢ် ပယီၤသုးကျိၤ(စစ်ကူ)ဟဲထီၣ်အါအါဂီၢ်ဂီၢ်အဃိ ဖဲတလါအံၤလါမ့ၤ ၁၂ သီအနံၤန့ၣ်ပယီၤသုးဟဲက့ၤထီၣ်မၤန့ၢ် ကဒါဝဲသုးကလၢၤအံၤန့ၣ်လီၤ.
ပယီၤသုးဟဲက့ၤထီၣ်မၤန့ၢ်က့ၤသုးကလၢၤဘၣ်ဆၣ် သုးကလၢၤလၢအအိၣ်တ့ၢ်ဝဲအံၤတၢ်ဒိးလီၤဃၥ်ဝဲဟီၣ်လၥ်မ့ၣ်ပိၢ်အဃိ တုၤလၢ ခဲအံၤအဝဲသ့ၣ်နုၥ်လီၤအိၣ်ဝဲလၢသဝီပူၤ,လၢပှၤကမျၢၢ်အဟံၣ်ပူၤဃီအဖၢမုၢ်ဒံးန့ၣ်လီၤ.
ဖဲလါမ့ၤထီၣ်အံၤပယီၤသုးအံၤမၢဝဲဒၣ်ပှၤကမျၢၢ်ဟဲက့ၤအိၣ်လၢသဝီပူၤဘၣ်ဆၣ် လၢသဝီပူၤခီဖျိပယီၤသုးသ့တဖၣ် ဆဲးအိၣ်ဒံး တကးဒံးဘၣ်အမဲၥ်ညါ လၢသဝီအခိၣ်အဃၢၤန့ၣ်တၢ်ပၢၢ်ဆၢသုးကရူၢ်ကဝီဃၥ်ဒံးဝဲပယီၤသုးအဃိ...
လါမ့ၤ ၂၉ သီ, ၂၀၂၆နံၣ်, ခ့ၣ်အဲးစံၣ်,
တၢ်ကအိးထီၣ်က့ၤဝဲကီၢ်ကၠီၣ်တဲၣ်-ကီၢ်ပယီၤကီၢ်ဆၢ,ရၤမတံမဲၢ်ဆီးဝ့ၢ်တၢ်ရ့လိၥ်မုၥ်လိၥ်တိၤနီၢ်ဂံၢ်(၂)ဒ်ညီနုၢ်အသိး,မဲၢ်ဆီးကၠီၣ်တဲၣ်ပှၤဘၣ်မူဘၣ်ဒါတဖၣ်အံၤအိၣ်ကတီၤပၥ်သးလၢပှဲၤလံအဃိတနံၤအံၤလါမ့ၤ(၂၉)သီအနံၤဂီၤခီအပူၤစးထီၣ်ပျၢ်လီၤဆိဝဲသိလ့ၣ်တနီၤလၢတၢ်ကမၤကွၢ်တၢ်အိၣ်သးအဂီၢ်အဂ့ၢ်,သ့ၣ်ညါဘၣ်န့ၣ်လီၤ.
တၢ်ကအိးထီၣ်ဝဲတိၤအံၤဒ်အပူၤကွံၥ်ညီနုၢ်အသိးအဂီၢ်,ကီၢ်ပယီၤတကပၤထုးထီၣ်ပၥ်ဖျါဝဲဒၣ်လံၥ်လဲၢ်တအိၣ်ဝဲနီတမံၤဘၣ်ဆၣ်,တနံၤအံၤဂီၤခီအပူၤကၠီၣ်တဲၣ်တကပၤပျၢ်လီၤဝဲသိလ့ၣ်(၂)ခိၣ်ဆူကလဲၤခီဃီၤလၢကီၢ်ပယီၤတကပၤအိၣ်ဝဲအဂ့ၢ်,ကၠီၣ်တဲၣ်ပှၤမၤတၢ်ကစီၣ်ဖိတဖၣ်ရၤလီၤဝဲဒၣ်တၢ်ဂီၤဒီးတၢ်ဂီၤမူတဖၣ်လၢစိၤရှၢၣ်မံးဒံးယၢၣ်အပူၤအိၣ်ဝဲဒၣ်န့ၣ်လီၤ.
ဒီးလၢကၠီၣ်တဲၣ်ပှၤမၤတၢ်ကစီၣ်ဖိတဖၣ်အတၢ်ရၤလီၤအပူၤန့ၣ်ကၠီၣ်တဲၣ်ခိၣ်နၢ်တဂၤစံးဝဲဒၣ်လၢ“တနံၤအံၤပကပၥ်ဖျါထီၣ်ဝဲတၢ်ကစီၣ်အမုၥ်န့ၣ်လီၤ.ပအိးထီၣ်ဝဲတိၤအံၤလံဘၣ်ဆၣ်တမ့ၢ်လၢလၢပှဲၤပှဲၤဒံးဘၣ်.လၢတၢ်မၤကွၢ်အဂီၢ်ပပျၢ်လီၤသိလ့ၣ်ဂီၤတဝီဟါတဝီန့ၣ်လီၤ.ပအိးထီၣ်လၢပှဲၤတန့ၢ်ဒံးဘၣ်န့ၣ်ခီဖျိလၢပခံခီခံကပၤတၢ်လိၣ်ဘၣ်အိၣ်ဒံးဝဲအဃိန့ၣ်လီၤ.ပအိးထီၣ်သီအခါဘၣ်သ့ၣ်သ့ၣ်တၢ်ဘၣ်ဘျီးဘၣ်ဒါဘၣ်ကအိၣ်ဘၣ်ဆၣ်လီၢ်ခံပကမၤကယီကယီတုၤအဘၣ်ဘျီးဘၣ်ဒါဒ်လၢညါအသိးန့ၣ်လီၤ”အဂ့ၢ်ကတိၤပၥ်ဖျါထီၣ်ဝဲဒၣ်န့ၣ်လီၤ.
လၢန့ၣ်မဲၥ်ညါ,တၢ်အိးထီၣ်ဝဲတိၤသီသီအပူၤတၢ်ပျၢ်လီၤဝဲသိလ့ၣ်သ့ၣ်တဖၣ်အံၤမ့ၢ်ကဟဲက့ၤစိၥ်ဝဲတၢ်မနုၤကန့ၢ်လဲၣ်အဂ့ၢ်န့ၣ်,ကအိၣ်ခိးကွၢ်ဘၣ်သကိးအဂ့ၢ်ကၠီၣ်တဲၣ်ပှၤဘၣ်မူဘၣ်ဒါတဂၤလီၢ်လီၢ်အံၤစံးစ့ၢ်ကီးဝဲဒၣ်န့ၣ်လီၤ.
တၢ်အိးထီၣ်က့ၤဝဲတၢ်ရ့လိၥ်မုၥ်လိၥ်တိၤနီၢ်ဂံၢ်(၂)အံၤ,ကၠီၣ်တဲၣ်တကပၤအသိလ့ၣ်ကလဲၤဃီၤဝဲဆူကီၢ်ပယီၤတကပၤအဂီၢ်တနံၤအံၤဖဲဂီၤခီအဆၢကတီၢ်လၢကီၢ်ပယီၤတကပၤအိးထီၣ်န့ၣ်ဝဲကျဲဘၣ်ဆၣ်,တၢ်ဒုးသ့ၣ်ညါဝဲကမျၢၢ်ထံဖိကီၢ်ဖိတဖၣ်တအိၣ်ဝဲဒံးဘၣ်အဂ့ၢ်,ရၤမတံဝ့ၢ်လီၢ်ကဝီၤကမျၢၢ်တဂၤစံးဝဲဒၣ်န့ၣ်လီၤ.
ဒီးကီၢ်ပယီၤတကပၤအတၢ်အိၣ်သးအဖီခိၣ်ရၤမတံလီၢ်ကဝီၤဖိတဂၤစံးဝဲဒၣ်လၢ“တဂီၤအံၤလၢကီၢ်ပယီၤတကပၤနါက့အိးထီၣ်ဝဲလီၤ.ဘၣ်ဆၣ်အိၣ်ထီၣ်ခူသူၣ်ဝဲဒၣ်လီၤ.ကၠီၣ်တဲၣ်တကပၤအသိလ့ၣ်ကဟဲ(၃)ခိၣ်လီၤ.ပနၢ်ဟူလၢကဟဲလီၤတီဝဲဘုခ့န့ၣ်လီၤ.မ့မ့ၢ်လၢကၠီၣ်တဲၣ်တၢ်ဖိတၢ်လံၤတဖၣ်တခီတၢ်ဟဲလီၤတီဝဲတအိၣ်ဒံးဘၣ်”အဂ့ၢ်စံးဝဲဒၣ်န့ၣ်လီၤ.
ရၤမတံ-မဲၢ်ဆီးတၢ်ရ့လိၥ်မုၥ်လိၥ်တိၤနီၢ်ဂံၢ်(၂)အံၤလၢတၢ်ကသမံသမိးက့ၤဝဲကီၢ်ဆၢဂ့ၢ်ဝီဒီးထၢတၢ်ခိတၢ်သွဲသနူလၢအသီအဂီၢ်အပူၤကွံၥ်(၂၀၂၅)နံၣ်လါအီးကူးအပူၤသုးကရူၢ်တကပၤပံးကွံၥ်ဝဲဒီးတၢ်ပံးကွံၥ်ဝဲကတီၢ်တၢ်ခးလိၥ်သးလၢပယီၤသုးကရူၢ်ဒီးကညီဒီကလုၥ်တၢ်ထူးဖျဲးသုးမုၢ်ဒိၣ်(KNLA)အဘၢၣ်စၢၤကဲထီၣ်တ့ၢ်ဝဲဒၣ်စ့ၢ်ကီးန့ၣ်လီၤ.
ဒီးတၢ်ပံးဃၥ်ဝဲဒၣ်အယံၥ်ဘူးထီၣ်လၢတနံၣ်ဃၣ်ဃၣ်အလီၢ်ခံ,လၢတၢ်ကအိးထီၣ်ဘၣ်က့ၤဝဲအဂီၢ်ပယီၤသုးကရူၢ်ဒီးကၠီၣ်တဲၣ်ပှၤဘၣ်မူဘၣ်ဒါသ့ၣ်တဖၣ်အံၤဂုၥ်ကျဲးစၢးထံၣ်လိၥ်ကတိၤတ့ၢ်ဝဲဒၣ်လၢအပူၤကွံၥ်လါအ့ဖြ့ၣ်ပူၤအခါလံၤလံၤအိၣ်ဝဲအဂ့ၢ်,တၢ်ကစီၣ်ဟူထီၣ်သါလီၤအိၣ်ဝဲဒၣ်န့ၣ်လီၤ.
ဒ်န့ၣ်အသိးရၤမတံ-မဲၢ်ဆီးတၢ်ရ့လိၥ်မုၥ်လိၥ်တိၤအံၤလၢကီၢ်ကၠီၣ်တဲၣ်ဒီးကီၢ်ပယီၤကီၢ်ဆၢတၢ်စိၥ်ဆှၢပနံၥ်တၢ်ကၤအဂီၢ်မ့ၢ်ဝဲကျဲတဘိလၢအရ့ဒိၣ်အသိးမ့ၢ်စ့ၢ်ကီးဝဲတၢ်လီၢ်လၢအလီၢ်ဘၣ်တတီၤအဂ့ၢ်,သ့ၣ်ညါဘၣ်န့ၣ်လီၤ.
လါမ့ၤ ၂၈ သီ, ၂၀၂၆ နံၣ်, ခ့ၣ်အဲးစံၣ်
ပယီၤသုးကျိၤလၢကလဲၤထီၣ်ဝဲဆူခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅)ဖၣ်ပူၣ်အံၤတဖၣ် ခီဖျိဘၣ်တၢ်ခိးခးအဝဲသ့ၣ် လၢဟီၣ်ကဝီၤ(KNLA)သုးပၥ်ဖှိၣ်ကရူၢ်အဃိ ဆဲးထီၣ်ဆူညါတန့ၢ်အိၣ်ကတးထီဝဲဖဲကဟံလူၢ်(မိုင် ၄၀)အခိၣ်အဃၢၤဒီး ဖဲမဟါအနံၤ တၢ်ဒုးကဲထီၣ်ဝဲဒီတနံၤကျၢၤအဂ့ၢ်န့ၣ် သ့ၣ်ညါဘၣ်လၢလီၢ်ကဝီၤပှၤဘၣ်မူဘၣ်ဒါအအိၣ်န့ၣ်လီၤ.
ဖဲမဟါလါမ့ၤ ၂၇ သီ ဂီၤခီတုၤဃီၤဝဲလၢဟါခီတစု လၢကဟံလူၢ်တၢ်လီၢ်တကပၤန့ၣ်တၢ်ဒုးကဲထီၣ်ဝဲလၢ(သုးက့ ၅)အပှၤဒီး ပယီၤသုးအဘၢၣ်စၢၤဒီတနံၤကျၢၤန့ၣ်လီၤ. လၢတၢ်ဒုးကဲထီၣ်ဘျီဝဲအံၤအပူၤန့ၣ် ပယီၤသုးတကပၤဘၣ်ဒိ(၉)ဂၤဒီး ဖဲန့ၣ်အကျါ ဘၣ်ဒိဘၣ်ထံးနးနးကျံၤကျံၤ(၇)ဂၤအဂ့ၢ်န့ၣ် (သုးက့ ၅)ပှၤကတိၤတၢ်ပၢ ပဒိၣ်စီၤရီဘ့ၤမူ စံးဝဲန့ၣ်လီၤ.
အဝဲစံးဝဲလၢ“ဖဲမဟါ ၂၇ သီန့ၣ်ပယီၤသုးကျိၤန့ၣ်အိၣ်ဒံးဖဲ(မိုင် ၄၀)န့ၣ်ဒံးလီၤ. ဖဲမဟါစးထီၣ်လၢဂီၤခီ ၉း၀၀ နၣ်ရံၣ် တုၤလၢ မုၢ်ဟါန့ၣ်တၢ်ဒုးကဲထီၣ်စဲးပြဲးဒီတနံၤကျၢၤလီၤ.လၢဒ်န့ၣ်အဖီခိၣ်အဃိပယီၤသုးန့ၣ်ပသ့ၣ်ညါလၢအဘၣ်ဒိ(၉)ဂၤမီၤ. လၢအဘၣ်ဒိ ဘၣ်ထံးတဖၣ်အံၤအကျါန့ၣ်ပသ့ၣ်ညါဘၣ်လၢအနးဒိၣ်အိၣ်ဒီးတၢ်ဘၣ်ယိၣ်န့ၣ်(၄)ဂၤမီၤနီၤ”အဂ့ၢ်န့ၣ်...
လါမ့ၤ ၂၇ သီ, ၂၀၂၆ နံၣ်, ခ့ၣ်အဲးစံၣ်
လၢတလၢၤကီၢ်စဲၣ် ဝီၢ်ရ့ၣ်ကီၢ်ဆၣ်(ရေးမြို့နယ်)အပူၤန့ၣ် ဖဲမနၤမုၢ်နၤခီဖးဖီမုၢ်အဆၢကတီၢ်န့ၣ် သုးမီၤစိရိၤကဘီယူၤ လဲၤတ့ၢ်လီၤ ဝဲမ့ၣ်ပိၢ်အါအါဂီၢ်ဂီၢ်လၢ(ရေးဘီလူး)တၢ်ပၢၢ်ဆၢသုးကရူၢ်အသုးကလၢၤတၢ်လီၢ်အဃိ (ရေးဘီလူး)အပှၤသံဝဲ ၆ ဂၤ, ဘၣ်ဒိဘၣ်ထံးဝဲ (၂၀)ဘျဲၣ်အဂ့ၢ်န့ၣ် ပှၤလၢဘူးဒီးတၢ်ပၢၢ်ဆၢကရူၢ်လၢအိၣ်ဖဲန့ၣ်တဖၣ်စံးဝဲန့ၣ်လီၤ.
ဖဲတနံၤအံၤလါမ့ၤ ၂၇ သီ ဖးဖီမုၢ်ကဘၣ်ဖဲ ၁း၀၀ နၣ်ရံၣ်ဘျဲၣ်အဆၢကတီၢ်န့ၣ် ကဘီယူၤဟဲတ့ၢ်လီၤဝဲမ့ၣ်ပိၢ်အဖျၢၣ်(၄၀)ဘျဲၣ် လၢ(ရေးဘီလူး)သုးကလၢၤတၢ်လီၢ်အဃိ တၢ်သံတၢ်ဘၣ်ဒိဘၣ်ထံးဘၣ်ဟဲကဲထီၣ်ဝဲအသးဒ်အံၤလီၤအဂ့ၢ်န့ၣ် (KNLA)ပှၤဘၣ်မူ ဘၣ်ဒါလၢအိၣ်ဘူး ဖဲန့ၣ်တဂၤ စံးဝဲန့ၣ်လီၤ.
အဝဲစံးဝဲလၢ“ဖဲမနၤ ၁း၁၀ မံးနံးအခါန့ၣ် ဟဲခးလီၤဝဲဒီးကဘီယူၤ. ခးလီၤဝဲကအိၣ်လၢအဖျၢၣ်(၄၀)ဘျဲၣ်ညါ. ဖဲန့ၣ်ပှၤသုးဖိသံ ၅ ဂၤ ၆ ဂၤညါ. မ့မ့ၢ်လၢအဘၣ်ဒိန့ၣ်အိၣ်အဂၤ(၂၀)ဘျဲၣ်”အဂ့ၣ်န့ၣ်...
လါမ့ၤ ၂၇ သီ, ၂၀၂၆ နံၣ်, ခ့ၣ်အဲးစံၣ်
(ကၠါဖၠၣ်)တၢ်ဖံးတၢ်မၤလီၢ်တၢ်သူၣ်ထီၣ်လၢအိၣ်ကီၢ်ကၠီၣ်တဲၣ်-ကီၢ်ပယီၤကီၢ်ဆၢ ခ့ၣ်အဲၣ်ယူၣ် ဒူပျၥ်ယၥ်ကီၢ်ရ့ၣ်(သုးက့ ၆) ရၤမတံကီၢ်ဆၣ် စွ့ၤကိၣ်ကိၤဟီၣ်ကဝီၤအပူၤအံၤ စးထီၣ်ဖဲလါမ့ၤ ၂၅ သီအနံၤန့ၣ် သုးမီၤစိရိၤစးထီၣ်မၤလီၤပှီၢ်မၤဟးဂီၤကဒီးဝဲ အဂ့ၢ်န့ၣ် သုးကရူၢ်အတၢ်ကစီၣ်သန့တဖၣ်ပၥ်ဖျါထီၣ်ဝဲန့ၣ်လီၤ.
တၢ်သူၣ်ထီၣ်အဖျၢၣ်(၃၀၀)ဘျဲၣ်လၢအတဖိးသဲစးလၢအိၣ်စွ့ၤကိၣ်ကိၤအံၤန့ၣ် ဖဲသုးမီၤစိရိၤအကရူၢ်နုၥ်လီၤသမံသမိး ဝဲအခါ ထံၣ်န့ၢ်ဝဲဒၣ်(ကၠါဖၠၣ်)တၢ်သူၣ်ထီၣ် ၇၇ ဖျၢၣ်လၢအမၤဝဲတၢ်တၤကျိၣ်တၤစ့,တၢ်လံၣ်အီၣ်လီအီၣ်တၢ်လၢအီၤလါပူၤ တၢ်ဖံးတၢ်မၤ အံၤသ့ၣ်တဖၣ်အဂ့ၢ်န့ၣ် စံးဝဲန့ၣ်လီၤ.
ဘၣ်ဆၣ်လၢတၢ်ပၥ်ဖျါအပူၤန့ၣ်ဘၣ်ဃး(ကၠါဖၠၣ်)တၢ်ဖံးတၢ်မၤအကစၢ်ဒီးပှၤမၤတၢ်ဖိစရီအံၤခီန့ၣ် ထံၣ်ဘၣ်လၢ တၢ်တပၥ်ဖျါထီၣ် ဃုၥ်ဝဲဘၣ်န့ၣ်လီၤ.
တၢ်သူၣ်ထီၣ်သ့ၣ်တဖၣ်အံၤတၢ်တိၥ်လီၤဃၥ်ဝဲလၢတၢ်ကမၤလီၤပှီၢ်မၤဟးဂီၤဝဲတနံၤ(၂)ဖျၢၣ်အဂ့ၢ်န့ၣ် ဂံၢ်ခီၣ်ထံးပှၤဟ့ၣ်တၢ်ကစီၣ် ဖိလၢအိၣ်စွ့ၤကိၣ်ကိၤအံၤတဂၤ စံးဝဲန့ၣ်လီၤ.
စွ့ၤကိၣ်ကိၤဟီၣ်ကဝီၤတၢ်လီၢ်လၢ(ကၠါဖၠၣ်)အိၣ်ဆီလီၤသးအံၤန့ၣ် အိၣ်ဝဲဒၣ်လၢသုးခိးကီၢ်ဆၢ(BGF)ဒီးကညီဒီကလုၥ်သုးမုၢ်ဒိၣ် (KNA) အတၢ်ပၢဟီၣ်ကဝီၤအပူၤန့ၣ်လီၤ. ဒ်န့ၣ်အသိးဘၣ်ဃးတၢ်မၤလီၤပှီၢ်ကွံၥ်(ကၠါဖၠၣ်)တၢ်သူၣ်ထီၣ်တၢ်ဂ့ၢ်အံၤ စ့ၢ်ကီးဘၣ် တၢ်ပၥ်ဖှိၣ် မၤသကိးတၢ်ဒီး(BGF/KNA)တဖၣ်လီၤအဂ့ၢ်န့ၣ် ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဂၤဃီဝဲန့ၣ်စံးဝဲန့ၣ်လီၤ.
တကးဒံးဘၣ်တၢ်မ့မၤဟးဂီၤဝဲ(ကၠါဖၠၣ်)တၢ်သူၣ်ထီၣ်သ့ၣ်တဖၣ်အံၤအိၣ်ဘၣ်ဆၣ်ခီဖျိ(ကၠါဖၠၣ်)တၢ်မၤကစၢ်ဒီးပှၤမၤတၢ်ဖိစရီအံၤ...
လါမ့ၤ ၂၇သီ, ၂၀၂၆နံၣ်, ခ့ၣ်အဲးစံၣ်,
ကီၢ်ကၠီၣ်တဲၣ်-ကီၢ်ပယီၤကီၢ်ဆၢ,တးကီၢ်ရ့ၣ်ထၣ်ဆီၣ်ယါကီၢ်ဆၣ်မဲၢ်လးကညီဘၣ်ကီဘၣ်ခဲဒဲကဝီၤအပူၤတၢ်ကဘှီထီၣ်က့ၤဝဲ ဒဲကဝီၤကမျၢၢ်တၢ်ဆါဟံၣ်အခိၣ်ဒုးအဂီၢ်လိၣ်ဘၣ်ဝဲကျိၣ်စ့တၢ်ဆီၣ်ထွဲမၤစၢၤအဂ့ၢ်,ဒဲကဝီၤဆူၣ်ချ့ပှၤဘၣ်မူဘၣ်ဒါတဖၣ်ပၥ်ဖျါထီၣ်ဝဲဒၣ်လၢတၢ်ဆါဟံၣ်အစိၤရှၢၣ်မံးဒံးယၢၣ်အပူၤန့ၣ်လီၤ.
မဲၢ်လးကညီဘၣ်ကီဘၣ်ခဲဒဲကဝီၤအတၢ်ဆါဟံၣ်အံၤတကီၢ်ခါခဲအံၤခီဖျိအခိၣ်ဒုးဖျိဟးဂီၤဝဲဒီးတၢ်စူၤလီၤစီၤဝဲဒၣ်အဃိတၢ်လီၤဘၣ်ယိၣ်ဘၣ်ဘှီအိၣ်ဝဲလၢကမျၢၢ်ပှၤဆူးပှၤဆါတဖၣ်အဂီၢ်ဒီး,(Electric Shock)သ့ဝဲဒၣ်စ့ၢ်ကီးအဃိ,တၢ်ကဘၣ်ဘှီဂ့ၤထီၣ်က့ၤဝဲဒၣ်အဂ့ၢ်,ဒဲကဝီၤဆူၣ်ချ့ပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.
လၢတၢ်န့ၣ်အဃိ,လၢတၢ်ကဘှီထီၣ်က့ၤဝဲအဂီၢ်တနံၣ်အံၤတချူးလါယူၤလၢၥ်အပူၤလိၣ်ဘၣ်ဝဲကျိၣ်စ့တၢ်ဆီၣ်ထွဲမၤစၢၤ(၂၀၀၀၀၀)ဘျဲၣ်အဂ့ၢ်,မဲၢ်လးကညီဘၣ်ကီဘၣ်ခဲဒဲကဝီၤတၢ်ဆါဟံၣ်မူဒါခိၣ်(၂)စီၤန့ၢ်တၢ်ဂ့ၤစံးဝဲဒ်အံၤန့ၣ်လီၤ.
“လါယူၤအပူၤဒုတၢ်ကစူၤဒိၣ်ထီၣ်လီၤ.အဃိပကဘၣ်အိၣ်ကတီၤပၥ်ပသး,မ့တမ့ၢ်ဘၣ်ခီမူခိၣ်စူၤမ့အါတၢ်လီၤစီၤန့ၣ်ရှီးသးတဘျီဃီန့ၣ်လီၤ.ပယၥ်လီၤပၥ်စ့ခီ(၂၅၀၀၀၀)ဘးန့ၣ်လီၤ.ခဲအံၤလၢပှၤနီၢ်တဂၤဒီးဒဲကဝီၤကညီပိၥ်မုၣ်ကရၢအအိၣ်န့ၣ်ပဒိးန့ၢ်ဘၣ်ဒံးထဲ(၂၀၀၀၀)ဘျဲၣ်န့ၣ်လီၤ.”အဂ့ၢ်စံးဝဲဒၣ်န့ၣ်လီၤ.
မဲၢ်လးကညီဘၣ်ကီဘၣ်ခဲဒဲကဝီၤအတၢ်ဆါဟံၣ်အံၤအပူၤကွံၥ်နံၣ်တဖၣ်အပူၤဒိးန့ၢ်ဘၣ်ဝဲတၢ်ဆီၣ်ထွဲမၤစၢၤလၢ(International Rescue Committee) (IRC)ကရူၢ်ကရၢတဖၣ်အိၣ်ဝဲဘၣ်ဆၣ်,စးထီၣ်ဖဲ(၂၀၂၅)နံၣ်လါယနူၤအါရံၤအပူၤတၢ်ဆီၣ်ထွဲမၤစၢၤလီၤစှၤကွံၥ်ဝဲဒၣ်အသိး,ဖဲ(၂၀၂၆)နံၣ်နုၥ်လီၤအလီၢ်ခံဘၣ်ဒိးသန့ၤထီၣ်က့ၤဝဲဒၣ်အသးလၢ(IRC)ဒီးကၠီၣ်တဲၣ်မဲၢ်တီၢ်တၢ်ဆါဟံၣ်ခံခီခံကပၤအအိၣ်အဂ့ၢ်,ဒဲကဝီၤပှၤဘၣ်မူဘၣ်ဒါတဖၣ်စံးဝဲန့ၣ်လီၤ.
ဒီးကရူၢ်ကရၢ(၂)ဖုအံၤခီဖျိဆီၣ်ထွဲမၤစၢၤဝဲန့ၢ်ဒၣ်ထဲကသံၣ်ပှၤမၤတၢ်ဖိအဘူးအလဲတဆံးတက့ၢ်အဃိလၢဒဲကဝီၤတၢ်ဆါဟံၣ်ကသံၣ်ကသီတၢ်လိၣ်ဘၣ်ဒီးတၢ်ဆါဟံၣ်ကလဲၤတရံးသးအဂီၢ်,ဘၣ်ဆၢထၢၣ်ဝဲဒၣ်လၢတၢ်ဘူၣ်တၢ်ဘါကရူၢ်ကရၢဒီးနီၢ်တဂၤပှၤမၤစၢၤတၢ်ဖိတဖၣ်အတၢ်နုၥ်လီၤမၤစၢၤဆီၣ်ထွဲတဆံးတက့ၢ်အဖီခိၣ်အဂ့ၢ်,သ့ၣ်ညါဘၣ်န့ၣ်လီၤ.
မဲၢ်လးကညီဘၣ်ကီဘၣ်ခဲဒဲကဝီၤတၢ်ဆါဟံၣ်အံၤ,ဒဲကဝီၤပူၤကမျၢၢ်သ့ၣ်အမဲၥ်ညါကမျၢၢ်လၢအိၣ်ဆိးဖဲသူမွဲထံကျိကၢၢ်နံၤခံခီယၢ်ပၤတဖၣ်ပၥ်ဂံၢ်ပၥ်ဘါလဲၤကူစါယါဘျါဝဲဒၣ်အသးအိၣ်ဝဲစ့ၢ်ကီးအဂ့ၢ်,သ့ၣ်ညါဘၣ်န့ၣ်လီၤ.
တကီၢ်ခါခဲအံၤလၢတၢ်ဆါဟံၣ်တၢ်ခိၣ်ဒုးတၢ်လိၣ်ဘၣ်ကဘၣ်ဂ့ၢ်ဘၣ်ဝီဝဲအဂီၢ်,ဒဲကဝီၤခိၣ်နၢ်တဖၣ်ကွဲမုၥ်ဝဲပှၤကဒဲကဝီၤဖိတဖၣ်လၢကပၥ်ဖှိၣ်မၤသကိးတၢ်လၢနီၢ်တဂၤစုတၢ်ဟ့ၣ်စ့ယိၤ(၁)ဘးအိၣ်ဝဲအသိး,ကွဲမုၥ်စ့ကိးဝဲထံဆၢကီၢ်ဆၢတၢ်ကရၢကရိကရူၢ်ကရၢ,တၢ်ဘူၣ်တၢ်ဘါတၢ်ကရၢကရိဒီးနီၢ်တဂၤပှၤသးအိၣ်မၤစၢၤဖိတဖၣ်စ့ၢ်ကီးအဂ့ၢ်,ပၥ်ဖျါဝဲဒၣ်လၢစိၤရှၢၣ် မံးဒံးယၢၣ်အပူၤန့ၣ်လီၤ.
ဒ်န့ၣ်အသိး,လၢတၢ်သးအိၣ်ဆီၣ်ထွဲအတၢ်မၤစၢၤဒဲကဝီၤတၢ်ဆါဟံၣ်အခိၣ်ဒုးအဂီၢ်တၢ်ဆဲးကျိးဝဲဒၣ်လိၤလိၤသ့ဝဲလၢကညီဘၣ်ကီဘၣ်ခဲကမံးတံၥ်(KRC)မ့တမ့ၢ်ဒဲကဝီၤပှၤဘၣ်မူဘၣ်ဒါဒီးတၢ်ဆါဟံၣ်ခိၣ်နၢ်ပှၤဘၣ်မူဘၣ်ဒါတဖၣ်သ့ဝဲအဂ့ၢ်,ဒဲကဝီၤဆူၣ်ချ့ပှၤဘၣ်မူဘၣ်ဒါတဖၣ်ပၥ်ဖျါဝဲဒၣ်န့ၣ်လီၤ.